Magmaliw a “Naspot a Tuloy” ed Ministeryo Yo

¹ Sano nabasa tayo a si apostol Pablo et nantrabaho diad impanggagaway tolda legan ton walad Corinto, nayarin isipen tayo a nilimitaan na saya so pankanawnawa ton manpulong. Balet, kuan na Gawa 18:5: “Si Pablo wala a naspot a tuloy ed panagpulong a papaletan to ed saray Judios a si Jesus sikato so Kristo.” Akin ya ontan lay inka-ukopado nen Pablo ed panagpulong a kimey? Anggaman dakel lay taga-Corinto a nagmaliw a mananisia, imbaga na Katawan a dakel niray magmaliw a babangatan ed satan a syudad. (Gawa 18:8-11) Walaan itayo met kasi na parehon rason pian magmaliw a naspot a tuloy odino okupadon maong ed ministeryo tayo? On. Dakel nin totoo so naromog tan nabangatan na katuaan.

² Mangusar na Malaglaem a Panaon ed Serbisyo Legan na Abril: Maseguron kalat yo so mantultuloy ya okupado ed pangipulong na maong a balita kada bulan. Balet walaray bulan a nagkalalo lan mangiter ed sikatayo na pankanawnawa a magmaliw a “naspot a tuloy” ed sayan kimey. Sakey ed saratan so bulan na Abril, nagkalalo la ta say espisyal a kampanya tayo a pangibunog ed brosyur a Mantultuloy a Manbantay! et mantultuloy anggad Abril 17. Kasin saray sirkumstansya yo et mangiyabuloy ed sikayon man-auxiliary payunir odino mamadaak na kimey yo ed ministeryo ed sayan bulan? Saramay manggagawa na ontan so nabebendisyonan a tuloy. (2 Cor. 9:6) No mamapasya kayo, tandaan a panliliketan nen Jehova so interon-kamarerwa a serbisyo yo. (Luc. 21:2-4) Antokaman so sirkumstansya yo, gawa yon kalat so pagmaliw a “naspot a tuloy” ed ministeryo legan na Abril tan Mayo. Tan agyo lilingwanan ya ireport iray serbisyo yo ed lawak diad kasampotan na bulan.

³ Dalawen Iray Balo ni ya Inmatendi ed Memoryal: Nen imbeneg a taon, say inmatendi ed memoryal dia ed Pilipinas et 438,418. Agni amta no pigaray dagup a bilang na inmatendi ed sayan taon. Ingen, ipapanengneng na saray report so alay abig a potensyal parad dakdakel ya “aanien.” (Mat. 9:37, 38) Sirin, iyarunsa lan tampol so idalaw ed saramay interesado ya inmatendi ed Memoryal nen Marso 24 pian tulongan ira ed espiritual. No ipaleen ni itan, nayarin “onsabi ed satan so mauges tan samsamen to may nitanem” ed puso ra a bini na panarian. (Mat. 13:19) Say idalaw yon tampol so mangipatnag a peteg kayon “naspot a tuloy” ed ministeryo.

⁴ Itultuloy a Tulongan Iray Inaktibo: Nepeg ya iyuksoy na mamatatken so idalaw ed siopaman ya inaktibo antis a manampot so Abril pian pasesegen iran mibiang ed ministeryo no iyabuloy na sirkumstansya ra. Pampelengan na saray mamatatken ya amtaen so lamot na problema na indibidual tan no antoy sankaabigan a pakatulong ed sikato pian itubat toy aktibon panlingkor ed si Jehova. Sayan maaron tulong so mangipatnag ya ipapapuso na saray mamatatken so responsabilidad da bilang pastol na “iglesia na Dios.” (1 Ped. 5:2; Gawa 20:28) Iilaloan tayo a pigara ed saraya so napagmaliw nin aktibo lamet ed lawak na ministeryo legan na espisyal a bulan ya Abril.

⁵ Tulongan so Dakel ni a Magmaliw ya Agbautismadon Manangipalapag: Kasin kinmualipika la iray anak yo bilang balon manangipalapag na maong a balita? Komusta met iray arum ya iyaaralan yoy Biblia? No naaprobaan ira na mamatatken, agkasi matukotukoy so Abril pian onggapo iran mangipalapag? No onaaligwas so iyaaralan tan akapanaral la na brosyur a Kakaukolanen tan libron Pikakabat, nayarin ituloy ya iyaralan na libron Dayewen so Dios. Say kalat yo et pian tulongan so iyaaralan a nawalaan na aragdalem a pakatalos ed katuaan, onkualipika bilang agbautismadon manangipalapag, tan magmaliw a dedikado tan bautismadon Tasi nen Jehova.​—Efe. 3:17-19; 1 Tim. 1:12; 1 Ped. 3:21.

⁶ Say agmanguman tan masimoon ya interes yo ed saray iyaaralan yoy Biblia so nayarin ontulong ed sikara diad kaunoran pian ipapuso so katuaan. Akatongtong na sakey a Tasi so sakey a sanasawan maedad la a maliket ya angawat na panangiyaral ed Biblia. Balet impaleen ni na sanasawa so panaral ed loob na taloy simba. Diad kaunoran, nigapo lanlamang so panagaral. Kabekta, inliwat na sanasawa so panagaral ed kada duay simba lawari. Diad kaunoran balet, say asawan bii so inmaligwas ya anggad bautismo. Oniay nanonotan na agin laki: “Kayari na bautismo to, mantedter iray lua to lapud liket, kanian akalua kami met a sanasawa.” On, say pagmaliw a “naspot a tuloy” ed panangipaamta na maong a balita ed arum so makapaliket a tuloy!

⁷ Say propesiya na Biblia tan saray nagagawa natan ed mundo so mangipapabitar ya asingsingger itayo la ed anggaan. Natan la so panaon pian mantultuloy a manbantay, a magmaliw a “naspot a tuloy” ed panangipaamta na maong a balita ed arum. Walaan itayo na alay abig ya instrumento pian nagawaan iya diad espisyal a kampanya a pangibunog ed brosyur a Mantultuloy a Manbantay! Usaren itan a sikakabat diad ministeryo. Impaseguro nen apostol Pablo a saratan a kimey et aliwa ya “anggapo so kabaliksan to ed Katawan.”​—1 Cor. 15:58.