Parte 3​—Pangikondukta na Progresibo Iran Panagaral na Biblia

Epektibon Panangusar ed Kasulatan

1. Akin a nepeg tayon pabitaren so Kasulatan sano mangiyaaral na Biblia?

¹ Say gagala tayo ed panangiyaral na Biblia et say ‘panggawa na saray babangatan’ diad panulong ed totoo a talosan tan awaten iray bangat na Salita na Dios insan iyaplika iratan ed bilay da. (Mat. 28:19, 20; 1 Tes. 2:13) Kanian, say panagaral et nepeg ya akasentro ed Kasulatan. Diad gapo et nayarin makatulong so pangibangat ed saray estudyante ya anapen so espisipiko iran teksto diad mismon Biblia ra. Balet, panon tayon nausar so Kasulatan pian tulongan iran ombulaslas ed espiritual?

2. Panon tayon pilien no dinan iran teksto ed Biblia so basaen tan singbaten?

² Mamili na saray teksto a basaen: Sano manpaparaan kayo, amtaen no panon a say kada nisitan teksto diad leksion et misiglaot ed punto a kokonsideraen, insan desidien no dinan so basaen tan singbaten yo legan na panagaral. Kaslakan lan maabig no say basaen et saramay mangipapanengneng ed Makasulatan a basiyan na sisisiaen tayo. Saray teksto a mangitatarya na kaaruman ya impormasyon so nayarin agla basaen. Ikonsidera iray pankaukolan tan kipapasen na kada iyaaralan.

3. Antoy gunggona na pantepet, tan panon tayon nagawaan iya?

³ Mantepet: Imbes ya ipaliwawa ed iyaaralan iray teksto ed Biblia, paipaliwawa yo iratan ed sikato. Sikatoy natulongan yo ed saya diad sidudunong a pantepet yo. No mapatnag la so kiyaplikaan na kasulatan, nayarin itepet yo labat no panon ya onsusuporta so teksto ed ibabaga na parapo. Diad arum a kipapasen, nayarin nakaukolan so mas direkta odino nanggegendanan a tepetepet pian niwanwan so iyaaralan ed dugan konklusyon. No nakaukolan ni so kaaruman iran eksplinasyon, nagawaan iya kayarin inmebat so iyaaralan.

4. Kaunongay nakaukolan a pangipaliwawa ed kasulatan a basaen tayo?

⁴ Pansiansiaen itan a simpli: Say asintadon pumapana et mankaukolan labat na sakey a pana parad pangipuntingan to. Mipadpara met, agkaukolan na marunong a managbangat so dakel a salita pian idanet so sakey a punto. Sarag ton ipasabi so impormasyon diad simpli, malinew, tan suston paraan. No maminsan, nayarin kaukolan yo so mansukimat ed saray Kristianon publikasyon pian natalosan so kasulatan tan suston nipaliwawa itan. (2 Tim. 2:15) Balet paliisan so pangipaliwawa ed amin ya aspekto na kada kasulatan diad panagaral. Ilaktip labat iramay nakaukolan pian nidanet so punto a sisingbaten.

5, 6. Panon tayon natulongan iray iyaaralan ya iyaplika so Salita na Dios ed bilay da, balet antoy nepeg tayon paliisan?

⁵ Manggawa na praktikal ya aplikasyon: No matukoy, tulongan so iyaaralan a manebek ed no panon ya onaplika ed sikato iray teksto. Alimbawa, sano sisingbaten so Hebreos 10:24, 25 ed iyaaralan ya agni onaatendi ed saray Makristianon miting, nayarin ipaliwawa yo ed sikato so sakey ed saray miting tan imbitaan ya onatendi. Balet agyo pipiliten. Abuloyan so Salita na Dios a mamakiwas ed sikaton mamaliket ed si Jehova.​—Heb. 4:12.

⁶ Legan tayon susumpalen so ingganggan a manggawa na saray babangatan, komon ta nipaseseg tayo so ‘katutulok diad panisia’ panamegley na epektibon panangusar ed Kasulatan.​—Roma 16:26.

No Anto so Ibaga Nipaakar ed Saray Magasin

Say Panag-bantayan Nob. 15

“Kaliktan na maslak a totoo so nawalaan na mabunigas tan andukey a bilay. Balet no posible itan, labay yo kasi so manbilay a maando? [Abuloyan ya onebat. Insan basaen so Juan 17:3.] Sisingbaten na sayan magasin so sipan na Biblia a bilay ya andi-anggaan. Uusisaen met na saya no anto so kipapasen na bilay sano nagawa la itan ya insipan.”

Awake! Nob. 22

“Diad apalabas a 20 taon, baleg so inaligwasan ed pakatalos tan panagtambal ed AIDS. Balet, siansia nin dakel so totoo ya aliwan susto so impakatalos da. [Ipanengneng so kahon a “Myths About AIDS,” tan abuloyan a mankomento.] Sisingbaten na sayan magasin no panon a naprotektaan na atateng iray anak da.” Basaen so Deuteronomio 6:6, 7.

Say Panag-bantayan Dis. 1

“Say sakey a walna a napangibiigan ed totoo manlapud ayayep et say abilidad a mangamta na duga tan aliwa. Makapaermen balet ta dakel a totoo so manggagawa na mauges iran bengatla. Diad padesir yo, akin kasi? [Abuloyan ya onebat. Insan basaen so Jeremias 17:9 odino Apocalipsis 12:9.] Sisingbaten na sayan magasin no anto so makatulong ed sikatayo a mangamta tan manggawa na duga.”

Awake! Dis. 8

“Saray inyaligwas ed teknolohiya so ag-akapanguman ed manunan pankaukolan na too parad pikakaaro. Balet naiimano yo ta a lapud saray impanguman ed kaliberliber et mairap a nabayuboan so maapit a pankakaaro? [Abuloyan ya onebat. Insan basaen so Uliran 18:24.] Sisingbaten na sayan magasin no panon itayon nawalaan tan napansiansia so peteg iran kaaro.”