Tepet

◼ Anto so sankaabigan a paraan na pakapandonasyon ed saray mankaukolan ya agagi ed arum a bansa?

Sagpaminsan et nabalitaan tayon saray agagi tayo ed arum a bansa so mankaukolan na materyal lapud panamasegsegang, desyang, odino arum niran mairap a sirkumstansya. Arum ya agagi so apakiwas a direktan mangipawit na saray pundo ed saray sangan opisina ed saratan a bansa. Nayarin ikerew ya usaren so kuarta pian tulongan so sakey ya indibidual, kongregasyon, odino parad proyekto ya ipapaalagey.​—2 Cor. 8:1-4.

Anggaman nakomendaan iray ontan a maaron panangiyansakit ed saray kapananisiaan, mabetbet a walaray pankaukolan a mas apuraan nen saramay sankanonot na mangidodonar. No maminsan, saramay labay a tulongan et naasikaso la. Siempre, makapanmatalek itayo a sano nipawit iray kontribusyon ed lokal a sangan opisina parad sankamundoan a kimey, Pundo na Kingdom Hall, odino tulong sano walay desyang, saratan a pundo so nausar unong ed instruksion na angidonar.

Nipasal a maong so amin a sanga pian onkiwas a tampol ed ag-iilaloan iran pankaukolan na saray agagi. Diad amin na saraya, naynay ya ipapaamta na sanga ed Mananguley ya Ulop so pamaakaran. No nakaukolan so kaaruman a tulong, nayarin pakabatan na Mananguley ya Ulop iray kabangibang a sanga pian ontulong odino nayarin direkta lan ipawit na hedkuarter iray pundo.​—2 Cor. 8:14, 15.

Sirin, amin a kontribusyon ya inggetman parad sankamundoan a kimey, panagpaalagey a proyekto ed arum iran bansa, odino tulong sano walay desyang, so nepeg ya ipawit ed sangan opisina ed bansan panaayaman yo, balanglan direkta odino panamegley na kongregasyon. Diad onian paraan, aasikasoen na “matoor tan makabat ya aripen,” panamegley na saray uksoyan na organisasyon ya inletneg na Mananguley ya Ulop, iray pankaukolan na sankamundoan ya impanaagi diad mauksoy a paraan.​—Mat. 24:45-47; 1 Cor. 14:33, 40.