Usaren a Sikakabat so Panaon Yo

¹ Lapud pilalek tayon paliketen si Jehova, napapakiwas itayon isentroy bilay tayo ed maespiritual iran aktibidad. Sisimbawaen itayo na Salita to a mantultuloy ‘ya anapen nin unona so panarian’ tan “seguroen iray bengatlan mas importante.” (Mat. 6:33; Fil. 1:10, NW) Panon tayon saliwen so panaon parad intereses na Panarian tan pansiansiaen a segundaryo iray agtanto importantin aktibidad?​—Efe. 5:15-17.

² Iyuna Iray Aktibidad Nipaakar ed Panarian: Iyeskedyul yoy panaon yo pian ag-itan nadarak ed saray bengatlan ag-importante. Igagapo na arum so bulan diad panmamarka ra ed kalendaryo na espisipiko iran agew parad lawak na ministeryo. Tan seseguroen dan agnasaletan na arum a pamaakaran iratan a plano. Ontan met so nayarin gawaen pian nasaliw so panaon parad saray pantitipon, personal a panagaral, tan saray kombension. Dakel so walaan na inagew-agew ya eskedyul ya onggagapo odino manasampot ed pambasa na Biblia. Mangigana na espisipikon oras parad kada importantin aktibidad, tan agpapaulyan a nasaletan iratan na arum a bengatla ya agmet nakaukolan.​—Ecl. 3:1; 1 Cor. 14:40.

³ Limitaan so Pangusar ed Mundo: Diad arum a bansa et dakerakel so isport, panligliwaan, panagrelaks, tan paborito iran aktibidad. Dakel so alablabas a mangipapanaon ed panagbantay na telebisyon odino panagkompyuter. Balet, say pagmaliw ya okupado ed saray aktibidad a pamalabasay oras tan saray modelon kagawaan ya iyoopresi na sayan mundo so seguradon manresulta ed pakadismaya. (1 Juan 2:15-17) Kanian, papasesegen itayo na Kasulatan ya agsigpot ya uusaren so mundo. (1 Cor. 7:31) Diad italineng yo ed satan a makabat a simbawa, nipatnag yo ed si Jehova a say panagdayew ed sikato so manuna ed bilay yo.​—Mat. 6:19-21.

⁴ Asingger lan manampot iyan peles a sistema. Saramay mangiyuuna ed intereses na Panarian so manliket tan makagamor na abobon na Dios. (Uli. 8:32-35; Sant. 1:25) Sikakabat tayo komon sirin ya usaren iyan makanakanan kayamanan, salanti, say panaon tayo.

Parte 12​—Pangikondukta na Progresibo Iran Panangiyaral na Biblia

Tulongan Iray Iyaaralan a Mangigapo tan Mangikondukta na Panangiyaral na Biblia

¹ Sano mibibiang la ed lawak na ministeryo iray iyaaralan tayoy Biblia, nayarin talawan ira diad pannonot lambengat ed pangigapo tan pangikondukta na dili ran panangiyaral na Biblia. Panon tayo ran natulongan a magmaliw a positibo ed sayan importantin kabiangan na ministeryo tayo?​—Mat. 24:14; 28:19, 20.

² Bektaman a kinmualipika la bilang agbautismadon manangipalapag so sakey ya iyaaralan na Biblia, maseguron sikatoy akapampalista la ed Teokratikon Eskuelaan Parad Ministeryo. Say kipapasal to ed panagparaan tan panangipresenta ed saray asainmin bilang estudyante so ontulong ed sikaton nabayuboan so dunong ed panagbangat a kaukolan na ‘komikimey ya anggapoy nepeg ton ibaing, a dugay panangibangat to’d katuaan na salita.’​—2 Tim. 2:15, Maung a Balita.

³ Ibangat Panamegley na Ehemplom: Impasal nen Jesus iray babangatan to diad impangiter toy malinew ya instruksion tan maabig ya ehemplo. Inkuan to: “Balang sakey a nagnap ya abangatan so magmaliw a singa say bumabangat to.” (Luc. 6:40, NW) Importante so pangalig ed si Jesus diad pangipanengneng moy maong ya ehemplo diad dilin ministeryom. Legan a naiimatonan na iyaaralan mo so ehemplom ed ministeryo, natalosan to a say gagala na panagpawil et pian makapangigapo na saray panangiyaral na Biblia.

⁴ Ipaliwawa a sano mangiyoopresi itayo na panangiyaral, kaslakan et agmet kaukolan a deskribien a detalyado so uksoyan na panagaral. Mabetbet et sankaabigan lay pangidemostra ed satan diad pangusar lambengat na sakey odino duaran parapo ed iyaaral tayon publikasyon. Saray makatulong a suhestion ed panggawa ed saya so naromog ed pahina 4 na Agosto 2005 a Ministeryo Tayo ed Panarian tan ed pahina 6 na Mayo 2002 a Ministeryo Tayo ed Panarian.

⁵ Sano matukoy, imbitaan so iyaaralan a miulop ed sika odino ed sananey nin eksperiensyadon manangipalapag diad arum a panangiyaral na Biblia. Sikatoy nayarin mankomento ed sakey a parapo odino manunan teksto. Diad pangobserba na iyaaralan, dakel so naaralan to nipaakar ed pangikondukta na progresibo iran panangiyaral na Biblia. (Uli. 27:17; 2 Tim. 2:2) Komendaan mo, tan isingbat ed sikato no panon so iyaligwas to.

⁶ Say pangipasal ed saray balon manangipalapag a magmaliw a managbangat na Salitay Dios so manginlong ed sikara parad ‘maabig a gawan’ panangigapo tan panangikondukta na dili ran panangiyaral. (2 Tim. 3:17) Agaylan makapnek so pankimey a kaiba ira diad maaron pangiimbita na: “Say malabay, mangala ed danum na bilay ya andi-bayar”!​—Apo. 22:17.