Panangipulong ed Panarian​—Sakey a Mablin Pribilehyo

¹ Diad inagew-agew et binilyon so nagugunggonaan a totoo diad dalin lapud daakan a probisyon nen Jehova parad bilay. (Mat. 5:45) Ingen ta pigpigara so walaan na nikadkaduman pribilehyo a mangipatnag na apresasyon ed Manamalsa ra panamegley na panangipulong ed maong a balita na Panarian na Dios. (Mat. 24:14) Panon kaaralem so panamabli yo ed sayan mablin pribilehyo?

² Say panangipulong ed Panarian so mamapagalang ed Dios tan mangitatarok na ilalo tan kareenan ed saray totoon nagogonigon ed sayan magulon panaon. (Heb. 13:15) Parad saramay onkiwas ed mensahe, mankabaliksan itan na andi-anggaan a bilay. (Juan 17:3) Wala tay sekular a karera a makapangitarya na ontan iran gunggona? Impatnag nen apostol Pablo so panangapresya to ed ministeryo diad paraan na impanumpal to ed satan. Tan impasen to itan bilang kayamanan.​—Gawa 20:20, 21, 24; 2 Cor. 4:1, 7.

³ Pablien so Mablin Pribilehyo Tayo: Say sakey lan paraan a nipatnag tayoy panangapresya ed pribilehyo tayon panagpulong et diad pangimano tayo ed kalidad na serbisyo tayo. Kasin mangigagana itayo na panaon ed pangiparaan na presentasyon ya ontanek ed kapusoan na saray nakatongtong tayo? Wala ni kasi aligwasan na dunong tayo ed panangusar na Kasulatan tan ed panagkatunongan ed saray totoo? Kasin kikimeyan tayon maong so teritorya tayo? Sarag tayo kasi so mangigapo tan mangikondukta na panangiyaral ed Biblia? Singa saray matoor a Kristiano, nensaman tan natan, papakiwasen itayo na suston panmoria ed sayan kimey, tan papablien tayo iyan pribilehyo.​—Mat. 25:14-23.

⁴ Sano nipapaarap itayo ed saray epekto na itatakken, makapuy a bunigas, odino arum niran mairap a kipapasen, naliligliwa itayo ed pakaamtan say maseet a panagsagpot tayo pian makapibiang ed ministeryo so peteg a papablien a maong. Papaseguroan itayo na Salitay Dios a papablien nen Jehova iray ontan a sagpot diad panaglingkor ed sikato, anggan saramay sagpot ya ompatnag ya andi-kakanaan ed arum.​—Luc. 21:1-4.

⁵ Say panangipulong ed panarian et lapuan na pirmin inkapnek. Oniay inkuan na 92 años ya agin bii: “Agaylan pribilehyo so pannodnonot ed apalabas ya 80 taon na imbunek a panaglingkor ed Dios​—anggapon balot so pagbabawian ko! No naulit koy bilay ko, ontan lamet a panagbilay so pilien ko, lapud, peteg a ‘say maaron abig na linawa na Dios et magmaong nen say bilay.’” (Sal. 63:3) Komon ta pabpablien tayo met iyan mablin pribilehyo ya inter na Dios, salanti, say kimey a panangipulong ed Panarian.

Parte 11​—Pangikondukta na Progresibo Iran Panangiyaral na Biblia

Tulongan Iray Iyaaralan a Manggawa na Panagpawil

¹ Sano onggapo lan mibiang so iyaaralan ed panagpulong a kimey, sikatoy makaromog na saray totoon interesado ed maong a balita. Panon tayon natulongan so balon manangipalapag a manggawa na epektibon panagpawil tan mamayubo ed aromog ton interes?

² Say panagparaan parad panagpawil so onggapo ed samay primeron dalaw. Pasesegen so iyaaralan a mangipatnag na masimoon ya interes ed saramay nakakatongtong to. (Fil. 2:4) Kalkalna yon ipasal no panon ton nasagyat iray unabung a mangibalikas ed nononoten da, ya ontalineng ed ibabaga ra, tan mangimano ed saray bengatlan pakapapagaan da. Sano walay angipatnag na interes, paisulat ed balon manangipalapag iray makanan impormasyon nipaakar ed samay indalaw. Usaren itan ya impormasyon pian sikatoy tulongan a manparaan parad onsaginonor iran pantotongtong.

³ Pamparaan Parad Ipawil: Repasoen so primeron indalaw, tan ibangat so iyaaralan no panon so pamili na sakey ya aspekto na mensahe na Panarian a managyat ed samay unabung. (1 Cor. 9:19-23) Mangiparaan kayon dua na antikey a presentasyon a tugyopen na sakey a teksto ed Biblia tan sakey a parapo ed iyaaral tayon publikasyon. Niarum ni, manparaan kayo’y nitepet ed sampot na tongtongan a pangibasiyan na ontumbok ya idalaw yo. Ibangat so balon manangipalapag no panon a napalaknab so kakabatan na too ed Salitay Dios diad kada idalaw to.

⁴ Makatulong met no itaryaan so iyaaralan na simplin introduksion. Kayari pangibano ed unabung, oniay nayarin ibaga to: “Nanliketan ko imay impakapitongtong ko’d sika nen imbeneg, tan pinmawil ak pian inabang ni lamet so ibabaga na Biblia nipaakar ed [salambiten so tema].” Nayarin kaukolan yo met ya ibangat so balon manangipalapag no antoy gawaen sano duman too so angilukas na puerta.

⁵ Sikukulin Mamawil: Pasesegen so iyaaralan a mangipanengneng na maabig ya ehemplo diad pamawil a tampol ed amin na saramay angipatnag na interes. Nayarin kaukolan so maminpigan ipawil pian nabanaan iray totoo ed kaabungan. Bangatan so iyaaralan no panon so mitarato parad ipawil lamet, tan tulongan pian natalosan to a kaukolan so ipawil unong a nipromiso. (Mat. 5:37) Ipasal so balon manangipalapag a magmaliw a mapangasi, makonsidera, tan marespeto legan ton manaanap ed saray kinmarneron totoo tan legan ton babayuboan so interes da.​—Tito 3:2.