Panangigapoy Panangiyaral na Biblia Dia ed Puerta tan Panamegley na Telepono

1, 2. Panon so nayarin pangiyadapta tayo ed programa tayon panangiyaral na Biblia pian tulongan iray okupadon totoo?

¹ Okupado iray totoo natan. Ingen ta dakel so interesado ed maespiritual iran bengatla. Panon tayo iran natulongan a mamenek ed espiritual a pankaukolan da? (Mat. 5:3) Dakel a manangipalapag so makapangiyaaral na Biblia ed saray totoo dia ed puerta odino panamegley na telepono. Nayarian yo kasin palaknaben so ministeryo yo ed onian paraan?

² Pian makapangigapo na panangiyaral na Biblia, kaukolan ya akaparaan itayon idemostra itan bektaman a walay pankanawnawa. Panon tan iner iya nayarin gawaen?

3. Akin a mangidemostra na panangiyaral na Biblia diad primeron dalaw, tan panon iyan nagawaan?

³ Dia ed Puerta: Sano walay naromog yon too a labay toy mitongtong nipaakar ed Biblia, ibukay labat ed parapo ya imparaan yo la, a singa say unonan parapo na leksion 1 na brosyur a Kakaukolanen, insan yo igapo. Basaen so parapo, konsideraen so tepet, insan itongtong so sakey odino duaran nisitan teksto. Diad kaslakan et nagawaan iya ed limara odino samploran minuto dia ed puerta a mismo. Sano nanliketan na too so tongtongan, iyarunsa so pangitongtong ed onsublay a sakey odino duaran parapo diad arum a panaon.​—Saray kaaruman a suhestion ed panangusar na direktan panangiparungtal pian nigapoy panangiyaral so naromog ed Mayo 2002 a Ministeryo Tayo ed Panarian, p. 6.

4. Panon so nayarin pangigapo tayo na panangiyaral na Biblia dia ed puerta diad ipawil tayo?

⁴ Nausar met itan a paraan pian makapangigapo na panangiyaral na Biblia sano ompawil. Alimbawa, nayarin iparungtal yo so brosyur a Kakaukolanen tan itongtong so ngaran na Dios diad pangusar ed leksion 2, parapo 1-2. Diad onsublay ya idalaw, nayari yon itongtong no antoy ipaparungtal na Biblia nipaakar ed kalidades nen Jehova, ya usaren so parapo 3-4. Parad ontumbok a pantongtong, nayari yon konsideraen so parapo 5-6 tan say litrato ed pahina 5 pian nipabitar no panon a say panagaral ed Biblia so ontulong ed sikatayon nakabat si Jehova. Amin na saya et nagawaan legan kayon walad puerta.

5, 6. (a) Akin a nayarin mas labayen na arum a totoo so paiyaralan na Biblia panamegley na telepono? (b) Anton paraan so nayarin usaren tayo sano mangiyoopresi na panangiyaral panamegley na telepono?

⁵ Panamegley na Telepono: Walaray totoon mas labayen day paiyaralan na Biblia panamegley na telepono nen say no pegdaten ed ayaman. Imanoen so onggendan ya eksperiensya: Legan a mankakabkaabungan so sakey ya agin bii, sikatoy akaromog na ugaw nin ina ya okupadon naynay ed trabaho to. Sanen agto la nabanaan so bii ed abung, denesidi ton tawagan. Impaliwawa na bii a talagan anggapoy panaon ton mitongtong nipaakar ed Biblia. Inkuan na agi: “Diad 10 odino 15 a minuto, makaaral ka lay balo, anggan diad telepono.” “Sige, basta diad telepono, labay ko!” so ebat na bii. Agnambayag, nikokondukta la so regular a panangiyaral panamegley na telepono.

⁶ Kasin walaray dadalawen yo a malabay a paiyaralan panamegley na telepono? Nayari yon salien so asalambit a paraan, odino ibaga labat lan: “No labay yo, nayari tayon pantongtongan so Biblia diad telepono. Ompan mas kombeniente kayo ed satan?” Sano itukoy-tukoy tayo ed sirkumstansya na arum so panangiyaral na Biblia a programa tayo, nayarin natulongan tayo iran ‘naromog so pikakabat ed Dios.’​—Uli. 2:5; 1 Cor. 9:23.

No Anto so Ibaga Nipaakar ed Saray Magasin

Say Panag-Bantayan Ago. 15

“Kayari na makapaermen a pakaandi na sakey a pinabli, panumamengan na dakel no anto kasi nagagawa diad ipapatey. Diad padesir yo, posible kasin talosan so patey? [Abuloyan ya onebat.] Ipapaliwawa na sayan magasin no antoy ibabaga na Biblia nipaakar ed kipapasen na saray inaatey. Sisingbaten met na saya so sipan na Dios a pamaoli ed saray inadaro tayon inaatey.” Basaen so Juan 5:28, 29.

Awake! Ago. 22

“Amta yo ta a say turismo so atawag a numero uno a manag-impleyo ed interon mundo? [Abuloyan ya onebat.] Say inkasil na turismo so amawala na saray gunggona ontan met na saray problema. Uusisaen na sayan magasin iray bentaha tan disbentaha na modernon industriya na turismo. Lugan met na saya so pigaran praktikal a suhestion parad saray ombiabiahe ed nanduruman bansa.”

Say Panag-Bantayan Set. 1

“Diad mundo natan, say katooran et sakey a kalidad ya irayrayew balet ta matalag ya iyaaplika. Agta alay abig komon no dakel nin totoo so singa sayay kaaron adeskribe dia ay? [Basaen Uliran 17:17. Insan abuloyan ya onebat.] Ipapaliwawa na sayan magasin iray gunggona na pagmaliw tayon matoor ed saray kapamilyaan tan kakaaro tayo.”

Awake! Set. 8

“Seguro et pandinayewan yo so pantutunosan na saray pinalsa. [Mamitla na sakey ya asalambit ya alimbawa diad artikulo.] Agta makapaermen ta saray totoo et ag-ira ontan, anta mas iilaloan komon itan ed sikara? [Abuloyan ya onebat.] Ipapaliwawa na sayan magasin no panon a magano lan pawalaen na Dios so kareenan tan pantutunosan diad dalin.” Basaen so Isaias 11:9.