Gawa Yon Kalat so Pangikondukta na Panangiyaral na Biblia
1 “Itangwa yoray mata yo, tan nengneng yo so kaumaan, ya amputi la ran maparaan ed panagani.” (Juan 4:35) Saratan a salita nen Jesu-Kristo et seguradon onaplika ed situasyon ya aarapen na saray Kristianon ministro natan.
2 Wala niran siansia so naroromog a matuan impanpuson totoo a manpilalek a nabangatan ed saray dalan nen Jehova. Napatnagan iya ed bilang na saray balon babangatan a nababautismoan kada taon. No peteg ya interesado kayon mangiyaral na Biblia, antoy nayari yon gawaen?
3 Mangiletneg na Kalat: Unona, gawaen a kalat so pangigapo tan pangikondukta na regular a panangiyaral na Biblia. Lawas nonoten itan a kalat legan a manpupulong. Lapud say kimey tayo bilang Kristiano et lalanoren toy panagbangat, ya aliwa labat a panagpulong, kaukolan a nagkalalon pampelengan tayon amin so pangiyaral na Biblia.—Mat. 24:14; 28:19, 20.
4 Arum Niran Punto a Lawas Nonoten: Importante ed saray manangipalapag na Panarian so impapuson pampikasi. No maminsan et naromog tayo iray totoo a mangipipikasi ed espiritual a tulong. Agaylan bendisyon ya uusaren itayo nen Jehova a mananap tan manbangat ed saratan!—Ag. 2:7; Gawa 10:1, 2.
5 Impikasi na sakey ya agin bii a nawalaan komon na iyaralan na Biblia insan to indispli iray kopya na tract a Labay Moy Makaaral nin Maong Diad Biblia? diad pantratrabahoan to. Sakey a bii so angalay tract tan binasa to. Sanen isusulat to lay ngaran tan address to ed beneg na tract, akitongtong ed sikato so agin bii tan nigapo so panangiyaral na Biblia.
6 Natulongan kayo na saray kaparan manangipalapag ya epektibo ed panangigapo tan panangikondukta na saray panangiyaral na Biblia pian nadampot yo so kalat a pangiyaral na Biblia. Ipikasi ed Dios iray sagpot yo a mananap na iyaralan, tan anamoten so amin a tulong pian nadampot itan a kalat. Nayarin, agmabayag et naeksperiensya yo lay gayaga ed panangiyaral na Biblia.