Kapitulo 44
Say Apocalipsis tan Sika
1. (a) Anton panamaseguro lamet so iiter na anghel ed si Juan nipaakar ed amin ya alay abig iran sipan ed Apocalipsis? (b) Siopa so mangibabaga ya, “ondago ak a magano,” tan kapigan itan ya ‘idadago’?
DIAD impamasa ed makapaliket a deskripsion na Balon Jerusalem, nayarin napakiwas kayon mangitepet: ‘Peteg kasin nagawa so ontan lan alay abig a bengatla?’ Eebatan nen Juan itan a tepet diad pangirereport to ed saray ontumbok a salita na anghel: “Tan inkuanto ed siak: Saraya a salita sikara so matoor tan matua: tan say Katawan [a] Dios na saray espiritu na propetas, imbaki to so anghel to pian ipatnag to ed saray aripen to so saray bengatla a kaukolan a nagawan magano. Tan nia, ondago ak a magano. Mapalar [odino maliket] so saray mangunor ed saray salita na propesiya na sayan libro.” (Apocalipsis 22:6, 7) Amin ya alay abig iran sipan ed Apocalipsis so petepeteg a nasumpal! Diad pansasalita ed ngaran nen Jesus, inyabawag na anghel a si Jesus so asingger lan onsabi, “magano.” Seguradon saya imay isasabi nen Jesus “a singa matakew” pian deralen iray kakabusol nen Jehova tan igapo so engrande tan maliket a kapantokan na Apocalipsis. (Apocalipsis 16:15, 16) Kanian, nepeg tayon itunos so kabibilay tayo ed saray salita na “sayan libro,” say Apocalipsis, pian niyabawag itayo a maliket ed satan a panaon.
2. (a) Panon so inkiwas nen Juan ed daakan a panangiparungtal, tan anto so imbaga na anghel ed sikato? (b) Anto so naaralan tayo ed imbaga na anghel a, “Manalwar ka!” tan, “Igalang [odino dayewen] mo so Dios”?
2 Kayari na ontan lan daakan a panangiparungtal, natalosan no akin ya abigbigla a maong si Juan: “Tan siak a Juan so akadngel tan akanengneng ed sarayan bengatla. Tan kayari impakadngel ko tan impakanengneng ko, dinmakmomo ak pian mangigalang ak ed arap na saray sali na saman so anghel ya angipanengneng ed siak na saraya a bengatla. Tan sikato kuanto ed siak: Nengneng mo [“manalwar ka,” NW] ta agmo gawaen itan, ta aripen ak met a kaparam tan kapara na saray agagim a propetas, tan saray mangunor ed saray salita na saya a libro: igalang mo so Dios.” (Apocalipsis 22:8, 9; ikompara so Apocalipsis 19:10.) Sayan amiduan danay a nibalikas a pasakbay ya agmandayew ed saray anghel so matukotukoy ed panaon nen Juan, sanen arum so mapatnag a nanggawa na ontan a panagdayew odino mangibabagan makakaawat na espisyal iran panangiparungtal a nanlapud saray anghel. (1 Corinto 13:1; Galacia 1:8; Colosas 2:18) Natan, ipapabitar na satan so katuaan a nepeg tayon dayewen so Dios lambengat. (Mateo 4:10) Nepeg ya agtayo dudutakan so tuan panagdayew diad pandayew ed siopaman odino antokaman a bengatla.—Isaias 42:5, 8.
3, 4. Anto so intultuloy ya imbaga na anghel ed si Juan, tan panon ya ontutulok so alanaan a nakdaan ed saray salita to?
3 Intuloy nen Juan: “Tan inkuan to ed siak: Agmo selyoan so saray salita a propesiya na saya a libro; ta say panaon asingger la. Say aliwa a matunong, yabuloy mo ni a manggawa na aliwa a matunong: tan say marutak, yabuloy ni a marutak: tan say matunong, yabuloy mo ni a manggawa na matunong: tan say santo, yabuloy mo ni a napasantos.”—Apocalipsis 22:10, 11.
4 Say alanaan a nakdaan natan so ontutulok ed saray salita na anghel. Agda sinelyoan iray salita na propesiya. Kanian, say sankaunaan a paway na Zion’s Watch Tower and Herald of Christ’s Presence (Hulyo 1879) so angidatak na saray komento nipaakar ed dakel iran bersikulo na Apocalipsis. Unong a naimano tayo ed inmunan kapitulo, diad inlabas na saray taon et saray Tasi nen Jehova so angipalapag la na arum iran libro a mangipapaliwawa ed Apocalipsis. Natan et sasagyaten mi lamet so imano na amin a manangaro ed katuaan ed sayan mapuersa iran propesiya na Apocalipsis tan say kasumpalan na saratan.
5. (a) Panon to no labay na totoon ipulisay iray pasakbay tan simbawa ed Apocalipsis? (b) Anto so nepeg a kiwas na saray mauyamo tan matunong?
5 No labay na totoo ya ipulisay iray pasakbay tan simbawa ed Apocalipsis, bueno, paulyan ira labat! “Say aliwa a matunong, yabuloy mo ni a manggawa na aliwa a matunong.” No satan so labay da, saramay mantitiblak ed karutakan na sayan malukak a panaon so ompatey ed satan a karutakan. Agmanbayag, sigpot lan nipaakseb iray panangukom nen Jehova, ya onggapo ed kaderal na Babilonia a Baleg. Komon ta maseet a talinengen na saray mauyamo iray salita na propeta: “Anapen yo si Jehova . . . Anapen yo so inkatunong, anapen yo so kauyamoan. Nayari a sikayo naani niyamot dia ed agew na sanok nen Jehova.” (Sofonias 2:3) No nipaakar ed saramay dedikado la ed si Jehova, “say matunong, yabuloy mo ni a manggawa na matunong: tan say santo, yabuloy mo ni a napasantos.” Amta na makabat a say temporaryon gunggona na kasalanan so agbalot makakompara ed magnayon iran bendisyon a panggayagaan na saramay manggegemtan na inkatunong tan inkasanto. Ibabaga na Biblia: “Dalepdep yo ed sikayon dili, no wala kayo ed pananisia; sali yo so sikayon dili.” (2 Corinto 13:5) Base ed kurang a pilien tan pansiansiaan yo, naawat yoy tumang yo.—Salmo 19:9-11; 58:10, 11.
6. Anto so inkuan nen Jehova legan ton kakatongtongen iray managbasa na Apocalipsis, ed unor a pankanawnawa, ed sayan propesiya?
6 Diad unor a pankanawnawa ed sayan propesiya, kakatongtongen natan nen Jehova, say andi-anggaan ya Ari, iray managbasa na Apocalipsis, a kuanto: “Nia, siak ondago ak a magano; tan say pambayar ko wala ed siak, pian tumangan ko so balang sakey unong ed gawa to. Siak so Alfa tan Omega, say sengeg tan kasumpalan, say una tan unor. Mapalar [“maliket,” NW] so saray manlinis ed saray kawekawes da, pian wala so katunongan da ya onsingger ed kiew na bilay tan onloob ed saray pinto na syudad. Manayam ira naani ed paway so saray aso, tan saray manag-anito, tan saray managlawan, tan saray akapatey, tan saray manangigalang ed kinondios, tan siopaman a maliket tan manggawa na tila.”—Apocalipsis 22:12-15.
7. (a) Parad anto ya ‘ondago a magano’ si Jehova? (b) Akin ya anggapoy betang na saray klero na Kakristianoan ed Balon Jerusalem?
7 Maminsan lamet, idadanet nen Jehova a Dios so magnayon ya inkasoberano to tan say katuaan a saray inmunan gagala to et sumpalen to la a siansia. Sikato so ‘ondago a magano’ pian ipaakseb so panangukom tan tumangan to iramay manggugunaet a manaanap ed sikato. (Hebreos 11:6) Saray estandarte to so manetermina no sioparay tumangan tan no sioparay ipulisay. Saray klero na Kakristianoan so kinmiwas a singano ‘emel ya aso,’ a manbulag-bulagan ed saray kabandayan a deneskribe dia nen Jehova. (Isaias 56:10-12; nengnengen met so Deuteronomio 23:18, New World Translation Reference Bible, paimano’d-leksab.) Segurado, ‘nanliketan [da] tan nanggawa’ ira na tila iran doktrina tan bangat tan sigpot ya imbaliwala ra so simbawa nen Jesus ed saray pitoran kongregasyon. Kanian, anggapoy betang da ed Balon Jerusalem.
8. (a) Siopa lambengat so nayarin ‘onasingger ed saray kiew na bilay,’ tan anto so kabaliksan na saya? (b) Panon ya ‘inurasan na [baleg ya ulop] so kawekawes da,’ tan panon dan pansiasiansiaen so malinis a talindeg da?
8 Saraman lambengat so alanaan iran Kristiano a petepeteg a ‘nanlinis ed saray kawes da’ pian magmaliw a malinis ed imaton nen Jehova so apribilehyoan ya ‘onasingger ed saray kiew na bilay.’ Salanti, awaten da so kanepegan tan betang da ya imortal a bilay ed mangatatawen a pasen. (Ikompara so Genesis 3:22-24; Apocalipsis 2:7; 3:4, 5.) Kayari na ipatey da bilang too, makaloob ira ed Balon Jerusalem panamegley na kioli. Sikaray palooben na 12 angheles, bangta sesebelan so siopaman a mangagamil na katilaan odino karutakan anggaman mangibabaga a walaan na mangatatawen ya ilalo. Say baleg ya ulop ed dalin so ‘anguras met ed kawekawes da, tan pinaputi ra ed dala na Kordero’ tan kaukolan dan pansiansiaen a malinis so talindeg da. Nagawaan da iya diad ipaliis ed saray kabandayan ya ipapasakbay nen Jehova dia, tan diad pangipapuso ra ed simbawa nen Jesus diad samay pitoran mensahe to ed saray kongregasyon.—Apocalipsis 7:14; kapitulo 2 tan 3.
9. Antoran salita so sinalita nen Jesus, tan nagkalautlan parad siopa so mensahe to tan say interon Apocalipsis?
9 Kayari nen Jehova, nansalita si Jesus. Ipapaarap to iray makapaseseg a salita to ed saray maptek-impanpuso a manbabasa ed Apocalipsis, a kuanto: “Siak si Jesus imbakik so anghel ko pian tasian to ed sikayo so saraya a bengatla dia ed saray iglesia. Siak so lamot tan say kailalakan nen David say kabontatalan masnag dia ed kabuasan.” (Apocalipsis 22:16) On, sarayan salita so nagkalautlan ‘parad saray iglesia’ odino kongregasyon. Manuna ed amin, saya so sakey a mensahen parad kongregasyon na alanaan iran Kristiano dia ed dalin. Amin a walad Apocalipsis so manunan nipapaarap ed alanaan iran Kristiano, a manayam ed Balon Jerusalem. Diad panamegley na satan a kongregasyon, say baleg ya ulop so apribilehyoan met a makagamor na pakatalos ed sarayan mabli a mapropetikon katuaan.—Juan 17:18-21.
10. Akin a tinawag nen Jesus so inkasikaton (a) “lamot tan say kailalakan nen David”? (b) “say kabontatalan masnag dia ed kabuasan”?
10 Nimatalek ed si Jesu-Kristo so pangipasabi ed Apocalipsis ed si Juan tan diad panamegley to et dia met ed kongregasyon. Si Jesus so namparan “lamot tan say kailalakan nen David.” Sikato imay kailalakan nen David unong ed laman tan sirin et kualipikadon magmaliw ya Ari ed Panarian nen Jehova. Sikato met so magmaliw ya “Andi-anggaan ya Ama” nen David, diad ontan et “lamot” nen David. (Isaias 9:6; 11:1, 10) Sikatoy permanente, imortal ya Ari ed linya nen David, a mananumpal ed sipan nen Jehova ed si David, tan “say kabontatalan masnag dia ed kabuasan” a nipasakbay ed panaon nen Moises. (Numeros 24:17; Salmo 89:34-37) Sikato so “kabontatala’d kabuasan” ya ompepelnak, a mamapabutay ed agew. (2 Pedro 1:19, Maung a Balita) Agnayarian na amin a kasiliban na baleg a kabusol a Babilonia a Baleg ya amperen iyan maglorian ibubutay.
Ikuan: “Gala”!
11. Anton imbitasyon a lukas parad amin so ipaparungtal natan nen Juan, tan siopa so nayarin onkiwas ed satan?
11 Natan et pankanawnawa lan mismo nen Juan so mansalita. Tekep na puson manleppua ed apresasyon lapud amin ya anengneng tan nadngel to, inkelyaw to: “Tan saman so espiritu tan saman so nobya kuanda: Gala. Tan say makadngel, kuanto komon: Gala. Tan say napgaan, ondago: et say malabay, mangala ed danum na bilay ya andi bayar.” (Apocalipsis 22:17) Saray gunggona ed dondon bagat nen Jesus et aliwan parad saray 144,000 labat, lapud nia so imbitasyon a lukas parad amin. Say manamakiwas ya espiritu nen Jehova so onkukurang panamegley na nobyan klase, pian say mensahe et mantultuloy a nipaknol a walaan na sigpot ya inkalinew: “Mangala ed danum na bilay ya andi bayar.” (Nengnengen met so Isaias 55:1; 59:21.) Siopaman a napgaan parad inkatunong et bagaan na “gala” tan mangawat na inkadaakan nen Jehova. (Mateo 5:3, 6) Agaylan apribilehyoan so amin a prospektibon mangaraldalin a klase ya onkikiwas ed sayan imbitasyon na alanaan a Juan a klase!
12. Panon so ikikiwas na baleg ya ulop ed imbitasyon ed Apocalipsis 22:17?
12 Nanlapula’d gapo na dekada na 1930, say ondarakel a bilang na baleg ya ulop so ‘ondedengel’—mangiimano ed imbitasyon. Singa saray alanaan a kapara ran ariripen, adampot da so malinis a talindeg ed arap nen Jehova. Pipirawaten da so panaon sano say Balon Jerusalem so onleksab manlapud tawen, pian mangipaagus na saray bendisyon ed sankatooan. Diad impakadngel ed makapasagyat a mensahe na Apocalipsis, aglambengat ibabaga na baleg ya ulop a “Gala” noagta aktibo met iran manitipon ed arum ni ya ipapaarap ed organisasyon nen Jehova, ya ipapasal da met iraya a mangiyabawag: “Tan say napgaan, ondago.” Kanian mantutultuloy ya ondarakel so bilang na baleg ya ulop, a masulok lan 6,000,000 ed 235 a daldalin ed sankamundoan so mibibiang a kaibay kulang a 9,000 ya alanaan a nobyan klase ed pangiyiimbita na “mangala ed danum na bilay ya andi bayar.”
13. Anton pasakbay so inter nen Jesus?
13 Insan, intuloy lamet nen Jesus so nansalita, a nankuan: “Siak tasian ko ed siopaman ya ondengel ed saray salita a propesiya na saya a libro, No wala so mangarum ed saraya a bengatla, say Dios yarum to ed sikato so saray bakbak unong a nisulat ed sayan libro: Tan no wala so mangekal ed saray salita na libro na sayan propesiya, say Dios ekalen to so apag to ed kiew na bilay, tan dia ed masantos a syudad, dia ed saray nisulat ed sayan libro.”—Apocalipsis 22:18, 19.
14. Panon so panmoria na Juan a klase ed “propesiya” na Apocalipsis?
14 Saramay kabiangan na Juan a klase so nepeg a mangimano ed “propesiya” na Apocalipsis. Agda nepeg ya iyamot odino aruman itan. Say mensahe na satan so nepeg a nipulong ed publiko, “ed toktok day kaabungan.” (Mateo 10:27) Say Apocalipsis so impuyan na Dios. Siopa kasi makapangitepel a manalin manalat ed salita a sinalitan mismo na Dios tan impasabi to panamegley na samay manuuley la natan ya Ari, si Jesu-Kristo? Segurado, satan a too so manepeg labat ya ekalen ed babatiken parad bilay tan managmak na saray bakbak odino salot a sagmaken na Babilonia a Baleg tan say interon mundo.
15. Anto so kabaliksan na saray salita nen Jesus a sikato so “mangiter na tasi ed sarayan bengatla” tan ‘onla dian magano’?
15 Iyaarum natan nen Jesus so unor a panamaseseg: “Say mangiter na tasi ed sarayan bengatla, kuanto, On: peteg, onla ak dian magano.” (Apocalipsis 22:20a) Si Jesus so “tasi a matoor tan matua.” (Apocalipsis 3:14) No tatasian to iray pasingawey ed Apocalipsis, seguradon tua iratan. Sikato tan si Jehova a Dios a mismo so paulit-ulit a mangidadanet ed katuaan a sikaray onsabi lan “magano,” komaliman danay la iyan imbaga nen Jesus dia. (Apocalipsis 2:16; 3:11; 22:7, 12, 20) Say ‘iyonla’ odino isasabi et pian ipaakseb so panangukom ed baleg a balangkantis, ed mapolitikan “arari” tan ed amin niran onsusumpa ed ‘panarian na Katawan tayon [Jehova], tan ed Kristo to.’—Apocalipsis 11:15; 16:14, 16; 17:1, 12-14.
16. Diad pikabat ya onsabi lan magano si Jehova a Dios tan si Jesus, anton mapekder a kiwas so nepeg yon gawaen?
16 Say pikabat yon onsabi lan magano si Jehova a Dios tan si Jesus so nepeg a pakapasesegan yon mansiansian “sinononot ed kiwawala na agew na sanok nen Jehova.” (2 Pedro 3:12, NW) Dinanman ya ompatnag ya inkaligen ed dalin na sistema na bengabengatla nen Satanas et ilusyon labat. Dinanman ya ompatnag ya iyaaligwas a nadadampot na singa tawen a minumundo iran manuley ed silong nen Satanas et temporaryo lambengat. Sarayan bengatla so ompaso. (Apocalipsis 21:1) Say alenleneg a permanente et naromog ed si Jehova, say Panarian to ed silong nen Jesu-Kristo, tan say insipan to a balon mundo. Agbalot lilingwanan iya!—1 Juan 2:15-17.
17. Panon kayon naapektaan na apresasyon yo ed inkasanto nen Jehova?
17 Sirin et abuloyan yon mangimpluensya a maong ed bilay yo iray naaralan yo ed Apocalipsis. Agta say impakapasikmat yo ed mangatatawen a kiwawala nen Jehova et angipaslep ed sikayo na agnaparaan a gloria tan inkasanto na Manamalsa tayo? (Apocalipsis 4:1–5:14) Agaylan pribilehyo so panlingkor ed ontan a Dios! Komon ta say apresasyon yo ed inkasanto to so mamakiwas ed sikayon mangipapuso ed simbawa nen Jesus ed saray pitoran kongregasyon tan paliisan iray bengatla a singa say materyalismo, panagtalintao, imoralidad, inkamala-inemem, apostasyan sektarianismo, odino dinanman nin bengatla a pansengegay agpanliket nen Jehova ed serbisyo yo. (Apocalipsis 2:1–3:22) Saray salita nen apostol Pedro ed Juan a klase so onaplika met ed baleg ya ulop: “Unong a say anawag ed sikayo et masantos, masantos kayo met komon ed ganaganay panagbilay.”—1 Pedro 1:15, 16.
18. Anto so sigpot a pibiangan yo anggad posible, tan akin a sayan kimey et maganat natan?
18 Niarum ni, napakiwas kayo komon a mamasimbalo ed seseg yo legan ya iyaabawag yo so “taon na panamalangkap nen Jehova, tan say agew na kababales na Dios tayo.” (Isaias 35:4; 61:2) Balanglan kabiangan kayo na melag a pulok odino baleg ya ulop, nawalaan kayo komon na sigpot a pibibiang anggad posible ed pangiyabawag na panangikalbo ed pitoran yaong na sanok nen Jehova, a mangipapasakbay na saray panangukom na Dios ed mundo nen Satanas. Ontan met, itekep yo so boses yo ed magayagan panangiyabawag ed andi-anggaan a maong a balita nipaakar ed niletneg lan Panarian nen Jehova tan ed Kristo to. (Apocalipsis 11:15; 14:6, 7) Maganat a mibiang ed sayan kimey. Tan komon ta say pakaamta a wala tayo la ed agew na Katawan so mamakiwas ed dakel ya agni manlilingkor ed si Jehova pian mibiang ed kimey a panangiyabawag na maong a balita. Komon ta onaligwas met iraya diad pangidedika ray bilay da ed Dios tekep na gagalan manpabautismo. Tandaan, “say panaon [so] asingger la”!—Apocalipsis 1:3.
19. Antoray pansaran salita na masiken lan apostol Juan, tan panon so ikiwas yo ed saratan?
19 Kanian, kaibay Juan, masimoon tayon ipikasi: “Amen: Gala, Katawan a Jesus.” Tan onia ni so inyarum na masiken lan apostol Juan: “Say grasya na Katawan tayon Jesu-Kristo so wala komon ed saray sasanto.” (Apocalipsis 22:20b, 21) Ontan met komon ed amin yon manbabasa ed sayan publikasyon. Nawalaan kayo komon na pananisia ya asingger lay engranden kapantokan na Apocalipsis, ta pian sikayo met so makapibiang ed sikami ed impapuson “Amen”!
[Litrato ed pahina 314]
‘Diad paway et saray aso . . . ’
[Litrato ed pahina 315]
‘Maliket iray . . . onloob ed saray pinto na syudad’