Pangipakabat ed Ngaran nen Jehova ed Intiron Dalin
1 Sanen ingganggan nen Jesus iray babangatan to a magmaliw a tastasi “ed sankaarawian a parti na dalin,” sikatoy angiletneg la na alimbawa a tumboken da. (Gawa 1:8) Kapiganman tan inerman a pakaromogan to’d totoo, intongtong toy nipaakar ed gagala na Dios ed totoo. Diad pangaalig ed si Jesus, uusaren na matoor ya aripen a klase so dakel a nanduruman paraan pian ‘nipakabat [so ngaran nen Jehova] ed intiron dalin.’—Isa. 12:4, 5.
2 No Antoy Agawaan ed Apalabas: Diad apalabas iran taon, nipalapag ed peryodiko iray sermon; apawala so “Photo-Drama of Creation” tan impabantayan ed minilyon; tan malaknab ya inusar so ponograpo tan diad inlabas na panaon, say radyo—amin iratan so nausar a pangipulong ed maong a balita. Siempre, abayag lan manunan nidanet so personal a pitongtong ed totoo ta pian nabayuboan so nalmoan ya interes. Lapud satan, apaneknekan lan say panagkabkaabungan so talagan epektibon paraan ed pangipakabat ed ngaran nen Jehova ed amin a pasen.—Gawa 5:42.
3 No Antoy Nagagawa ed Panaon Tayo: Lapud panguuman na panaon et okupadon tuloy iray totoo ed mundo, tan diad dakel a pasen et matalag lan naromog so totoo ed kaabungan da. Pigpigara lay mahilig a mangipanaon na pambasa tan pandalepdep ed espiritual iran bengatla. Sirin nepeg tayon iyadapta so ministeryo tayo unong ed satan. Niarum ni ed tuloytuloy a pakakakobri ed teritorya diad panagkabkaabungan, papasesegen itayon onla ed kawalaay totoo tan magmaliw ya ‘akaparaan lawas’ a mangidepensa ed ilalo a walad sikatayo. (1 Ped. 3:15) Kabaliksan na saya a panggunaetan tayon pulongan iray katrabahoan, kaeskuelaan, totoo ed karsada tan diad parki odino paradaan, ed saray lakoan, tan inerman ni a pakaromogan ed totoo. Lapud tulong nen Jehova, ontalonan tuloy iray sagpot tayo. Kasin mibibiang kayo diad panabi ed totoo inerman so kawalaan da?
4 Salien komon na balang sakey ed sikatayo so amin a posiblin paraan sano ipakabat so ngaran nen Jehova ed teritorya tayo. Nagamoran tayoy pirmin kapenek diad sigpot a panumpal ed ministeryo tayo, diad panilalo tayon iyasingger nen Jehova iray maptek-impanpuso.—Juan 6:44.