1. Antoy labay na Dios ya nagawad dalin?

TALAGAN balibali so labay nen Jehova a Dios ya nagawad dalin. Labay ton say dalin et panayaman na totoon maliket tan agla ran balot mansakit. Ibabaga na Biblia ya “angiparaan si Jehova a Dios na sakey a hardin diad Eden” tan “pinatubo tod dalin so amin a kiew a makapaliket a nengnengen tan maabig a naakan.” Kayarin pinalsa na Dios so inmunan laki tan bii, si Adan tan Eva, impanayam to rad satan ya marakdakep ya ayaman tan inkuan tod sikara: “Manbunga kayo tan manparakel kayo, pano yoy dalin tan uleyan yo.” (Genesis 1:28; 2:8, 9, 15) Kanian labay na Dios ya saray totoo et nawalaay ananak, paawangen day hardin ya ayaman da ya anggad magmaliw ya paraiso so interon dalin, tan asikasoen da ray ayayep.

2. (a) Panon tayon naseguro ya nasumpal so panlabayan na Dios diad dalin? (b) Base ed Biblia, siopa ray manbilay ya tuloytuloy diad dalin?

² Parad sika, nagawa kasi so panlabayan nen Jehova a Dios ya manayam iray totoo diad paraison dalin? Oniay imbaga na Dios: “Sinalitak iya . . . tan sumpalen ko.” (Isaias 46:9-11; 55:11) On, seguradon gawaen na Dios so panlabayan to! Imbaga ton ‘agto pinalsa so dalin ya andiay gagala, noagta ginawa ton panayaman.’ (Isaias 45:18) Anton klase na totoo so panayamen na Dios diad dalin? Tan panon kabayag so labay ton pambilay da dia? Oniay ebat na Biblia: “Saray matunong et tawiren day dalin, tan manbilay ira ditan diad andi-anggaan.”​—Salmo 37:29; Apocalipsis 21:3, 4.

3. Anto ray makapaermen ya nagagawa natan diad dalin, tan anto ray nitepet tayo lapud satan?

³ Tua, agni ’tan agawa. Saray totoo natan et mansasakit tan ompapatey; manlalaban tan manpapateyan ni ra ingen. Walay agawan aliwa. Balet, segurado tayon aliwan oniay labay na Dios parad totoo! Anto kasi agawa? Akin et ag-asumpal so panlabayan na Dios? Anggapoy libro ed history ya makapangipaliwawa ed satan ta ginmapo so gulo diad tawen.

SAY NANLAPUAN NA SAKEY A KALABAN

4, 5. (a) Siopan talaga so akitongtong ed si Eva panamegley na sakey ya uleg? (b) Panon a nayarin magmaliw a matakew so datin makalakal tan matuan too?

⁴ Ipapaamta na unonan libro na Biblia ya walay kinmontrad Dios diad hardin na Eden. Sikatoy tinawag ya “uleg,” balet diad tua et aliwan ayep. Diad sampot ya libro na Biblia, nabasa ditan ya sikatoy “tatawagen a Diablo tan Satanas, a mangibabalang ed interon mundo.” Sikatoy tinawag met ya “sankaunaan ya uleg.” (Genesis 3:1; Apocalipsis 12:9) Sayan makapanyarin anghel odino agnanengneng ya espiritu, et angusar na uleg pian mitongtong ed si Eva, ya singa gagawaen na marunong a too ya kunkunwarin pansalitaen to so puppet anta sikato manaya so talagan mansasalita. Seguradon anengneng na satan ya anghel so impanggawa na Dios ed dalin parad totoo.​—Job 38:4, 7.

⁵ Balet, lapud perpekto so amin a pinalsa nen Jehova, siopay nanggawad sayan “Diablo” odino “Satanas”? Say simplin ebat et, ginawa na sayan makapanyarin espiritun anak na Dios so sarili to ya Diablo. Posible kasi itan? Diad tua, anggan say toon makalakal tan matua et posiblin magmaliw ya matakew. Panon? Nayarin abuloyan ton ontubod puso toy makapuy a pilalek. No atan lan lanang so sankanonot to, lalon ombiskeg so mauges a pilalek to. Insan no wala lay pankanawnawa to, nayarin gawaen toy mauges a pilalek ya nononoten to.​—Basaen so Santiago 1:13-15.

6. Panon a nagmaliw ya Satanas a Diablo so sakey a makapanyarin espiritun anak na Dios?

⁶ Ontan so agawa ed si Satanas a Diablo. Nayarin nadngel toy imbaga na Dios ed si Adan tan Eva ya manpamilya ira anggad napano so dalin. (Genesis 1:27, 28) Ompan inisip nen Satanas, ‘Balibali komon no siak so dayewen na totoo imbes ya say Dios!’ Kanian tinmubod puso to so mauges a pilalek. Insan nen kien, ginawa to la itan, pinalikdo toy Eva tan pinapaway ton matila so Dios. (Basaen so Genesis 3:1-5.) Kanian sikatoy nagmaliw a “Diablo,” ya say labay ton ibaga et “Managpauges.” Tan sikatoy nagmaliw a “Satanas,” ya say labay ton ibaga et “Sumusumpa.”

7. (a) Akin et inatey si Adan tan Eva? (b) Akin et ontatatken tan ompapatey so amin ya anak nen Adan?

⁷ Lapud katilaan tan panamalikdo nen Satanas a Diablo, agtinulok di Adan tan Eva so Dios. (Genesis 2:17; 3:6) Kanian sinmabi panaon et inatey ira. Atan may imbaga na Dios ya nagawad sikara no ag-ira ontulok. (Genesis 3:17-19) Lapud aliwa lan perpekto si Adan nen nankasalanan, atawir na amin ya anak to so kasalanan. (Basaen so Roma 5:12.) Pian natalosan tayo itan, niay sakey ya ilustrasyon: No say sukogan na tinapay et walay kumpil to, antoy nagawad kada tinapay? Ombalkat ed kada tinapay so kumpil odino aliwa lan perpektoy kurti to. Mipadpara, kada too et atawir toy “kumpil” odino ag-inkaperpekto nen Adan. Atan so rason no akin ya ontatatken tan ompapatey so amin a totoo.​—Roma 3:23.

8, 9. (a) Antoy akusasyon nen Satanas ed Dios? (b) Akin ya agtampol pinatey na Dios iramay nanrebelde?

⁸ Diad tua, sanen atukso nen Satanas si Adan tan Eva ya mankasalanan ed Dios, inggapo toy panagrebelde. Kinuestion toy paraan na pananguley nen Jehova. Singa to ibabagan: ‘Mauges a manuley so Dios. Matila tan isisiblet to ray maong a bengatla ed saray uuleyan to. Agkaukolan na totoo so uley na Dios. Sarag day mandesisyon a bukor no antoy maong tan mauges. Tan mas maong ni no siak so manguley ed sikara.’ Antoy gawaen na Dios ed ontan ya makapainsulton akusasyon? Parad arum, maong komon no pinatey la na Dios iratan ya rebelde. Balet naebatan kasi so akusasyon nen Satanas no ontan so ginawa na Dios? Napruebaan kasi ya duga so paraan na pananguley na Dios?

⁹ Lapud perpekto so hustisya nen Jehova, agnayarin tamtampol ton pateyen irayan rebelde. Nandesisyon so Dios ya palabasen ni panaon pian naebatan so akusasyon nen Satanas, tan napruebaan met ya matila so Diablo. Kanian inabuloyan na Dios ya uleyan na totoo so sarili da tan impluensyaan ira nen Satanas. Aralen ed Kapitulo 11 na sayan libro no akin ya ontan so ginawa nen Jehova tan no akin ya inabuloyan to nin onlabas so andukey a panaon antis ton panampoten iratan ya problema. Balet, nonot mo pa ’ya: Duga kasin anisia si Adan tan Eva ed si Satanas, anta anggapon balot so ginawa ton maabig ed sikara? Duga kasin panisiaan dan maruksa tan matila si Jehova, anta sikatoy angiter ed sikara na amin a bengatla? No sika man, anto kasi ginawam?

10. Panon mon nasuportaan si Jehova pian naebatan so akusasyon nen Satanas?

¹⁰ Importantin nonoten iratan a tepet ta amin tayo et apektado ed saratan ya problema natan. On, walay pankanawnawam ya ebatan so akusasyon nen Satanas pian nasuportaan moy Jehova. Pilim si Jehova bilang Manuley mo tan makatulong kan napruebaan ya matila si Satanas. (Salmo 73:28; basaen so Proverbio 27:11.) Makapaermen ta dagdaiset labat ed binilyon ya totoo so ontay desisyon da. Kanian nitepet tayo, Talaga kasin ibabangat na Biblia ya si Satanas so manuuley ed sayan mundo?

SIOPA SO MANUULEY ED SAYAN MUNDO?

11, 12. (a) Panon ya nanengneng ed samay impanukso nen Satanas ed si Jesus ya sikato so manuley ed sayan mundo? (b) Anto ni prueba ya si Satanas so manuley ed sayan mundo?

¹¹ Agbalot nanduaruwaan nen Jesus ya si Satanas so manuuley ed sayan mundo. Aminsan et tinukso nen Satanas si Jesus tan impanengneng toy “amin a panarian na mundo tan say karakpan na saratan.” Insan impromisa nen Satanas ed si Jesus: “Amin iraya et iter kod sika no ondakmomo ka tan mandayew kad siak a maminsan.” (Mateo 4:8, 9; Lucas 4:5, 6) Isip mo pa labat, nibaga tayo kasin tukso ed si Jesus so iyoopresi nen Satanas no aliwan sikato so manuuley ed saratan ya panarian? Agkinontra nen Jesus so imbaga nen Satanas ya gawa toy amin ya gobierno ed sayan mundo. No aliwan si Satanas so mangokontrol ed saratan, seguradon sikatoy kinontra nen Jesus.

¹² Siempre, si Jehova et makapanyarin-amin a Dios, say Manamalsa na makapadinayew ya uniberso. (Apocalipsis 4:11) Balet, anggapoy nabasad Biblia ya si Jehova a Dios odino si Jesu-Kristo so manuuley ed sayan mundo. Diad tua, espesipikon tinukoy nen Jesus ya si Satanas so “manuley na sayan mundo.” (Juan 12:31; 14:30; 16:11) Ibabaga ni ingen na Biblia ya si Satanas a Diablo et “dios na sayan sistema na mundo.” (2 Corinto 4:3, 4) Oniay insulat nen apostol Juan nipaakar ed sayan sumusumpa odino Satanas: “Say interon mundo et walad pakayari na samay mauges.”​—1 Juan 5:19.

NO PANON YA EKALEN SO MUNDO NEN SATANAS

13. Akin et kaukolan ya umanen so situasyon ed mundo?

¹³ Diad ilalabas na kada taon, lalon magmamaliw a mapeligro so situasyon ed mundo. Dakel so migi-guerran sundalo, kurakot ya politiko, kunkunwarin makadios ya lider na relihyon, tan mauge-uges iran kriminal. Imposiblin ondakep ni situasyon ed interon mundo. Ibabaga na Biblia ya asingger lan ekalen na Dios iray nagagawan mauges ed mundo diad piguerra tod Armagedon. Tan pagmaliwen ton mareen so situasyon ed mundo.​—Apocalipsis 16:14-16.

14. Siopa so pinili na Dios a magmaliw ya Manuley ed Panarian To, tan panon itan ya nipasakbay?

¹⁴ Pinili nen Jehova a Dios si Jesu-Kristo ya magmaliw ya Manuley ed Panarian odino gobierno To diad tawen. Abayag lan ibabaga na Biblia: “Sakey ya ugaw so niyanak ed sikatayo, sakey ya anak a laki so niiter ed sikatayo; tan niiter naani ed sikato so pananguley. Sikatoy tawagen a . . . Prinsipe na Kareenan. Say ilaknab na gobierno to tan say kareenan et agmangangga.” (Isaias 9:6, 7, paimanod leksab) Imbangat nen Jesus iray patumbok to ya ipikasi iyan gobierno: “Onsabi la komon so Panarian mo. Nagawa komon so linawam, a singa ed tawen, ontan met diad dalin.” (Mateo 6:10) Naaralan tayo nid ontumbok iran parte na sayan libro ya magano lan ekalen na Panarian na Dios so amin a gobierno ed sayan mundo, tan salatan to iratan ya amin. (Basaen so Daniel 2:44.) Insan panamegley na Panarian na Dios, magmaliw lan paraiso so dalin.

ASINGGER LA SO BALON MUNDO NA DIOS!

15. Anto so “balon dalin”?

¹⁵ Ipapasegurod sikatayo na Biblia: “Walay balon tawen tan balon dalin ya aalagaren tayo unong ed sipan [na Dios], tan diad saraya et manayam so inkatunong.” (2 Pedro 3:13; Isaias 65:17) No maminsan, no tutukoyen na Biblia so “dalin,” say labay ton ibaga et saray totoo diad dalin. (Genesis 11:1) Kanian say matunong ya “balon dalin” et totoo ya manguunor ed Dios tan bebendisyonan to.

16. Anto so mabmablin regalo na Dios ed saray manguunor ed sikato, tan antoy nepeg tayon gawaen pian naawat tayo itan?

¹⁶ Impromisa nen Jesus ya diad onsabin balon mundo, saramay manguunor ed Dios so makaawat na regalo ya “bilay ya andi-anggaan.” (Marcos 10:30) Pibukay mo pay Bibliam diad Juan 3:16 tan 17:3, tan pibasam so imbaga nen Jesus ya nepeg tayon gawaen pian tuloytuloy tayon manbilay. Natan, nengnengen tayo pad Biblia iray bendisyon parad saray kualipikadon mangawat ed balibalin regalo na Dios diad Paraison dalin ya asingger lan onsabi.

17, 18. Akin ya segurado tayon walay kareenan tan kaligenan ed anggan iner a pasen diad dalin?

¹⁷ Anggapo lay kaugsan, guerra, krimen, tan gulo. “Anggapo lay mauges . . . Balet saray mauyamo et tawiren day dalin.” (Salmo 37:10, 11) Magmaliw lan mareen lapud ‘patundaen la na Dios iray guerra diad interon dalin.’ (Salmo 46:9; Isaias 2:4) Insan “ombulaslas so matunong, tan inerman a pasen et walay kareenan anggad kaandi na bulan”​—labay ton ibaga et agla manganggay kareenan!​—Salmo 72:7.

¹⁸ Saray mandadayew ed si Jehova et manayam ya maligen tan mareen diad dalin. Nensaman nen inunor na saray Israelita so Dios, nagmaliw iran maligen. (Levitico 25:18, 19) Talagan makapalikliket no naeksperiensya tayo met so kaligenan diad Paraiso!​—Basaen so Isaias 32:18; Miqueas 4:4.

19. Akin ya segurado tayon dakel so naakan diad balon mundo na Dios?

¹⁹ Agla onkulang so naakan. “Dakdakel so anien ya ilik diad dalin; say toktok na kapalandeyan et napanopano,” so inkansion na sakey a nansulat ed Salmo. (Salmo 72:16) Bendisyonan nen Jehova a Dios iray matunong a totoo to tan “say dalin et mangiter na bunga to.”​—Salmo 67:6.

20. Akin ya segurado tayon say interon dalin et magmaliw ya paraiso?

²⁰ Say interon dalin et magmaliw ya paraiso. Ipaalagey iray mararakep ya abung tan gawaen ya hardin iray lugar ya datin dineral na makasalanan a totoo. (Basaen so Isaias 65:21-24; Apocalipsis 11:18) Diad ilabas na panaon, itultuloy nin parakepen iray nanduruman parte na dalin ya anggad say interon globo et magmaliw lan marakdakep tan mabunabuna ya singa say hardin na Eden. Tan ‘ilukas na Dios so lima to tan peneken toy pirawat na balang mabilay a bengatla.’​—Salmo 145:16.

21. Antoy mangipanengneng ya diad arapen et mareen la ray totoo tan ayayep?

²¹ Mareen lay totoo tan ayayep. Saray maatap tan maamon ayayep et saniiban mankabkab. Anggan say melag ya ugaw et ag-ontakot ed ayayep ya natan et masisibeg.​—Basaen so Isaias 11:6-9; 65:25.

22. Antoy nagawad sakit?

²² Anggapo lay sakit. Si Jesus ya Manuley ed Panarian na Dios diad tawen et mas makapadinayew ni gawaen ton pamaabig nen say ginawa to nen wadiad dalin. (Mateo 9:35; Marcos 1:40-42; Juan 5:5-9) Kanian “anggapoy manaayam ditan a mangibagay: ‘Mansasakit ak.’”​—Isaias 33:24; 35:5, 6.

23. Akin et makapaliket ed sikatayo so kioli ed bilay?

²³ Nabilay lamet iray inaatey ya inad-aro tayo tan nayarin agla ran balot ompatey. Nabilay lamet so amin ya inaatey ya sankanonot na Dios. Diad tua, “walay kioli na saray matunong tan saray agmatunong.”​—Gawa 24:15; basaen so Juan 5:28, 29.

24. Antoy nibagam ed pambilay ed Paraiso diad dalin?

²⁴ Talagan balibali pansumpalan na saray mandesisyon ya aralen so nipaakar ed Makapadinayew a Manamalsa, si Jehova a Dios, tan manlingkor ed sikato! Sankanonot nen Jesus so onsabin Paraiso ed dalin nen impromisa tod kriminal ya kaabay to: “Nakaiba ta ka ed Paraiso.” (Lucas 23:43) Kabaten tayo nin maong sirin si Jesu-Kristo, say usaren na Dios pian nagawa iratan ya amin a bendisyon.

1. Anton kabkabat a pikakasi so aralen tayo?

KABISADO na minilyon a totoo ed interon mundo so pikakasin “Ama Mi” odino Pikakasi na Katawan. Atan may kabkabat ya pikakasin imbangat nen Jesu-Kristo ya pangaligan tayo. Dakel so naaralan tayod satan ya pikakasi, tan no imanoen tayo may unonan taloran kerew, lalo tayon naamtaan no anton talagay ibabangat na Biblia.

2. Antoy talora ed saray imbangat nen Jesus ya ipikasi na saray disipulo to?

² Diad gapo na satan ya pangaligan a pikakasi, imbangat nen Jesus: “Onia sirin so nepeg a pampikasi yo: ‘Ama mi a walad tawen, napasanto komon so ngaran mo. Onsabi la komon so Panarian mo. Nagawa komon so linawam, a singa ed tawen, ontan met diad dalin.’” (Mateo 6:9-13) Akin et importante irayan taloran kerew?

3. Anto ray kaukolan tayon amtaen nipaakar ed Panarian na Dios?

³ Dakel lay naaralan tayo nipaakar ed ngaran na Dios, a Jehova. Tan naaralan tayo lay pigarad saray linawa na Dios​—no antoy ginawa to la tan no antoy gawaen to ni parad totoo. Balet, antoy labay ya ibaga nen Jesus nen inkuan ton ipikasi tayo ya, “Onsabi la komon so Panarian mo”? Anto ’tay Panarian na Dios? Panon ya napasanto so ngaran na Dios no onsabi la itan? Tan panon ya nagawa iray panlabayan na Dios no onsabi lay Panarian?

NO ANTO SO PANARIAN NA DIOS

4. Anto so Panarian na Dios, tan siopa so Ari na satan?

⁴ Say Panarian na Dios et gobierno nen Jehova a Dios, tan walay pinili ton Ari ya manuley ed satan. Siopa so Ari ed Panarian na Dios? Si Jesu-Kristo. Anggapon balot so toon manuley ya makapiparad si Jesus. Diad Biblia, sikatoy tinawag ya “Ari na saray arari tan Katawan na saray katawan.” (1 Timoteo 6:15) Sarasarag toy manggawa na maabig nen say anggan siopan manuley a too, anggan say sankamaongan lad sikara.

5. Iner so kawalaan na Panarian na Dios, tan anto so uleyan to?

⁵ Iner so kawalaan na Panarian na Dios? Pian naebatan itan, amtaen tayo no iner so kawalaan nen Jesus. Seguradon nanonotan mo ni may naaralan mo ya sikatoy pinatey ed panamairapan a poste, insan binilay lamet. Ag-abayag, sikatoy linma lad tawen. (Gawa 2:33) Kanian, say kawalaan na Panarian na Dios et diad tawen. Atan so rason no akin a tinawag itan na Biblia ya ‘Panarian ed tawen.’ (2 Timoteo 4:18) Balet anggaman say Panarian na Dios et walad tawen, uleyan na satan so interon dalin.​—Basaen so Apocalipsis 11:15.

6, 7. Akin et nibagan sankamaongan ya Ari si Jesus?

⁶ Akin et nibagan sankamaongan ya Ari si Jesus? Say sakey a rason et sikatoy agbalot ompatey. No ikompara si Jesus ed totoon arari, ibabaga na Biblia ya sikatoy “alenleneg a walaan na imortal a bilay, a manaayam ed agnaasinggeran a liwawa.” (1 Timoteo 6:16) Labay ton ibaga, amin ya balibalin gagawaen nen Jesus et mansiansia. Tan sikatoy manggawa na makapakelkelaw tan marakdakep iran bengatla.

⁷ Isipen pa iyan imbaga na Biblia nipaakar ed si Jesus: “Sikatoy napano na espiritu nen Jehova, say espiritu na karunongan tan pakatalos, say espiritu na pananimbawa tan inkabiskeg, say espiritu na pikakabat tan say takot ed si Jehova. Tan panliketan to so ontakot ed si Jehova. Agto mangukom a base labat ed nanengneng to, odino mangipetek a base labat ed narengelan to. Patas so pangukom to ed saray pobri, tan sikatoy mangipetek parad pakagunggonaan na saray mauyamo ed dalin.” (Isaias 11:2-4) Ipapanengneng na satan ya si Jesus et maomaong tan mapangasin Ari ed amin a totoo diad dalin. Agta ontan so labay mon ari?

8. Siopa ray nakaiba nen Jesus a manuley?

⁸ Nia ni sakey a katuaan nipaakar ed Panarian na Dios: Agbukbukor nen Jesus so manuley. Wala ray kaiba to. Singa bilang, imbaga nen apostol Pablo ed si Timoteo: “No mantultuloy itayon mansungdo [odino man-anos], sankakaiba itayo met a manuley bilang arari.” (2 Timoteo 2:12) On, si Pablo, Timoteo, tan arum ni ran matoor a totoo ya pinili na Dios et kaiba nen Jesus ya manuley ed Panarian diad tawen. Pigara so pinili ya nakaiba nen Jesus?

9. Pigaray nakaiba nen Jesus ya manuley, tan kapigan ginmapo ya nampili so Dios?

⁹ Naamtaan tayo lad Kapitulo 7 na sayan libro ya diad sakey a milagro et anengneng nen apostol Juan so “Kordero [si Jesu-Kristo] ya akaalagey diad Palandey Sion, tan kaiba to so 144,000, ya akasulat ed saray moling da so ngaran to tan say ngaran na Ama to.” Siopa irayan 144,000? Imbaga nen Juan a mismo: “Saraya may nantultuloy a tinmumbok ed Kordero anggan iner so laen to. Sinaliw iraya ed limog na katooan bilang unona iran bunga a parad Dios tan parad Kordero.” (Apocalipsis 14:1, 4) On, sikaray matoor a patumbok nen Jesu-Kristo ya pinilin nakaiba ton manuley ed tawen. Kayari iran napaoli ed tawen, “manuley ira bilang arari ed dalin” ya kaiba nen Jesus. (Apocalipsis 5:10) Manlapu lad panaon na saray apostol, manpipili lay Dios na matoor iran Kristiano pian nakompleto so bilang ya 144,000.

10. Akin ya maar-aro si Jehova diad impamili tod si Jesus tan say 144,000 ya manuley ed totoo?

¹⁰ Maar-aro so ginawa nen Jehova ta say pinili ton manuley ed totoo et si Jesus tan say 144,000. Nibagan maar-aro ta asali nen Jesus so nagmaliw a too tan asali to met so nanirap. Imbaga nen Pablo nipaakar ed si Jesus: “Say atagey a saserdote tayo et makapilikna ed saray kakapuyan tayo, lapud asali to so amin a klase na subok a nasasali tayo, balet ta andian na kasalanan.” (Hebreo 4:15; 5:8) Tan saray kaiba ton manuley et nanirap tan nan-anos met nen wadia ni rad dalin. Niarum ni, nilabanan day kakapuyan da tan asali da met so nansakit. Seguradon natalosan da ray problema ya dadalanen na totoo!

ANTOY GAWAEN NA PANARIAN NA DIOS?

11. Akin et imbaga nen Jesus a kaukolan ya ipikasi na saray disipulo to ya nagawa komon so linawa na Dios ed tawen?

¹¹ Sanen imbaga nen Jesus a kaukolan ya ipikasi na saray disipulo to ya onsabi la komon so Panarian na Dios, imbaga to met ya kaukolan dan ipikasi ya nagawa komon so linawa odino panlabayan na Dios “a singa ed tawen, ontan met diad dalin.” Say Dios et walad tawen, tan say panlabayan to et lawas ya gagawaen diman na saray matoor ya anghel. Balet, diad Kapitulo 3 na sayan libro, naaralan tayon walay mauge-uges ya anghel ya agto la labay a gawaey panlabayan na Dios tan tinukso toy Adan tan Eva ya mankasalanan. Diad Kapitulo 10, mas natalosan tayoy ibabangat na Biblia nipaakar ed satan a mauge-uges ya anghel, a tinawag ya Satanas a Diablo. Si Satanas tan saray arum nin rebelden anghel odino demonyo et inabuloyan ya mansiansian magano diad tawen. Kanian, aliwan amin ya walad tawen nensaman et gagawaen day panlabayan na Dios. Balet anguman iman nen ginmapo lay uley na Panarian na Dios. Nen nagmaliw lan Ari si Jesu-Kristo, sikatoy akilaban ed si Satanas.​—Basaen so Apocalipsis 12:7-9.

12. Antoy duaran importantin agawa ya abitlad Apocalipsis 12:10?

¹² Impaliwawa na sayan propesiya so agawa: “Walay nadngel kon maksil a boses ed tawen, ya angibaga: ‘Natan et sinmabi lay panangiliktar na Dios tayo, nipatnag lay pakayari to, tan niletneg lay Panarian to tan ginmapo lay pakauley na Kristo to, lapud nibantak lay manag-akusa ed saray agagi tayo, samay mangaakusa ed sikara ed agew tan labi diad arap na Dios tayo!’” (Apocalipsis 12:10) Anengneng moy duaran importantin agawa ya abitlad satan a bersikulo na Biblia? Unona, say Panarian na Dios ya uleyan nen Jesu-Kristo et ginmapo lan manuley. Komadua, imbantak si Satanas diad dalin.

13. Antoy resulta nen anggapo lay Satanas ed tawen?

¹³ Antoy resulta na satan ya duaran agawa? No nipaakar ed tawen, nabasa tayo: “Manliket kayo katawenan tan sikayo ran manaayam ditan!” (Apocalipsis 12:12) On, malikeliket iray matoor ya anghel ed tawen ta anggapo lay Satanas tan saray demonyo to diman. Kanian amin lan walad tawen et matoor ed si Jehova a Dios. Mareen la tan wala lay pankakasakey diman. Agawa la so linawa na Dios ed tawen.

14. Antoy agawa nen imbantak si Satanas diad dalin?

¹⁴ Anto balet so agawa diad dalin? Ibabaga na Biblia: “Kasi lay dalin tan say dayat, lapud linmeksab ed sikayo so Diablo, ya agaylay pasnok to, ta amta ton antikey lay panaon to.” (Apocalipsis 12:12) Agaylay pasnok nen Satanas ta sikatoy imbantak diad dalin tan antiktikey lay panaon to. Diad pasnok to, ginulo odino ginawa ton ‘pakaskasi’ so dalin. Dakel ni naaralan tayo nipaakar ed satan ya ‘pakaskasi’ ya kipapasen diad ontumbok a kapitulo. Lapud satan ya agawad dalin, oniay nitepet tayo, Panon ya gawaen na Panarian so linawa na Dios diad dalin?

15. Antoy labay na Dios ya nagawad dalin?

¹⁵ Nanonotan mo ni no antoy labay na Dios ya nagawad dalin? Naaralan mo itan ed Kapitulo 3. Diad Eden, impaamta na Dios ya gawaen ton paraiso iyan dalin tan napanoy maong a totoo ya tuloytuloy a manbilay. Balet, tinukso nen Satanas si Adan tan Eva ya mankasalanan, kanian agni agawa so panlabayan na Dios diad dalin. Anggaman ontan, agto labay ya ibagan anguman lay linawa na Dios. Siansian labalabay nen Jehova ya “saray matunong et tawiren day dalin, tan manbilay ira ditan diad andi-anggaan.” (Salmo 37:29) Tan say Panarian na Dios so manggawa ed satan. Panon?

16, 17. Antoy ibabaga na Daniel 2:44 nipaakar ed Panarian na Dios?

¹⁶ Imanoen pay ibabaga na Daniel 2:44 ya nagawad arapen: “Diad saray agew na saratan ya arari, say Dios na tawen et mangiletneg na panarian ya agbalot naderal. Tan sayan panarian et agniiter ed anggan siopan totoo. Buyaken tan panampoten to irayan amin a panarian, tan saya labat so mansiansia ed andi-anggaan.” Antoy naaralan tayod saya nipaakar ed Panarian na Dios?

¹⁷ Unona, naaralan tayon onggapo so Panarian na Dios diad “saray agew na saratan ya arari,” odino legan ya manuuley ni ray arum ya panarian o gobierno. Komadua, naaralan tayon say uley na Panarian et agmanampot. Ag-itan natalo odino salatan na arum ya gobierno. Komatlo, naaralan tayon manlaban so Panarian na Dios tan saray gobierno ed mundo. Manalo so Panarian na Dios. Insan, atan labat so gobiernon manuley ed amin a totoo. Panliketan lad satan na totoo so sankarakepan ya gobierno ya agda nin balot asali.

18. Antoy tawag ed sampot lan panlaban na Panarian na Dios tan saray gobierno ed mundo?

¹⁸ Dakel ni naaralan tayod Biblia nipaakar ed sampot lan panlaban na Panarian na Dios tan saray gobierno ed mundo. Singa bilang, naaralan tayo ya legan ya manasingger so anggaan, palikdoen na saray mauges ya espiritu so “arari na interon dalin.” Akin? “Pian tiponen da [ray arari] ed guerra a nagawa ed baleg ya agew na Dios a Makapanyarin-amin.” Natipon iray arari ed dalin diad “pasen a tatawagen ed Hebreo ya Armagedon.” (Apocalipsis 16:14, 16) Ibabaga na saratan ya duaran bersikulo ya say sampot lan panlaban na saray gobierno na totoo tan say Panarian na Dios et tinawag ya Armagedon.

19, 20. Akin et agni nagagawa natan so panlabayan na Dios diad dalin?

¹⁹ Anto ray maong ya nagawa lapud Armagedon? Isipen pa lamet so labay na Dios ya nagawad dalin. Labay nen Jehova a Dios ya say dalin et napano na maong tan perpekton totoo ya mandayew ed sikato diad Paraiso. Akin et agni ’tan nagagawa natan? Unona, makasalanan itayo, mansasakit tan ompapatey tayo. Balet, naaralan tayod Kapitulo 5 ya inatey si Jesus parad sikatayo pian makapambilay itayo ya tuloytuloy. Seguradon nanonotan mo ni imbaga nen Juan ed Ebanghelyo to: “Ontan lay panangaro na Dios ed mundo ya inter to so bogbogtong [odino saksakey] ya Anak to, pian kada sakey a mangipapanengneng na pananisia ed sikato et agnaderal noagta nawalaan na bilay ya andi-anggaan.”​—Juan 3:16.

²⁰ Say sakey nin problema et dakel so totoon manggagaway mauges. Mantitila, mansasaol ira, tan marutak so kabibilay da. Agda labay ya gawaen so panlabayan na Dios. Saray totoon manggagaway mauges et naderal diad pilaban na Dios diad Armagedon. (Basaen so Salmo 37:10.) Balet, wala ni sananey a rason no akin ya agni nagagawa so panlabayan na Dios diad dalin​—saray gobierno et anggapoy tanton nagagawaan da, maruksa, tan kurakot ira. Agda tutulongan iray totoo ya gawaen so panlabayan na Dios. Oniay diretsaan ya ibabaga na Biblia: “Say too et uuleyan toy kapara ton too diad pankaugsan to.”​—Eclesiastes 8:9.

21. Panon ya gawaen na Panarian so panlabayan na Dios diad dalin?

²¹ Kayari na Armagedon, saray totoo et uleyan na saksakey labat ya gobierno, say Panarian na Dios. Gawaen na satan ya Panarian so panlabayan na Dios tan mangiter na marakdakep iran bendisyon. Singa bilang, diad sanlibon taon et ikulong si Satanas tan saray demonyo to. (Apocalipsis 20:1-3) Lapud bagat nen Jesus, saray matoor a totoo et agla mansakit tan ompatey. Imbes, diad uley na Panarian et manbilay ira ya tuloytuloy. (Basaen so Apocalipsis 22:1-3.) Say dalin et magmaliw ya paraiso. Kanian gawaen na Panarian so panlabayan odino linawa na Dios diad dalin tan pasantoen na satan so ngaran to. Antoy labay ya ibaga na satan? Labay ton ibaga, diad uley na Panarian na Dios et igalang la na amin a mabilay so ngaran nen Jehova.

KAPIGAN ONKIWAS SO PANARIAN NA DIOS?

22. Akin et segurado tayon say Panarian na Dios et agsinmabi nen wadiad dalin si Jesus odino kayarin mismo na imbilay to lamet?

²² Sanen imbaga nen Jesus ed saray patumbok to ya ipikasi ran “Onsabi la komon so Panarian mo,” malinew ya agni itan sinmabi ed saman a panaon. Kasin sinmabi la itan nen pinmawil ed tawen si Jesus? Andi, lapud imbaga di Pedro tan Pablo ya kayari na imbilay lamet nen Jesus, agawad sikato imay abayag lan akasulat ed Salmo 110:1: “Imbaga nen Jehova ed Katawan ko: ‘Yurong ka ed nikawanan ko anggad iyan ko ray kakabusol mo a toonan na saray salim.’” (Gawa 2:32-35; Hebreo 10:12, 13) On, kaukolan nin manalagar si Jesus.

23. (a) Kapigan ginmapo so uley na Panarian na Dios? (b) Antoy aralen ed ontumbok a kapitulo?

²³ Anggad kapigan so panalagar to? Manga 40 taon antis na 1914, kalkanan atalosan na saray estudyante na Biblia [ya natan et tatawagen ya Saray Tasi nen Jehova] ya say panalagar et manampot ed 1914. (Nipaakar ed sayan taon, nengnengen so Apendise ed artikulon “1914​—Importantin Taon ya Impasakbay na Biblia.”) Saray agawgawa ed mundo nen 1914 et prueba ya duga so atalosan na sarayan estudyante na Biblia. Agawa sirin so abayag lan imbaga na Biblia ya nen 1914, si Kristo et nagmaliw ya Ari tan ginmapo lay uley na Panarian na Dios diad tawen. Kanian, ‘antiktikey lay panaon’ nen Satanas. (Apocalipsis 12:12; Salmo 110:2) Nibaga tayo met ya magano lan onkiwas so Panarian na Dios pian gawaen so panlabayan na Dios diad dalin. Kasin parad sika et maong itan ya balita? Kasin manisia kad satan? Makatulong so ontumbok a kapitulo pian natalosan mo no anton talagay ibabangat na Biblia nipaakar ed saratan.