Panon Tayon Natulongan Iray Onatendi ed Memoryal?

1. Anton mabiskeg a pantasi so narengelan no Marso 22, 2008?

¹ No Marso 22, 2008, minilyon a totoo ed interon mundo so makaawat na mabiskeg a pantasi. Narengelan na saramay onatendi ed Memoryal so nipaakar ed baleg a panangaro nen Jehova diad impangitarya to na dondon parad katooan. (Juan 3:16) Naaralan da so nipaakar ed Panarian tan no panon ya usaren nen Jehova itan pian sumpalen so linawa to ed interon dalin. (Mat. 6:9, 10) Naimatonan dan mismo so panangaro tan pankakasakey na totoo na Dios tan naeksperiensya ra so maligsan panangabrasa tayo.​—Sal. 133:1.

2. Panon tayon natulongan iray iyaaralan tayo na Biblia ya onatendi ed Memoryal?

² Saray Iyaaralan na Biblia: Arum ed saray onatendi et balo nin iyaaralan na Biblia. Ikabat ira ed saray agagi. Ipaliwawa ed sikara so sinimban pantitipon tan iliber iran magano ed Kingdom Hall. Legan na paliwawa, pasesegen na espiker iratan pian mantultuloy so iyaligwas da ed espiritual. Nayarian yon usaren iray komento na espiker bilang basiyan pian pasesegen iray iyaaralan yo.

3. Panon tayon napaseseg iray inaktibon manangipalapag ya onatendi ed Memoryal?

³ Inaktibo: Arum ya onatendi et inaktibon manangipalapag. Ibano tan abrasaen ira. Ag-ira tetepetan na personal iran tepet odino mangibalikas na pakabaingan da. Pigaran agew kayari na Memoryal, kaukolan a bisitaen na saray mamatatken so siopaman ya inaktibo ya inmatendi, komendaan da ra lapud impansagpot dan inmatendi, tan imbitaan da ra ed ontumbok a pantitipon ed kongregasyon.

4. Panon a natulongan na balang sakey ed sikatayo iray bisita?

⁴ Saray Bisita: Arum ya onatendi et nayarin kabkabat odino kapamilya ya inimbitaan tayon mismo. Arum so nayarin akaawat na imbitasyon legan na espisyal a kampanya. No naimano yo iray balon lupa, ikabat yo lay inkasikayo tan abrasaen ira. Nayarin agni ran balot akaatendi ed saray pantitipon tayo nensaman. Diad pitongtong yo ed sikara et naamtaan yo no panon iran nakontak. Nayarian yo iran pasesegen a makaaral ni diad panamegley na personal ya ibisita odino antikey a tawag ed telepono pigaran agew kayari na Memoryal, tan iyopresin iyaralan ira na Biblia.

5. Anto so nayarin ibaga tayo diad pangigapo na panangiyaral na Biblia?

⁵ Say impormasyon ed paliwawa ed Memoryal so nayarin usaren bilang basiyan ed pangiparungtal ed libron Ibabangat na Biblia diad ipawil. Singa bilang, basaen na espiker ed Memoryal so Isaias 65:21-23. Diad ipawil, nayari yon salambiten so paliwawa tan ikuan, “Ipanengneng ko ed sika so arum niran bendisyon a nagmaliw a posible lapud dondon.” Insan singbaten so pahina 4-5 na libron Ibabangat na Biblia. Odino nayari yon ikuan, “Panumamengan na dakel no kapigan nagawa so propesiya nen Isaias.” Insan singbaten so parapo 1-3 ed kapitulo 9. Nayari met a salambiten so komento na espiker ed Memoryal, insan iparungtal so libron Ibabangat na Biblia, tan idemostra so panagaral.

6. Antoray pankanawnawa tayo legan tayon tutuloken so ganggan nen Jesus a nodnonoten so impatey to?

⁶ Komon ta balang sakey ed sikatayo so alerto ed saray pankanawnawan tulongan iray iyaaralan na Biblia, inaktibo, tan bisita ya onatendi. (Luc. 22:19) Seguradon bendisyonan nen Jehova so antokaman ya inmaligwas a kimey tayo ed Panarian.

No Anto so Ibaga Nipaakar ed Saray Magasin

The Watchtower Mar. 1

“Kada agew et nababalitaan tayo so kairapan, sakit, tan ipapatey. Panumamengan yo ta no kasin naliktaran tayo irayan amin? [Abuloyan ya onebat.] Sayan bersikulo na Biblia so mangiiter na ilalo ed minilyon. [Basaen so Juan 3:16.] Ipapaliwawa na sayan magasin ‘No Panon a say Impatey nen Jesus so Mangiliktar ed Sikayo.’”

Awake! Mar.

“Diad padesir yo wala kasi makapuy ya epekto na saray anito? [Abuloyan ya onebat.] Onia so makapainteres a komento na Biblia. [Basaen so Isaias 65:11.] Sisingbaten na sayan artikulo no kasin mipakna ed ibabangat na Biblia so anito.” Iparungtal so artikulo ya onggapo ed pahina 10.

Say Panag-bantayan Abr.-Hun.

“Agta labay yon nanengneng a nagawa iyan propesiya? [Basaen so Isaias 2:4. Insan abuloyan ya onebat.] Imanoen ya onsalet so Dios ed saray gagawaen na totoo pian ipetek iray bengatla. Ibabaga na Biblia a milaban so Dios panamegley na bakal a tatawagen ya Armagedon a mamatunda ed amin a bakal. Ipapaliwawa na sayan magasin itan a bakal ya Armagedon tan no akin a talaranan tayo itan.”

Awake! Abr.

“Diad padesir yo manbibilay tayo la kasi ed panaon ya adeskribe dia? [Basaen so 2 Timoteo 3:1-4. Insan abuloyan ya onebat.] Interesado itayon maong ed kaunoran iran agew lapud say pakasusumpal na saratan so pakapatnagan ya akatarya iray maabig a nagawa ed dalin. Satan so ipapaliwawa na sayan magasin.”