Ontatdang ed Palandey nen Jehova

1. Ontangwa’d lampas na

Sankatagyan a pukdol.

Wadtay palandey na Dios,

Nitandoro natan.

Totoo’d nasyones

So ontatatdang ditan.

Kuan da ed sinansakey,

‘Dios so panlingkoran.’

Natan lan panaon

Ondakel so melag a bilang.

Diad iyaaligwas,

Bendisyoy Dios nagagamoran.

Minilyoy dinmapag,

Nampasakop la ed Dios.

Diad Dios et insipan dan

Manmatoor ira.

2. Ingganggan nen Jesus

A manpulong itayo.

Panarian ibalita

Ed ami’ totoo.

Si Kristoy Ari la,

Ondapag ed sikato.

Diad saray ontalineng,

Bibliay ’yaral tayo.

Manliket so puso

Ed agaylan indaak tayo!

On, lawas ti’n mibiang.

Jehova’y ipaamta’d mundo.

Ikelyaw ti’ sirin,

Pian narengel na amin,

‘Onla’d palandey nen Jah

Tan ditan mansiansia.’