Leksion Manlapu ed Marino

MAKAPAKESAW a tuloy so panlayag a bukor diad dayat. Say pakapakel lapud banal so magmainomay a mangipaarap ed marino ed kapeligroan, kanian walaray pakakalingo tan aliwan desisyon. Lapud saya, papablien to so kablian na pataga ed dayat. Mangiyabuloy itan ed apakel lan managlayag pian makapanpainawa tan onkasil lamet ya agnapagaan ompan niyanor. Ontan met, say pataga ed dayat so mamabiskeg ed bandad arap na bapor pian onsuba ed dagem tan daluyon tan napansiansian walad maligen a tuloy a kipapasen so bapor.

No panon a saray managlayag et nipapaarap ed dakel a kapeligroan diad dayat, saray Kristiano so nipapaarap met ed tuloytuloy iran desdes na sayan mundo tan liknaen da so pankaukolan a manpainawa. Diad tua, aminsan et inrekomenda nen Jesus ed saray babangatan to: “Galidia ed arawi ed sakey a pasen a lawak, tan manpainawa kayon magano.” (Marcos 6:31) Natan et walaray nayarin manbakasyon na pigaran simba pian manbiahe odino ompasyar no sampot simba pian manrelaks a kaibay pamilya ra. Sarayan bekta so makaparepresko tan makapabiskeg lamet. Balet, panon tayon naseguro a maligen itayo ed espiritual a paraan diad saratan a panaon? Anto so onkanan espiritual a pataga tayo pian naresistian tayo so kiyanor tan namantini tayoy inkaligen tayo?

Walay mabunlok ya intarya nen Jehova parad sikatayo. Satan et say Masanton Salita to, say Biblia. Diad pambasa tayo ed satan ya inagew-agew, makapansiansia itayon maapit ed si Jehova tan agbalot niyarawi manlapud sikato. Say simbawa na satan so mamaligen ed sikatayo tan ontulong ed sikatayon natalindegan iray tukso nen Satanas tan say mundo to. Say panmantini tayo ed regular a programa na panagbasa ed Biblia, anggano agtayo eskedyul, so onkanan pataga tayo ed espiritual a paraan.​—Josue 1:7, 8; Colosas 2:7.

Papanonotan itayo na salmista a “mapalar so too” a “say gayaga to wala ed ganggan nen Jehova; tan diad ganggan to mandalepdep ed agew tan labi.” (Salmo 1:1, 2) Say inagew-agew a pambasa ed Salita na Dios so ‘mamaliket’ ed sikatayo a resulta na pagmaliw a tuan arepreskoan tan apabiskeg lamet, ya akaparaan a mangituloy ed Kristianon kurang tayo.

Kasin Labay Mo so Pabisita?

Anggan diad sayan magulon mundo, nagamoran mo so liket manlapud suston pikakabat ed Biblia nipaakar ed Dios, say Panarian to, tan say makapakelaw a gagala to ed katooan. No abrasaen mo so kaaruman ya impormasyon odino kaliktan mo so sakey a mangikondukta ed sika na libren panagaral na Biblia ed abung, ipangasin mansulat ed Watch Tower, P.O. Box 2044, 1060 Manila, odino diad matukoy ya address a nilista ed pahina 2.