1-3. (a) Akin et maabig ya alimbawa si Josue ed pampili na dugan direksion ed bilay? (b) Antoy nepeg tayon tandaan no mandedesisyon itayo?

IMPORTANTE no anto ray pipilien tayo. Walay epekto na satan ed pansumpalan tayo. Singa bilang, isip mo pan walay manaakar, tan akasabid nansangaan ya dalan. Dinan so pilien to ey? No amta toy laen to, say pilien ton dalan et samay ompugtad destinasyon to, aliwan samay mangiyarawid sikato.

² Diad Biblia et dakel so nabasa tayon nipaarap ed situasyon a kaukolan day manpili. Alimbawa, kaukolan nen Cain so mandesisyon no kasin kontrolen toy sanok to odino andi. (Gen. 4:6, 7) Kaukolan nen Josue so manpili no kasin manlingkor ed tuan Dios odino diad saray palson dirios. (Jos. 24:15) Determinado si Josue ya mansiansian maapit ed si Jehova, kanian pinili toy dugan direksion. Duma balet ed si Cain, pinili toy dalan ya angiyarawid sikato ed si Jehova.

³ No maminsan, dakel so napampilian tayo. No nagawa itan, tandaan moy destinasyon odino kalat mo—pian idayew si Jehova tan agmakapanggaway antokaman a mangiyarawid sika ed sikato. (Basaen so Hebreos 3:12.) Diad sayan mantumbokan ya artikulo, aralen tayoy pitoran aspektod bilay ya agti nepeg ya abuloyan a mangiyarawid sikatayo ed si Jehova.

TRABAHO TAN PROPESYON

4. Akin ya importantin walay trabaho tayo?

⁴ Responsabilidad na saray Kristiano ya itaryay pankaukolan da tan na pamilya da. Ipapaimano na Biblia ya no walay siopaman ya agto labay ya taryaan so pamilya to, sikatoy mauges ni nen say agmananisia. (2 Tes. 3:10; 1 Tim. 5:8) Kanian importantin walay trabaho tayo. Balet no agka manalwar, posiblin iyarawi ka na satan ed si Jehova. Panon?

5. Anto ray importantin ikonsideram antis mon awatey sakey a trabaho?

⁵ Panon to no mairap so makalmoy trabaho? Ompan natukso kan awaten so anggan anto lan trabaho. Panon to balet no kontra itan ed saray prinsipyo na Biblia? Odino dakel so upoten ton panaon kanian napaulyanan mo lay pililimog ed kongregasyon tan say pamilyam? Awaten mo ni kasin siansia itan ya opresi, tan ibagam ya mas maong met ni nen say anggapo? Tandaan ya no aliway pinilim ya direksion, niyarawi kad si Jehova. (Heb. 2:1) Balanglan manaanap kay trabaho odino iisipen moy mansalat na trabaho, panon kan makapanggaway dugan desisyon?

6, 7. (a) Anto so duaran rason no akin ya mantrabaho so sakey? (b) Dinan ed saratan so mamaapit ed sika ed si Jehova, tan akin?

⁶ Singa nibaga la, agmo lilingwanay destinasyon mo. Itepet mod sarilim, ‘No ayan propesyon so pilien ko, antoy pansumpalan ko?’ No say gagalam ed pantrabahom et pian nasuportaan moy sarilim tan say pamilyam diad panlingkor ed si Jehova, seguradon bendisyonan to ka. (Mat. 6:33) Agmo iisipen ya agka natulongan nen Jehova no naandi trabahom odino onirap so panagbilay. (Isa. 59:1) “Amta nen Jehova no panon ton iliktar ed subok iray maridios a totoo.”—2 Ped. 2:9.

⁷ Panon to balet no say gagalam et manpayaman? Nayarin onyaman ka met. Ingen tandaan mo ya mapeligro itan. (Basaen so 1 Timoteo 6:9, 10.) No iyunam so pampayaman tan propesyon, iyarawi ka na satan ed si Jehova.

8, 9. Antoy nepeg ya ikonsidera na atateng no nipaakar ed trabaho ra? Ipaliwawa.

⁸ No sakey kan ateng, isip moy epekto na alimbawam ed saray anak mo. Antoy nanenengneng dan iyuunam, say propesyon mo odino say relasyon mod si Jehova? No nanenengneng dan mas importantid sikay posisyon, inkasikat, tan kuarta, posible kasin aligen day mauges ya alimbawam? Kasin naekal so respeto dad sika bilang ateng? Oniay inkuan na sakey ya Kristianon marikit: “Manlapu lad intuboy kalakal ko, busy ya naynay si tatay kod trabaho to. Nen unaan, say antak et makulikulin mantratrabaho pian nalegpet toy pamilya mi, tan labay ton oninaway bilay mi. Balet anguman itan diad apalabas iran taon. Trabaho lan trabaho pian makasaliw na mabmabli iran gamit ya agmet kaukolan. Kanian kabkabat so pamilya mi ya mayaman, aliwan pamilyan napanuliranan ed panaglingkor ed si Jehova. Mas labay ko nin maespiritual so tatay ko nen say makuarta.”

⁹ Atateng, agyo aabuloyan ya iyarawi kayo ed si Jehova na trabaho yo. Panamegley na alimbawa, ipanengneng yod ananak yo ya talagan panisiaan yon mas importante so relasyon yod si Jehova nen say kayamanan.—Mat. 5:3.

10. Antoy nepeg ya ikonsidera na saray kalangweran no mamipili ira na propesyon?

¹⁰ No sakey kan kalangweran ya mannononot no antoy alaen mon propesyon, panon mon napili so dugan direksion? Singa nipaliwawa la, kaukolan mon amtaen no antoy labay mon pansumpalan. Kasin say nononoten mon propesyon et agto ka amperen ya makapibiang a nagkalalo ed kimey parad Panarian, odino iyarawi to ka ed si Jehova? (2 Tim. 4:10) Kasin aligen mo ray totood mundo ya akadepende so liket da ed kabaleg na tipon da, odino aligen moy David ya nanmatalek ed si Jehova? Inkuan to: “Tobonbalo ak nensaman, et natan masiken ak la, agko nin balot anengneng a say matunong et apaulyan, nisay saray bini to mipabpayabol na nakan.” (Sal. 37:25) Tandaan, duara labat so nayarin pansumpalan mo. Balanglan niyarawi kad si Jehova, odino ompugta kad sankaabigan a klase na bilay. (Basaen so Uliran 10:22; Malaquias 3:10.) Dinan so pilien mo?a

PANAGRELAKS TAN PANAGLIGLIWA

11. Antoy ibabaga na Biblia nipaakar ed panagrelaks tan panagligliwa, balet antoy nepeg tayon tandaan?

¹¹ Say Biblia et aliwan kontrad panliket tan agto met ibabagan panagdarak labat na panaon so panrelaks tan panligliwa. Oniay insulat nen Pablo ed si Timoteo: “Say panangipasal ed laman et makagunggona na daiset.” (1 Tim. 4:8) Ibabaga ni ingen na Biblia ya walay “panaon a panelek” tan “panaon a pansayaw,” tan ipapaseseg ton manpainawa tayo met. (Ecl. 3:4; 4:6) Balet no agka manalwar, iyarawi ka na saratan ed si Jehova. Panon? Diad klase na pipilien mo tan say karakel na oras ya uusaren mo.

12. Antoy nepeg mon ikonsidera no manpipili kay panagrelaks tan panagligliwaan?

¹² Unona, pantongtongan tayo so klase na panagrelaks tan panagligliwaan. Seguradon walay napilim ya maabig, balet maslak ed saray panagligliwaan et mangipapaseseg ed saray bengatlan kabusol na Dios, kaiba lay inkaruksa, espiritismo, tan imoralidad. Kanian kaukolan ya maal-alwar kan manpili. Antoy epekto na satan ed sika? Kasin nalagyat kan magmaliw a ‘maruksa,’ makompetensya, odino nasyonalistiko? (Pro. 3:31, NW) Kasin upoten toy kuartam? Kasin onkapuy so pananisia na arum? (Roma 14:21) Siopa ray nakaulop mo no pilien mo itan ya panagligliwaan? (Uli. 13:20) Kasin natukso kan manggaway mauges?—Sant. 1:14, 15.

13, 14. Antoy kaukolan mon ikonsidera no nipaakar ed oras ya usaren mod panagrelaks?

¹³ Nonot mo met so karakel na oras ya usaren mod panagrelaks tan panagligliwaan. Itepet mod sarilim: ‘Kasin nauupot ed saratan so oras ko kanian ngalngali anggapo lay panaon kod espiritual iran bengatla?’ No amin lawarin oras mo et walad saratan, agka lanlamang narelaks. Diad tua, mas maliket iramay amta dan limitaay panagrelaks da. Akin? Amta ran inyuna ray “mas importantin bengatla,” kanian ag-ira nakokonsiensia sano manrerelaks ira.—Basaen so Filipos 1:10, 11.

¹⁴ Anggan singano balibali manrelaks lan manrelaks, posiblin iyarawi ka na satan ed si Jehova. Oniay naeksperiensyan mismo na 20 años a sister ya si Kim: “Dati ayaman koy party. Kada Biernes, Sabado, tan Simba et walay happening. Natan balet, amoriak ya dakel manayay mas importantin gawaen. Singa bilang, lapud payunir ak la, ala-sais na kabuasan abangon ak la pian manpulong kanian agak nayarin mi-party ya anggad ala-una o alas-dos na palbangon. Antak ya aliwan mauges iray panlilimog, balet nayarin makadisturbo iratan. Kaukolan ya limitaan.”

15. Panon ya nibangat na atateng iray anak da diad pampili na makaparepreskon panagrelaks?

¹⁵ Responsabilidad na atateng ya itaryay materyal, espiritual, tan emosyonal ya pankaukolan na pamilya ra. Kaibad satan so panagrelaks. No sakey kayon ateng, agkayo komon killjoy tan agyo iisipen ya mauges lan amin so panagrelaks. Balet, manalwar ed saray mauges ya impluensya. (1 Cor. 5:6) No mannonot kayo nin maong, seguradon makalmo kayoy panagrelaks tan panagligliwaan ya talagan makaparepreskod interon pamilya yo.b Diad ontan, agkayo niyarawi ed si Jehova.

RELASYON ED PAMILYA

16, 17. Anto so pirmin paneermenan na dakel ya ateng, tan panon tayon amta ya natatalosan nen Jehova so nalilikna da?

¹⁶ Malet so aroan na atateng tan ananak kanian inusar itan nen Jehova pian iyilustray panangaro tod saray totoo to. (Isa. 49:15) No taynan na sakey si Jehova, natural labat ya naermenan a maong iray kapamilya to. Oniay imbaga na sakey a sister nen adispelosip so anak ton bii: “Agaylay ermen ko. Inisip ko, ‘Akin kasi et tinaynan toy Jehova?’ Akonsiensia ak, tan tinetel koy sarilik.”

¹⁷ No ontan so situasyon mo, natatalosan nen Jehova so naliliknam. Sikaton mismo et “asakitan so puso to” nen nanrebelde so inmunan too ya pinalsa to, tan saray dakel a totoo antis na Delap. (Gen. 6:5, 6, NW) Nayarin agnatalosan na saramay agnin balot akaeksperiensya na ontan no panon kaermen itan. Balet, mapeligro no abuloyan moy impankasalanan na adispelon kapamilyam a mangiyarawid sika ed si Jehova. Panon mo sirin a natalonaan so pirmin ermen no taynan na kapamilyam si Jehova?

18. Akin et agnepeg ya tetelen na atateng so sarili da no taynan na anak da si Jehova?

¹⁸ Agmo teteteley sarilim ed agawa. Inikdan nen Jehova iray totoo na kawayangan a manpili, tan balang dedikado tan bautismadon membro na pamilya et ‘nepeg ton sakbaten so awit ton dili.’ (Gal. 6:5) Parad si Jehova, samay nankasalanan so akanresponsabli ed ginawa to, aliwan sika. (Eze. 18:20) Ontan met, agmo tetetelen so arum. Igalang moy uksoyan na panagdisiplina nen Jehova. Sumpam so Diablo, aliwan saray pastol ya manproprotekta ed kongregasyon.—1 Ped. 5:8, 9.

19, 20. (a) Antoy nagawaan na atateng ya adispeloy anak da pian natalonaan day ermen da? (b) Antoy agmet mauges ya ilaloan na sarayan atateng?

¹⁹ No ombarong kad si Jehova, iyaarawim so sarilim ed sikato. Kaukolan mon ipanengneng ed inad-arom a kapamilya ya mas inarom si Jehova nen say amin nin bengatla—mas ni nen say pamilyam. Kanian pian natalonaan moy ontan ya situasyon, pabiskeg moy espiritualidad mo. Agmo isisian so sarilim ed saray matoor ya kaagian mo. (Uli. 18:1) Ibalikas mod si Jehova so walad pusom panamegley na pikakasi. (Sal. 62:7, 8) Agka manaanap na baraan mo pian makapiulop kad adispelon kapamilyam, singa diad text tan e-mail. (1 Cor. 5:11) Mansiansia kan aktibo ed espiritual iran kimey. (1 Cor. 15:58) Oniay inkuan na samay sister ya abitla niman: “Antak ya kaukolan koy mansiansian aktibo ed panaglingkor ed si Jehova tan mabiskeg ed espiritual pian no ompawil lad si Jehova so anako, akaparaan ak ya ontulong ed sikato.”

²⁰ Ibabaga na Biblia ya say aro et “maniilalo ed amin a bengatla.” (1 Cor. 13:4, 7) Aliwan mauges so panilalon ompawil ed si Jehova so inad-arom. Kada taon, amayamay so magbabawi tan ompapawil ed organisasyon nen Jehova. Tan no nagbabawi la ra, agla nonoten nen Jehova so kasalanan da. Imbes, sikatoy ‘akaparaan ya mamerdona.’—Sal. 86:5.

PILIM SO DUGA

21, 22. Antoy determinadom ya gawaen nipaakar ed pangusar moy kawayangan mon manpili?

²¹ Inikdan nen Jehova so totoo na kawayangan ya manpili. (Basaen so Deuteronomio 30:19, 20.) Balet satan ya kawayangan et walay katekep ton seryoson responsabilidad. Oniay nepeg ya itepet na kada Kristiano: ‘Kasin dugay pinilik a dalan? Aabuloyan ko kasi so trabaho tan propesyon, panagrelaks tan panagligliwaan, odino say relasyon ed pamilya ya mangiyarawid siak ed si Jehova?’

²² Agbalot ombebetel so panangaro nen Jehova ed saray totoo to. Kanian anggapoy makapangiyarawid sikatayo ed si Jehova, likud labat no aliway direksion ya pilien tayo. (Roma 8:38, 39) Balet, agkomon nagawa itan! Agmo aabuloyan so antokaman a mangiyarawid sika ed si Jehova. Diad onsublay ya artikulo, pantongtongan tayoy apatira nin aspektod bilay ya nipanengneng tayoy ontan ya determinasyon.

1, 2. (a) Anto ray masilib a “paraan” nen Satanas? (b) Antoy ontulong ed sikatayon onapit ed Dios?

PINALSA nen Jehova a Dios iray totoo ya walay pankaukolan dan onapit ed sikato. Balet, labay nen Satanas ya isipen tayo ya agtayo kaukolan si Jehova. Atan so katilaan ya uusaren nen Satanas manlapu la nen pinalikdo toy Eva diad hardin na Eden. (Gen. 3:4-6) Tan anggad natan, dakel ni napapalikdo to.

² Maong labat ta agtayo bastabasta napatitan nen Satanas. “Aliwa itayon andian na pikakabat ed saray paraan to.” (2 Cor. 2:11) Susugsogan itayo nen Satanas a manggaway aliwa pian niyarawi itayod si Jehova. Balet singa naaral tayod imbeneg ya artikulo, sarag tayon piliey duga nipaakar ed propesyon, panagligliwa, tan relasyon ed pamilya. Diad sayan artikulo, naaralan tayo no panon a say dugan panmoria ed teknolohiya, bunigas, kuarta, tan panagpasirayew et ontulong ed sikatayon ‘onapit ed Dios.’—Sant. 4:8.

TEKNOLOHIYA

3. Iyilustra no panon a nausar so teknolohiya ed duga odino aliwan paraan.

³ Diad panaon tayo, lalon ondadakel so balon kompyuter tan arum ni ran gadyet. No dugay pangusar, baleg so nitulong na saratan. Balet no andi, isian itayo na saratan ed Ama tayon walad tawen. Singa bilang, sayay magasin ya babasaen mo et nisulat tan im-publish diad impangusar na kompyuter. Baleg met ya tulong so kompyuter ed panag-research tan komunikasyon, tan nayarin usaren ed makarepreskon panagligliwa. Balet posiblin naadik so sakey ed panagkompyuter. Aayaten na saray negosyante iray totoo ya kaukolan et walad sikaray sankabaloan ya gadyet. Walay sakey ya kalangweran a laki ya inlako toy sakey a kidney to ta agaylay pampirawat ton makasaliw na tablet computer. Talagan agmakabat ya desisyon!

4. Panon ya nilabanan na sakey a Kristiano so sobran panagkompyuter to?

⁴ Mas alodloor ni no lapud satan et naderal so relasyon mod si Jehova. Oniay inkuan nen Jon, Kristianon 28 años to: “Antak pa may ibabaga na Biblia ya nepeg tayon ‘saliwen so panaon’ parad espiritual iran bengatla.a Balet no kompyuter lay tongtongan, kalaban koy sarilik.” Mabetbet ya napupuyat si Jon ed panag-Internet. “No kapigan naknaksawan ak la, diman met ngalngali agko napigilay man-chat o manbantay na antirikey a video ya no maminsan et pati saray mabanday la,” so kuan to. Pian nalabanan nen Jon iyan bisyo, in-set toy kompyuter to ya automatikon naerep no oras lay kakaugip.—Basaen so Efeso 5:15, 16.

5, 6. (a) Antoy responsabilidad na atateng ed saray anak da? (b) Panon a naseguro na atateng a maabig so kalimog na anak da?

⁵ Atateng, agyo kaukolan ya kontroley amin ya gagawaen na anak yo, balet nepeg yon i-monitor so panagkompyuter da. Agyo ra aabuloyan ya manlukas na Web site ya imoral tan walay espiritismo to, manggalaw na bayolentin video games tan milimog ed saray mauges diad Internet, pian labat walay gawaen da tan agda kayo nadisturbo. Ta no ontan, ompan isipen dan, ‘Baliwala met labat ed si Tatay tan Nanay, kanian ayos labat seguro.’ Bilang ateng, pati saray tinedyer lan anak yo et responsabilidad yon protektaan ed saray bengatlan mangiyarawid sikara ed si Jehova. No saray ayayep et proprotektaan da ray anak da, di nagkalalo lad sikayo ran atateng!—Ikompara so Oseas 13:8.

⁶ Tulongan yo ray anak yon makapikaaro ed saray napanuliranan ya kalangweran tan maedad lan Kristiano. Tan agyo lilingwanan ya kaukolan day pilimog yo ed sikara! Kanian ipanaon yoy mielekan, migalaw, tan mikemey ed sikara. Diad ontan et “onapit kayo ed Dios” a saniiba.b

BUNIGAS

7. Akin ya labay tayon mansiansian maksil so laman tayo?

⁷ Panapanaon et kukumustaen tayoy nalilikna na arum. Lapud inyarawi di Adan tan Eva so sarili dad si Jehova, amin tayo et mansasakit. Atan so labay nen Satanas pian mas nairapan tayon manlingkor ed si Jehova. Tan no ompatey tayo, agti la makapanlingkor ed sikato. (Sal. 115:17) Kanian natural labat ya panggunaetan tayon pansiansiaen a maksil so laman tayo.c Tan nepeg ya iyansakit tayoy bunigas tan pankaabigan na agagi.

8, 9. (a) Panon tayon napaliisay alabas a panagpagad bunigas tayo? (b) Antoy pankaabigan na pansiansian magayaga?

⁸ Anggaman ontan, nepeg tayon paliisay alabas a panagpagad bunigas tayo. Saray arum et masyadoy pangipapaseseg dad sakey a klase na panagdieta, panagtambal, odino produkto. Mas maseseg ni ra ingen ed saratan nen say diad pangipulong ed Panarian na Dios. Say abaloan da et talagan makakatulong irad arum. Balet agmatukoy ya iyopresi iratan diad aral, asemblea, tan kombension. Akin ey?

⁹ Mililimog itayod saray agagi pian pantongtongay espiritual iran bengatla tan naliknay gayaga ya papawalaen na masanton espirituy Dios. (Gal. 5:22) Say pangiyopresi na panagtambal odino produkto ed saratan ya pankanawnawa, anggano aliwan sikatayo so angigapoy tongtongan, et makaderal ed gagala na pantitipon tan makadismayad arum. (Roma 14:17) Agtayo nepeg ya idesisyonan so arum no antoy pilien dan panagtambal. Diad tua, anggapoy siopaman ya makatambal ed amin ya sakit. Anggan saray eksperton doktor et ontatatken, mansasakit, tan ompapatey met. Tan agnaparukey na alabas a panagpagad bunigas so bilay tayo. (Luc. 12:25) Imbes, ibabaga na Biblia ya “say magayaga a puso sikato so maong a tambal.”—Uli. 17:22.

10. (a) Parad si Jehova, anto ray mamaparakep ed sakey a too? (b) Kapigan itayo nawalaan na perpekton bunigas?

¹⁰ Tua, duga met labat ya agtayo paulyanan so itsura tayo. Balet agtayo kaukolan a pansagpotan ya ekalen so amin ya pakapatnagay itatatken. Nayarin pakanengnengan iratan ya say sakey et eksperiensyado, kagalgalang, tan maong so inkatoo to. Oniay ibabaga na Biblia: “Say ubanan ya ulo sikato so balanget na gayaga [no] naromog ed dalan na inkatunong.” (Uli. 16:31) Ontan so panmoria nen Jehova ed sikatayo, tan nepeg ya ontan met so panmoria tayo. (Basaen so 1 Pedro 3:3, 4.) Kanian, nepeg tayo kasin ipeligroy bunigas o bilay tayo diad pampaopera odino pamparetoke pian labat mas ongguapo odino ongganggana itayo? Antokaman so edad o kipapasey laman tayo, say tuan kalimgasan et manlalapud ‘liket ya iiter nen Jehova.’ (Neh. 8:10) Diad balon mundo labat magmaliw ya perpektoy bunigas tayo tan ompawil ed kaugawan so itsura tayo. (Job 33:25; Isa. 33:24) Balet legan tayon aalagaren itan, nepeg ya ipatnag tayoy karunongan tan manmatalek tayod saray sipan nen Jehova pian maliket itayo tan agtayo masyadon pampagaan so bunigas tayo.—1 Tim. 4:8.

KUARTA

11. Panon itayon niyarawi ed si Jehova na kuarta?

¹¹ Aliwan mauges so kuarta, tan aliwa met ya mauges so mannegosyo. (Ecl. 7:12; Luc. 19:12, 13) Balet no ‘aroen tayoy kuarta,’ seguradon niyarawi itayod si Jehova. (1 Tim. 6:9, 10) “Saray kapagaan ed sayan mundo,” odino alablabas ya panaburidod pananap na pambilay et nayarin mangamper ed espiritualidad tayo. Ontan met ed “say mapalikdon pakayari na kaykayamanan” odino say panisip ya say kuarta et mangiter na tuan liket tan inkaligen. (Mat. 13:22) Malinew ya imbaga nen Jesus ya “anggapo” so nayarin bansag a manpaaripen ed Dios tan ed kayamanan.—Mat. 6:24.

12. Anto ray kaslakan ya patit ed kuarta, tan panon tayon napaliisan iratan?

¹² No ipasen mon sankaimportantian so kuarta, ompan natukso kan manggaway aliwa. (Uli. 28:20) Lapud labay na arum so onyaman a tampol, naayat iran onteen ed lotto odino mimembrod multilevel marketing, tan rerekruten da ni ingen iray agagi. Wala met iray akombensin manpautang ed sakey ya agi lapud baleg kunoy interes. Agmo aabuloyan so agum ya mamalikdo ed sika. Usar moy pakatebek mo. No say opresi et singa imposible, ompan talagan imposible itan.

13. Antoy pidumaan na panmoria nen Jehova tan na mundo nipaakar ed kuarta?

¹³ No iyuna tayoy “panarian tan say inkatunong to,” bendisyonan nen Jehova so panggugunaet tayon makalmoy pambilay. (Mat. 6:33; Efe. 4:28) Agto labay ya makatemeg tayo no aral lapud naknaksawan tayod trabaho odino wala tayod Kingdom Hall ya tua balet ta sankanonot tayoy kuarta. Panisiaan na dakel a totood mundo ya no iyupot day panaon dad pananap na kuarta, ondakep tan oninaway bilay dad arapen. Ontan met so ipupurek dad saray anak da. Balet, impanengneng nen Jesus ya agmakatunongan itan. (Basaen so Lucas 12:15-21.) Nayarin nanonotan mod saya si Gehazi ya say abaloan to et anggano magmaliw ya maagum, siansia nin agnaapektoay relasyon tod si Jehova.—2 Ara. 5:20-27.

14, 15. Akin et agtayo nepeg a panmatalkan so kuarta? Mangiter na alimbawa.

¹⁴ Wala ray agilan nalner lapud agda inikbanay balbaleg ya siran asingkat da. Nayari met kasin nagawa so ontan ed saray Kristiano? Oniay impaliwawa na sakey ya elder a si Alex: “Sipor lan antak so mantipid. No nasobraan koy nikalbok ya shampoo, ipawil koy arum.” Balet, asagyat si Alex ed sakey a negosyo lapud inisip ton agmanbayag et onyaman la tan sarag to lay onekal ed trabaho pian manpayunir. Inaral ton maong so nipaakar ed satan ya negosyo. Impuonan toy amin ya kuarta to tan inmutang pian manuboy baleg. Balet, kabaliktaran so agawa. Oniay intuloy nen Alex: “Labay kon nabawi may kuartak. Inisip ko ya no agak onsukon tampol, nabawik lanlamang so impuonan ko.”

¹⁵ Pigay bulan a satan so pinonot nen Alex. Agto makapanpokus ed saray espiritual a bengatla tan agmakakaugip. Balet agto lan balot abawi may kuarta to. Naupot so tipon nen Alex tan inlako toy abung to. Oniay inamin to: “Sakit na ulo so inter kod pamilyak.” Anggaman ontan, walay importantin naaralan to. “Antak la natan ya no manmatalek kad sistema nen Satanas, talagan nadismaya ka.” (Uli. 11:28) On, no say panmatalkan mo et say kuarta odino say abilidad mon makalmoy kuarta diad sayan sistema, nibagan say panmamatalkan mo et say “dios na sayan sistema na mundo,” si Satanas. (2 Cor. 4:4; 1 Tim. 6:17) Natan, pinasimpli la nen Alex so bilay to “nisengeg ed maong a balita.” Sikato tan say pamilya to et nagmaliw lan maliket tan lalo iran inmapit ed si Jehova.—Basaen so Marcos 10:29, 30.

PANAGPASIRAYEW

16. Antoy pandumaan na duga tan makapuy a panagpasirayew?

¹⁶ Walay klase na panagpasirayew ya aliwan mauges. Singa bilang, ipapasirayew tayon Tasi nen Jehova itayo. (Jer. 9:24) Makatulong so talek ed sarili pian makapandesisyon na duga tan ag-iyabebay moral ya estandarte tayo. Balet, no sobray pangipapasen tayod panmoria tan posisyon tayo, niyarawi itayo ed si Jehova.—Sal. 138:6; Roma 12:3.

17, 18. (a) Diad Biblia, siopay abitlan mapaabeba tan siopa ray mapasirayew? (b) Antoy ginawa na sakey ya brother pian sikatoy ag-iyarawi ed si Jehova na inkamapasirayew?

¹⁷ Wala ray alimbawa ed Biblia na mapasirayew tan mapaabeban totoo. Si Arin David et mapaabeban nampaigiya ed si Jehova kanian abendisyonan. (Sal. 131:1-3) Balet, dinusa nen Jehova iray mapasirayew ya arari ya singa si Nabucodonosor tan Belsasar. (Dan. 4:30-37; 5:22-30) Ontan met natan, wala ray situasyon ya nasubok so kapaabebaan tayo. Si Ryan, ya 32 años a ministeryal a lingkor et inmalis ed sananey a kongregasyon. Imbaga to: “Iilaloan kon irekomenda da ak lan tampol ya elder balet sakey taon la et anggapo ni agawa.” Kasin sinmyodot o binmarong si Ryan, tan inisip ton agpinagalangan na saray elder? Tinmunda la kasin akiaral, tan inabuloyan toy inkamapasirayew ya mangiyarawid sikato ed si Jehova tan ed kongregasyon? No sika ey, antoy gawaen mo?

¹⁸ “Binasak so amin ya naromog kod publikasyon tayo nipaakar ed panalagar,” so kuan nen Ryan. (Uli. 13:12) “Amoriak ya kaukolan kon araley mananos tan manpaabeba. Kaukolan koy paipasal ed si Jehova.” Imbes ya sarili toy isipen to, nanpokus si Ryan ed panlingkor ed arum diad kongregasyon tan ed lawak na kimeyan. Ag-abayag, wala lay pigaran progresibon iyaaralan to na Biblia. “Sanen aturo ak ya elder kayari na sakey tan kapalduan taon, abigla ak. Agko la man iilaloan ta nai-enjoy kon maong so ministeryok,” so kuan to.—Basaen so Salmo 37:3, 4.

MANSIANSIAN MAAPIT ED SI JEHOVA!

19, 20. (a) Panon tayon naseguro ya ag-itayo iyarawi ed si Jehova na saray aspektod bilay ya apantongtongan tayo? (b) Siopa ray nansiansian maapit ed si Jehova ya nayari tayon aligen?

¹⁹ Amin ya apantongtongan ed sayan artikulo tan ed samay imbeneg et importantid bilay tayo. Ipapasirayew tayoy pagmaliw tayon lingkor nen Jehova. Say maliket ya pamilya tan kasil na laman et kaibad saray alay abig ya regalo nen Jehova. Atalosan tayo ya makatulong so trabaho tan kuarta pian niwalad sikatayo iray pankaukolan tayo. Amta tayo ya makaparepresko so manrelaks tan mausausar so teknolohiya. Balet no aliwan diad dugan panaon, sobra, odino makaabala lad panagdayew tayo so anggan sakey ed saratan, niyarawi itayo ed si Jehova.

²⁰ Siempre, atan so labay ya nagawa nen Satanas. Balet sarag mon protektaay sarilim tan say pamilyam! (Uli. 22:3) Apit kad si Jehova tan agkan balot onaarawi. Dakel so alimbawa ed Biblia ya pakaaralan tayo. Si Enoc tan Noe et “akiulop-ulop ed Dios.” (Gen. 5:22; 6:9) Si Moises et “nansiansian malet a singa sankanengneng to imay Sakey ya agnanengneng.” (Heb. 11:27) Ginawa nen Jesus no antoy makapaliket ed Dios kanian sikatoy abendisyonan. (Juan 8:29) Alig moy alimbawa ra. ‘Manliket kan naynay. Mantultuloy kan manpikasi. Misalamat ka parad amin a bengatla.’ (1 Tes. 5:16-18) Tan agmo aabuloyay antokaman a mangiyarawid sika ed si Jehova!