Kapitulo 19
Sano Say Dalin so Napano na Pikakabat na Dios
1, 2. Panon ya aderal so palsa nen Jehova?
IYALILING a sakey a maong a pintor so kasumsumpal to’d alay dakep a painting. Makanepegan lambengat ya ikonsidera to itan a marakerakep—sakey ya obra-maestra! Balet ta diad labi et dineral itan na sakey a maimon a kalaslasan. Natural, asakitan a tuloy so pintor. Agaylay pankaliktan ton niprisoy nanderal! Tan naisip yo no panon so panpirawat na pintor ed kipawil ed datin inkadakep na kimey to.
2 Singa satan a pintor, nanggawa si Jehova na sakey ya obra-maestra diad impangiprepara ed dalin tan impangipasen to’d katooan ed satan. Kayari impamalsa ed laki tan bii, inyabawag to ya amin a mangaraldalin a kimey to so “maong iran toloy.” (Genesis 1:31) Si Adan tan Eva so dilin ananak na Dios, tan inaro to ra. Nanenengneng to la so maliket tan maglorian arapen parad sikara. Tua, inwanwan ira nen Satanas a manrebeldi, balet agsigpot ya aderal so makapakelkelaw a palsa na Dios ya agla naapiger.—Genesis 3:23, 24; 6:11, 12.
3. Anto so “bilay a peteg”?
3 Determinado so Dios pian peteken iray pamaakaran. Kaliktan ton nanengneng itayon manbilay unong ed orihinal a gagala to. Say antikey tan magulon kiwawala tayo so aliwan “bilay a peteg,” lapud satan so arawin tuloy ed gagala nen Jehova. Say “bilay a peteg” a kaliktan na Dios parad sikatayo et say “bilay ya andi anga” ed silong na ayadyari iran kipapasen.—1 Timoteo 6:12, 19.
4, 5. (a) Panon a namoria so Paraison ilalo? (b) Akin a nepeg tayon isipen so nipaakar ed ilalo tayo parad arapen?
4 Say pikakabat ed Dios so mangitatarok na responsabilidad ed arap nen Jehova. (Santiago 4:17) Balet isipen paray bendisyon a panggayagaan yo no iyaplika yo itan a pikakabat tan dampoten so andi-anggaan a bilay. Diad Salita to, say Biblia, ipipintora nen Jehova a Dios so marakep a litraton pagmaliwan na bilay ed Paraison dalin ya asingsingger la. Siempre, bilang totoo nen Jehova et ag-itayo manlilingkor ed Dios lapu lambengat ed pilalek a pakagamor na tumang. Manlilingkor tayo ed Dios lapud sikatoy inaro tayo. (Marcos 12:29, 30) Nagkalalo ni, ag-itayo magmamaliw a makanepegan ed bilay lapud panlilingkor ed si Jehova. Say andi-anggaan a bilay so sakey a regalo na Dios. (Roma 6:23) Satan so mangungguna ed sikatayo pian dalepdepen so ontan a bilay lapud say ilalo ed Paraiso so mangipapanonot no anton klasen Dios si Jehova—say maaron “mananumang ed saray mananap ed sikato.” (Hebreos 11:6) Say sakey ya ilalon masmasnag ed kanonotan tan kapusoan tayo so ontulong ed sikatayo a nasungdoan iray kairapan ed mundo nen Satanas.—Jeremias 23:20.
5 Iyapasakey tayo pa so imano tayo ed nibase’d-Biblian ilalon andi-anggaan a bilay ed arapen a mangaraldalin a Paraiso. Anto kasi nengneng na bilay sano say dalin et napano na pikakabat na Dios?
KAYARI ARMAGEDON—SAKEY A PARAISON DALIN
6. Anto so Armagedon, tan anto so kabaliksan na satan parad katooan?
6 Singa nipanengneng la, magano lan deralen nen Jehova a Dios so peles a marelmeng a sistema na bengabengatla. Say mundo so maples a mamapaarap ed tatawagey Biblia a Har–Magedon, odino Armagedon. Nayarin isipen na arum a satan a salita so manutukoy ed sakey a nuklear a kadederal ya itarok na manbabakal iran nasyon, balet say Armagedon so duman tuloy ed satan. Unong ya ipapanengneng na Apocalipsis 16:14-16, satan so “bakal na baleg ya agew na Dios, a Makapanyarin amin.” Satan so bakal a mangilalanor ed “saray arari na amin a mundo,” odino nasyones. Say Anak nen Jehova a Dios, say aturon Ari, so magano lan onsalta ed bakal. Say pansumpalan so sigpot a segurado. Amin ya onsusumpa ed Panarian na Dios tan kabiangan na marelmeng a sistema nen Satanas so napunas. Saraman lambengat so matoor ed si Jehova so niliktar.—Apocalipsis 7:9, 14; 19:11-21.
7. Iner so kawalaan nen Satanas tan saray demonyo to legan na Sanlibon Taon ya Uley nen Kristo, tan panon a saya so mangungguna ed katooan?
7 Isipen pan sikayo so akaliktar ed satan a baleg a kadederal. Anto so magmaliw a kipapasey bilay ed dalin diad insipan a balon mundo na Dios? (2 Pedro 3:13) Agtayo nakaukolan a palbengan, ta ibabaga ed sikatayo na Biblia, tan say ibabaga to so makapalikliket. Naaaralan tayo a si Satanas tan saray demonyo to so niiyan ed inka-inaktibo, nipangaw ed kaaralman ed loob na Sanlibon Taon ya Uley nen Jesu-Kristo. Agla onsanib-sanib iraman a marelmeng, mauges iran pinalsa, a mangilalagyat na gulo tan manggugunaet a sagyaten itayon agmanmatoor ed Dios. Agaylan pakainawaan!—Apocalipsis 20:1-3.
8, 9. Diad balon mundo, anto so nagawa ed saratan a kairapan a singa say sakit tan itatatken?
8 Nasabi panaon, amin a nengneng na sakit so sigpot a naekal. (Isaias 33:24) Saray piley so makaalagey la, makaakar, makabatik, tan makasayaw ed togtog, tekep na mabiskeg iran bikking. Kayari impanbilay na dakel a taon ed dili ran mundon andi-esel, narengel na saray emel so magayaga iran tanol ed liber da. Saray bulag so mankelkelaw legan a nalulukasan ed kamataan da so sakey ya alay dakep a mundo tekep na nanduruman kolor tan ohas. (Isaias 35:5, 6) Sikaran siansiay makanengneng ed kalupaan na saray inad-aro ra! Anganko diad satan et say pakanengneng da so nakurarap a magano lapud saray lua na gayaga.
9 Isipen pa lambengat! Anggapo laray antipara, anggapo laray takarang tan baston, anggapo laray tambal, anggapo laray klinika parad ngipen tan saray ospital! Aglan balot nagamgaman so liket na totoo lapud sakit-na-linawa tan depresyon. Anggapo lay mansakit ya ugugaw. Say epekto na itatatken so nauman. (Job 33:25) Sikatayo so magmaliw a mas mabunigas tan mas mabiskeg. Kinabuasan tayon ombangon manlapud masamit ya ugip tekep na apasimbalon biskeg, napno na ligsa tan magunaet parad sakey a balon agew na masiglan bilay tan makapenek a kimey.
10. Anton kimey so gawaen na saray niliktar ed Armagedon?
10 Daakan so makapaliket a trabahon kimeyan na saray makaliktar ed Armagedon. Pasimbaloen da so dalin a pagmaliwen a sakey a paraiso. Antokaman a bakat na marutak a daan a sistema so nalinisan. Onletaw iray parke tan harden ed datin lugar na nanleletletan tan marutdutak a kobong-kobong tan aderal a dalin. Panggayagaan na amin so komportabli tan maliket a panayaman. (Isaias 65:21) Legay ilalabas na panaon, say mala-paraison kabiangan na dalin so onlaknab tan ompanat anggad nakapet na interon globo so estandarte na inkasanting ya inletneg na Manamalsa diman ed tanamanan na Eden. Agaylan makapenek sirin so pakapibiang ed satan a kimey a panangipawil!
11. Anto so magmaliw ya arapen a siglaotan na katooan ed kaliber-liber na dalin tan ed bilay na ayayep?
11 Amin na saya so nagawa diad silong na madibinon panangiwanwan ta pian say kaliber-liber so agnaapektoan. Saray totoo so mikareenan ed ayayep. Imbes a siruruksan pateyen iraya, itubat na too so responsablin inkamayurdumo ed dalin, ya asikasoen ira. Ilitrato pa ed kanonotan iray lobo tan kordero, leon tan kilaw iran baka, a saniiban mankabkab—tan saray maamon ayayep so sigpot lan maligen. Agla anggan ontakot so sakey a melag ya ugaw ed maatap ya ayayep, nisay nabuyak na maruksa tan masebeg a totoo so inkaligen na balon mundo. (Isaias 11:6-8) Agaylan mareen a balon mundo so pagmaliwan na satan!
NAPASIMBALO SO KATOOAN
12. Panon a nasusumpal so Isaias 11:9 natan, tan panon a satan so nasumpal ed Paraiso?
12 Ibabaga ed sikatayo na Isaias 11:9 no akin ya anggapo lay deral a nagawa ed interon dalin. “Say dalin napano naani ed pikakabat [nen] Jehova, singa saray danum sakbongan da so dayat.” Saya so manutukoy ed totoo lapud saray ayayep so agmakaala na “pikakabat nen Jehova” tan makapanggawa na pananguman, lapud sikaray kokontrolen lambengat na natatawag a nisipor. Balet say pikakabat ed Manamalsa tayo so mamapasimbalo ed too. Andi-duaruwan sikayo la so akapanggawa na pigaran panamasimbalo bilang resulta na pangiyaaplika ed pikakabat na Dios ed bilay yo. Minilyon so manggagawa ed saya. Sirin, sayan propesiya so ginmapo lan nasusumpal ed saramay manlilingkor ed si Jehova. Ingen, satan met so mangituturo ed panaon sano ekalen la na totoo ed sankamundoan so antokaman ya inaayep odino marawal ya ugali tan sikaray magmaliw a mareen ed ando lan ando.
13. Anton edukasyonal a programa so nagawa ed dalin?
13 Agaylan makapakelkelaw itan sano say dalin so napano na pikakabat na Dios! Niwala so malaknab ya edukasyonal a programa ed silong na panangiderehi na Arin si Jesu-Kristo tan say 144,000 a kaiba ton manuley. Insan nausar ed satan so balo “iran lukot.” Mapatnag a saraya so nisulat ya instruksion na Dios ya onkana bilang basiyan parad panangibangat ed saray manaayam ed dalin. (Apocalipsis 20:12, NW) Naaralan na katooan so kareenan, aliwan say bakal. Amin a makaderal ya armas so naandi la ed ando lan ando. (Salmo 46:9) Saray manaayam ed balon mundo so nabangatan a pidenengan so kapara ran too tekep na aro, respeto, tan dignidad.
14. Panon a magmaliw a duma so mundo sano say katooan so magmaliw lan sakey a nankakasakey a pamilya?
14 Say katooan so magmaliw a sakey a nankakasakey a pamilya. Anggapo laray babeng ed pankakasakey tan impanaagi. (Salmo 133:1-3) Anggapo lay ayaman a kaukolan ya ikandado pian agmakaloob iray matakew. Say kareenan so manuley ed kada puso, ed kada abung, ed kada parti na dalin.—Miqueas 4:4.
SAY MAGAYAGAN KIOLI
15. Anton duaran grupo so napaoli ed dalin?
15 Legan na satan a Milenyo, nagawa so kioli. Saramay sigagalan nankasalanan sumpad masanton espiritu na Dios, odino aktibon puersa, diad andiay-pagbabawin isusumlang ed panangipatnag odino panangiwanwan to so agnapaoli. (Mateo 23:15, 33; Hebreos 6:4-6) Siempre, say Dios so mandeside no sioparay nankasalanan ed ontan a dalan. Balet duaran nandumaan a grupo so napaoli—“saray matunong tan ag matunong.” (Gawa 24:15) Lapud wala so suston inka-oksuy, makatunongan lambengat ya isipen a say ununan naabrasan napaoli ed dalin et saray matunong, saramay sitotoor a nanlingkor ed si Jehova.—Hebreos 11:35-39.
16. (a) Sioparay kabiangan na “saray matunong” a napaoli ed dalin? (b) Sioparan matoor ed kadaanan iran panaon so nagkalautlan labay yon nakabat, tan akin?
16 Imbes ed pakarengel na saray balita nipaakar ed saray bakal, desyang, tan patey, saray ariripen nen Jehova so makaawat na makapakelaw iran report na kioli. Makapalikliket so pakaamta nipaakar ed kipawil na matoor a lalaki tan bibii a singa di Abel, Enoch, Noe, Abraham, Sara, Job, Moises, Rahab, Rut, David, Elias, tan Ester. Agaylan makapatenyeg-liknaan iray agawa ed awaran so iparungtal da legan ya iiter daray detalye ed abenegan na dakel a salaysay na Biblia! Andi-duaruwan sikara tan saray matunong ya inaatey ed agano nin panaon so magunaet met a mangamta nipaakar ed impanampot na sistema nen Satanas tan no panon a pinasantos nen Jehova so masanton ngaran to tan inyalangon so inkasoberano to.
17. Anton tulong so iter na saray matoor ed arum a napaoli?
17 Agaylan makatulong irayan matoor ed onsublay a kikioli, sano binilyon ed saray “ag matunong” so nibulos la manlapud panangaripen na ipapatey! Maslak ed katooan so agbalot awalaan na pankanawnawan mangamta ed si Jehova. Si Satanas so ‘mamubulag ed kaisipan da.’ (2 Corinto 4:4) Balet say kimey na Diablo so sigpot lan nalingwanan. Saray agmatunong so ompawil ed sakey a marakep tan mareen a dalin. Sikaray abrasaen na totoon organisadon maong pian bangatan ira nipaakar ed si Jehova tan ed manuuley ya Anak to, si Jesu-Kristo. Legan a binilyon a pinaoli so makakaamta tan mangaaro ed Manamalsa ra, say dalin so napano na pikakabat nen Jehova ed agnaparaan a dalan.
18. Antoy isisipen yon liknaan yo sano mangabrasa ed apaoli iran inad-aro?
18 Agaylan gayaga so itarok na kioli ed kapusoan tayo! Siopa so agnanirap lapud kabusol tayon patey? On, siopa so ag-asakitan sanen say bedber na aro odino impankaaro so pinakset na sakit, itatatken, aksidenti, odino karawalan a sengegay impatey na inad-aro? Sirin, isipen pay gayaga na pannenengneng-lamet ed Paraiso. Saray kainaan tan kaamaan, ananak a lalaki tan bibii, kakaaro tan kakanayon, so manlalakapan, legan a maneelekan tan manaakisan lapud gayaga.
INKAYADYARI A SIANSIA!
19. Anton milagro so nagawa legan na Milenyo?
19 Diad interon Milenyo, sakey a makapakelkelaw a milagro so nagawa. Parad katooan, nayarin satan so magmaliw a sankaliketan a kabiangan na Sanlibon Taon ya Uley nen Kristo. Iderihe nen Jehova so Anak to pian iyaplika iray gungguna na dondon bagat ed kada matoor tan matulok a laki tan bii. Diad panamegley na satan, amin a kasalanan so naekal la tan say katooan so nitandoro ed inkayadyari.—1 Juan 2:2; Apocalipsis 21:1-4.
20. (a) Anto so kabaliksan na pagmaliw ya ayadyari? (b) Kapigan ya onggapon manbilay ed sigpot a pantalos iray niliktar ed Armagedon?
20 Inkayadyari! Anto so kabaliksan na saya? Kabaliksan na satan so kipawil ed nengneng na bilay a nanggayagaan di Adan tan Eva sakbay a nankasalanan ira sumpad si Jehova a Dios. Diad pisikal, mental, emosyonal, moral, espiritual—diad kada pamaakaran a naisip—sigpot a nakapet na ayadyarin totoo iray estandarte na Dios. Balet kasin manpapareho ed satan so amin a too? Andin balot! Saray palsa nen Jehova—kakiewan, karosasan, ayayep—amin so mangibabangat ed sikatayo a labalabay to so panduruma. Saray ayadyarin totoo so nawalaan na nanduruman personalidad tan abilidad. Balang sakey so manggayaga ed bilay unong ed orihinal a ginagala na Dios. Ibabaga na Apocalipsis 20:5: “Saray arum ya inatey ag ira pinmawil a binmilay anga ed kasumpal na sanlibon taon.” Singa say baleg ya ulop a niliktar ed Armagedon, saray apaoli so sigpot a manbilay sano narateng da so andiay-kasalanan ya inkayadyari.
21. (a) Anto so nagawa ed sampot na Sanlibon Taon ya Uley nen Kristo? (b) Anto so kaunoran a nagawa ed si Satanas tan amin ya ondapag ed sikato?
21 Saray ayadyarin totoo so onarap ed kaunoran a subok. Diad sampot na Milenyo, si Satanas tan saray demonyo to so nibulos manlapud kaaralman ed antikey a panaon tan naabuloyan a manggawa na unor a sagpot a pabenegen so totoo manlapud si Jehova. Labayen ni na arum iray lingon pilalek nen say pangaro ed Dios, balet sayan panagrebeldi so napatikeyan. Deralen nen Jehova irayan makasarili a pati si Satanas tan amin a demonyo to. Amin a managgaway-mauges so diad satan et naandi la ed ando lan ando.—Apocalipsis 20:7-10.
ANTO SO GAWAEN YO?
22. Anto so nenengnengan yon gawaen ed Paraiso?
22 Say inkaando so ninatnat ed saray mangaaro ed si Jehova a Dios tan manayam ed Paraison dalin. Mairap tayon naisip so gayaga ra, tan anggan sikayo met so makapibiang ed saya. Say musika, dunong, gaway-lima—agayla, palampasan na saray gawa na ayadyarin totoo so sankaabigan iran kimey na sanka-onsianoan ed daan a mundo! Diad katuaan to, amin a too so magmaliw ya ayadyari tan aglimitadoy panaon da. Isipen pa no anto so nayarian yon gawaen bilang sakey ya ayadyarin too. Isipen met no anto so naaralan yo tan saray kapara yon totoo nipaakar ed panamalsa nen Jehova—manlapud binilyon a galaksi ed sankatalbaan ya anggad sankamelagan a subatomic particles. Amin a nagawaan na katooan so nagkalalon mamaliket ed puso na maaron mangatatawen ya Ama tayo, si Jehova.—Salmo 150:1-6.
23. Akin a say bilay ed Paraiso so agbalot magmaliw a makapasawa?
23 Say bilay ed satan so agmagmaliw a makapasawa. Satan so lalon makapainteres diad pantultuloy ya ilabas na panaon. Ta, nengneng yo pa, anggapoy anggaay pikakabat na Dios. (Roma 11:33) Diad panaon na inkaando, walan naynay ni naaralan tan nadiskobren balon lugar. (Eclesiastes 3:11) Tan legan na pantultuloy yon panaral nipaakar ed si Jehova a Dios, mantultuloy kayon manbilay—aliwa lambengat ed loob na pigaran taon noagta ando lan ando!—Salmo 22:26.
24, 25. Akin a nepeg a manbilay kayo la natan a mitunosan ed pikakabat na Dios?
24 Agta say makapalikliket ya arapen ed sakey a paraison dalin so makanepegan ed antokaman a sagpot odino sakripisyon gawaen yo? Siempren ontan! Bueno, inanatnat la nen Jehova ed sikayo so tombok ed satan a maliwawan arapen. Satan a tombok et say pikakabat na Dios. Kasin satan so usaren yo?
25 No inaro yo si Jehova, makaromog kayo na liket ed panggawa na linawa to. (1 Juan 5:3) Legan a gegemtanen yo itan a kurso, agaylaran bendisyon so naeksperiensia yo! No iyaplika yo so pikakabat na Dios, satan so makapangitarok ed sikayo na mas maliket a bilay anggaman ed sayan magulon mundo. Tan saray tumang ed arapen so abalbaleg, lapud saya so pikakabat a mangitonton ed andi-anggaan a bilay! Natan la so paborablin panaon pian sikayoy onkiwas. Magmaliw a determinadon manbilay a mitunosan ed pikakabat na Dios. Idemostray aro yo ed si Jehova. Igalang so masanton ngaran to tan paneknekan a matila si Satanas. Diad ontan, si Jehova a Dios, say Lapuan na tuan kakabatan tan pikakabat, so manliket ed sikayo ed baleg tan maaron puso to. (Jeremias 31:3; Sofonias 3:17) Tan aroen to kayo ed ando lan ando!
SUBOKEN SO PIKAKABAT YO
Anto so “bilay a peteg”?
Kayari na Armagedon, anto so nagawa ed dalin?
Sioparay napaoli ed dalin?
Panon a magmaliw ya ayadyari so katooan tan nasubok ed kaunoran?
Anto so ilalo yo nipaakar ed Paraiso?
[Litrato ed pahina 188, 189]
Kasin maniilalo kayon manbilay ed Paraiso, sano say dalin so napano na pikakabat na Dios?