Tinaon a Miting Oktubre 2, 1999

SAY TINAON A MITING na saray membro na Watchtower Bible and Tract Society of Pennsylvania so nagawa no Oktubre 2, 1999, diad Assembly Hall na Tastasi nen Jehova, diad 2932 Kennedy Boulevard, Jersey City, New Jersey. Say pilimeron miting na saray membro labat so nagawa ed 9:15 n.k., a tumbokan na inkalapagan a tinaon a miting diad 10:00 n.k.

Kaukolan ya ipaamta la natan na saray membro na Korporasyon ed Opisina na Sekretaryo so nipaakar ed antokaman ya impansalat na address da diad apalabas a taon ta pian onsabi ed sikara leleg na Hulyo iray regular a sulat na abiso tan saray dokumenton-kasandi (proxy).

Saray dokumenton-kasandi, ya ipawit ed saray membro katekep so abiso na tinaon a miting, so kaukolan ya ipawil ta pian makasabi ed Opisina na Sekretaryo na Sosyedad ya ag-onlampas ed Agosto 1. Kaukolan a kompletoen tan ipawil a tampol na kada membro so dokumenton-kasandi to, a mangidalatdat no kasin sikatoy makapimiting odino andi. Say impormasyon a nilugan ed dokumenton-kasandi so kaukolan a piho nipaakar ed sayan punto, lapud pangibasiyan itan diad panetermina no siopa so personal a makaonla.

Ilaloan a say intiron sesyon, pati say pormal a business meeting tan saray report, so nasumpal ed 1:00 n.n. odino tampol kayari to. Anggapo so sesyon ed ngarem. Lapud limitado so espasyo, makaloob labat iramay walaay ticket. Anggapo iray uksoyan a gawaen pian ikonekta so tinaon a miting ed saray telepono diad arum ya auditorium.

Tepetepet Manlapud Saray Managbasa

Kasin say ‘panagmarka’ a sinalambit ed 2 Tesalonica 3:14 et sakey a pormal a paraan ed kongregasyon, odino sakey itan a bengatlan gawaen la na sinansakey iran Kristiano pian napaliisan iramay agpaipetek?

Ipapabitar na sulat nen apostol Pablo ed saray taga-Tesalonica a saray matatken ed kongregasyon so walaay espisipikon betang ed ontan a ‘panagmarka.’ Balet, mitunosan ed satan et say sinansakey iran Kristiano so mansiansia, a gawaen itan a sinononot ed saray espiritual a gagala. Naapresia tayon maong iya diad pangonsidera ed simbawa nen Pablo unong ed orihinal ya inkagawaan to.

Tinmulong si Pablo a mangiletneg ed kongregasyon na Tesalonica, a tinulongan toray lalaki tan bibii pian magmaliw a mananisia. (Gawa 17:1-4) Diad saginonor et sikatoy sinmulat manlapud Corinto pian komendaan tan pasesegen ira. Angiter met si Pablo na nakaukolan a simbawa. Pinaseseg toran ‘manbilay a mareen, gawaen so nabebetangan dan dili, tan mankimey ed saray lima ra.’ Aliwan ontan so gagawaen na arum, kanian oniay inyarum nen Pablo: “Bilinen mi kayo, agagi, a simbawaen yo so saray agnauksoy, ibalap yo so apunaw ed puso, tagano yo so saray makapuy.” Malinew, walaray “agnauksoy”a ed limog da a nakaukolan a simbawaen.​—1 Tesalonica 1:2-10; 4:11; 5:14.

Pigaran bulan ed saginonor, insulat nen Pablo so mikaduan sulat to ed saray taga-Tesalonica, tekep na kaaruman iran komento nipaakar ed arapen a kiwawala nen Jesus. Inter met nen Pablo so kaaruman a panangigiya ed no panon so pideneng ed saray agnauksoy ya ‘anggapoy gagawaen da noagta mibabali ira ed saray bengatlan anggapoy siglaotan ed sikara.’ Misumlangan iray gagawaen da ed namparan alimbawa nen Pablo bilang makulin komikimey tan ed mabitar a ganggan to nipaakar ed panlegpet na sakey ed inkasikaton dili. (2 Tesalonica 3:7-12) Imbilin nen Pablo a walaray kundang a kaukolan a gawaen. Ginawa irayan kundang kayari na impanimbawa odino impangonseho la na mamatatken ed say agnauksoy. Insulat nen Pablo:

“Natan ibilin mi ed sikayo, agagi, . . . paliisan yo so amin ya agagi a manaakar ed andi-ganggan, tan ag-ira minonong ed bangat ya inawat da ed sikami. Et ingen sikayo, agagi, agkayo komon nakesawan a manggawa na maabig. Tan no wala so too ya agminonong ed salita tayo a nipaakar ed sayan sulat tandaan [“markaan,” NW] yo so satan a too, pian agkayo komon makapiulop ed sikato, ta pian komon nabaingan. Tan ontan met agyo ibibilang a kabusol, noag ingen bilinbilin yo a singa agi.”​—2 Tesalonica 3:6, 13-15.

Kanian laktipen na sarayan kaaruman a kundang so iyarawi ed saray agnauksoy, a markaan ira, ya ag-ira pililimogan, ingen simbawaen ira bilang agagi. Diad antoran sirkumstansia a nayarin gawaen na saray membro na kongregasyon so ontan iran kundang? Bilang tulong a mamalinew ed saya, ibiig tayo so taloran situasyon ya aliwan pangiyaapasakeyan nen Pablo dia.

1. Amta tayon ag-ayadyari iray Kristiano tan walaan iray kakulangan. Siansia, say aro so tanda na tuan Inkakristiano kanian kakaukolanen ed sikatayo so pagmaliw a makatalos tan manamerdona ed kalilingoan na arum. Alimbawa, nayarin say sakey a Kristiano et sagpaminsan ya onsulag ed sanok, a singa agawa ed baetan di Bernabe tan Pablo. (Gawa 15:36-40) Odino lapud abanalan et nayarin garambasal tan ansakit so pakapansalita na sakey. Diad ontan iran kipapasen, say pangipatnag ed aro tan pangiyaplika ed simbawa na Biblia so ontulong ed sikatayo pian nasakbongay lingo, mantultuloy a manbilay, milimog, tan mikimey ed kapara tayon Kristiano. (Mateo 5:23-25; 6:14; 7:1-5; 1 Pedro 4:8) Malinew, saray kakulangan ed onian kipapasen et aliwan samay tutukoyen nen Pablo ed 2 Tesalonica.

2. Si Pablo et agto tutukoyen so situasyon a personal a nilabay na sakey a Kristiano ya agla tanto milimog ed arum a makapuy iray paraan odino awawey da​—alimbawa, say sakey a mapatnag lan aarapen ton maong so panligliwaan odino materyal iran bengatla. Odino nayarin limitaan na sakey ya ateng so pililimog na anak to ed saray kalangweran ya agmangingalngalep ed pakauley na atateng, a makapasakit odino mapeligro so piaay-ayam da, odino agda ipapasen a seryoso so Inkakristiano. Say ontan iran simplin personal a desisyon so mitunosan ed nabasa tayo diad Uliran 13:20: “Miulop ka ed saray makabat a totoo, et sika naani makabat; balet say kaiba na saray maatiw manlikna na segsegang.”​—Ikompara so 1 Corinto 15:33.

3. Nipaakar ed dumaruma lan inkaseryoso na sakey bengatla, sinulat nen Pablo iray taga-Corinto makasengeg ed sakey a mangaagamil na ambelat a kasalanan tan agmagbabawi. Say ontan iran agmagbabawin managkasalanan so nakaukolan ya ekalen ed kongregasyon. Say “mauges” a too so kaukolan ya iyawat ed Satanas, a singa panangibaga. Diad ontan, saray matoor a Kristiano so kaukolan ya agmiulop ed ontan iran mauges; binilin nen apostol Juan iray Kristiano ya agda ni ingen iratan ibabano. (1 Corinto 5:1-13; 2 Juan 9-11) Balet, agmet iya ontukoy ed simbawa na 2 Tesalonica 3:14.

Miduma so taloran situasyon ed tagey diad situasyon a mangilalanor ed saray “agnauksoy” a singa say siningbat ed 2 Tesalonica. Insulat nen Pablo a saraya et ‘agagi’ nin siansia, a nepeg a simbawaen tan tratoen bilang agi. Kanian, say probleman nipaakar ed saray “agnauksoy” ya agagi et agmanutukoy ed personal lambengat a pamaakaran ed baetan na saray Kristiano nisay inkaseryoso lan maong na bengatla a nepeg lan onsalet iray mamatatken ed kongregasyon pian mandispelosip, a singa ginawa nen Pablo a misiglaotan ed imoral a kipapasen diad Corinto. Saray “agnauksoy” so ag-akapankasalanan na ambelat, a singa samay lakin adispelosip ed Corinto.

Saray “agnauksoy” ed Tesalonica so nankasalanan lapud ompapatnag lan ikakasipa ed Inkakristiano. Ag-ira mantrabaho, balanglan lapud iisipen dan asingsingger lay ipawil nen Kristo odino lapud sikaray mangiras. Niarum ni, sikaray pansesengegay ompapatnag lan kagigirogiro diad ‘pibabali ra ed bengatlan anggapoy siglaotan ed sikara.’ Nayarin sikaray aminpiga lan sinimbawa na mamatatken ed kongregasyon, a mitunosan ed bilin nen Pablo diad pilimeron sulat to tan ed arum nin bilin na Dios. (Uliran 6:6-11; 10:4, 5; 12:11, 24; 24:30-34) Siansia et nantultuloy ira ed kurson nampabanday ed kongregasyon tan nayarin mangimpluensia ni ed arum a Kristiano. Kanian parungtalan ya impaimano na Kristianon matatken a si Pablo so pagmamaliw dan agnauksoy tan inwalwal toy nalilingo lan kurang da, ya agto binitlay kangaranan na saray indibidual.

Impaamta to met ed kongregasyon a matukoy ed biang da bilang indibidual iran Kristiano a ‘markaan’ so agnauksoy. Say labay ton ibaga ed saya et nepeg ya imanoen na sinansakey iramay onkikiwas a mitukoyan ed kurson parungtalan lan impasakbay ed kongregasyon. Imbilin nen Pablo a “paliisan [da] so amin ya agagi a manaakar ed andi-ganggan.” Maseguron agkabaliksan na satan a sigpot ya arawian so ontan a too, lapud kaukolan iran ‘bilinbilinen a singa agi.’ Tuloytuloy ni iran katongtongen bilang Kristiano diad saray miting tan nayarin ontan met ed ministeryo. Nailaloan dan say agi ra so onkiwas ed panamilin tan italirak toray dalan ton makagirogiro.

Diad anton pantalos a sikatoy “paliisan” da? Mabitar a saya et diad panaoy sosyal a panduroypo. (Ikompara so Galacia 2:12.) Say itunda ran piulop ed sikato diad sosyal a panlilimog tan panligliwaan so nayarin mangipamoria ed sikato ya aglabay na totoon walaay prinsipyo iray gagawaen to. Anggaman agto nabaingan tan agmanguman, anggan panon et agnaaralan na arum iray gagawaen to tan agmagmaliw a singa sikato. Ontan met, nepeg ya iyapasakey na sarayan indibidual a Kristiano so makapabiskeg iran bengatla. Binilin ira nen Pablo: “Ingen sikayo, agagi, agkayo komon nakesawan a manggawa na maabig.”​—2 Tesalonica 3:13.

Malinew, sayan simbawa na apostol so aliwan basiyan pian iyabeba odino husgaan iray agagi tayon makakagaway angkelag iran lingo odino kasalanan. Imbes, say gagala na satan et pian tulongan so sakey ya onaarap la ed kurson makagirogiro ya ompatnag lan misumlangan ed Inkakristiano.

Ag-indatak nen Pablo so detalyado iran totontonen a singano sasalien toy mamawala na komplikado iran paraan. Balet malinew a nepeg a simbawaen nin unona tan tulongan na mamatatken so agnauksoy. No ag-ira ontalona tan mantultuloy so too ed dalan a makagirogiro tan walaan na posibilidad ya onkayat, nayarin nibaga da lan kaukolan a pasakbayan so kongregasyon. Iyuksoy da so sakey a paliwawa nipaakar ed no akin a nakaukolan a paliisan so ontan lan pagmamaliw ya agnauksoy. Agda bitlaen iray kangaranan, balet say manamasakbay a paliwawa ra so manalimbeng ed kongregasyon lapud makapanalwar nin maong iray maunor pian limitaan day sosyal iran aktibidades dan kaiba so siopaman a mabitar a mangipapatnag na ontan lan pagmamaliw ya agnauksoy.

Komon ta onsabi panaon a say agnauksoy et nabaingan ed saray gagawaen to tan onkiwas a manguman. No nanenengneng lay mamatatken tan arum ni ed kongregasyon so panguuman to, makauley lay sinansakey a mangitultuloy ed mismon sosyal a pililimog da ed sikato.

Bilang sumaryo sirin: Idaulo na mamatatken ed kongregasyon so panulong tan panimbawa no walay onkikiwas ya agnauksoy. No agto imanoen so kakapuyay gagawaen to tan mantultuloy a magmaliw a makapuy ya impluensia, pasakbayan na mamatatken so kongregasyon diad panamegley na sakey a paliwawan mangipapalinew ed panmoria na Biblia​—balanglan nipaakar itan ed pi-date ed saray agmananisia, odino antokaman ya agmanepeg a kurso. (1 Corinto 7:39; 2 Corinto 6:14) Saray Kristiano ed kongregasyon ya apasakbayan la sirin so makapandesidin sinansakey a limitaan so antokaman a sosyal a pililimog ed saramay mapatpatnag a mangegemtan na matungangan kurso balet siansia nin agagi ira.

[Paimano ed leksab]

[Saray litrato ed pahina 31]

Baaten na Kristianon mamatatken iray agnauksoy balet ta moriaen da ira bilang kapananisiaan