Panagmintina ed Saray Kingdom Hall Tayo
1. Antoy usar na Kingdom Hall?
1 Say Kingdom Hall tayo et sentro na puron panagdayew diad sakey a komunidad. Anggaman simpli irayan bilding, kaukolan a saratan so namintina tan pansiansiaen a malinis iray kaliberliber to lapud irerepresenta na saratan si Jehova tan saray totoo to ed satan a baley odino barangay.
2. Akin ya importante a pansiansiaen a malinis tan presentable so Kingdom Hall?
2 Regular ya Eskedyul ed Panaglinis: Say panagmintina ed Kingdom Hall et importantin kabiangan na sagradon serbisyo tayo. Onia so ibabaga na libron Organisado ed pahina 121: “Nepeg ya ipasen na saray kabiangan na kongregasyon a pribilehyo ra so panuporta ed pinansyal a pankaukolan na Kingdom Hall ontan met ed saray boluntaryon serbisyo ra diad pamasiansia ed satan a malinis, presentable, tan namimintina. Namparan diad loob tan paway, kaukolan a say Kingdom Hall et matukoy a mangirepresenta ed organisasyon nen Jehova.” Singa nen panaon ya isusulat so Biblia, sikatayo iran lingkor nen Jehova met natan so nepeg a magunaet a ‘mangapiger’ ed pasen na panagdayewan tayo.—2 Awa. 34:10.
3. Panon ya oorganisaen so panaglinis ed Kingdom Hall tan siopa iray nayarin mibiang ed sayan pribilehyo?
3 Kaukolan ya ipaskil ed information board so eskedyul na sinimban panaglinis ed Kingdom Hall. Amin a grupo na panagaral na libro so kaukolan a mansusublayan ed panaglinis ed hall kada simba, a tumboken da so listaan na saray nepeg a gawaen. Amin a makasarag so nepeg a mibiang ed sinimban pribilehyo a pamasiansian malinis tan presentable ed Kingdom Hall. Nayari met a mibiang iray ananak ed panaglinis basta kaiba daray atateng da, diad ontan et nibangat da iran mangipatnag na apresasyon ed sayan pribilehyo. Lalo lan importante so kooperasyon no pigaran kongregasyon so manguusar ed sakey a Kingdom Hall, pian aliwan apasakey iray makapipibiang ed sayan importantin aspekto na panagdayew tayo.
4. Panon ya iyuuksoy so panagmintina ed Kingdom Hall?
4 Panmintina ed Kingdom Hall: Responsabilidad na ulop na mamatatken so pangasikaso ed panmintina ed Kingdom Hall. No saksakey a kongregasyon so manguusar ed Kingdom Hall, sakey a matatken odino ministeryal a lingkor so napabtangan a mangiyuksoy ed kimey. Organisaen to so inagew-agew a pakakausar ed Kingdom Hall, a seguroen ton malinis tan walad kondisyon, tan walay magenap iran uusaren parad panagmintina. No pigara so manguusar ed Kingdom Hall, manuro iray ulop na mamatatken na operating committee pian mangorganisa ed saray uksoyan ed pangasikaso ed bilding tan sular. Sayan committee so onkukurang diad panangidirehi na saray ulop na mamatatken.
5. Anto so gawaen kada taon tan kada bisita na manangasikaso na sirkito pian naseguron namimintina so Kingdom Hall?
5 Kada Setyembre et gawaen so detalyadon panag-inspeksion ed Kingdom Hall. Niarum ni, legan na bisita na saray manangasikaso na sirkito, manggawa ira na report ed kondisyon na Kingdom Hall tan mangiter na saray suhestion ed saray bengatlan mankaukolan na imano. Responsabilidad na saray mamatatken so manggawa na saray uksoyan pian naasikason maong iray kaukolan ya asikasoen. Nayarin ontulong iray manangipalapag ed nakaukolan ya apigeren tan mintinaen. Amin so kaukolan a mangimano ed anggan angkelag iran bengatla tan ag itan ipapaleen ya asikasoen.
6, 7. Panon a napapawala iray pundo parad regular a panagmintina ed Kingdom Hall?
6 Pangigana na Pundo Parad Panmintina: Maslak a kimey ed Kingdom Hall tan ed kaliberliber to et gagawaen na saray boluntaryo. Say panagsakripisyo ra et maabig a panangipatnag na panangaro tan baleg a makakabawas ed gastos. Balet, kaukolan iray pundo parad panag-apiger tan ed saray uusaren ed panaglinis, ontan met ed danum tan koryenti. Kanian irerekomenda a binulan a mangigana iray mamatatken na pundo ya usaren na balanglan operating committee, odino na matatken odino ministeryal a lingkor ya apabtangan a manmintina ed hall.
7 No pigaran kongregasyon so manguusar ed Kingdom Hall, mamasiansia so operating committee na biig a pundo ed bangko tan manggawa na binulan a report na kuenta ed kada ulop na mamatatken, pian napakabatan ira no panon a nauusar iray pundo. Responsabilidad na saray mamatatken so dugan pangusar ed pundo na kongregasyon.
8. Anto so gawaen no walay baleg ya apigeren odino mintinaen?
8 No Walay Baleg a Mintinaen tan Apigeren: Sano naimano na operating committee a walay baleg ya apigeren tan mintinaen ed Kingdom Hall, ipanon da ni itan ed saray ulop na mamatatken. No adetermina a baleg so kaukolan a mintinaen odino apigeren, amtaen na mamatatken no kaunongan so nagastos tan manggawa ira na sakey a resolusyon a paaprobaan ed kongregasyon. (Nengnengen so “Tepet” ed Pebrero 1994 a Ministeryo Tayo ed Panarian.) Insan mansulat ira ed sangan opisina parad pangaproba. Diad sulat da ed sangan opisina, kaukolan a salambiten na mamatatken so gawaen, kaunongan so nagastos, tan kaunongan so walan pundo. Agmanggagawa na baleg a pangapiger odino pangarum ed bilding ya agni impaaprobaan ya unona ed sangan opisina.
9. Panon tayon nipatnag so panamabli tayo ed Kingdom Hall tayo?
9 Peteg a papablien tayo so pribilehyo tayon mantitipon diad Kingdom Hall! Gawaen tayon amin sirin so betang tayo panamegley na interon puson pankontribusyon tan panuporta ed panmintina ed pasen na panagdayewan tayo.