Nilaban so Amin a Nengneng na Totoo
1. Anto so akadependian na talindeg tayo ed Dios?
1 Say agkanepegan a panangasi na Dios so angilukas na dalan parad kilalaban. Linawa nen Jehova ya “amin a totoo nilaban ira komon, tan ondago’ra ed pakapikabat ed katuaan.” (1 Tim. 2:3, 4) Say talindeg tayo ed Dios so ag-akadepende ed rasa, kipapasen tayo ed bilay, saray abilidad, odino itsura tayo, noagta diad pangagamil tayoy pananisia ed dondon bagat nen Jesus. (Juan 3:16, 36) Bilang kakimeyan na Dios, nepeg ya ag-itayon balot mangiduduma, a nayarin mangimpluensya ed sikatayon ipulisay so totoon awaten nen Jehova.
2, 3. Antoy ontulong ed sikatayon ag-husgaan so totoo unong ed itsura ra?
2 Paliisan so Panaghusga: Say nenengnengen nen Jehova ed totoo et say akindalem da, ya agto tetekepan na makapuy a getma odino panaglabi. (1 Sam. 16:7) Nenengnengen to met so potensyal da. Kanian, momoriaen ton makaroyroyo iramay manpilalek a mamaliket ed sikato. (Ag. 2:7) Ontan met kasi so panmoria tayo ed arum?
3 Walaray naabet tayon totoo ed ministeryo a nayarin makapaopendi ed sikatayo so itsura ra. Nayarin maringot so kawes da odino akulkulastay, mabalbalbas, odino di-ikaw ira ed eleng odino bibil. Andiay-ayaman ni ingen so arum. Ompan wala niray mamasakit ed sikatayo. Imbes a husgaan iratan ya aglan balot magmaliw a managdayew nen Jehova, nepeg a positibo itayo, “ta sikatayo, makulangkulang itayo met nen samay aminsan a panaon, matulay [tan] alingo.” (Tito 3:3) Say pakamoria tayo ed saya et manggawa ed sikatayon magunaet a pulongan so amin, anggan saramay ompatnag ya agmakanepegan lapud itsura ra.
4, 5. Antoy naaralan tayo ed saray ehemplo nen Jesus tan si Pablo?
4 Saray Inmunan-Siglon Ehemplo: Nanggunaetan nen Jesu-Kristo a tinulongan iramay nayarin impasen la na arum ya andiay ilalo. (Luc. 8:26-39) Anggaman agton balot kinonsenti iray mauges a gawa, kabat to a walay tendensia na toon nalanor ed agsuston kabibilay. (Luc. 7:37, 38, 44-48) Kanian, tinalosan to ra, tan ‘inabagey to ra, lapud singa ira karnero ya andian na managpastol.’ (Mar. 6:34) Sarag tayo kasin aligen a nagkalalo ni so ehemplo to?
5 Si apostol Pablo so tinutupak, nilelewet, tan impriso. (Gawa 14:19; 16:22, 23) Kasin saratan ya asagmak ton inkaruksa et amasyodot ed sikato tan ninonot to lan pipirdien to labat so panaon to ed saratan a nasyon odino etnikon grupo? Andin balot. Kabat to a walaray matuan-impanpuson indibidual ed limog na amin ya etnikon grupo, tan determinado ton inanap iratan. Ontan met kasi panmoria tayo ed saramay walad teritorya tayo a nanduruma so abenegan tan kultura ra?
6. Antoy nayarin epekto na awawey tayo ed saramay balo ni diad saray pantitipon na kongregasyon?
6 Pangabrasa ed Arum Natan: Dakel a totoo na Dios so maliket lapud sikaray inabrasa ed kongregasyon na saray agagi ya ag-onnenengneng ed akinpaway ya itsura. Walay lakin mabalbalbas, andukey so buek to, tan maringot so kawes to a linma ed sakey a Kingdom Hall ed Alemanya. Aliwliwa met so reputasyon to. Anggaman kuan, sikatoy inabrasa ed pantitipon. Sikatoy mandinayew a maong a sikatoy pinmawil kayari na sakey simba. Diad aganon panaon, nilinis toy itsura to, tinmunda lan nansigarilyo, tan ginawa to lan legal so relasyon to ed biin piaamongan to. Agnambayag, sikara tan saray anak da so saniiba lan manlilingkor ed si Jehova bilang nankakasakey a pamilya.
7. Panon tayon naalig so agmanangidumaduman Dios tayo?
7 Bilang pangalig ed agmanangidumaduman Dios tayo, komon ta inatnat tayo ed amin so imbitasyon a minabang ed agkanepegan a panangasi na Dios.
[Blurb ed pahina 3]
“Say Dios anggapo so pangiduma to ed saray totoo; noag ingen dia ed balang nasyon akoen to so antakot ed sikato tan manggawa na matunong.”—Gawa 10:34, 35.