Napapabiskeg na Panagpulong so Espiritualidad Tayo
1. Anto ray nagunggona tayo ed panagpulong?
1 No aktibo itayon mibibiang ed panagpulong, ombiskeg so espiritualidad tayo tan lalo tayon magmaliw a maliket. Siempre, say manunan rason na pampupulong tayo et pian napaliket si Jehova. Balet legan tayon uunoren so ganggan ya ‘ipulong so salita,’ naawat tayo so panamendisyon nen Jehova tan nagunggonaan itayo ed arum nin paraan. (2 Tim. 4:2; Isa. 48:17, 18) Panon itayon napabiskeg tan napaliket na panagpulong?
2. Panon itayon napapabiskeg na ministeryo tayo?
2 Napapabiskeg tan Nabebendisyonan Itayo: No manpupulong itayo, akapokus so imano tayo ed saray bendisyon na Panarian imbes a diad saray problema tayo. (2 Cor. 4:18) Legan tayon ipapaliwawa ed arum iray bangat na Biblia, lalon ombibiskeg so pananisia tayod saray sipan nen Jehova tan mas naaapresya tayoy katuaan. (Isa. 65:13, 14) Tan diad itutulong tayod arum ya onaligwas ed espiritual pian ag-ira magmaliw a “kabiangan na mundo,” ombibiskeg met so mismon determinasyon tayon mansiansian biig ed mundo.—Juan 17:14, 16; Roma 12:2.
3. Panon ya ontulong so ministeryo pian niwalad sikatayo iray Kristianon kualidad?
3 Natulongan itayo na pibibiang ed ministeryo pian niwalad sikatayo iray Kristianon kualidad. Alimbawa, diad pansasagpot tayon ‘magmaliw ya amin a bengatla diad amin a klase na totoo,’ magmamaliw itayon mas mapaabeba. (1 Cor. 9:19-23) Legan tayon mitotongtong ed saray totoon singa “kinatatan tan pinaulyanan a karnero ya andian na managpastol,” naaralan tayon ipanengneng so simpatya tan pililikna. (Mat. 9:36) Naaralan tayo met so man-anos no mantultuloy itayo anggano ag-interesado odino susumpaen itayo na totoo. Mas maliket itayo no usaren tayoy bilay tayo diad itulong ed arum.—Gawa 20:35.
4. Antoy pangipapasen mo ed ministeryom?
4 Agaylan bendisyon so mibiang ed kimey a mangiglogloria ed Alenleneg a makanepegan na panagdayew tayo! Napapabiskeg itayo na ministeryo. Mangiter itan na dakel a bendisyon ed saramay sigpot a mibibiang ed ‘panangipulong na maong a balita.’—Gawa 20:24.