Manalwar ed Saray Patit na Diablo!

“Makablos ira ed patit na Diablo.”​—2 TIM. 2:26.

PANON MON EBATAN?

Antoy nepeg mon gawaen no lanang mo lan krikritikoey arum?

Antoy naaralan tayod alimbawa di Pilato tan Pedro nipaakar ed panaeg ed takot tan desdes?

Panon tayon napaliisan so alablabas a pakakakonsiensia?

1, 2. Anto ran patit na Diablo so pantongtongan tayod sayan artikulo?

SASALIEN na Diablo ya erelen iray lingkor nen Jehova. Balet sikatoy aliwan singa sakey ya hunter a mamapatey lawari ed amin ya naeerel to. Imbes, say manunan gagala na Diablo et erelen a mabilay so biktima to tan usaren itan a manggaway panlabayan to.​—Basaen so 2 Timoteo 2:24-26.

² Manguusar na nanduruman patit so sakey ya hunter pian naerel a mabilay so biktima to. Nayarin dagdagen toy ayep ya ompaway pian naerel panamegley na lubir. Odino mangusar na akaamot ya patit pian biglan naerel so biktima to. Uusaren met na Diablo so ontan iran patit pian erelen a mabilay iray lingkor na Dios. Pian agtayo naerel, kaukolan a manalerto tan ondengel tayod saray pasakbay ya ontulong ed sikatayon naamtaan no iner so kawalaan na saray patit nen Satanas. Pantongtongan tayod sayan artikulo no panon tayon napaliisan so taloran patit ya inusar na Diablo pian erelen so arum ed saray lingkor na Dios. Saratan et (1) anggapoy kontrol a panagsalita, (2) takot tan desdes, tan (3) alablabas a pakakakonsiensia. Pantongtongan tayod ontumbok ya artikulo so duara nin patit ya uusaren nen Satanas.

EREPEN SO APOY NA ANGGAPOY KONTROL A PANAGSALITA

3, 4. No agtayo kontroley dila tayo, antoy magmaliw a resulta? Mangiter na alimbawa.

³ Pian napapaway iray akaamot ya ayayep, manggawa na pool so hunter ed kakiewan a panaayaman na saratan. Insan to ra biglan erelen legan iran ontatakas. Diad piguratibon panangibaga, labay na Diablo so manggawa na pool ed loob na kongregasyon pian ompaway iray agagi ed satan. Panon tayon agnaam-amtaan a tutulongan tayo lay Diablo?

⁴ Inkompara nen babangatan a Santiago so dila ed apoy. (Basaen so Santiago 3:6-8.) No agtayo kontroley dila odino panagsalita tayo, makapangigapo tayoy piguratibon pool ed kongregasyon. Panon? Nia so sakey a situasyon: Diad sakey a miting na kongregasyon, inyanunsio so impaka-aproba na sakey a sister bilang regular payunir. Kayari na miting, pinantongtongan na duaran sister so impaka-aproba to. Imbaga na sakey a sikatoy naliliketan ed impanpayunir na sister tan inyarum to nin komon ta magmaliw a maaligwas. Balet inkuan na samay sakey a nampayunir labat imay agi ta labay toy manpaimportante ed kongregasyon. Siopa ed sarayan dua so labay mon nakaaro? Mainomay tayo lan nibiig no siopay mangigagapo na apoy ed kongregasyon panamegley na panagsalita to.

5. Pian naerep so apoy na anggapoy kontrol a panagsalita, antoy nepeg tayon gawaen?

⁵ Panon tayon erepen so apoy na anggapoy kontrol a panagsalita? Oniay imbaga nen Jesus: “No anto so daakan a walad puso, satan so ibabalikas na sangi.” (Mat. 12:34) Kanian usisaen tayo nin unona no antoy walad puso tayo. Kasin papaliisan tayo ray liknaan ya mangimpluensyad sikatayon mansalitay ansakit ed arum? Singa bilang, no naamtaan tayon mansasagpot so sakey a brother pian naabot so sakey a pribilehyo, kasin manisia itayon malinis so motibo to, odino mansuspetsa tayon gagawaen to labat itan lapud makasarilin pilalek? No naynay tayon iisipen a manlilingkor labat so sakey ya agi lapud makasarilin interes, nepeg tayon tandaan ya ontan met so inisip na Diablo nipaakar ed matoor a lingkor na Dios a si Job. (Job 1:9-11) Imbes ya kritikoen so agi tayo, kaukolan tayon usisaen no akin ya ontan so iisipen tayod sikato. Wala kasi makatunongan a rason? Odino naimpluensiaan tayo la na agmaaron ugali na sayan mundo legan na sarayan kaunoran ya agew?​—2 Tim. 3:1-4.

6, 7. (a) Anto ray nayarin rason no akin ya makritiko tayod arum? (b) Antoy ikiwas tayo sano asakitan itayo na arum?

⁶ Pantongtongan tayo so arum nin rason no akin ya makritiko tayod arum. Nayarin say sakey et lapud mas labay tayon saray nagagawaan tayo so naimano pian ompaway a mas maabilidad tayo. Odino walay agtayo agawaan, kanian manggagawa tayoy paraan pian agnaimano itan a kakulangan. No abuloyan tayoy pride, ibeg, odino kakulangay kompiyansa a mangimpluensya ed sikatayo, mamawala itan na makaderal a resulta.

⁷ Ompan nalilikna tayon duga labat so pankritiko ed arum. Nayarin asakitan tayo lapud aliwan maalwar a panagsalita na sakey ya agi. No ontan so ginawa tod sikatayo, aliwan maabig no ombawi tayo. Palooren labat na satan so situasyon, a labalabay na Diablo a gawaen tayo. (2 Tim. 2:26) Maabig no aligen tayoy ehemplo nen Jesus nipaakar ed saya. Sanen sikatoy minudmora, “agto ra minudmora.” Imbes, “inmatalek toy inkasikato ed samay matunong ya ukom.” (1 Ped. 2:21-23) Matalek si Jesus ya asikasoen nen Jehova iray situasyon unong ed paraan tan panaon To. Nepeg ya ontan met so panagmatalek tayod Dios. No usaren tayoy dila tayo pian mamabiskeg, ontutulong itayon napansiansiay “bedber na kareenan” ed kongregasyon.​—Basaen so Efeso 4:1-3.

ARAWIAN SO PATIT NA TAKOT TAN DESDES

8, 9. Akin ya senentensiaan nen Pilato na patey si Jesus?

⁸ Say sakey ya ayep ya apatitan et aliwa lan bulos. Ontan met, no say sakey a too et nampadaeg ed takot tan desdes, singa to inabuloyan so arum a mangontrol ed bilay to. (Basaen so Uliran 29:25.) Pantongtongan tayo so alimbawa na duaran lalaki a nampadaeg ed desdes tan takot, tan nengnengen tayo no antoy naaralan tayod eksperiensya ra.

⁹ Amta na Romanon Gobernador ya si Poncio Pilato ya anggapoy kasalanan nen Jesus, kanian agto labay a dusaen. Diad tua, imbaga nen Pilato ya ‘anggapon balot so aromog to ed si Jesus a makanepegan na patey.’ Balet, siansia to nin senentensiaan na patey si Jesus. Akin? Lapud nampadaeg si Pilato ed desdes na saray totoo. (Luc. 23:15, 21-25) Pinilit day Pilato a gawaen toy labay da diad impangiyeyag na: “No ibulos mo iyan too, aliwa kan kaaro nen Cesar.” (Juan 19:12) Tinmakot si Pilato ompan naekal ed posisyon to tan ompan pateyen da ni ingen no ibulos toy Kristo. Kanian inabuloyan toy inkasikaton gawaey linawa na Diablo.

10. Akin ya imburi nen Pedro so Kristo?

¹⁰ Si apostol Pedro so sakey ed saray sankaapitan ya kaaro nen Jesus. Anggapoy takot ton inyabawag a si Jesus so Mesias. (Mat. 16:16) Anggan sanen agnatatalosan na arum a papatumbok so kabaliksan na imbaga nen Jesus tan imbatikan da, nansiansian matoor si Pedro. (Juan 6:66-69) Tan sanen arestoen la na saray kakabusol si Jesus, inuyos nen Pedro so espada to pian iyagel so Katawan to. (Juan 18:10, 11) Balet ag-abayag, sikatoy nampadaeg ed takot tan imburi toy Jesu-Kristo. Diad aganon panaon et apatitan si Pedro. Abalang toy determinasyon ton gawaey duga tan manmatoor ed si Jesus.​—Mat. 26:74, 75.

11. Anto ran desdes so kaukolan tayon labanan?

¹¹ Bilang Kristiano, kaukolan tayon labanan so desdes a manggaway mamaermen ed Dios. Nayarin desdesen itayo na saray amo odino katrabaho tayon mantila odino manggaway imoral. Tatalonaan met na saray estudyante so desdes ed sikaran mankopya no exam, manbantay na pornograpiya, mansigarilyo, mandrugs, manbuanges, odino mibiang ed marutak iran kagagawad sekso. Anto sirin so makatulong ed sikatayon naarawian so patit na takot tan desdes a manggaway mamaermen ed si Jehova?

12. Anto ran leksion so naaralan tayod di Pilato tan Pedro?

¹² Antoy naaralan tayod alimbawa di Pilato tan Pedro? Daiset so amta nen Pilato nipaakar ed Kristo. Balet, amta ton anggapoy kasalanan tan aliwan ordinaryon too si Jesus. Ingen, aliwan mapaabebay Pilato tan agto inaroy tuan Dios. Kanian, sikatoy narel a mabilay na Diablo. Si Pedro et walaan na suston pikakabat tan panangaro ed Dios. Balet wala ray panaon ya agto binidbir so limitasyon to, nagmaliw a matakot, tan nampadaeg ed desdes. Antis ya naarestoy Jesus, oniay imbaga to: “Anggano taynan da kan amin, agta ka taynan.” (Mar. 14:29) No nanmatalek komoy Pedro ed Dios a singa ed impanmatalek na salmista, mas akaparaan komon a mangarap ed subok na pananisia to. Oniay inkanta na satan a salmista: “Si Jehova wala ed abay ko; agak la natatakot. Anto ni nayarian na too a gawaen ed siak?” (Sal. 118:6) Diad unor lan labi na bilay nen Jesus ed dalin, impila toy Pedro tan duara nin apostol diad hardin na Getsemani. Imbes ya mansiansian aliing, akaugip si Pedro tan saray kakaiba to. Sikaray binangon nen Jesus tan inkuan ton: “Mantultuloy kayon manbantay tan manpikasi, ta pian agkayo napelag ed tukso.” (Mar. 14:38) Balet akaugip lamet si Pedro, tan ag-abayag et tinmakot tan nampadaeg ed desdes.

13. Panon tayon nalabanay desdes a manggaway mauges?

¹³ Wala ni importantin leksion a naaralan tayod di Pilato tan Pedro: Pian nalabanan tayoy desdes tan takot ed totoo, kaukolan tayoy suston pikakabat, kapaabebaan, pamidbir ed limitasyon, panangaro tan takot ed si Jehova, aliwan diad saray totoo. No say pananisia tayo et base ed suston pikakabat, makpel tayon ipulong iray papanisiaan tayo. Ontulong iyad sikatayon labanay desdes tan daegen so takot ed too. Agtayo alablabas a manmatalek ed sarilin biskeg tayo. Imbes, mapaabeba tayon bidbiren a kaukolan tayoy pakayari na Dios pian nalabanay desdes. Kaukolan tayon kerewen so tulong na masanton espiritu nen Jehova tan abuloyan tayon say aro tayod sikato so mamakiwas ed sikatayon idayew so ngaran to tan mangunor ed saray estandarte to. Ontan met, kaukolan tayoy manparaan antis ya onsabi iray subok. Singa bilang, kaukolan tayoy manpikasin kaiba iray ananak tayo tan iparaan ira pian amta ray gawaen da sano piliten ira na kaedaran dan manggaway mauges.​—2 Cor. 13:7.a

PALIISAN SO PATIT A MAKAPABELAT​—ALABLABAS A PAKAKAKONSIENSIA

14. Nipaakar ed saray agawaan tayon lingo, antoy labay na Diablo ya isipen tayo?

¹⁴ No maminsan wala ray patit a gawad baleg a kiew odino bato ya akasabit ed petek na dalan a mabetbet a nadadalanan na ayep. Sano nagatinan na sakey ya ayep imay lubir, napaktak so ambelbelat a kiew o bato ya mamildak ed sikato. Say alablabas a pakakakonsiensia so nikomparad ambelat a bato ya mamildak. Sano lanang tayon nononoten iray agawaan tayon kasalanan, nayarin sikatayoy ‘nadanel a maong.’ (Basaen so Salmo 38:3-5, 8.) Labay nen Satanas ya isipen tayon agtayo la naperdona nen Jehova tan agtayo sarag ya unoren iray ganggan to.

15, 16. Panon mon napaliisan so patit na alablabas a pakakakonsiensia?

¹⁵ Panon mon napaliisan iyan patit a makapabelat? No akagawa kay seryoson kasalanan, gawam iray nakaukolan pian nipawil so relasyon mod si Jehova. Mitongtong kad saray elder tan onkerew kay tulong ed sikara. (Sant. 5:14-16) Gawam so anggaay nayarian mon ipetek so lingom. (2 Cor. 7:11) No nadisiplina ka, agka nadidismaya. Tanda itan na panangaro nen Jehova ed sika. (Heb. 12:6) Pansagpotan mon agla uliten so kasalanan. No nagbabawi tan anguman ka la, manmatalek kan sarag ya sakbongan na dondon bagat nen Jesu-Kristo so kasalanan mo.​—1 Juan 4:9, 14.

¹⁶ Wala ray agagin nagogonigon nin siansia ed agawaan dan lingo anggano aperdona la ra. No ontan so naliliknam, tandaan mon pinerdona nen Jehova si Pedro tan arum ni ran apostol diad impanaynan dad inad-aro ton Anak sanen kakkaukolan to ra. Pinerdona met nen Jehova imay adispelosip ed kongregasyon na Corinto lapud alablabas ya imoralidad, a diad saginonor et nagbabawi. (1 Cor. 5:1-5; 2 Cor. 2:6-8) Nabasa tayod Biblia iray totoon akagaway graben kasalanan a sanen nagbabawi ira et pinerdona ra na Dios.​—2 Awa. 33:2, 10-13; 1 Cor. 6:9-11.

17. Antoy nagawaan na dondon parad sika?

¹⁷ No talagan nagbabawi ka tan inawat mo lay panangasi nen Jehova, perdonaen tan lingwanan to la ray agawaan mon lingo. Agmon balot iisipen ya agnaperdona na dondon bagat nen Jesus iray kasalanan mo. No isipen mon agka naperdona, napelag kad sakey ed saray patit nen Satanas. Labay ton panisiaan mo ya agnasakbongan na dondon so amin a kasalanan na saray magbabawi. (Uli. 24:16) Say panisia ed dondon bagat so ontulong ed sikan agnabelatan na alablabas a pakakakonsiensia tan mangiter ed sika na biskeg a manlingkor ed Dios diad interon puso, nonot, tan kamarerwa.​—Mat. 22:37.

ALIWA ITAYON ANDIAN NA PIKAKABAT ED SARAY PATIT NEN SATANAS

18. Panon tayon napaliisan iray patit na Diablo?

¹⁸ Ag-importantid si Satanas no panon to tayon napatitan. Basta say labay to et naerel to itayo, odino gawaen tayoy panlabayan to. Lapud amta tayo la ray patit ya uusaren to, napaliisan tayo iratan. (2 Cor. 2:10, 11) Agtayo napatitan no onkerew tayoy kakabatan ed si Jehova diad pikakasi pian natalonaan tayo ray subok. Oniay inkuan nen Santiago: “No walad sikayo so kulang na karunongan, mantultuloy komon ya onkerew ed Dios, ta sikatoy mabunlok a mangiiter ed amin tan agmamabalaw; tan iter to itan ed sikato.” (Sant. 1:5) Kaukolan tayoy onkiwas unong ed pikakasi tayo panamegley na regular a personal a panagaral tan pangiyaplika ed Salita na Dios. Ipapaamtad sikatayo na saray publikasyon a nanlapud matoor tan makabat ya aripen iray patit na Diablo tan ontutulong iratan ed sikatayon napaliisay patit to.

19, 20. Akin a nepeg tayon busolen so mauges?

¹⁹ Ontulong ed sikatayo so pikakasi tan panagaral ed Biblia pian aroen no antoy maong. Balet, importante met ya busolen tayoy mauges. (Sal. 97:10) Makatulong ed sikatayo so pandalepdep ed saray mauges a resulta na makasarilin pilalek pian napaliisan tayo iratan. (Sant. 1:14, 15) No aralen tayon busolen so mauges tan aroen so maong, ag-onipektod sikatayo iray patit nen Satanas, agtayo nasagyat ed saratan.

²⁰ Talagan misalsalamat tayo ta tutulongan itayo na Dios pian napaliisan iray patit nen Satanas! Panamegley na espiritu, Salita, tan na organisasyon To, tutulongan itayo nen Jehova ya makaliktar ed “samay sakey a mauges.” (Mat. 6:13) Diad ontumbok ya artikulo, aralen tayo ni duaran patit na Diablo ya uusaren to pian naerel a mabilay iray lingkor na Dios.

Ontalindeg tan Paliisan Iray Patit nen Satanas!

‘Ontalindeg kayo sumpad saray masilib a paraan na Diablo.’​—EFE. 6:11.

PANON MON EBATAN?

Panon a napaliisan na Kristiano so patit na materyalismo?

Antoy makatulong ed sakey ya Kristianon walaay asawa pian agmakapikalugoran?

Anto ray gunggonan nagamoran no paliisan tayoy patit na materyalismo tan seksual ya imoralidad?

1, 2. (a) Akin ya anggapoy panangasi nen Satanas ed saray alanaan tan ed ‘arum a karnero’? (b) Anto ran patit nen Satanas so pantongtongan tayod sayan artikulo?

ANGGAPOY panangasi nen Satanas a Diablo ed saray totoo, lalo lad saramay manlilingkor ed si Jehova. Diad tua, milalaban si Satanas ed saray alanaan a wadia nid dalin. (Apo. 12:17) Sarayan Kristiano et makpel ya angidaulod panangipulong ed Panarian diad modernon panaon tan impaamta ran si Satanas so manguuley ed sayan mundo. Anggapo met so panangaro tod ‘arum a karnero’ ya manusuporta ed saray alanaan tan walaan na ilalon manbilay ed andi-angga​—say ilalon agnagamoran nen Satanas. (Juan 10:16) Kanian, ontan lay pasnok to! Say ilalo tayo man et manbilay ed tawen odino diad dalin, anggapoy pibabali nen Satanas ed sikatayo. Basta say labay to et nabiktima to tayo.​—1 Ped. 5:8.

² Pian nagawaan iya, si Satanas et manguusar na nanduruman patit. Lapud ‘binulag toy kanonotan’ na saray agmananisia, agda aawaten so maong a balita tan agda nanenengneng iray patit to. Balet, papatitan met na Diablo iray arum ya angawat lad mensahe na Panarian. (2 Cor. 4:3, 4) Naaralan tayod imbeneg ya artikulo no panon tayon napaliisan so taloran patit nen Satanas: (1) anggapoy kontrol a panagsalita, (2) takot tan desdes, tan (3) alablabas a pakakakonsiensia. Pantongtongan tayo natan so duara nin patit ya uusaren nen Satanas​—say materyalismo tan tukson manggaway pikakalugoran.

MATERYALISMO​—SAY PATIT A MAKAAMPER

3, 4. Panon a saray kapagaan ed sayan mundo et nayarin manresultad materyalismo?

³ Diad sakey ed saray ilustrasyon nen Jesus, sinalambit to so bini a nitanem ed kasabitan. Imbaga ton nayarin say sakey a too et ondengel ed salita, “balet saray kapagaan ed sayan mundo tan say mapalikdon pakayari na kaykayamanan so mangamper ed ibaleg na salita, tan sikatoy agmakapambunga.” (Mat. 13:22) On, say materyalismo so sakey a patit ya uusaren nen Satanas.

⁴ Walay duaran bengatlan makaamper ed salita. Sakey ed satan et saray “kapagaan ed sayan mundo.” Diad sayan “nikadkaduma tan mair-irap a panaon,” dakel iray bengatlan pansengegay kapagaan tayo. (2 Tim. 3:1) Nayarin nairapan tayon itaryay pankaukolan tayo lapud itatagey na saray sasaliwen tan daiset so naanap a trabaho. Nayarin pampapagaan tayo met so arapen tan ibagan, ‘Wala kasi magenap ya kuartak no man-retire ak la?’ Say arum et nananap na dakel a kuarta lapud iisipen dan satan so mangiter ed sikara na seguridad.

5. Panon itayon napalikdo na “pakayari na kaykayamanan”?

⁵ Sinalambit met nen Jesus so sakey nin makaamper​—“say mapalikdon pakayari na kaykayamanan.” Singa saray kapagaan, saya met so nayarin mangamper ed salita. Ibabaga na Biblia a ‘say kuarta et sakey a proteksion.’ (Ecl. 7:12, NW) Balet, agmakabat so pampayaman. Amoria na dakel ya diad panggugunaet dan onyaman, mas lalo iran napapatitan na materyalismo. Say arum ni ingen et nagmaliw ya aripen na kayamanan.​—Mat. 6:24.

6, 7. (a) Anton situasyon ed trabaho so nayarin managyat ed sikan manpayaman? (b) Antoy nepeg a nonoten na sakey a Kristiano sano sikatoy naopresian a man-overtime?

⁶ Nayarin onggapoy pampilalek tayod kayamanan ya agtayo naliklikas. Singa bilang, inasinggeran ka na amom tan imbaga ton: “Walay maabig a balita! Akala na baleg a kontrata so kompanya. Kanian, kaukolan tayoy man-overtime a lanang diad loob na pigaran bulan. Balet seguradon baleg so sueldoen tayo.” Antoy gawaen mo no ontay inyopresid sika? Importante so pangitarya na materyal a pankaukolan na pamilyam, balet aliwan satan labat so responsabilidad mo. (1 Tim. 5:8) Wala ni ray kaukolan mon nonoten. Pigaran oras so pan-overtime mo? Kasin apektaen la na satan iray espiritual ya aktibidad mo singa say pipiaral tan Panagdayew na Pamilya yo?

⁷ Diad pandesisyon mo, antoy kaukolan mon iprayuridad​—kuarta odino say relasyon mod si Jehova? Kasin lapud pilalek mon nawalaay dakel a kuarta et agmo la niyuna so Panarian? Amoriam la kasi no antoy magmaliw ya epekto no napaulyan moy relasyon mo tan na pamilyam ed si Jehova? No ontan so situasyon mo, panon kan makatalindeg tan makapaliis ed patit na materyalismo?​—Basaen so 1 Timoteo 6:9, 10.

8. Anto ran alimbawa ed Biblia so ontulong ed sikatayon usisaey paraan na kabibilay tayo?

⁸ No agtayo labay a napatitan na materyalismo, kaukolan a regular tayon usisaey paraan na kabibilay tayo. Agtayo labay a magmaliw a singa si Esau ya ag-angapresyad espiritual iran bengatla! (Gen. 25:34; Heb. 12:16) Tan seguradon agtayo met labay so magmaliw a singa samay mayaman a laki ya binagaan nen Jesus ya ilako to ray kaykayarian to, iter tod saray mairap bilay, tan ontumbok ed sikato. Ag-inmunor imay laki, imbes sikatoy “tinmaynan a maer-ermen ta dakel so kaykayarian to.” (Mat. 19:21, 22) Abalang toy baleg a pribilehyon ontumbok ed sankatalonggaringan ya toon nambilay lapud apatitan na kayamanan! Sirin manalwar tayo pian agtayo nabalang so pribilehyo tayo bilang papatumbok nen Jesu-Kristo.

9, 10. Unong ed Biblia, antoy nepeg tayon panmoria ed materyal iran bengatla?

⁹ Pian nalabanan tayoy sobran panaburido ed materyal, kaukolan tayon tumbokey simbawa nen Jesus: “Agkayon balot manpapaga ya ibaga yon, ‘Anto kasi kanen mi?’ odino, ‘Anto kasi inumen mi?’ odino, ‘Anto kasi isulong mi?’ Ta sarayan amin a bengatla so panseseetan ya anapen na saray nasyon. Ta amta na Ama yo ed tawen a nakaukolan yo irayan amin.”​—Mat. 6:31, 32; Luc. 21:34, 35.

¹⁰ Pian ag-itayo napatitan na mapalikdon pakayari na kayamanan, aligen tayoy panmoria na sakey a managsulat na Biblian si Agur: “Agmo iyaabuloy ya onyaman ak odino onirap ak. Iter mo labat so nakaukolan ko.” (Uli. 30:8, Contemporary English Version) Atalosan nen Agur ya importante so kuarta pian manbilay, balet amta to met so mapalikdon pakayari na kayamanan. Nepeg tayon tandaan ya saray kapagaan ed sayan mundo tan say mapalikdon pakayari na kayamanan et manresultad pakabalang na relasyon tayod si Jehova. Say sobran panagpaga ed materyal iran bengatla et mangupot na panaon tan biskeg tayo, tan mangamper ed sikatayon niyunay Panarian. Kanian agtayon balot papaerel ed patit nen Satanas a materyalismo!​—Basaen so Hebreos 13:5.

PIKAKALUGORAN​—MAAMOT A PATIT

11, 12. Panon a napatitan so sakey a Kristiano a makapikalugoran ed pasen na trabaho?

¹¹ No labay na saray hunter so makarel na baleg ya ayep, mankotkot iray aralem ya abot diad pasen a mabetbet a dadalanen na satan, insan da itan sakoban na saray bislak tan daiset a dalin pian agnanengneng na biktimaen da. Sakey ed saray sankaepektiboan a patit nen Satanas et say imoralidad. (Uli. 22:14; 23:27) Wala ray Kristianon naplag ed satan a patit diad impangiyabuloy dan niwala rad situasyon a maininomay so pakagaway imoral. Arum ed saray Kristianon walaay asawa so akapikalugoran lapud binayuboan day agmanepeg a romantikon relasyon.

¹² Nayarin onggapo so agmanepeg a romantikon relasyon diad pasen na trabaho. Unong ed sakey ya survey, masulok a kapaldua ed saray mikakalugoran a bibii tan ngalngali 3 ed 4 mikakalugoran a lalaki so akirelasyon ed katrabaho ra. Kasin wala ray katrabahom ya agmo kaparay sekso? No wala, panon mo ran pidedenengan? Kasin walay limitasyon na pidedeneng mod sikara pian anggapoy onlesan romantikon relasyon? Singa bilang, nayarin say sakey a sister et naynay a mitotongtong ed lakin katrabaho to. Nayarin magmaliw iran sankaaro tan panmatalkan na sister imay katrabaho to ya anggad ibaga to la ray problema dan sanasawa. Odino mikakaaro so sakey a brother ed biin katrabaho to. Tan nayarin irason to ya: “Sikatoy interesado ed saray opinyon ko tan talagan dedengelen to ray ibabagak. Aapresyaen to ak. Komon ta onia met si asawak!” Kasin nanenengneng mo no panon a sarayan situasyon so magmaliw a sengegay pakapikalugoran na sakey a Kristiano?

13. Panon ya onlesa so agmanepeg a romantikon relasyon diad loob na kongregasyon?

¹³ Nayari met ya onlesa so agmanepeg a romantikon relasyon diad loob na kongregasyon. Imanoen iyan tuan bilay ya eksperiensya. Si Daniel tan say asawa ton si Saraha et regular payunir. Sakey ya elder si Daniel tan aawaten to so amin ya asainmin ya iiter ed sikato. Sikatoy mangiyaaral na Biblia ed limaran kalangweran a lalaki, tan talora ed sikara so abautismoan la. Kakkapanpabautismo da ni labat kanian kaukolan day tulong. Lapud busy ed kongregasyon si Daniel, mabetbet a say ontutulong ed sikara et si Sarah. Ontan a lanang so nagagawa. No walay problema na saray iyaaralan nen Daniel, si Sarah so ontutulong. No kaukolan met nen Sarah so atension, saray iyaaralan nen Daniel so mangipapanengneng ed satan. Nagmaliw itan a mapeligron patit. Oniay imbaga nen Daniel: ‘Diad loob na pigaran bulan ginawa nen asawak so anggaay nayarian ton ontulong ed arum, kanian kaukolan toy espiritual tan emosyonal a suporta. Balet diad saraman a panaon et sikatoy nibaliwalak tan makapaermen so nansumpalan na satan. Akapikalugoran si asawak ed sakey ed saray datin iyaaralan ko. Lapud busy ak ed saray kimey ko, agko naimano ya kinmapuy la manayay espiritualidad to.’ Panon mon napaliisan so onian makapaermen a situasyon?

14, 15. Anto ray makatulong ed sanasawa pian napaliisay patit na pikakalugoran?

¹⁴ Pian napaliisan so patit na pikakalugoran, nonot mo no anton talagay labay ya ibaga na pagmaliw a matoor ed asawam. Inkuan nen Jesus: “Say impankasakey na Dios, agnepeg a pansianen na too.” (Mat. 19:6) Agmon balot iisipen ya mas importante iray teokratikon pribilehyom nen say asawam. Ontan met, nepeg mon tandaan a say mabetbet ya iyalis parad agtanto importante iran bengatla ya agmo kaibay asawam et pakapatnagan a walay problema yon sanasawa tan magmaliw itan a sengegan na pakatukso tan pakapanggaway seryoson kasalanan.

¹⁵ No sakey kan elder, kaukolan mon asikasoey kongregasyon. Oniay imbaga nen apostol Pedro: “Pastolan yo so pulok na Dios a walad panangasikaso yo, ya agkayo napapasootan, noagta mabulbulos kayo; tan agkayo manaanap na napinabangan yo, noagta akaparaan kayon naynay.” (1 Ped. 5:2) Agmo ibabaliwala iray agagi ed kongregasyon. Balet, agmo kaukolan so mansagpot a maong pian magmaliw a maabig ya elder, ya anggad agmo la nagawaay responsabilidad mo bilang asawa. Agmakatunongan​—mapeligro ni ingen—​ya ipraprayuridad moy pamakan ed kongregasyon balet ta say asawam et “naeerasan” ed espiritual. Onia ni imbaga nen Daniel, ‘Agmon balot aabuloyan a saray pribilehyom so magmaliw a sengegay pakapaulyan mod mismon pamilyam.’

16, 17. (a) Anto ray nayarin gawaen na saray Kristianon walaay asawa ed pasen na trabaho pian ipaamtan agla ra nayarin mirelasyon ed arum? (b) Mangiter na alimbawa na saray artikulod magasin a makatulong ed saray Kristianon napaliisay pikakalugoran.

¹⁶ Dakel ni ray simbawan nabasad Say Panag-bantayan tan Awake! ya makatulong ed saray Kristianon sanasawa pian napaliisay patit na pikakalugoran. Singa bilang, oniay insimbawa na Setyembre 15, 2006 ya isyu na Say Panag-bantayan: “Diad pantratrabahoan odino inerman a pasen, manalwar ed saray situasyon a nayarin pakabayuboan na maapit a relasyon. Alimbawa, nayarin mansumpal ed tukso so pangusar na kaaruman iran oras a maapit a mikimey ed sakey a kasunian ed sekso. Bilang de-asawan laki odino bii, nepeg yon ipabitar itan diad panagsalita tan kakikiwas yo ya agkayo la nayarin mirelasyon ed anggan siopa. Bilang manggegemtan na maridios a debosyon, maseguron agyo labay so naimanon makarinyo odino aliwan masimpit so panangawes tan itsura yo. . . . Say pangiparungtal yo ed litrato na asawa tan ananak yo diad pantratrabahoan yo so onkanan panonot ed sikayo tan ed arum nin totoo ya importante ed sikayo so pamilya yo. Magmaliw a determinado ya agbalot ipapaseseg​—odino aabuloyan ni ingen—​iray romantikon pananagyat na arum.”

¹⁷ Say artikulon “Marital Fidelity​—What Does It Really Mean?” ed Abril 2009 ya isyu na Awake! so mamapasakbay nipaakar ed seksual a panagpantasya ed agmo asawa. Unong ed satan ya artikulo, no manggagawa ka na seksual a panagpantasya ed agmo asawa, mas lalo kan nasagyat a mikalugoran. (Sant. 1:14, 15) No wala lay asawam, makatulong no panapanaon yon repasoen iratan ya impormasyon a saniba. Say panangasawa et sakey ya uksoyan ya inggapo nen Jehova a mismo, kanian sagrado itan. Say pangigana yoy panaon pian pantongtongay nipaakar ed panamaley yo et pakapatnagan ya papablien yo iray sagradon bengatla.​—Gen. 2:21-24.

18, 19. (a) Anto ray mauges a pansumpalan na pikakalugoran? (b) Anto ray gunggona na panmatoor ed asawam?

¹⁸ No natutukso kan bayuboay agmanepeg a romantikon relasyon, nonot mo ray mauges a pansumpalan na pilalawanan tan pikakalugoran. (Uli. 7:22, 23; Gal. 6:7) Saramay manggagawa na imoral et napapaermen day Jehova tan sasakitan da ray kaasawaan da tan say sarili da. (Basaen so Malaquias 2:13, 14.) Balet, nodnonoten iray gunggonan nagamoran na saramay pansiasiansiaen day malinis a kondukta. Aglabat ira naikdan na ilalon manbilay ed andi-angga noagta natan ni labat et nawalaan la ra na maliket a bilay tan malinis a konsiensia.​—Basaen so Uliran 3:1, 2.

¹⁹ Oniay inkanta na salmista: “Abalbaleg a kareenan so wala ed saray mangaro na ganggan mo, tan anggapo a balot so sengegay kigapolan da.” (Sal. 119:165) Kanian arom so katuaan tan ‘manalwar kan maong pian say panagkurang mo et aliwan bilang agmarunong a too noagta marunong a too’ ed sayan mauges a panaon. (Efe. 5:15, 16) Dakel a patit so uusaren nen Satanas pian patitan iray tuan managdayew ed Dios. Balet, inter nen Jehova so amin a nakaukolan tayo pian “makatalindeg” tan “naerep [so] amin a mandarlang a pana na samay mauges”!​—Efe. 6:11, 16.