Tepet na Saray Manbabasa . . .

Nepeg Kasin Bautismoan Iray Kapangiyanak ya Ugugaw?

▪ “Naaaburido ak ompan walad Limbo si ading kon John,” so inkuan nen Victoria. Akin et ontan lay panaaburido to? Inkuan to: “Agni abinyagan si John nen inatey, tan imbaga na Katolikon pari ya diad Limbo so laen to tan diman la ya andi-angga.” Talagan makapataktakot itan ya isipen, balet kasin ontan so ibabangat na Biblia? Kasin ibabangat na Biblia ya onlad purgatoryo iramay ugugaw ya inatey ya ag-abautismoan?

Ibabangat na Biblia a kaukolan ya nabautismoan iray Kristiano. Ingganggan nen Jesus iray papatumbok to: “Ibangat yo iray totoo ed amin a nasyones pian magmaliw iran disipulok, a bautismoan yo ra ed ngaran na Ama tan ed ngaran na Anak tan ed ngaran na masanton espiritu, ya ibangat yo ran mangunor ed amin a bengatlan ingganggan ko ed sikayo.” (Mateo 28:19, 20) Imanoen ya saramay abautismoan et nepeg ya magmaliw a disipulo nen Jesus. Sirin, sikaray akaaral nipaakar ed si Jesus tan sikatoy pinili dan tumboken​—desisyon ya agnagawaan na kapangiyanak ya ugaw.

Anggaman ontan, ipipilit na dakel ya onaaplika so ganggan nen Jesus ed saray angkekelag nin anak. “Amin et nepeg a nabautismoan, kaiba la ray kapangiyanak ya ugugaw,” so inkuan na Lutheran pastor a si Richard P. Bucher. Inyarum to ni: “No ag-ira bautismoan, ag-ira naperdona tan onla rad purgatoryo.” Balet, diad tua, saratan ya sisisiaen et kontra ed imbangat nen Jesus, diad taloran paraan.

Unona, ag-imbangat nen Jesus a nepeg ya bautismoan iray kapangiyanak ya ugugaw. Akin et importante iyan katuaan? Konsideraen: Imbangat nen Jesus ed saray disipulo to so nipaakar ed kakaukolanen na Dios. No maminsan, uuliten ton ibaga iray manunan bangat. Akin? Pian seguroen no atalosan na saray disipulo to so labay ton ibaga. (Mateo 24:42; 25:13; Marcos 9:34-37; 10:35-45) Balet, anggan aminsan et agto imbangat ya nepeg a bautismoan iray kapangiyanak ya ugugaw. Kasin alingwanan ton binitla itan ya kakaukolanen? Imposible! Ta no talagan kaukolan a bautismoan iray kapangiyanak ya ugugaw, imbaga la komon itan nen Jesus.

Komadua, agbalot imbangat nen Jesus ya siopaman et nadusa kayari ipatey to. Papanisiaan toy Kasulatan, a malinew ya mangibabagan: “Saray mabilay et amta ra ya ompatey ira; balet saray inatey et anggapon balot so amta ra.” (Eclesiastes 9:5) Amta nen Jesus ya agmaniirap iray inaatey diad purgatoryo, Limbo, impiernon-apoy, odino diad arum nin pasen. Imbes, imbangat to ya anggapo lay amta ra, a singa ra labat nanaugip.​—Juan 11:1-14.

Komatlo, imbangat nen Jesus ya “amin a walad pakanodnonotan iran lubok” so onoli ed bilay. (Juan 5:28, 29) Seguradon kaibad saraya so minilyon ya agbalot abautismoan. Sano napaoli ira, walay pankanawnawa dan naaralan so kakaukolanen na Dios tan manbilay ya andi-angga diad Paraison dalin. a​—Salmo 37:29.

Malinew sirin ya ag-ibabangat na Biblia a nepeg ya bautismoan iray kapangiyanak ya ugugaw.

[Paimano ed leksab]