No Panon so Pangusar ed Saray Pangaligan a Presentasyon

1. Panoy nepeg tayon panmoria ed saray nitaryan pangaligan a presentasyon?

¹ Saray pangaligan a presentasyon parad panangiyopresi na saray magasin tan arum nin publikasyon tayo so regular ya ompapaway ed Ministeryo Tayo ed Panarian. Sano mibibiang itayo ed ministeryo, agtayo kaukolan ya eksakton aligen so nisulat iran nisuherin presentasyon. Nitarya iraya a pinagkagiya tayo ed no antoy nayarin ibaga tayo. Kaslakan et magmaliw itayon mas epektibo no ibaga tayo ed dilin salita iray presentasyon. Say pansalita ed natural a paraan so mamarelaks ed unabung tan mangipatnag na inkasimoon tan kombiksion.​—2 Cor. 2:17; 1 Tes. 1:5.

2. Akin a kaukolan tayon ikonsidera iray lokal a kustombre sano manpaparaan itayo na presentasyon?

² Itukoy-tukoy so Presentasyon Yo: Say paraan na panangipresenta tayo ed maong a balita so iimpluensyaan a tuloy na saray lokal a kustombre. Diad teritorya yo kasi et kaukolan nin mibanoan sakbay yon niparungtal so presentasyon ed tongtongan, odino iilaloan na saray totoo ya onderitso kayo lan tampol ed punto? Manguman-uman itan ed kada pasen tan no maminsan et diad kada too ni ingen. Kaukolan met so pakatebek diad panangusar na saray tepet. Walaray tepet a matukoy ed sakey a pasen balet ta nayarin aliwan matukoy ed arum. Kanian, kaukolan a nawalaan itayo na suston pakarandan tan itukoy iray presentasyon tayo unong ed aawaten ed lokal.

3. Akin a nepeg ya ikonsidera so abenegan tan panmoria na saramay nakakatongtong tayo?

³ Niarum ni, kaukolan tayon ikonsidera so abenegan tan panmoria na saray totoo ed teritorya tayo sano manpaparaan itayo parad lawak na serbisyo. Singa bilang, maseguron mandumaan so pangisingbat yo ed Mateo 6:9, 10 diad sakey a debotadon Katoliko tan ed sakey a toon agmikabisado ed pikakasin “Ama Mi.” Diad pannonot lan masakbay, mabetbet a nitukoy tayo iray presentasyon tayo pian magmaliw iratan a mas makapainteres ed saray totoon nanaabet tayo ed ministeryo.​—1 Cor. 9:20-23.

4. Akin ya importante so maabig a panagparaan?

⁴ Anggan sano plano tayon gawaen a giya iray pangaligan a presentasyon a singa nisulat, agnin siansia napalumbasan na satan so maabig a panagparaan. Nepeg tayon basaen a maong so artikulo odino kapitulo a plano tayon iparungtal tan anapen iray punton nayarin managyat na interes. Insan ilaktip iraya ed presentasyon tayo. Magmaliw itayo labat ya entusiastiko ed panangiyopresi na saray publikasyon sano kabisado tayo iray maabig ya impormasyon a wadtan.

5. Akin a nayari itayo met a manparaan na saray arum a presentasyon, tan panon tayon nagawaan iya?

⁵ Arum nin Panangipresenta: Kasin saray nidatak labat a pangaligan a presentasyon so nausar tayo ed pitotongtong? Andi. No mas mainomay ed sikayo so pangusar na sananey a metodo odino teksto, usaren itan. Nagkalautla ed saray magasin, magmaliw ya alisto ed saray pankanawnawa a niparungtal iray artikulon aliwan nipaakar ed samay walad apis a nayarin paninteresan na saray totoo ed teritorya yo. Sano mangidedemostra na saray presentasyon ed Pantitipon Parad Panagserbi, nayarin iyuksoy so pangusar ed antokaman a metodo ya epektibo ed lokal a teritorya. Diad onian paraan et amin so natulongan ya epektibon mangiparungtal ed maong a balita.

No Antoy Ibaga Nipaakar ed Saray Magasin

Say Panag-bantayan Ene. 15

“Labay tayon amin so magmaong a bilay parad sikatayon mismo tan ed saray anak tayo, balet ta liknaen na dakel ya anggapo so nagawaan da pian nadampot itan. Padesir yo nakontrol tayo kasi so arapen tayo? [Abuloyan ya onebat.] Ipaparungtal na sayan magasin so ibabaga na Biblia a walay nagawaan tayo, ta say arapen tayo so mandependi ed saray gagawaen tayon desisyon natan.” Basaen so Deuteronomio 30:19.

Awake! Ene. 22

“Sano walay liliknaen tayo, apresyaen tayon amin so doktor a mangikokonsidera ed liknaan tayo. Balet naisip yo kasin dakel a pasyente so agla mangikokonsidera ed liknaan na doktor? [Abuloyan ya onebat.] Uusisaen na sayan magasin iray angat a kipapaarapan na saray doktor tan no antoy arapen parad panagtambal.” Basaen so Isaias 33:24.

Say Panag-bantayan Peb. 1

“Agta makapagonigon a dakdakel a totoo natan so biktima na panaglames tan karawalan? [Mangibaga na sakey ya agano nin alimbawa a balitado ed lugar yo, tan abuloyan ya onebat.] Uusisaen na sayan magasin no panon a momoriaen na Dios so bilay na too. Ipapaliwawa met na saya no panon to itayon iliktar manlapud saray kairapan natan.” Basaen so Salmo 72:12-14.

Awake! Peb. 8

“Sakey ed saray manunan kidudungetan tayon angat natan et say panalona ed detdet. Anganko et onabobon kayo? [Abuloyan ya onebat.] Onia so suston impasakbay na Biblia a nagawa. [Basaen so 2 Timoteo 3:1.] Itatarya na sayan magasin iray praktikal a suhestion ya ontulong ed sikayo tan ed pamilya yo a natalonaan so detdet.”