Itultuloy a “Manggawa na Maabig”
1 Maabig so ginawa yo sanen nagmaliw kayon lingkor nen Jehova a Dios. Balet, natan say angat ed sarayan maatap a panaon et say pantultuloy a ‘panggawa na maabig.’ (Gal. 6:9) Anggaman mankaukolan iya na peteg a sagpot, nagawaan yo itan. Panon?
2 Bayuboan so Awawey na Kanonotan nen Jesus: Singa si Jesus, no mantultuloy yon iyapasakey so ilalo nipaakar ed Panarian, nasungdoan yo iray subok. (Heb. 12:2, 3) Maseguro kayo ya aaroen kayo nen Jehova tan labay ton ontalona kayo. (2 Ped. 3:9) Sigpot kayon manmatalek ed sikato, a makompiyansan tulongan to kayo. (1 Cor. 10:13) Mantultuloy ed pikakasi, a patulongan kayo ed si Jehova a makapansungdo. (Roma 12:12) Panliketan yo so kombiksion yo a say panagsungdo yo so mangitonton ed naabobonan a kipapasen ed imaton na Dios. (Roma 5:3-5) Mangitarok ed sikayo na dilin kapenek tan mamaliket ed puso nen Jehova so inkamatoor yo ed pamayubo ed “ontan met ya awawey na kanonotan a walad si Kristo Jesus.”—Roma 15:5, NW; Uli. 27:11.
3 Itultuloy a Gawaen Iray Maabig a Kimey: Sigpot ya anamoten iray probisyon ya itatarya nen Jehova parad totoo to pian natulongan iran mantultuloy a manggawa na maabig. Mantinien so maabig a personal a rotina ed panagbasa na Salitay Dios tan aralen iray nibase ed Biblian palapagan na matoor tan makabat ya aripen a klase. Matoor a manparaan, onatendi, tan mibiang ed amin iran miting ed kongregasyon. Sakbay tan kayari na saray Kristianon miting, maapit a milimog ed saray espiritual ya agagi yo. Mangiletneg na realistiko iran kalat ed ministeryo yo ta pian nawalaan na makabaliksan a pibibiang ed lawak na kimeyan tan pian napaaligwas iray dunong yo ed panangipresenta na maong a balita ed arum.
4 Diad onian paraan et nitultuloy yon nagawaan so maabig tan naeksperiensia yo met so baleg a gayaga. Nipaakar ed saya, onia so inkuan na sakey ya agi ed Italya: “Sano nasabi lay labi, tan akasempet ak la kayari na sanagew a serbisyo ed si Jehova, liknaen kon naksawan ak, tua itan. Balet maliket ak, tan pisalsalamatan koy Jehova ed pangiiter to’d siak na gayaga ya anggapoy makasamsam.” Kanian, itultuloy a gawaen so maabig, tan naeksperiensia yo met so baleg a gayaga.