Panagaral ed Brosyur a Mantultuloy a Manbantay!
Aralen na saray kongregasyon ed interon mundo so brosyur a Mantultuloy a Manbantay! kaleganay simba na Mayo 23 anggad Hunyo 20, 2005, dia ed Panagaral na Kongregasyon ed Libro. Ipangasin usaren so onggendan a tepetepet sano ipaparaan tan ikokondukta iyan pantitipon. Legan na panagaral, basaen so inimprintan materyal, tan basaen iray nisitan teksto no wala ni oras.
Simba na Mayo 23
◼ Pahina 3-4: Dinan ed sarayay nantutumbokan a situasyon so nagkalautlan angapekta ed bilay mo? Anto so mangipapabidbir ed sika a sarayan situasyon et aglabat nambibiigan a nagagawa?
◼ Pahina 5: Antoy mangokombinse ed sika a peteg a mangiyaansakit so Dios? Anto so mangipatnag ed no kaunongan kaimportante ed sikatayo so Dios tan say gagawaen to?
◼ Pahina 6-8: Anto so ibabaga na Mateo 24:1-8, 14 nipaakar ed kabaliksan na saray nagagawa natan ed mundo? Unong a nipanengneng ed 2 Timoteo 3:1-5, anton panaon so pambibilayan tayo la natan? Saraya la so kaunoran iran agew na anto? Anto so mangombinse ed sika a say Biblia et peteg a Salitay Dios? Nipaakar ed anto so ipupulong tayon Panarian?
◼ Pahina 9-10: Akin a kaukolan tayon motekteken iray inagew-agew a desisyon tan saray prayuridad tayo ed bilay? (Roma 2:6; Gal. 6:7) Legan mon rerepasoen iray tepet ed pahina 10, antoray anonotan mon teksto a nepeg a mangimpluensya ed gagawaen mo?
Simba na Mayo 30
◼ Pahina 11: Akin a nepeg tayon motekteken a mismo iray tepetepet diad sayan pahina? (1 Cor. 10:12; Efe. 6:10-18) Anto so ipaparungtal na saray ebat tayo ed sarayan tepet no nipaakar ed inkaseryoso tayon mangawat ed simbawa nen Jesus diad Mateo 24:44?
◼ Pahina 12-14: Anto imay ‘oras na panangukom’ ya asaglawi ed Apocalipsis 14:6, 7? Anto so kabaliksan na ‘itakot ed Dios tan pangiter ed sikato na gloria’? Anto so Babilonia a Baleg tan anto so pansumpalan na satan? Anton kiwas nipaakar ed Babilonian Baleg so nepeg tayon gawaen natan? Anto niray kalaktip ed nipasakbay ya oras na panangukom? Anto so epekto ed sikatayo na agtayo pakaamta ed “agew ono oras” na impasakbay na Dios a pangipaakseb toy panangukom? (Mat. 25:13)
◼ Pahina 15: Anto so isyu nipaakar ed inkasoberano, tan panon iyan mangapekta ed sikatayo bilang indibidual?
◼ Pahina 16-19: Anto so “tawen a balo” tan “dalin a balo”? (2 Ped. 3:13) Siopa so mangisisipan ed saraya? Antoran pananguman so itarok na balon tawen tan balon dalin? Kasin nagunggonaan itayon mismo ed saratan?
Simba na Hunyo 6
◼ Pahina 20-1: Anton pasakbay nipaakar ed itataynan so inter nen Jesus ed saray papatumbok to nen inmunan siglo? (Luc. 21:20, 21) Kapigan a nagmaliw a posible itan ya itataynan? Akin a maganat tan agnipaleen so itataynan? (Mat. 24:16-18, 21) Akin a dakdakel a totoo so mangibabaliwala ed saray pasakbay? Panon ya agunggonaan so nilibon totoo ed Tsina tan Pilipinas diad intalineng da ed napanmatalkan iran pasakbay? Akin a nagkalalon maganat so italineng ed pasakbay na Biblia nipaakar ed kasampotan na peles a sistema na bengabengatla? Lapu ed sayan inkaganatan lan maong, anto so responsabilidad tayo? (Uli. 24:11, 12)
◼ Pahina 22-3: Diad Australia nen 1974 tan diad Colombia nen 1985, akin ya imbaliwala na dakel so pasakbay ed desyang, tan antoray resulta? Panon so padesir mon ikiwas mo ed oniaran pasakbay, tan akin? Anto so nayarin pakapatnagan no kasin tinmalineng itayo ed samay pasakbay diad agew nen Noe? Akin a nilabay na totoo nensaman so manbilay ed loob tan ed kabangibang na Sodoma? Panon itayon nagunggonaan ed panmotektek nipaakar ed agawa ed Sodoma?
Simba na Hunyo 13
◼ Pahina 24-7: Usaren so “Tepetepet Parad Panagaral” ed pahina 27.
Simba na Hunyo 20
◼ Pahina 28-31: Usaren so “Tepetepet Parad Panagaral” ed pahina 31.
Say panaral tayo ed sayan brosyur so ontulong ed sikatayon “mantultuloy a manbantay” tan paneknekan so inkasikatayo ya akaparaan. Komon ta naynay a napatnagan ed mapublikon ministeryo tayo so inkaganatan na inyabawag na anghel: “Takotan yo so Dios, tan iter yo ed sikato so gloria: ta say oras na pangukom to sinmabi la.”—Mat. 24:42, 44, NW; Apo. 14:7.