Panliket ed si Jehova Anggaman ed Subsubok

UNONG ED SALAYSAY NEN GEORGE SCIPIO

Nen Disyembre 1945 et akarukol ak ed ward na ospital, a nagnap a paralisado nilikud ed saray limak tan salik. Abaloan kon temporaryo labat so kipapasen ko, balet panduaruwaan na arum no makaakar ak ni. Agaylan subok parad sakey a makitkitsing a 17 años! Agko naawat ya ontan so pagmaliwan ko. Dakerakel so planok, laktip lay pambiahe mi nen amok diad Inglatera ed ontumbok a taon.

BIKTIMA ak na inkamayat na poliomyelitis a sinmaknap ed intiron isla a kawalaan mi diad St. Helena. Tinigway na satan so 11 a totoo tan dakerakel so alupoy. Legan kon akarukol, dakel so panaon kon manmolimoli nipaakar ed antikey a bilay ko tan ed arapen ko. Legan kon manmomolimoli, amoriak ya anggaman ed sakit ko et walay rason kon manliket.

Melag a Gapoan

Nen 1933 sanen limay taon ko ni, say tatay kon si Tom, sakey a polis tan diakono ed Baptist Church, so angalay pigaran masekder-apis a libro ed duaran Tastasi nen Jehova. Sikara et sigpot-panaon ya ebanghelisador, odino payunir, a binmisita ed isla diad loob na antikey a panaon.

Sakey ed saray libro so atituloay The Harp of God. Inusar itan nen amak ed pangiyaaral toy Biblia ed pamilya mi a kaibay pigaran interesadon indibidual. Say materyal et mairap a randanen, tan dagdaiset so atalosan ko. Balet nanonotan ko ni a ginulisan ko’d Bibliak so kada tekston siningbat mi. Ag-abayag et amoria nen amak a katuaan so aaralen mi tan dumaruma itan ed ikakalar to’d loob na Baptist Church. Impulong to itan ed arum tan inkalar to’d pulpito ya anggapo so Trinidad, mangapuy-apoy ya impierno, tan ag-ompatey a kamarerwa. Sengegan itan na pirmin inalinsuagan ed loob na kapilya.

Saginonor, diad panosolbar ed problema, intawag so miting ed kapilya. Nitepet so tepet a, “Siopa so ondapag ed saray Baptist?” Dinmapag so karaklan. Say tinmumbok a tepet et, “Siopa so ondapag ed si Jehova?” Dinmapag so ngalngali 10 odino 12, tan sikaray pinaekal ed kapilya.

Saya so melag a gapoan na balon relihyon ed St. Helena. Akitalosan si amak diad hedkuarter na Watch Tower Society ed Estados Unidos tan kinmerew na transcription machine pian niparengel ed totoo so nirekord iran paliwawa ed Biblia. Nibaga ed sikato a balbaleg so makina no ipawit ed St. Helena. Sakey a memelag a ponograpo so nipawit, tan diad saginonor et kinmerew so agagi na duara ni. Nanakar ira tan nanlugan ira’d asno a linmiber ed isla, a taroktarok so mensahe ed totoo.

Diad ilalaknab na mensahe, ompapalalo met so isusumpa. Diad paneeskuelaan ko et oniay ikankansion na ugugaw: “Denglen yo, denglen yo so banda na ponograpo nen Tommy Scipio!” Pirmin subok iya’d siak bilang eskuelan mankaliktay abobon na saray kaeskuelaan to. Antoy akatulong ed siak a mansungdo?

Say baleg a pamilya mi​—a walay anemiran ananak​—so walaay regular a panagaral na pamilya ed Biblia. Saniiba kami met a manbabasay Biblia kada kabuasan sakbay na almusal. Maseguron akatulong iya ed pamilya mi pian makapantultuloy a manmatoor ed katuaan diad loob na saray taon. Personal kon abayuboan so aro ed Biblia diad malangwer ya edad, tan diad inlabas na saray taon et amantinik so ugalin regular a panagbasa na Biblia. (Salmo 1:1-3) Sanen tinmunda ak lan manaral ed edad a 14, niletneg ak lan malet ed katuaan, tan nipapusok so takot ed si Jehova. Saya so amasarag ed siak pian manliket ed si Jehova anggaman ed saraman a subok.

Kaaruman Niran Subok tan Gayaga

Legan kon akarukol ed ospital a mannononot ed saramay akadkaunan taon tan ed arapen iran iilaloan ko, amtak ya unong ed impanaral koy Biblia a sayan sakit et aliwan subok odino dusan manlalapud Dios. (Santiago 1:12, 13) Anggaman kuan, say polio so makapaermen a subok, tan saray epekto to so mansiansia ed siak kaleganay bilay ko.

Diad iyaabig ko, kaukolan kon aralen lamet so manakar. Agko met la tanton nipuersa iray taklay ko. Diad agew-agew et maminpigapiga ak a natumba. Ingen, lapud masimoon a pikakasi tan ed agmanundan pansasagpot, kasabi 1947 et akaakar ak diad tulong na baston.

Kaleganan na satan, inmibeg ak ed sakey a marikit, si Doris, a kaparak met ed relihyoso iran papanisiaan ko. Ugaw kami nin tuloy a manasawa, balet adagdag ak a lalon paaligwasen so panag-akar ko. Inmekal ak met la’d trabahok lapud aliwan magenap so sueldo sano wala lay asawak, kanian angipaalagey ak na dilin dental a laboratoryok, a kinmurang ed loob na tinmumbok a duaran taon. Nankasal kami nen 1950. Diad saman et akatipon ak lay magenap a kuarta kanian akasaliw ak na melag a luluganan. Diad ontan nayarian ko lan ilugan iray agagin miaral tan manpulong.

Saray Teokratikon Iyaaligwas ed Isla

Nen 1951 et imbaki na Sosyedad ed sikami so pilimeron manangilaman da. Sikato et si Jacobus van Staden, balolakin nanlapud Abalaten ya Aprika. Kaali-alis mi ni’d sakey a maawang ya abung, kanian sikatoy pinanpundo mi ed loob na intiron sakey taon. Lapud kien koy anapan ko, dakel a panaon so inusar mi ed panagpulong, tan akaawat ak na makanakanan panangipasal manlapud sikato.

Si Jacobus, odino Koos so tawag mi, so angiyorganisa na regular iran miting ed kongregasyon, a malikeliket min amin ya inatendian. Problema mi so panluganan lapud duadduara so luganan na saray interesado. Say dalan et matibagkol tan nipugaro, tan pigpigara so marakep a dalan ed saman a panaon. Kanian, masagpot a maong so pangabet ta pian makapiaral so amin. Palbangon labat ni et manaakar lay arum. Ilugan ko so talora ed melag a kotsik tan iyepas ko ra ed medyo arawdawi la. Onepas ira tan ituloy day manakar. Ompawil ak, ilugan ko lamet so talora ed medyo arawdawi, iyepas ira insan ompawil ak lamet. Diad kaunoran, amin so makapiaaral ed ontan a paraan. Kayari na aral, ontan lamet so gawaen mi pian makasempet so amin.

Imbangat kami met nen Koos no panon so epektibon pangiter na saray presentasyon ed saray puerta. Dakel so eksperiensia min marakep tan walara met so agmarakep. Balet ta pinalumbasan na gayaga mi ed lawak na ministeryo so amin a panusubok na saray sumusumpa ed panagpulong mi. Sakey a kabuasan et manpupulong kami nen Koos. Nen ontoktok kami la, walay nadngel min bosis ed dalem na abung. Sakey a lakin manbabasan maksil ed Biblia to. Sankarengel mi iray kabkabisadon balikas manlapud Isaias kapitulo 2. Sanen akasabi la’d bersikulo 4, tinmoktok kami. Pinaloob kami na makaaron masiken, tan inusar mi so Isaias 2:4 pian ipaliwawa ed sikato so maong a balita na Panarian na Dios. Nigapo so panangiyaral na Biblia ed sikato anggaman sikatoy manaayam ed nisulsulinek a lugar. Kaukolan mi so onlasor ed pukdol, ombaliw ed kulos diad itonton ed saray bato, ontatdang ed sananey a pukdol, insan onlasor a mamaarap ed abung to. Balet maabig so nansumpalan na satan. Inawat na sayan mauyamon masiken so katuaan tan abautismoan. Ta pian makapiaral, manakar a duaray baston to anggad lugar a pangabetan ko’d sikato ta pian nilugan ko. Diad saginonor et sikato so inatey a matoor a Tasi.

Sumpa so commissioner na polisya ed kimey mi tan aminpigan amagyaw a pataynanen toy Koos. Maminsan ed kada bulan et patatawag toy Koos pian imbestigaan to. Say lalon sasanokan to et say lawas direktan iyeebat ed sikato nen Koos manlapud Biblia. Diad kada pankanawnawan pasakbayan toy Koos a nepeg to lan itunda so manpulong, sikato met so napupulongan. Intultuloy ton sinumpa so kimey anggano tinmaynan lay Koos ed St. Helena. Insan say commissioner, sakey a baleg tan mabiskeg a laki so biglan nansakit tan inmeya-eyas. Agnaromog na saray doktor no anto so deperensia to. Bilang resulta, sikatoy tinmaynan ed isla.

Bautismo tan Tuloytuloy ya Imbulaslas

Diad imbayag la nen Koos ed isla ed loob na taloran bulan, naisip ton matukoy lay kagawa na bautismo. Balet say problema et anggapoy naromog a marakep a panagpalgepan. Denisidi mi so mankotkot na abot, sementoen itan, tan asolay danum. Diad samay labi sakbay na bautismo et inmuran, kanian kaimbuasan to et malikeliket kami ta apanopanoy pangipalgepan.

Diad saman a kabuasan na Simba et nampaliwawa si Koos nipaakar ed bautismo. Sanen kinerew ton onalagey iray kandidato ed bautismo, 26 ed sikami so inmalagey pian onebat ed kaslakan lan itetepet ed bautismo. Pribilihyo mi so pagmaliw a sankaunaan a Tastasin abautismoan ed isla. Sankaliketan iman ya agew na bilay ko lapud lawas kon panaaburidoan nensaman ya ompan onsabi lay Armagedon et agak ni abautismoan.

Aporma ed saginonor so duaran kongregasyon, sakey ed Levelwood tan sakey ed Jamestown. Kada simba et manbiahe so talora odino apatira ed sikami na 13 kilometro a paonla’d sakey a kongregasyon pian mangikonduktay Eskuelaan Parad Teokratikon Panagministro tan Service Meeting no labi Sabado. Kayari na panpulong ed Simbay kabuasan, ompawil kami tan nawalaan lamet na mipara iran miting, ontan met ed say Panagaral ed Say Panag-Bantayan, diad dilin kongregasyon mi ed ngarem tan labi. Kanian saray sampot simba mi so napnapnoy magayagan teokratikon aktibidades. Pirawat koy manpulong a sigpot-panaon, balet kaukolan kon legpeten so pamilyak. Kanian nen 1952, pinmawil ak ed serbisyo ed gobierno bilang resident dentist.

Nen 1955 bibisitaen na saray managbiahen manangilaman na Sosyedad, saray manangasikaso na sirkito, so isla kada taon, tan ontuloy ira ed ayaman ko bilang kabiangay imbisita ra. Positibo iran impluensia ed pamilya mi. Diad saman met a panaon, apribilihyoan ak met a mibiang ed pangipanengneng ed taloran pelikula na Sosyedad ed intiron isla.

Say Makapalikliket a Madibinon Linawa ya Asamblea

Nen 1958, ta pian makaatendi ak ed Madibinon Linawa ya Internasyonal ya Asamblea diad New York, inmekal ak lamet ed serbisyo ed gobierno. Importanti itan ya asamblea ed bilay ko​—sakey a pankanawnawan angiter ed siak na dakel a rason pian manliket ed si Jehova. Lapud kakulangay regular a panluganan ya onarap ed isla, andi kami’d man ed loob na limara tan kapalduay bulan. Nambayag so asamblea ed waloy agew, tan nagagawa iray sesyon manlapud alas nuebe na kabuasan anggad alas nuebe na labi. Balet agak balot naksawan, tan pitalaran koy kada agew ya onsabi. Apribilihyoan ak a mangirepresenta ed St. Helena diad loob na duaran minuto ed programa. Say pansalita ed arap na baleg iran ulop diad Yankee Stadium tan Polo Grounds so makapanerbiyos ya eksperiensia.

Sayan asamblea so amabiskeg ed determinasyon kon manpayunir. Say paliwawa ed publiko a, “Manuuley lay Panarian na Dios​—Asingger Ta lay Anggaan na Mundo?,” so nagkalautlan makapaseseg. Kayari na asamblea, binmisita kami ed hedkuarter na Sosyedad diad Brooklyn tan pinasyar mi so paktorya. Akatongtong koy Brother Knorr, a presidenti ed saman na Watch Tower Society, nipaakar ed aligwas na kimey diad St. Helena. Inkuanto a pilalek toy pakabisita ed isla. Angisempet kami na saray tape recording na amin a paliwawa ontan met ed dakerakel a pelikula ed asamblea pian nainabang ed kapamilyaan tan kakaaro mi.

Impakadampot ed Kalat a Sigpot-Panaon a Serbisyo

Diad impawil ko et niyopresi lamet ed siak so datin trabahok, lapud ta anggapoy dentista ed isla. Balet, impaliwawak a ginetmak lay onloob ed sigpot-panaon a ministeryo. Kayari na andukey ya impantongtong et naabuloyan ak a mantrabahoy taloy agew ed sakey simba, balet atatagey so sueldo nen say impantrabahok na anem agew ed sakey simba. Tua iray salita nen Jesus: “Anapen yo nin unona so panarian, tan say inkatunong to; et amin iraya a bengatla niarum ira ed sikayo.” (Mateo 6:33) Nairapan ak a manbiahe ed nipugpugaron dalan na isla lapud maletey iran siklak. Anggaman ontan, nampayunir ak ed loob na 14 taon tan atulongan koy dakel a kaparan taga-isla a makaaral na katuaan​—a seguradon sengegay baleg a liket.

Nen 1961 ibabaki ak na gobierno ed Fiji Islands parad libren duay taon a kurso na panagpasal ta pian magmaliw ak a nagnap a kualipikadon dentista. Inyopresi da ni ingen ed siak ya awiten koy pamilyak. Makapasagyat iyan opresi, balet kayari na maalwar ya impangonsidera et agko itan inawat. Agko labay a taynan so agagi ed ontan kabayag tan italirak so pribilihyok a panlingkoran ira. Adismayan tuloy so manunaan ya opisyal a mediko ya angorganisa ed pambiahe. Inkuanto: “No nononoten mon asingger lay anggaan, nausar mo ni so kuartan natipon mo kaleganan to.” Balet tinmalindeg ak a malet.

Diad tinmumbok a taon et naimbitaan ak ed Abalaten ya Aprika pian onatendi ed Kingdom Ministry School, sakey bulan a kurso a panagpasal parad saray manangasikaso ed kongregasyon. Naikdan kami na mablin instruksion ya akatulong ed sikami pian mas epektibon naasikaso iray asainmin mi ed kongregasyon. Kayari na impanaral, akaawat ak na kaaruman a panangipasal diad impikimey ed sakey a managbiahen manangasikaso. Nanserbi ak ed saman ed duaran kongregasyon ed St. Helena ed masulok a samploran taon bilang onsasandin manangasikaso na sirkito. Asabi panaon, niwalay arum a kualipikadon agagin lalaki, tan niyuksoy so pansusublayan.

Kaleganan to, kaukolan mi so onalis manlapud Jamestown pian onla’d Levelwood, a walay babaleg a pankaukolan, tan nansiansia kami diman ed loob na samploran taon. Legan na satan a panaon et pinaspasyak so nankimey ya andiay magenap a painawa​—manpayunir, mantrabahoy taloy agew parad gobierno, tan mangipakurang na melag a groseri. Niarum ni, aasikasoen koray pamaakaran ed kongregasyon, tan aasikasoen min sanasawa so pamilya min walaay apatiran ombabaleg ya ilalak. Pian makatalona, inmekal ak ed taloy agew a trabahok, inlakok so puesto, tan inawit koy intiron pamilyak diad Cape Town, Abalaten ya Aprika, parad taloy bulan a bakasyon. Insan inmalis kami’d Ascension Island tan nansiansia kami diman ed loob na sakey taon. Kaleganan na satan, atulongan mi so dakel a makagamor na suston pikakabat ed katuaan na Biblia.

Diad insempet mi’d St. Helena, pinmawil kami’d Jamestown. Inapiger mi so abung a kasuldongay Kingdom Hall. Pian walay napambilay, pinagmaliw mi nen ana’kon John so trak a Ford ya ice cream van, tan nanlako kami na sorbetes ed onsaginonor a limay taon. Kagapogapo ni labat na negosyo et naaksidenti ak ed van. Apigar itan tan apitpit iray siklak. Bilang resulta, agmakalikna iray bikking ko, tan asabi toy taloy bulan pian manpaabig.

Mayaman Iran Bendision ed Apalabas tan ed Arapen

Diad inlabas na saray taon, dakerakel iray bendision mi​—a kaaruman niran rason pian manliket. Sakey ed saraya et say impanbiahe mi ed Abalaten ya Aprika pian onatendi ed sakey a nasyonal a kombension nen 1985 tan say imbisita mi ed balon Bethel home, ya ipapaalagey ed saman. Say sananey et say melag ya impibiang mi nen ana’kon John ed impangipaalagey ed marakdakep ya Assembly Hall ya asingger ed Jamestown. Malikeliket kami met ta talora ed saray anak min lalaki so manlilingkor la natan bilang mamatatken, tan say sakey ya apo mi so manseserbi ed South Africa Bethel. Tan talagan inani mi so baleg a gayaga tan inkapnek lapud impakatulong ed dakel a makagamor na suston pikakabat ed Biblia.

Limitado so lawak a panpupulongan mi, a walaan lambengat na ngalngali 5,000 a totoo. Anggaman kuan, say pakatatayek mi ed teritorya so amawalay maabig iran resulta. Pigpigaray totoon agmangisengansengan ed sikami. Kabkabat so St. Helena lapud inkamakaaro to, tan nibano ka ed inerman a laen mo​—manaakar ka man ed karsada odino manmamanehoy luganan mo. Say naeksperiensiak et no kabat mon maong so totoo, mainomay iran pulongan. Walaan kami la natan na 150 a manangipalapag, anggano dakel lay inmalis ed biek-taew.

Lapud angkakabaleg lay amin ya ananak mi tan anggapo la ra’d pudir mi, siksikami lamet nen akulaw ko, kayari na 47 taon na panamaley. Say matoor ya aro tan suporta to ed loob na saray taon so akatulong ed siak pian mantultuloy a manserbi ed si Jehova a magaygayaga anggaman ed subsubok. Onkekespay lay pisikal a biskeg mi, balet ta kada agew a napapasimbalo so espiritual a biskeg mi. (2 Corinto 4:16) Siak, kaibay pamilyak tan kakaarok, so maniilalo ed makapakelaw ya arapen sano ombunigas ak lamet a magmaong ni sanen siak so 17 anõs. Say kalkaliktan ko et say panggayaga ed inkayadyari ed amin a bengatla tan, say sankaimportantian et say magnayon a panlingkor ed maaro tan mataliman Dios tayo, si Jehova, tan say manuuley lan Ari to, si Jesu-Kristo.​—Nehemias 8:10.

[Litrato ed pahina 26]

Si George Scipio tan say taloran anak to, so manlilingkor la natan bilang mamatatken

[Litrato ed pahina 29]

Si George Scipio tan say akulaw to, si Doris