Apaseseg tan Apabiskeg Iray Dumerengel

ANGGAN antoray probleman aarapen da, saray lingkor na Dios so nepeg a makaromog na panamaseseg ed Kristianon kongregasyon. Pian satan so nagegemtan, nepeg a nagkalautlan seguroen na saray mamatatken a saray paliwawa tan simbawa ra so makapaseseg. Kaukolan a paneknekan na saray mamatatken a sikaray “singa sakey ya amotan ed dagem tan sakey a siroman ed bagyo, singa saray agus na danum ed pasen ya amaga, singa anino na sakey a baleg a baton-dampay ed sakey a dalin ya apegaan.”​—Isa. 32:2.

No sakey kan matatken, kasin saray paliwawam so makarepresko tan makaligliwa? Kasin saratan so mamapaligsa ed saramay manbabanikel a manlingkor a sitotoor ed si Jehova? Kasin saratan so mamabiskeg ed panagsungdo diad panggawa ed linawa na Dios anggaman ed agmananginenen ya awawey na kaslakan a totoo odino ed isusumpa? Anto no arum ed saray dumerengel mo so nagogonigon, maniirap nisesengeg ed pirmin desdes na ekonomya, odino mibabarangkaan ed graben sakit ya agnatambal? Nayarian mon ‘pabiskegen so agagim diad saray salita na sangim.’​—Job 16:5.

Usaren so pankanawnawam bilang sakey a managpaliwawa pian ontulong ed agagim ya onkerew na ilalo tan biskeg a manlapud si Jehova tan diad saray probisyon to.​—Roma 15:13; Efe. 6:10.

Panonotan Iray Dumerengel Mo ed Agawaan la nen Jehova. Sakey ya importantin paraan na panamaseseg et diad panamegley na pangipabitar no panon so impanulong nen Jehova ed totoo to diad saray kairapan nensaman.​—Roma 15:4.

Imbaga nen Jehova ed si Moises a “pasesegen” tan “pabiskegen” to si Josue sakbay a linmoob so Israel ed Insipan a Dalin, a diad saman a panaon et panaayaman na kabusol iran nasyon. Panon nen Moises a ginawa itan? Diad imaton nen Josue, pinanonotan nen Moises so interon nasyon ed saray bengatlan ginawa la nen Jehova ed sikara sanen tinaynan da so Ehipto. (Deut. 3:28; 7:18) Indalatdat met nen Moises so impagamor nen Jehova ed sikara iran impanbiktorya sumpad saray Amoreo. Insan pinaseseg nen Moises si Josue: “Manpakpel tan manpabiskeg ka.” (Deut. 31:1-8, NW) Sano mamapaseseg ka ed agagim, kasin tutulongan mo ran manpabiskeg diad pannodnonot ed saray agawaan la nen Jehova parad sikara?

No maminsan saray sinansakey so pirmin natatalonaan na saray problema ra a manduaruwa la ra no kasin natawayan da niray bendisyon na Panarian. Panonotan ira ed inkanapanmatalkan na saray sipan nen Jehova.​—Jos. 23:14.

Saray agagi tayo ed arum a daldalin so nidudunget ed saray ley na gobierno a mangisesebel na panangipulong ed maong a balita. Diad ontan iran kipapasen, natulongan na saray maaron mamatatken iray kapananisiaan a napabiskeg manlapud saray eksperiensya na saray apostol nen Jesu-Kristo. (Gawa 4:1–​5:42) Tan say pangipabitar ed paraan na Dios diad inkagawa na saray bengatla a singa nikurit ed libro na Ester so seguradon makapanpapakpel ed saray agagi.

No maminsan walaray sinansakey ya onaatende ed saray miting na kongregasyon balet ta sikaray ag-onaaligwas. Nayarin liknaen dan agla ran balot perdonaen na Dios lapud say datin dalan na bilay da so mauges a tuloy. Nayarian mo palagin isalaysay no panon so impideneng nen Jehova ed si Arin Manases. (2 Awa. 33:1-16) Odino nayarin ibagam so nipaakar ed totoo diad Corinto nensaman a pinasimbalo ra so dalan na bilay da, nagmaliw iran Kristiano, tan inyabawag ira na Dios a matunong.​—1 Cor. 6:9-11.

Kasin liknaen na arum a lapud probleman sasagmaken da et mangipatnag ya anggapo lay pabor na Dios ed sikara? Nayarin panonotan mo ra ed samay sinagmak nen Job tan no panon ya abendisyonan a nagkalalo lapud binembenan ton malet so katooran to ed si Jehova. (Job 1:1-22; 10:1; 42:12, 13; Sal. 34:19) Saray palson managligliwa nen Job so lingon angisangsang ya akagawa si Job na kasalanan. (Job 4:7, 8; 8:5, 6) Diad piduma, sanen papabiskegen daray babangatan tan “binibilin da ra a mansiansia ed pananisia,” imbaga nen Pablo tan si Bernabe: “Dia ed dakel ya irap nakaukolan ya onloob itayo ed panariay Dios.” (Gawa 14:21, 22) Ontan met natan, nayarian mon pabiskegen iramay manasagmak na subsubok diad pangipabitar a say pansungdo ed silong na kairapan so kakaukolan ed amin a Kristiano tan mabmablin tuloy ed imaton na Dios.​—Uli. 27:11; Mat. 24:13; Roma 5:3, 4; 2 Tim. 3:12.

Paseseg mo iray dumerengel mo a nonoten iray paraan ed impanumpal nen Jehova na saray sipan to diad mismon bilay da. Diad panangipanonot, nayarin natalosan da no panon so inkiwas la nen Jehova ed sikara a personal, a singa insipan to. Diad Salmo 32:8, nabasa tayo: “Bilinen taka tan ibangat taka ed dalan a nepeg mo a laen. Simbawaen taka a sinenengneng so matak ed sika.” Diad pakapangipanonot ed saray dumerengel mo no panon iran inwanwan odino pinabiskeg nen Jehova, natulongan mo ran makatalos a maong ed personal a paraan a sikara so tatalimaen nen Jehova tan peteg a sikaray tulongan to diad antokaman iran subok a nasagmak da ed kaplesan.​—Isa. 41:10, 13; 1 Ped. 5:7.

Ipanengneng so Liket diad Gagawaen na Dios Natan. Sano panggugunaetan mon pasesegen so agagim, ipaimano so gagawaen nen Jehova natan. Say pangitongtong ed sarayan bengatla diad paraan a mamapaliket iratan ed sika so managyat na miparan liknaan ed kapusoan na saray dumerengel mo.

Konsideraen no panon so panutulong nen Jehova ed sikatayo a mansungdo tan matalonan mangarap ed saray desdes ed bilay. Ipapanengneng to ed sikatayo so sankaabigan a dalan na panagbilay. (Isa. 30:21) Ipapaliwawa toray rason nipaakar ed krimen, ag-inkahustisya, kairapan, sakit, tan patey tan ibabaga to ed sikatayo no panon ton panganggaen irayan amin. Papaliberan to itayo na maaron impanaagi. Ipapagamor to ed sikatayo so mablin langkap na pikakasi. Imamatalek to ed sikatayo so pribilehyo bilang Tastasi to. Ipaparungtal to ed sikatayo a si Kristo so nitrono la ed katawenan tan say kaunoran iran agew na daan a sistema so mapmaples ya onaarap ed anggaan to.​—Apoc. 12:1-12.

Nilikud ed saratan a bendisyon et wadtan iray pantitipon tayo ed kongregasyon, saray asamblea, tan saray kombension. Sano saglawien mo irayan probisyon diad paraan a nipatnag moy puron panamabli ed saratan, napabiskeg mo so determinasyon na arum ya agda papaulyanan so pitipon ed saray agagi ra.​—Heb. 10:23-25.

Saray report a mangiter na ebidensya ed panamendisyon nen Jehova ed saray sagpot tayo ed lawak na ministeryo so panlapuan met na biskeg. Nen inmunan siglo sanen mamapaarap si Pablo tan si Bernabe ed Jerusalem, sikara so akapangiter na “baleg a liket ed saray amin ya agagi” diad detalyadon impangisalaysay da ed inkakomberte na saray totoo na nasyones. (Gawa 15:3) Napagayagam met iray agagim diad panginabang mo ed sikara na makapabiskeg iran eksperiensya.

Mansumpal ed kaaruman a kapaseseg no saray sinansakey so natulongan a makanengneng ed kablian na gagawaen da. Komendaan ira diad pibibiang da ed Kristianon ministeryo. Komendaan iramay nalilimitaan a tuloy so kimey da lapud inkatakken tan sakit balet ta ipapanengneng da so matoor a panagsungdo. Panonotan ira ya aglingwanan nen Jehova so aron ipapanengneng da nisengeg ed ngaran to. (Heb. 6:10) Say pananisian apaneknekan ed subok so mabmablin tuloy a kayarian. (1 Ped. 1:6, 7) Nakaukolan a napanonotan iray agagi tayo ed saya.

Mansalitan Atekepay Liknaan Nipaakar ed Arapen ya Ilalo. Saray apuyanan a sipan ed bengabengatlan onsabi so manunan panlapuan na kapaseseg ed amin a mangaaro ed Dios. Nayarin maslak ed saray dumerengel mo so makakadngel lan mabetbet ed sarayan balikas. Balet diad apresasyon ya ipanengneng mo sano salitaen mo irayan sipan, saraya so napabilay mo ed sikara, nipaslep mo so kompiyansa diad pakasumpal na saratan, tan napalippuam so kapusoan ed pisasalamat. Say pangiyaplika ed naaaralan mo diad Teokratikon Eskuelaan Parad Ministeryo so makatulong ed sikan manggawa ed satan.

Si Jehova a mismo so Baleg a Manamaseseg tan Manamabiskeg ed totoo to. Ingen, makapikoopera ka ed sikato diad panangipanabang ed saratan a bendisyon. Sano manpaliwawa ka ed kongregasyon, usaren a maabig so pankanawnawa pian nainabang iratan a bendisyon.