Usaren so “An Introduction to God’s Word” Pian Mangigapo na Tongtongan
1. Anton balon tulong ed panagpulong so nausar tayo?
1 Diad unona iran pahina na revised edition na New World Translation et walay seksion ya “An Introduction to God’s Word.” Panon tayo iyan usaren no manpaparaan na presentasyon ed ministeryo? Mausausar iya diad pangigapoy tongtongan ta agrupo-grupo iray teksto unong ed nanduruman topic na Biblia ya singa ed libron Reasoning.
2. Panon so nayarin pangusar tayo ed “An Introduction to God’s Word” diad pampulong?
2 Nayarim ya usaren so koma 8 ya tepet tan ibagan: “Wadia kami natan ta dakel so maniisip, ‘Say Dios kasi so natetel ed paniirap na totoo?’ [Diad arum a pasen, mas epektibo no ipanengneng day tepet ed unabung.] Parad sikayo ey? [Abuloyan ya onebat.] Walay ebat na Biblia ed satan.” Basaen ed Biblia tan pantongtongan so sakey odino pigaran teksto ya abitla. No interesadoy unabung, nayarin ipanengneng so 20 ya akalistan tepet ed gapo tan pampilien na pantongtongan yod ipawil mo. Odino iyopresim ed sikato so sakey ed saray aaralen ya publikasyon a walay kaaruman ya impormasyon nipaakar ed topic ya nantongtongan yo.
3. Panon tayon usaren so “An Introduction to God’s Word” no pupulongan iray aliwan Kristiano so relihyon da?
3 No pupulongan iray totoon aliwan Kristiano so relihyon da, seguradon makatulong so koma 4, tan 13 anggad 17 ya tepet. Singa bilang, nayarim ya usaren so koma 17 tan ibagan: “Manggagawa kami na public service parad saray pamilya. Naiimano yo ya dakdakel so problema na saray pamilya natan? [Abuloyan ya onebat.] Akatulong ed dakel ya sanasawa iyan simbawa: ‘Say asawan bii et nepeg a walaan na aralem a respeto ed asawa to.’ [Agla kaukolan ya ibagan nanlapu iyad Efeso 5:33. No bii so katongtong, nayarin say bitlaen mo et samay walad Efeso 5:28.] Parad sika, makatulong kasi iyad sanasawa?”
4. Antoy nayarin gawaen mo diad sampot na pitongtong mod sakey ya aliwan Kristiano so relihyon to?
4 Diad sampot na pitongtong mo, iyeskedyul so pangituloy na tongtongan yo. Diad onsublay et nayarim ya usaren so sakey ed saramay teksto ed saman a tepet. Diad dugan panaon, ipaamtam ed unabung ya saray ibabagam et nanlapud Biblia. Depende ed apalabas iran impantongtong yo tan say panmoria na satan a too ed Biblia, iyopresi so publikasyon ya antam ya makapainteres ed sikato.—Nengnengen so insert ed Disyembre 2013 ya Ministeryo Tayo ed Panarian.