Kianak Lamet​—Say Dalan a Mamaarap ed Kililiktar?

ANTOY ebat mo ed tepet ya, “Born again ka?” Minilyon a totoo ed interon mundo so mangibagan, “Siempre, on!” Papanisiaan dan say kianak lamet et pakabidbiran na amin a tuan Kristiano tan alenleneg a dalan paarap ed kililiktar. Parehoy panmoria ra ed saray lider na relihyon, a singa si Robert C. Sproul ya angisulat: “No agnianak lamet so sakey a too, . . . aliwa sirin a Kristiano.”

Sika ey, papanisiaan mo met a say kianak lamet so dalan a mamaarap ed kililiktar? No on, seguradon labay mon tulongan iray kakanayon tan kakaarom a naromog itan a dalan tan manakar ditan. Balet, pian nagawaan da itan, kaukolan dan talosay pandumaan na toon nianak lamet tan samay andi. Panon mon ipaliwawa’d sikara so kabaliksan na kianak lamet?

Panisiaan na dakel a say sakey a “nianak lamet” et samay toon pormal ya angisipan a panserbian toy Dios tan si Kristo, tan bilang resulta et sikatoy awalaan na maabig a relasyon ed Dios. Diad tua, unong ed sakey a modernon diksionaryo, say toon nianak lamet et “Kristiano a nampasimbalo odino imbalikas toy agnauman a debosyon to ed Dios, nagkalalo la kayari ton awalaan na maemosyon ya eksperiensya’d relihyon.”​—Merriam-Webster’s Collegiate Dictionary​—Eleventh Edition.

Ompan nabigla ka no naamtaan mon aliwan ontan so ibabagay Biblia. Labay mon naamtaan no anton talagay ibabangat na Biblia nipaakar ed kianak lamet? Seguradon nagunggonaan ka no aralen mon maong iya. Akin? Lapud say suston pakatalos ed kianak lamet et apektaen toy bilay mo tan say arapen mo.

Anto so Ibabangat na Biblia?

Say balikas a “nianak lamet” et naromog ed Juan 3:1-12. (Maung a Balita) Nabasa ed saratan a bersikulo so makapainteres ya impantongtong di Jesus tan si Nicodemo, sakey a lider na relihyon ed Jerusalem. Nabasam itan a salaysay na Biblia diad kahon a walad pahina 4. Ipangasim pan basaen itan.

Diad satan a salaysay, walaray pigaran impurek nen Jesus nipaakar ed ‘apasimbalon kianak.’a Diad tua, natulongan itayo na impangipaliwawa nen Jesus pian naebatan irayay limaran importantin tepet:

◼ Panon kaimportante so kianak lamet?

◼ Akadepende kasi’d sikatayo so pakaeksperiensya na kianak lamet?

◼ Anto so gagala na kianak lamet?

◼ Panon itan a nagawa?

◼ Manresulta itan ed anton pananguman?

Sansakeyen tayo pan ebatan iratan a tepet.

[Paimano ed leksab]

[Kahon/Litrato ed pahina 4]

“Nakaukolan Kayon Nianak Lamet”

“Walay sakey a Fariseo a manngaray Nicodemo, sakey a pangulo da ray Judio. Aminsan a labi, linma’d kinen Jesus. ‘Rabbi,’ kuan to, ‘amta mi a sakey kan bumabangat ya imbaki na Dios. Ta anggapoy toon makagawa ed saray gagawaen mo, likud no walad sikatoy Dios.’ Inmebat si Jesus ed sikato, ‘Ibagak ed sikay katuaan: Likud a nianak lamet so sakey a too, ag to nanengneng so Panariay Dios.’ Tinepet nen Nicodemo ed sikato, ‘Panon a nianak lamet so sakey a toon matatken la? Nayarian to tay ompawil ed eges na ina to insan iyanak lamet?’ ‘Ibagak ed sikay katuaan,’ ebat nen Jesus, ‘No ag nianak ed danum tan espiritu so sakey a too, ag makaloob ed Panariay Dios. Say nianak ed laman, laman, tan say nianak ed espiritu, espiritu. Agka mankelaw lapud imbagak ed sika, Nakaukolan kayon nianak lamet. Onsiplog so dagem ed inerman a pasen a labay to, et narengel moy siplog to, balet agmo amta no iner so panlalapuan tan lalaen to. Ontan met so kipapasey balang sakey a nianak ed espiritu.’ ‘Panon iyan nagawa?’ tepet nen Nicodemo. Inmebat si Jesus, ‘Maestro ka’d Israel et agmo amta iya? Ibagak ed sikay katuaan: Sasalitaen mi amta mi, tan ibabaga mi naimatonan mi, balet agyo nin siansia awaten so pantatasi mi. No agyo ak sisiaen ed sasalitaen ko’d sikayo nipaakar ed mangaraldalin a bengatla, panoy panisia yo’d siak sirin no salitaen ko ray nipaakar ed mangatatawen a bengatla?’”​—Juan 3:1-12, Maung a Balita.

Kianak Lamet​—Panon Kaimportante?

SANLEGAY impantongtong di Jesus tan Nicodemo, impurek nen Jesus a talagan importante so kianak lamet. Panon ton impalinew itan ey?

Imanoen pa no panoy impangibaga to: “Likud a nianak lamet so sakey a too, ag to nanengneng so Panariay Dios.” (Juan 3:3, Maung a Balita) Idadanet na saray salitan “likud” tan “ag” a nakaukolan so kianak lamet. Singa bilang, no walay mangibagan, “Likud no onsinag so agew, ag naliwawaay kaliberliber,” say labay ton ibaga et kakkaukolay sinag na agew pian maliwaway kaliberliber. Mipadpara, impalinew nen Jesus a talagan kakkaukolan so kianak lamet pian nanengneng so Panariay Dios.

Insan, pian lalon nidanet nen Jesus so punto to, inkuan to: “Nakaukolan kayon nianak lamet.” (Juan 3:7, Maung a Balita) Malinlinew ya unong ed si Jesus, say kianak lamet et kakaukolanen pian say sakey et “makaloob ed Panariay Dios.”​—Juan 3:5, Maung a Balita.

Lapud ta ipapasen nen Jesus a talagan importante so kianak lamet, nepeg a seguroen na saray Kristiano a susto so pakatalos da ed saya. Alimbawa, diad padesir mo, akadepende kasi’d sakey a Kristiano so kianak to lamet?

[Blurb ed pahina 5]

“Likud no onsinag so agew, ag naliwawaay kaliberliber”

Kianak Lamet​—Kasin Sika so Mandesisyon?

SIOPA so akadependian na kianak lamet? Sano kokombinsien na arum a ministro iray totoo a magmaliw a Kristianon born again, sasalambiten da imay imbaga nen Jesus: “Nakaukolan kayon nianak lamet.” (Juan 3:7, Maung a Balita) Uusaren da iyan imbaga nen Jesus a pinagka-ganggan pian magmaliw a born again iray totoo. Sirin et ipupulong da a wala la’d balang too no unoren to imay imbaga nen Jesus tan no gawaen to iray kakaukolanen pian magmaliw a nianak lamet. Base ed satan a panagkatunongan da, ibabaga ran personal a desisyon so kianak lamet. Balet, kasin ontan a talaga so labay ya ibaga nen Jesus ed si Nicodemo?

No talosan tayon maong imay imbaga nen Jesus, agto ibabangat ya akauley so toon manpili no kasin labay toy nianak lamet odino andi. Akin et ontan so nibaga tayo? Say Griegon salita a nipatalos a “nianak lamet” et nayari met a mankabaliksan na “nianak a manlapud tagey.” (Juan 3:3, paimano’d leksab na Maung a Balita) Kanian, unong ed satan a kabaliksan, say kianak lamet et “nanlapu ed tagey,” salanti, “manlapu ed Ama.” (Juan 19:11; Santiago 1:17) On, say panlapuan na satan et say Dios.​—1 Juan 3:9.

Base ed satan sirin, mainomay tayon natalosan ya aliwan say indibidual so manpili no kasin sikatoy nianak lamet odino andi. Singa bilang, sanen inyanak kayo, kasin lapud dilin panlabayan yo kanian agawa itan? Siempre andi! Inyanak kayo ta inilalak kayo na ama yo. Mipadpara, naeksperiensya tayo labat so kianak lamet no linawa itan na Dios, say mangatatawen ya Ama tayo. (Juan 1:13) Kanian duga labat so imbaga nen apostol Pedro ya: ‘Nagalang komoy Dios tan Ama na Katawan tayon Jesu-Kristo! Lapud baleg a panangasi Dios, inikdan to itayoy balon bilay.’​—1 Pedro 1:3, Maung a Balita.

Ganggan Kasi Iya?

Nayarin oniay isipen balet na arum: ‘No talagan aliwan say indibidual so makapandesisyon ed kianak to lamet, akin balet et ingganggan nen Jesus a, “Nakaukolan kayon nianak lamet”?’ Marakep itan a tepet. Ta no talagan ingganggan itan nen Jesus, ipapagawa to sirin ed sikatayo so agtayo sarag a gawaen. Tan singa aliwan makatunongan itan. No ontan sirin, antoy labay ya ibaga na nakaukolan kayon “nianak lamet”?

Diad orihinal a lenguahe, samay imbaga nen Jesus et aliwan ganggan, noagta wala labat lay ibabalikas to. Mangala tayo pay alimbawa. Kunwari et dakel so eskuelaan ed sakey a syudad. Sakey ed saratan ya eskuelaan et eksklusibon parad saray estudyanten katutubo a manaayam ed sakey a lugar ya arawi’d syudad. Aminsan, sakey a kalangweran ya aliwan katutubo so akitongtong ed prinsipal na satan ya eskuelaan, tan inkuan ton “Labay koy manpa-enroll ed sayan eskuelaan.” Kuan na prinsipal ya, “Pian awaten mi ka dia, kaukolan a katutubo ka.” Siempre, saman ya imbaga na prinsipal et aliwan ganggan. Agto igaganggan imay estudyante, noagta ibabaga to labat no antoy kakaukolanen pian makapanaral ditan. Mipadpara, sanen inkuan nen Jesus a: “Nakaukolan kayon nianak lamet,” ibabaga to labat no antoy kakaukolanen pian say sakey et “makaloob ed Panariay Dios.”

Satan a Panarian na Dios et walay pikonektaan to ed sananey nin aspekto na kianak lamet. Mikonektaan itan a Panarian ed tepet ya, Anto so gagala na kianak lamet? No naamtaan tayoy ebat ed satan, nawalaan tayoy dugan pakatalos ed kabaliksan na kianak lamet.

[Litrato ed pahina 6]

Antoy piparaan na kianak lamet tan say literal a kianak?

Kianak Lamet​—Anto so Gagala na Satan?

PANISIAAN na dakel a kaukolan day nianak lamet pian nawalaan iray andi-anggaan a kililiktar. Imanoen balet so inkuan a mismo nen Jesus nipaakar ed gagala na kianak lamet: “Likud a nianak lamet so sakey a too, ag to nanengneng so Panariay Dios.” (Juan 3:3, Maung a Balita) Kanian, kaukolan so kianak lamet aliwan pian niliktar, noagta pian makaloob ed Panarian na Dios. Nayarin itepet balet na arum, ‘Agta say iloob ed Panarian tan kiliktar et pareho labat?’ Andi. Pian natalosan tayoy pandumaan da irayan dua, amtaen tayo nin unona so kabaliksan na “Panariay Dios.”

Say panarian et sakey a klase na gobierno. Sirin, say “Panariay Dios” et mankabaliksan na “gobierno na Dios.” Ibabangat na Biblia a si Jesu-Kristo, say “anak na too,” so Ari na Panarian na Dios tan walaray kakaiba ton manuley. (Daniel 7:1, 13, 14; Mateo 26:63, 64) Niarum ni, naamtaan tayo’d puyan ed si apostol Juan a saray kaiba nen Kristo a manuley et totoon pinili manlapud “balang kailalakan, tan salita tan baley tan nasyon” tan “manari ra ed tapew na dalin.” (Apocalipsis 5:9, 10; 20:6) Ipapaamta met na Biblia a sarayan manuley ya ari et “daiset a papastolan” a say bilang da et 144,000, tan ‘asaliw ira diad dalin.’​—Lucas. 12:32; Apocalipsis 14:1, 3.

Iner so akaletnegay Panarian na Dios? Say “panarian na Dios” et tatawagen met a “panarian na tawen,” a mangipapanengneng a si Jesus tan saray ararin kakaiba to et manuuley diad tawen. (Lucas 8:10; Mateo 13:11) Kanian, say Panarian na Dios et gobierno ed tawen a say manuley et si Jesus tan saray kakaiba to a pinili ed katooan.

Anto sirin so labay ya ibaga nen Jesus sanen inkuan ton kaukolan so kianak lamet pian “makaloob ed Panariay Dios”? Say labay ton ibaga, kaukolan a say sakey et nianak lamet pian magmaliw a manuley a kaiba nen Kristo ed tawen. Diad simplin panangibaga, say gagala na kianak lamet et pian iparaan so melag a grupo na totoo parad panuley ed tawen.

Diad sarayan apantongtongan tayo, naamtaan tayon say kianak lamet et talagan importante, say Dios so mamipili no siopay nianak lamet, tan ipaparaan na satan so grupo na totoo parad panuley ed tawen. Balet, panon so kagawa na kianak lamet?

[Blurb ed pahina 7]

Say gagala na kianak lamet et pian iparaan so melag a grupo na totoo parad panuley ed tawen

[Litrato ed pahina 7]

Si Jesu-Kristo tan saray kakaiba to a pinili ed katooan so manuley ed Panarian na Dios

Kianak Lamet​—Panon Itan a Nagawa?

AGLABAT imbaga nen Jesus ed si Nicodemo so nipaakar ed kaimportantian, panlapuan, tan gagala na kianak lamet, noag pati say pakagawa na satan. Inkuan nen Jesus: “No ag nianak ed danum tan espiritu so sakey a too, ag makaloob ed Panariay Dios.” (Juan 3:5, Maung a Balita) Kanian, nianak lamet so sakey a too panamegley na danum tan espiritu. Balet antoy natutukoy dia a “danum tan espiritu”?

“Danum tan Espiritu”​—Anto Iratan?

Lapud kabkabisado nen Nicodemo so relihyon da ran Judio, seguradon sikatoy pamilyar ed impangusar na Hebreon Kasulatan (kabkabat met ed tawag a Daan a Sipan) ed terminon “espiritu na Dios”​—say aktibon puersa na Dios ya ontutulong ed totoo pian makagawa na makapadinayew iran bengatla. (Genesis 41:38; Exodo 31:3; 1 Samuel 10:6) Kanian sanen sinalambit nen Jesus so salitan “espiritu,” atalosan nen Nicodemo a say tutukoyen to et say masanton espiritu odino aktibon puersa na Dios.

Anto balet imay danum a tinukoy nen Jesus ey? No basaen tayo iramay akarekord ya agawgawa antis tan kayari na impantongtong di Jesus tan Nicodemo, ipapanengneng na saraya a si Juan a Managbautismo tan saray babangatan nen Jesus et nambabautismo ed danum. (Juan 1:19, 31; 3:22; 4:1-3) Tan pamilyar iray taga Jerusalem ed saya. Kanian, sanen sinalambit nen Jesus so nipaakar ed danum, seguradon atebek nen Nicodemo a say tutukoyen nen Jesus et aliwan basta danum, noagta say bautismo ed danum.a

Abautismoan ed Masanton Espiritu

No say tutukoyen na ‘kianak ed danum’ et pakabautismoan ed danum, antoy kabaliksan na ‘kianak ed espiritu’? Sakbay nin agawa imay impitongtong nen Nicodemo ed si Jesus, impulong nen Juan a Managbautismo ya aliwa labat lan danum noagta pati espiritu so walaay betang ed bautismo. Oniay inkuan to: “Siak binyagan ta kayo ed danum. Sikato [si Jesus] balet binyagan to kayo naani na espiritu santo.” (Marcos 1:7, 8) Oniay impaneskribe nen Marcos, sakey a managsulat na Ebanghelyo, ed sankaunaan a bautismo ed danum tan espiritu: “Agawa ed saraman ya agew, a si Jesus sinmabi a nanlapu ed Nazaret na Galilea, et bininyagan nen Juan ed Jordan. Et tampol a sanen ontatatdang a nanlapu ed danum, anengneng to so saray katawenan a linmukas, tan say espiritu a singa malapati ya onleleksab ed sikato.” (Marcos 1:9, 10) Sanen impalseb si Jesus ed Jordan, sikatoy binautismoan ed danum. Tan diad samay bektan akaawat na espiritu manlapud tawen, sikatoy abautismoan ed masanton espiritu.

Manga taloran taon kayari na impakabautismoan nen Jesus, oniay impaseguro to ed saray babangatan to: “Nabinyagan kayo na espiritu santo ed aliwa lan dakel ya agew a manlapu ed natan.” (Gawa 1:5) Kapigan itan agawa?

Nen Pentecostes 33 C.E., nantitipon ed sakey ya abung ed Jerusalem so manga 120 a babangatan nen Jesus. “Kapagdakan sinmabi a nanlapu ed tawen so sakey a tanol a singa sakey a dagem a mabiskeg a sinmabi a maksil, et pinano to so sankaabungan a kawalaan dan akayurong. Et pinmatnag ed sikara so diladila a singa apoy a niyutob. . . . Et sikaray napno ya amin na espiritu santo.” (Gawa 2:1-4) Diad saman met lanlamang ya agew, pinaseseg iray walad Jerusalem a manpabautismo ed danum. Oniay inkuan nen apostol Pedro ed saray totoo: “Magbabawi kayo, tan manbinyag so sinansakey ed sikayo ed ngaran nen Jesu-Kristo, pian pakapaandian na kasalanan yo, et awaten yo naani langkap na espiritu santo.” Antoy reaksion da? “Saraman sirin so angawat na salita to, nambinyag ira; et niarum ed saray binangatan ed saman ya agew, so ngalngalin talon libo a kamarerwa.”​—Gawa 2:38, 41.

Nankaduan Proseso

Antoy ipapaamta na sarayan bautismo nipaakar ed kianak lamet? Ipapanengneng na saraya a nagawa so kianak lamet panamegley na nankaduan proseso. Imanoen a nampabautismo nin unona si Jesus ed danum, insan akaawat na masanton espiritu. Ontan met, abautismoan ni’d danum iray inmuunan babangatan (arum et binautismoan nen Juan a Managbautismo), insan ira akaawat na masanton espiritu. (Juan 1:26-36) Mipadpara, abautismoan nin unona ed danum iray 3,000 a balon babangatan, insan ira akaawat na masanton espiritu.

No ontan so agawa nen Pentecostes 33 C.E., panon met sirin so pakagawa na kianak lamet ed sayan panaon? Mipara itan ed samay agawa ed saray apostol nen Jesus tan ed inmuunan babangatan. Unona, kaukolan a say sakey et magbabawi ed saray kasalanan to, umanen toy mauges a kabibilay to, igana toy bilay to ed pandayew tan panlingkor ed si Jehova, tan ipaamta to itan a desisyon to ed publiko panamegley na bautismo ed danum. Insan, no sikatoy pilien na Dios pian manuley ed Panarian To, sikatoy makaawat na masanton espiritu. Say unonan parte na sayan nankaduan proseso (bautismo ed danum) et desisyon na indibidual; say komaduan parte (bautismo ed espiritu) et akadepende ed Dios. Sano nagawa ed sakey a too iyan duaran bautismo, insan nibagan sikatoy nianak lamet.

Balet, akin a diad samay impitongtong nen Jesus ed si Nicodemo et inusar toy terminon “nianak”? Pian nidanet a saramay abautismoan ed danum tan espiritu et makaeksperiensya na baleg a pananguman. Ipaliwawa ed onsublay ya artikulo itan ya aspekto na kianak lamet.

[Paimano ed leksab]

[Litrato ed pahina 9]

Binautismoan nen Juan ed danum iray magbabawin Israelita

Kianak Lamet​—Manresulta Itan ed Anton Pananguman?

AKIN et inusar nen Jesus so terminon ‘nianak ed espiritu’ sanen sinalambit toy nipaakar ed bautismo ed masanton espiritu? (Juan 3:5, Maung a Balita) No maminsan, sano uusaren so salitan “kianak,” say labay ton ibaga et “gapoan.” Kanian, say tutukoyen a “kianak lamet” et “balon gapoan.” No ontan sirin, idadanet na salitan “nianak” tan “kianak lamet” a say relasyon na Dios tan saramay abautismoan ed masanton espiritu et walaay balon gapoan. Panon a nagawa itan a baleg a pananguman?

Sanen impaliwawa nen apostol Pablo no panon ya ipaparaan na Dios iray totoo parad panuley da ed tawen, say inusar ton alimbawa et nipaakar ed pamilya. Insulat to ed saray Kristiano nen panaon to a sikaray ‘tagibien na Dios’ tan sirin et ipasen To ran “singa anak.” (Galacia 4:5, NW; Hebreos 12:7) Sayan alimbawa nipaakar ed panagtagibi et ontulong pian natalosan tayo no anton pananguman so nagagawa sano say sakey et abautismoan ed masanton espiritu. Pian nalinewan itayo, pawilen tayo pa lamet imay ilustrasyon nipaakar ed sakey a kalangweran a labay toy manpa-enroll ed eskuelaan a para labat ed saray estudyanten katutubo.

Pananguman Lapud Impanagibi

Diad samay ilustrasyon, agmakapan-enroll ed saman ya eskuelaan imay kalangweran lapud sikatoy aliwan katutubo. Balet, ipasen tayo pan walay agawan baleg a pananguman. Sikatoy legal a tinagibi na sakey a katutubo a padre-de-pamilya. Anto la nata’y kipapasen na samay kalangweran? Siempre lapud tinagibi la, saray kanepegan to et nayarin pareho la ed saray katutubon kalangweran. Kanian sarag to lay manaral ed saman ya eskuelaan. Baleg so angumanan na arapen to lapud satan ya impanagibi ed sikato.

Ipapanengneng na saya no antoy mas importante nin nagawa ed saramay nianak lamet. Imanoen tayo pa so pigaran pamparehoan. Diad samay ilustrasyon, naawat labat imay kalangweran no sikatoy sakey a katutubo, ta satan so kakaukolanen na eskuelaan. Balet, anggan antoy gawaen to ed dili ton pakayari, sikatoy ag-onkualipika. Mipadpara’d satan, magmaliw labat a manuley ed Panarian na Dios so arum a totoo no sikaray “nianak lamet,” ta satan so kakaukolanen. Balet, no diad dili ran pakayari labat et ag-ira onkualipika, lapud akadepende ed Dios so kianak lamet.

Akin et anguman so kipapasen na samay kalangweran? Lapud sikatoy legal a tinagibi. Siempre, ag-inuman na satan a proseso so inkatoo to, sikato nin siansia imay datin kalangweran. Anggaman ontan, sanen agawaan la iramay legal a kakaukolanen parad panagtagibi, balo lay kipapasen na samay kalangweran. On, sikatoy awalaan na balon gapoan, aliling to et nianak lamet. Sikatoy bibidbiren lan anak na samay ama ya anagibi ed sikato, kanian wala lay kanepegan ton magmaliw a kapamilya ra tan manaral ed samay eskuelaan.

Mipadpara, inuman nen Jehova so kipapasen na sakey a grupo na agperpekton totoo panamegley na legal ya impanagibi to ed sikara. Si apostol Pablo, a kaiba ed satan a grupo et oniay insulat to ed saray kaagian to: “Inawat yo ingen so espiritu na inkipaanak [“adopcion,” odino panagtagibi], a lapud saya yakis tayo, Abba, Ama. Say dilin espiritu so mamatua ed espiritu tayo, ya anak itayo na Dios.” (Roma 8:15, 16, paimano’d leksab) On, panamegley na impanagibi ed saratan a Kristiano, sikaray nagmaliw lan kabiangan na pamilya na Dios, odino “anak na Dios.”​—1 Juan 3:1; 2 Corinto 6:18.

Siempre, ag-inuman na impanagibi na Dios so inkatoo na saramay tinagibi, lapud siansia nin aliwa ran perpekto. (1 Juan 1:8) Anggaman ontan, unong ya impaliwawa ni nen Pablo, balo lay kipapasen da kayarin agawaan iray legal a kakaukolanen parad panagtagibi. Ontan met, intanem na espiritu na Dios ed kapusoan na saramay tinagibi so mabisbiskeg a pananisia a sikaray manayam ed tawen kaibay Kristo. (1 Juan 3:2) Lapud satan a kombiksion da, anguma-uman so panmoria ra ed bilay. (2 Corinto 1:21, 22) On, sikaray awalaan na balon gapoan, aliling to et nianak ira lamet.

Oniay inkuan na Biblia nipaakar ed saray tinagibin anak na Dios: “Sikara so nagawa a saserdote na Dios tan si Kristo, et miari ra ed sikato ed sanlibon taon.” (Apocalipsis 20:6) Kaiba nen Kristo irayan tinagibin anak na Dios pian manuley bilang arari diad Panarian na Dios, odino gobierno ed tawen. Inkuan nen apostol Pedro ed saray kaagian to a makaawat ira na “tawir ya agnaderal, tan agnarumsisan tan agnaumas” a ‘nigana ed katawenan’ parad sikara. (1 Pedro 1:3, 4) Talagan mabmabli itan a tawir!

Balet, nia ni sakey a tepet: No sarayan nianak lamet et manuley bilang arari diad tawen, sioparay uleyan da? Naebatan itan ed onsublay ya artikulo.

[Litrato ed pahina 10]

Antoy imbaga nen Pablo nipaakar ed panagtagibi?