No Panon ya Iparaan so Pangipresenta ed Magasin

1. Akin a magmaong so pangiparaan na personal a presentasyon ed magasin imbes a basta labat ipatlep so pangaligan a nitarya ed Ministeryo Tayo ed Panarian?

¹ Nayarin panumamengan yo, ‘Akin a pamparaanan tayo ni so pangipresenta ed saray magasin, anta nitarya la iratan ed kada isyu na Ministeryo Tayo ed Panarian?’ Anggaman aromogan na dakel a makatulong irayan pangaligan a presentasyon, kaukolan nin siansia so personal a panagparaan. Say sakey a presentasyon ya epektibo ed sakey a teritorya so nayarin agpraktikal ed arum. Kanian, agtayo nepeg a naoobligan ipresenta iray magasin unong ed eksakton inkisalita na saratan ed saray pangaligan a presentasyon. Anggano pilien tayon usaren so sakey a pangaligan a presentasyon, sankaabigan no ibaga tayo ed dili tayo ran salita iray ideya na satan.

2. Anto so nalalanor ed panetermina no dinan ya artikulo so ipresenta yo?

² Mamili na Artikulo: Kayari yon binasa so magasin, mamili na artikulon matukoy ed teritorya yo tan naninteresan yon maong. Say kombiksion tan ligsa yo sano iprepresenta yo itan so posiblin mamakiwas ed unabung pian labayen met a basaen itan. Anggaman nayarin say ipresenta yon artikulo et samay paniinteresan na karaklan ed lokal a teritorya, kabisadoen met so arum iran artikulo ed magasin. Saya so mangiyabuloy ed sikayon nitukoy so presentasyon yo sano walay nakatongtong yon nayarin mas interesado ed arum a tema.

3. Anton klase na introduksion so usaren yo pian makapawala na sankaabigan iran resulta?

³ Mantepet: Insan, iparaan a maong so introduksion yo. Importante itan. Nayarin makatulong so panepet ed unabung na manenyeg ed nonot to pian nasagyat so interes to ed artikulon pinili yon ipresenta. Saray tepet a mangiparungtal ed panmoria so mabetbet lan epektibo. Paliisan so pangitepet na pansengegay paniri-iri odino pangidepensa na unabung ed opinyon to.

4. Antoray gunggona na pangibasa na teksto ed unabung sano iyabuloy na saray kipapasen?

⁴ Mangibasa na Teksto: Kaunoran, mamili na teksto a basaen sano iyabuloy na saray kipapasen na unabung, nayarin samay naromog ed artikulon ipresenta yo. Diad pangibasa yo na teksto, namoria na unabung a say mensahe tayo et manlalapud Salita na Dios. (1 Tes. 2:13) Say Kasulatan so mantasi met ed sikato anggano agto awaten iray magasin. Aliing na arum so interes na unabung diad impamasa ra na teksto antis dan amalesa na espisipikon tepet. Nayari yon iparungtal so teksto diad pangibagay, “Labay ko komon a naamtaan no antoy opinyon yo ed sayay wadiad sayan bersikulo na Biblia.” Insan yo ipaimano ed sikato so sakey a misiglaotan a punto ed magasin, tan komentoan na antikey pian nasagyat nin lalo so interes to antis yon iyopresi itan.

5. Antoran manunan giya so nepeg yon tandaan sano manpaparaan na presentasyon ed saray magasin?

⁵ Anggapo so mapeget a totontonen no antoy ibaga sano mangiyoopresi na saray magasin. Diad inkalapagan, sankaabigan no pansiansiaen yon simpli tan antikey so presentasyon yo. Mangusar na metodon mainomay parad sikayo tan walaan na maabig iran resulta. Iteen so imano yo ed matalonggaring a balor na saray magasin, tan magmaliw a maligsa. No akaparaan kayon maong, mas lalo kayon epektibo a mangipalima na Say Panag-Bantayan tan Awake! ed saramay “suston nikiling ed andi-anggaan a bilay.”​—Gawa 13:48, NW.

No Anto so Ibaga Nipaakar ed Saray Magasin

Say Panag-bantayan Nob. 15

“Lapud pinasya lay inkauges ed mundo, nayarin panumamengan na arum, ‘Akin et mipuligesgesan ak nin gawaen no antoy duga?’ Alikna yo met la kasi ontan? [Abuloyan ya onebat.] Imanoen irayan makapaseseg a salita. [Basaen so Uliran 2:21, 22.] Ipapaliwawa na sayan magasin so sankaimportantian a rason ed pagmaliw a matunong.”

Awake! Nob.

“Isipen na arum a say Dios so responsable ed amin a nagagawa. No walay nagawan desyang, ibaga ran nayarin say Dios so walaan na maong a rason ed impamalesa to ed satan. Antoy padesir yo? [Abuloyan ya onebat. Insan basaen so Santiago 1:13.] Wadiad sayan magasin so ibabaga na Biblia nipaakar ed sengegan na paniirap tan no antoy gagawaen na Dios pian panampoten itan.”

Say Panag-bantayan Dis. 1

“Diad padesir yo, kasin nasusumpal natan iyan propesiya ed Biblia? [Basaen so Mateo 24:11. Insan abuloyan ya onebat.] Sisingbaten na sayan magasin iray pigaran bangat a nagmaliw a popular. Ipapanengneng met na saya no panon tayon napaliisan so pakapalikdo ed saray palson managbangat.”

Awake! Dis.

“Parad sikayo, siopa so sankatalonggaringan a toon nambilay? [Abuloyan ya onebat.] Ipapasen na dakel si Jesus bilang say sankatalonggaringan a too. Imanoen no antoy gawaen to parad dalin bilang Manuley ed Panarian na Dios. [Ipanengneng so litrato ed pahina 8-9, insan basaen so sakey ed saray nipabitar a teksto.] Sisingbaten na sayan magasin no panon tan no kapigan a gawaen nen Jesus iya.”