Leksion 1

No Panon Mon Naamtaan so Kakaukolanen na Dios

Anton importantin impormasyon so lugan na Biblia? (1)

Siopa so autor to? (2)

Akin a nepeg mon aralen so Biblia? (3)

1. Say Biblia so mablin regalon nanlapud Dios. Satan so singa sakey a sulat a nanlapud maaron ama ed saray ilalak to. Ibabaga to ed sikatayo so katuaan nipaakar ed Dios​—no siopa tan no anto iray estandarte to. Ipapaliwawa to no panon so panalona ed saray problema tan no panon a naromog so tuan liket. Say Biblia so ­mogmon mangipapaamta ed sikatayo no anto so nepeg tayon gawaen pian na­paliket so Dios.​—Salmo 1:1-3; Isaias 48:17, 18.

2. Say Biblia so insulat na 40 nanduruman lalaki ed loob na 1,600 a taon, ginmapo nen 1513 K.K.P. Tutugyopen itan na 66 ya ankekelag a libro. Saramay angisulat ed Biblia so pinuyanan na Dios. Insulat da so walad kanonotan to, aliwan say diad inkasikara. Kanian say Dios ed tawen, aliwan siopaman a too ed dalin, so Autor na Biblia.​—2 Timoteo 3:16, 17; 2 Pedro 1:20, 21.

3. Seniguro na Dios a say Biblia et susto so pakakopya tan kipreserba to. Mas dakel so Biblia a niiimprinta nen say dinanman nin libro. Agnaliketan so kada sakey ed pakanengneng ed sika a manaaral ed Biblia, balet ag-aabuloyan itan a mamatunda ed sika. Say magnayon ya arapen mo so mandedependi ed pangamtam ed Dios tan ed panggawa ed linawa to anggaman ed dinanman ya isusumpa.​—Mateo 5:10-12; Juan 17:3.