Say Dios a mismo so angipaliwawa ed matoor a lingkor ton si Moises no antoy labay ya ibaga na ngaran To. Nen tinepet nen Moises so nipaakar ed ngaran na Dios, inmebat si Jehova: “Magmaliw Ak No Antoy Pilien Kon Pagmaliwan.” (Exodo 3:14) Oniay impangipatalos na bersion na Rotherham ed satan: “Magmaliw ak ya antokaman a labay kon pagmaliwan.” Kanian sarag nen Jehova so magmaliw ya antokaman a nakaukolan pian nagawa so panlabayan to tan sarag to met ya pagmaliwen iray pinalsa to ya gawaen day antokaman ya nakaukolan pian nasumpal so panlabayan to.

No sarag mon gawaen so sarilim ed labay mon pagmaliwan, antoy gawaen mo parad kakaarom? No nansakit so sakey ed sikara, sarag moy magmaliw ya marundunong a doktor tan tambalen mo. No walay mankaukolan na kuarta, sarag moy magmaliw ya mayaman pian natulongan mo. Balet diad tua, limitado labat so nagawaan mo. On, amin tayo. Legan mon aaraley Biblia, seguradon pandinayewan mon naamtaan no panon ya magmamaliw si Jehova ed antokaman a nakaukolan pian gawaen to ray impromisa to. Tan maliket ton uusaren so pakayari to parad saray mangaaro ed sikato. (2 Awaran 16:9) Sarayan balibalin kabiangan na personalidad nen Jehova et agnaamtaan na saramay agda kabat so ngaran to.

Malinew, say ngaran ya Jehova et agnepeg ya ekalen ed Biblia. No amta tayoy labay ya ibaga na ngaran to tan marespeto tayon usaren itan ed panagdayew tayo, ontulong itan pian lalon onapit tayod Ama tayod tawen, si Jehova.a

NAMBILAY si propeta Daniel masulok ya 500 a taon antis na inkiyanak nen Jesus. Balet, impaamta la nen Jehova ed si Daniel so impormasyon no kapigan nalanaan odino naturo si Jesus bilang Mesias odino Kristo. Impasakbay nen Daniel: “Amtaen mo tan talosan mo a manlapud pangipaakseb na ganggan ya apigeren tan ipaalagey lamet so Jerusalem ya anggad isabi na Mesias a Pangulo et walay 7 simba tan 62 simba.”​—Daniel 9:25.

Pian naamtaan so “isabi na Mesias,” kaukolan tayo nin amtaen no kapigan ginmapon agawa imay impasakbay nen Daniel. Base ed satan, onggapo itan diad “pangipaakseb na ganggan ya apigeren tan ipaalagey lamet so Jerusalem.” Kapigan inter odino ‘impaakseb itan ya ganggan’? Base ed si Nehemias, sakey ed saray nansulat ed Biblia, inter so ganggan ya ipaalagey lamet iray padir na Jerusalem “diad koma-20 taon na uley nen Arin Artaxerxes.” (Nehemias 2:1, 5-8) Prupruebaan na saray historian a say taon 475 B.C.E. so onunan taon ya impanuley nen Artaxerxes. Kanian, say koma-20 a taon na uley to et nen 455 B.C.E. Natan et amta tayo la ya say gapo na samay panaon ya impasakbay nen Daniel nipaakar ed Mesias et nen 455 B.C.E.

Impanengneng nen Daniel no panon karukey so panaon ya onlabas anggad isabi na Mesias a Pangulo. Diad samay impasakbay to et walay “7 simba tan 62 simba” (7 + 62), ami-amin et 69 simba. Panon karukey itan? Ibabaga na pigaran patalos na Biblia a saratan ya “simba” et aliwan literal ya sakey simban walay pitoran agew, noagta simsimba na taotaon. Labay ton ibaga, say sakey simba et pitoran taon. Sayan simsimba na taotaon, odino asanpi-pito a taon, et kabisado na saray Judio nensaman. Singa bilang, seselebraan da so taon na Sabaton ed kada komapiton taon. (Exodo 23:10, 11) Kanian, say impasakbay ya 69 simba et 69 ya asanpi-pito a taon (69 x 7), ami-amin et 483 a taon.

Natan et kuentaen tayo. No manlapud 455 B.C.E. et manbilang tayoy 483 ya taon, ompetek itan ed taon 29 C.E. Atan so eksakton taon nen abautismoan si Jesus tan nagmaliw a Mesias!a (Lucas 3:1, 2, 21, 22) Talagan makapadinayew no panon ya asumpal itan ya impasakbay na Biblia!

PIAN natulongan itayon naamtaan no siopa so Mesias, impaisulat nen Jehova a Dios ed dakel a propeta iray detalye nipaakar ed kiyanak, ministeryo, tan ipatey na sayan impromisan Manangisalba. Amin iratan ya impasakbay ed Biblia et agawa ed si Jesu-Kristo. Makapadinayew so inkasusto tan inka-detalyado na saratan. Singa bilang, nia ray pigaran impasakbay ed Biblia ya nagawa ed kiyanak tan ibaleg na Mesias:

Impasakbay nen propeta Isaias a say Mesias et manlapud poli nen Arin David. (Isaias 9:7) Si Jesus et talagan nanlapud poli nen David.​—Mateo 1:1, 6-17.

Impasakbay nen Miqueas, sakey nin propeta na Dios, ya sayan ugaw et magmaliw a manuley diad arapen tan sikatoy iyanak ed “Betlehem Efrata.” (Miqueas 5:2) Diad saman ya panaon, walay duaran baley ed Israel a tatawagen ya Betlehem. Say sakey et asingger ed Nazaret diad bandad norte na bansa, tan samay sakey et asingger ed Jerusalem diad Juda. Say datin tawag ed Betlehem ya asingger ed Jerusalem et Efrata. Ditan inyanak si Jesus. Eksakton agawa so impasakbay na propeta!​—Mateo 2:1.

Impasakbay met na Biblia ya say Anak na Dios et ‘tawagen manlapud Ehipto.’ Nen ugaw ni Jesus, sikatoy inawit ed Ehipto. Insan insempet kayari impatey nen Herodes, kanian agawa so impasakbay.​—Oseas 11:1; Mateo 2:15.

Diad tsart ya Saray Impasakbay Nipaakar ed Mesias, nabasa iray detalye nipaakar ed Mesias ed saray teksto diad leksab na heading ya “No Panon ya Impasakbay.” Ipangasin ikompara iratan ed saray tekston akalista diad leksab na heading ya “No Panon ya Agawa.” Makatulong iya pian lalon ombiskeg so pananisiam ya talagan tua so Salitay Dios.

Legan mon aaralen iratan ya teksto, tandaan ya impasakbay iraya nilasus taon lay apalabas antis nin niyanak si Jesus. Imbaga nen Jesus: “Amin a nisulat ed Ganggan nen Moises tan ed sulat na saray Propeta tan Salmo nipaakar ed siak et nepeg a nasumpal.” (Lucas 24:44) Nanengneng mon mismo ed Bibliam ya talagan detalyadon agawa iratan ya amin!

IBABAGA na saray manisia ed bangat a Trinidad ya say Dios et taloran persona​—Ama, Anak, tan Masanton Espiritu. Papanisiaan da ya saratan a taloran persona et nampapara, pareho iran makapanyarin-amin, tan anggapoy gapoan da. Base ed doktrinan Trinidad sirin, say Ama et Dios, say Anak et Dios, tan say Masanton Espiritu et Dios, balet saksakey labat so Dios.