Natumangan so Panagsungdo

¹ “Dia ed pantepel yo natalima yo naani kamarerwa yo.” (Luc. 21:19) Saratan a salita, a kabiangan na propesiya nen Jesus nipaakar ed “anggaan na mundo,” so mangipapabitar a pian napansiansia so integridad tayo, nepeg ya akaparaan itayon managmak na dakel a subsubok. Balet diad tulong nen Jehova, balang sakey ed sikatayo so ‘makapansungdo angga ed kasampotan’ tan “nilaban.”​—Mat. 24:3, 13; Fil. 4:13.

² Say panamasegsegang, maletey a bunigas, kairapan ed pinansyal, tan say pakagogonigon so mamapairap ed sikatayo ed inagew-agew. Balet, nepeg ya agtayon balot lilingwanan a sasalien nen Satanas a deralen so integridad tayo ed si Jehova. Kada onlabas a sanagew a mansiasiansia itayon matoor ed Ama tayo et sakey lamet ya agew ya akapibiang itayo ed impangebat ed angat na Mamabalaw. Agaylan tumang so pakaamta a sano nasusubok itayo et saray ‘lua’ tayo so agnalingwanan! Mabli iratan ed si Jehova, tan say integridad tayo so mamapaliket ed puso to!​—Sal. 56:8; Uli. 27:11.

³ Napipino Lapud Subsubok: Say kairapan so nayarin mangiparungtal na kaleteyan ed pananisia odino kakapuyan ed inkatoo, a singa say inkamapaatagey odino inka-agmakankaanos. Imbes ya ibatikan odino panganggaen iray subsubok panamegley na saray agmakasulatan a paraan, nepeg tayon talinengen so simbawa na Salita na Dios a “paulyan komon so anos a wala so ayadyarin gawa to.” Akin? Lapud ontulong ed sikatayo so matoor a panagsungdo ed subsubok pian magmaliw itayon “ayadyari . . . tan napnek . . . ya andi-kulang.” (Sant. 1:2-4) Tulongan itayo na panagsungdo a nabayuboan so makanakana iran kalidad, a singa say inkamakatunongan, empatya, tan panangasi.​—Roma 12:15.

⁴ Asubok a Kalidad na Pananisia: Sano sungdoan tayo iray subsubok, nawalaan itayo na asubok a kalidad na pananisia a mablin tuloy ed Dios. (1 Ped. 1:6, 7) Satan a pananisia so mangiparaan ed sikatayo a mansiansian mapekder ed arapen a subsubok. Niarum ni, nalikna tayo so panangabobon na Dios, tan mamabiskeg iya ed ilalo tayo, diad ontan et lalon magmaliw iyan petepeteg ed sikatayo.​—Roma 5:3-5.

⁵ Say sankarakpan a tumang ed panagsungdo et nipabitar ed Santiago 1:12, ya oniay kuan to: “Mapalar so too a mantepel na panalsali, ta no asali la, awaten to so balanget na bilay.” Kanian, mansiansia itayon mapekder ed debosyon tayo ed si Jehova, a matalek a tumangan to na daakan iraman so mantutultuloy a ‘mangaaro ed sikato.’

Parte 2​—Pangikondukta na Progresibo Iran Panagaral na Biblia

Pamparaan ed Pangikondukta na Panagaral

¹ Aliwa lambengat a say paningbat ed materyal tan pambukay ed saray nisitan teksto so nalalanor ed epektibon panagbangat ed sakey ya iyaaralan na Biblia. Nakaukolan tayon ipresenta so impormasyon diad paraan a napakiwas so puso na iyaaralan. Kakaukolanen na saya so pamparaan a maong parad pakagunggonaan na iyaaralan.​—Uli. 15:28.

² No Panon so Pamparaan: Gapoan itan diad pangipikasi ed iyaaralan tan saray pankaukolan to ed si Jehova. Kerewen ed si Jehova a tulongan to kayon nasabi so puso na iyaaralan. (Col. 1:9, 10) Pian natalosan a maong so tema, imanoen a magano so titulo na kapitulo odino leksion, saray subtitulo, tan antokaman iran nengneng a katulongan. Tepetan so inkasikayo, ‘Anto so manunan gagala na materyal?’ Tulongan kayo na saya ya ipabitar so manunan tema legan kayon mangiyaaral.

³ Maalwar a repasoen so materyal a parapo por parapo. Anapen iray ebat ed niimprintan tepetepet, a gulisan labat iray manunan salita tan balikas. Analisaen no panon a misiglaotan iray nisitan teksto ed manunan punto na parapo, tan pilien no dinan iran teksto so basaen legan na panagaral. Nayarin makatulong ed sikayo so pangisulat na antikey a nota ed gilig na pahina na publikasyon. Nepeg a natebek na iyaaralan a say naaaralan to et manlalapu ed Salita na Dios.​—1 Tes. 2:13.

⁴ Iyadapta so Leksion: Onsublay et konsideraen so leksion a sankanonot so iyaaralan. Nonoten lan unona iray nayarin itepet to tan no anton punto so posiblin agto tanton natalosan odino naawat. Tepetan so inkasikayo: ‘Antoy kaukolan ton talosan odino paaligwasen pian ombulaslas ed espiritual? Panon kon nasabi so puso to?’ Insan iyadapta so panagbangat yo. No maminsan et natebek yo a nakaukolan so mangiparaan na sakey ya ilustrasyon, paliwawa, odino manggegendanan a tepetepet pian natulongan so iyaaralan a manalos ed kabaliksan na sakey a punto odino teksto. (Neh. 8:8) Balet paliisan so pangisalet na kaaruman ya impormasyon ya agtanto makana ed tema. Say antikey a panrepaso kayari impanaral so ontulong pian natandaan to iray manunan punto.

⁵ Agaylay liket tayo sano mangipatnag na inkatunong iray balo ni parad kirayewan nen Jehova! (Fil. 1:11) Pian nadampot da itan a kalat, manparaan a maong kada no mangiyaral kayo na Biblia.