Idadanet na 2011 Calendar so Panagdayew na Pamilya
Say 2011 Calendar of Jehovah’s Witnesses et nipaakar ed Panagdayew na Pamilya. Ipapabitar na kalendaryo iray pamilya natan tan saray piparaan da ed Biblia. Ipapanengneng met na satan iray sanasawa tan anggapoy asawan lingkor nen Jehova ya manaaral na Salita to.
Saray karakter ed Biblia a nanengneng ed kalendaryo so nanliket ed ganggan nen Jehova, tan akatulong itan ed sikara diad impangarap ed saray nikaduman angat ya dinalan da. (Sal. 1:2, 3) Legan tayon uusisaen so kada litrato, napanonotan itayo ed kaimportantian na Panagdayew na Pamilya, balanglan baleg odino melag so pamilya tayo, tasi tayon amin odino andi. Walay pangisulatan diad kalendaryo na eskedyul yo parad Panagdayew na Pamilya. Kasin sinulatan yo la?