Panon Kan Makapanayam ed Mareen a Balon Mundo na Dios?

IMPASEN na Dios si Adan tan Eva diad hardin na Eden. Anggaman nagmaliw iran masugnar tan inatey, ginawa na Dios a posibli parad ananak da, pati sikatayo natan, so manbilay ya andi-anggaan diad Paraiso. Isisipan na Biblia: “Say matunong tawiren to so dalin tan manayam diman lawas.”​—Salmo 37:29.

Ibabaga na Biblia so nipaakar ed “balo a tawen” tan “balo a dalin.” (Isaias 65:17; 2 Pedro 3:13) Say “tawen” natan so tugyopen na saray gobierno na too, balet si Jesu-Kristo tan saraman so manuley a kaiba to diad tawen so tugyopen na “balo a tawen.” Agaylay karakep sano sayan balo a tawen, salanti say matunong a gobierno na Dios a mangitarok na kareenan, so manuley la ed interon dalin!

Anto sirin so “balo a dalin”?— Say balo a dalin et saray maong a totoo a mangaaro ed si Jehova. Kaukolan mon talosan, a sano tutukoyen na Biblia so “dalin,” no maminsan et ontutukoy itan ed saray totoo a manaayam diad dalin, aliwan say dalin a mismo. (Genesis 11:1; Salmo 66:4; 96:1) Kanian saray totoo a tugyopen na balo a dalin so manayam a mismo diad sayan dalin.

Say peles a mundo na mauges a totoo so naandi. Tandaan, say Delap ed panaon nen Noe so angiyanor ed mauges a mundo na totoo. Tan singa naaralan ta la, sayan peles a mauges a mundo so naderal diad Armagedon. Pantongtongan ta natan no anto so klase na bilay diad balon mundo na Dios kayari na Armagedon.

Labay mo so manbilay ya andi-anggaan ed Paraiso diad mareen a balon mundo na Dios?— Anggapoy doktor a napagmaliw to itayon manbilay ya andi-anggaan. Anggapoy tambal a makaamper ed ipatey tayo. Say saksakey a remedyo a makapambilay tayo ya andi-anggaan et say iyasingger ed Dios. Tan ibabaga ed sikatayo na Sankamaongan a Managbangat no panon itan a gawaen.

Alaen ta pa so Biblia tan lukasan itan diad Juan kapitulo 17, bersikulo 3. Dia et naromog ta iray salita na Sankamaongan a Managbangat: “Saya sikato so andi-anggaan a bilay, a naamtaan da ka a saksakey a tuan Dios, tan saman so imbakim, salanti Jesu-Kristo.”

Kanian, antoy imbaga nen Jesus a nepeg tayon gawaen pian manbilay ya andi-anggaan?— Unona, nepeg tayoy mangala na pikakabat ed Ama tayo a walad tawen, si Jehova, tan ontan met ed Anak to, ya inter toy bilay to parad sikatayo. Kabaliksan na saya a nepeg tayon aralen so Biblia. Sayan libro, Manaral Manlapud Sankamaongan a Managbangat, so ontulong ed sikatayo a manggawa ed satan.

Balet panon a say panaral nipaakar ed si Jehova so ontulong ed sikatayo pian manbilay ya andi-anggaan?— No panon a kaukolan itayon mangan kada agew, nepeg tayo met so manaral nipaakar ed si Jehova diad kada agew. Ibabaga na Biblia: “Aliwa a say tinapay labat so napambilay na too noag say amin a salitan ombesngaw ed sangi’ Dios.”​—Mateo 4:4.

Kaukolan tayo met so mangala na pikakabat nipaakar ed si Jesu-Kristo lapud imbaki na Dios so Anak to pian mangekal na kasalanan tayo. Ibabaga na Biblia: “Anggapo so arum a kilabanan.” Tan ibabaga met na Biblia: “Say manisia ed Anak walay bilay ton andi-anggaan.” (Gawa 4:12; Juan 3:36) Natan, antoy kabaliksan na ‘panisia’ ed si Jesus?— Kabaliksan to a talagan panisiaan tayo si Jesus tan amta tayo ya agtayo makapambilay ya andi-anggaan no anggapo si Jesus. Kasin panisiaan mo itan?— No manisia itayo, itultuloy tayoy manaral manlapud Sankamaongan a Managbangat ed kada agew, tan unoren tayoy ibabaga to.

Say sakey a maabig a paraan pian makaaral ed Sankamaongan a Managbangat et say pambasa ed sayan libro a paulit-ulit tan nengnengen tan nonoten so amin a litrato. Salim pa no naebatan moray tepet a manutukoy ed sarayan litrato. Ontan met, basaen so libro a kaibay nanay odino tatay mo. No anggapo ra, basaen itan kaiba iray arum a matatken la tan kaibay arum ya ugugaw. Agta alay abig no natulongan moy arum a makaaral manlapud Sankamaongan a Managbangat no antoy kaukolan dan gawaen pian manbilay ed balon mundo na Dios?—

Ibabaga met ed sikatayo na Biblia: “Say mundo so mangangga.” Balet ta ipapaliwawa na Biblia no panon tayon makapambilay ya andi-anggaan ed balon mundo na Dios. Ibabaga na satan: ‘Say mangunor ed linawa na Dios mansiansia lawas.’ (1 Juan 2:17) Kanian, panon itayon makapambilay ya andi-anggaan diad balon mundo na Dios?— On, diad pangala na pikakabat ed si Jehova tan ed inad-aro ton Anak, si Jesus. Balet kaukolan tayo met ya iyaplika so nanaaralan tayo. Komon ta say panagaral mo ed sayan libro so ontulong ed sika a manggawa ed sarayan bengatla.