Kapitulo 31

Saray Kimey nen Jehova—Baleg tan Makapakelaw

Pasingawey 10​—Apocalipsis 15:1–16:21

Tema: Si Jehova ed santuaryo to; nikalbo iray pitoran yaong na sanok to ed dalin

Panaon na Kasumpalan: 1919 anggad Armagedon

1, 2. (a) Anton komatlon tanda so irereport nen Juan? (b) Anton betang na saray anghel so abayag lan amta na saray lingkor nen Jehova?

SAKEY a bii a mangiyaanak na sakey ya ugaw a laki! Sakey a baleg a dragon a panggunaetan ton buagen itan ya ugaw! Saratan a duaran tanda ed tawen, a malinlinew ya indeskribe ed Apocalipsis kapitulo 12, so angipatebek ed sikatayo a manasingger la so kapantokan na abayag lan balingaan na Bini na bii a pinagka-asawa na Dios tan si Satanas tan say demonikon bini to. Diad pangipapabitar ed sarayan simbolo, inkuan nen Juan: “Tan sakey a baleg a tanda so anengneng ed tawen . . . Tan anengneng so sananey a tanda.” (Apocalipsis 12:1, 3, 7-12) Natan et irereport nen Juan so komatlon tanda: “Tan anengneng ko so sananey a tanda ed tawen, baleg tan makapakelaw, a pitora ya anghel a wala ed sikara so saray pitora a bakbak, a sikaray kaunoran, ta dia ed sikara nasumpal so sanok na Dios.” (Apocalipsis 15:1) Sayan komatlon tanda so walaan met na makanan kabaliksan parad saray lingkor nen Jehova.

² Imanoen iray importantin betang lamet na saray anghel diad panumpal ed linawa na Dios. Sayan katuaan so abayag lan amta na saray lingkor nen Jehova. Diad tua, say kadaanan a salmista so apuyanan ni ingen a mitongtong ed saratan ya anghel, ya oniay ipapaseseg to ed sikara: “Galangen yo si Jehova, sikayo [iran] angheles to, a mabiskeg, a manguunor na salita to; ondengel na boses na salita to”! (Salmo 103:20) Natan, diad sayan balon eksena, saray anghel so apabtangan a mangikalbo ed pitoran kaunoran a bakbak odino salot.

3. Antoray pitoran salot, tan antoy kabaliksan na panangikalbo ed saratan?

³ Anto iratan a salot? Singa saray pitoran tanol na trumpeta, saratan so mansasnit ya anunsio na panangukom a mangiyaabawag ed panmoria nen Jehova nipaakar ed nanduruman kabiangan na sayan mundo tan pasakbay nipaakar ed kaunoran a pansumpalan na saray panangukom to. (Apocalipsis 8:1–9:21) Say pangikalbo ed saratan so manutukoy ed panangipaakseb ed saraman a panangukom, sano saray puntirya na sanok nen Jehova so naderal la ed agew na petang na sanok to. (Isaias 13:9-13; Apocalipsis 6:16, 17) Kanian, diad panamegley na saratan, “nasumpal so sanok na Dios.” Balet sakbay a deskribien so pangibung ed saray salot, ibabaga ed sikatayo nen Juan a walaray totoon agnaapektoan na saratan. Lapud impulisay day tanda na atap ya ayep, sarayan matoor so mankakanta na panangidayew ed si Jehova legan ya iyaabawag da so agew na panangibales to.—Apocalipsis 13:15-17.

Say Kanta nen Moises tan say Kordero

4. Anto natan so nanenengneng nen Juan?

⁴ Sakey a makatantandan nenengnengen so anengneng natan nen Juan: “Tan akanengneng ak na sakey a singa dayat a salming ya alaokan na apoy; tan saray akagamor na palabo [“nambiktorya,” NW] ed ayep, tan say talintao to, tan nanlapud bilang na ngaran to, manal-alagey ira ed abay na dayat a salming, a sankaegna ra so arpa na Dios.”—Apocalipsis 15:2.

5. Anto so ililitrato na “singa dayat a salming ya alaokan na apoy”?

⁵ Say “singa dayat a salming” et pareho ed samay akadkaunan anengneng nen Juan, a walad arap na trono na Dios. (Apocalipsis 4:6) Mipadpara itan ed “inbobo a dayat” (kargaan na danum) na templo nen Solomon, a pangaalaan na saray saserdote na danum a panlinis da ed inkasikara. (1 Arari 7:23) Sakey iya sirin a maabig a representasyon na “pananguras na danum,” salanti, Salita na Dios, ya uusaren nen Jesus diad panlinis ed makasaserdoten kongregasyon na alanaan iran Kristiano. (Efeso 5:25, 26; Hebreos 10:22) Sayan singa dayat a salming so “alaokan na apoy,” a pakapatnagan a sarayan alanaan so asubok tan alinisan legan dan tutuloken so atagey ya estandarte a nidatak ed sikara. Niarum ni, ipapanonot na satan ed sikatayo a lugan met na Salita na Dios so mangapuy-apoy iran balikas na panangukom sumpad kakabusol to. (Deuteronomio 9:3; Sofonias 3:8) Arum ed sarayan mangapuy-apoy a panangukom so nipatnag ed pitoran unor iran salot a ngalngali la nikalbo.

6. (a) Sioparamay komakanta ya akaalagey ed arap na mangatatawen a singa dayat a salming, tan panon so pakaamta tayo? (b) Diad anton dalan a sikaray “nambiktorya”?

⁶ Say katuaan a say imbobo (molten) a dayat ed templo nen Solomon a parad usaren na saray saserdote so mangipapabitar a saray komakanta a manal-alagey ed arap na mangatatawen a singa dayat a salming et sakey a makasaserdoten klase. Walaan ira na “arpa na Dios,” tan isiglaot tayo ira sirin ed saray 24 a mamasiken tan say 144,000, lapud mankakanta met irayan grupo a babansagan na arpa. (Apocalipsis 5:8; 14:2) Saray komakanta ya anengneng nen Juan so “nambiktorya ed ayep, tan say talintao to, tan [ed] bilang na ngaran to.” Kanian sikara imay nanlapud limog na 144,000 a manbibilay ed dalin legan na kaunoran iran agew. Bilang sakey a grupo, peteg a sikaray nambiktorya. Diad ngalngali 90 a taon nanlapula’d 1919, agda inawat so tanda na atap ya ayep nisay impasen da so talintao to bilang mogmon ilalo na too parad kareenan. Dakel ed sikara so nansungdon matoor anggad patey, tan saraya, a natan et wala la’d tawen, so seguradon malikeliket a manutumbok ed pankakanta na saray agagi ra a wala ni ed dalin.—Apocalipsis 14:11-13.

7. Panon ya inusar so arpa diad Israel nensaman, tan panon a mangapekta ed sikatayo so kiwawala na saray arpa na Dios ed pasingawey nen Juan?

⁷ Sarayan matoor a mananalo so walaan na saray arpa na Dios. Diad saya, sikaray singa saray Levita a manlilingkor ed templo nensaman, a nandayew ed si Jehova diad pankakanta a babansagan na saray arpa. Arum met so nampropesiya a babansagan na arpa. (1 Awaran 15:16; 25:1-3) Saray alay abig a tono na arpa so amarakep ed saray kanta na gayaga tan pikakasi na panangidayew tan pisasalamat na Israel ed si Jehova. (1 Awaran 13:8; Salmo 33:2; 43:4; 57:7, 8) Diad panaon na gonigon odino inkakautibo, ag-arengel so arpa. (Salmo 137:2) Say kiwawala na saray arpa na Dios ed sayan pasingawey so nepeg a mamabiskeg ed paniilalo tayo parad sakey a maliket, mananalon kanta na panangidayew tan pisasalamat ed Dios tayo.a

8. Anton kanta so kakantaen, tan antoray balikas na satan?

⁸ Onia so irereport nen Juan: “Tan kakantaen da so kanta nen Moises ya aripen na Dios, tan say kanta na Kordero, a kuanda, Angkakabaleg tan makapakelaw so saray gawam, O Katawan a Dios, a Makapanyarin-amin; maptek tan tua so saray dalan mo, Ari na saray tinaon. Siopa so ag-ontakot ed sika, O Katawan [“Jehova,” NW], tan agmangigalang ed ngaran mo? Ta sika lambengat so Santo [“matoor,” NW]; kanian amin a nasyones ondago ra tan mangigalang ira ed arap mo; ta saray gawam a matunong sikara so nipatnag.”—Apocalipsis 15:3, 4.

9. Akin a say sakey a tawag ed satan a kanta “et say kanta nen Moises”?

⁹ Kakantaen na sarayan mananalo so “kanta nen Moises,” salanti, sakey a kanta a miulibay ed samay kinanta nen Moises ed mipara iran sirkumstansya. Kayarin naimatonan na saray Israelita so samploran salot ed Ehipto tan say inkaderal na armada na Ehipsio ed Ambalangan Dayat, indauloan ira nen Moises ed ontan a mananalon kanta na panangidayew ed si Jehova, a mangiyaabawag: “Si Jehova man-ari ed ando lan ando.” (Exodo 15:1-19) Agaylan matukotukoy a saray komakanta ed pasingawey nen Juan so nepeg met a manganta “ed Ari ya andi-angga,” lapud nambiktorya ira ed atap ya ayep tan akapibiang ed panangiyabawag ed pitoran unor iran salot!—1 Timoteo 1:17.

10. Anto nin kanta so kinompos nen Moises, tan panon a say unor a bersikulo na satan so ontutukoy met ed baleg ya ulop natan?

¹⁰ Diad sananey a kanta, a kinompos sanen manpaparaan so Israel a mangubkob ed Canaan, onia so inkuan nen masiken lan Moises ed saman a nasyon: “Iwakawak ko naani ngaran nen Jehova. Igalot yo so kinabaleg na Dios tayo.” Say unor a bersikulo na sayan kanta so amaseseg met ed saray aliwan Israelita, tan saray apuyanan a salita nen Moises so akasabi anggad say baleg ya ulop natan: “Manggayaga kayo, O sikayo [iran] nasyon, a pati ombaley to.” Tan akin a nepeg day manggayaga? Lapud natan et “balesen [nen Jehova] naani dala na saray aripen to. Tan iter to naani so panamales ed saray kakabusol to.” Sayan panangipaakseb na matunong a panangukom so mangitarok na gayaga ed amin a maniilalo ed si Jehova.—Deuteronomio 32:3, 43; Roma 15:10-13; Apocalipsis 7:9.

11. Panon a say kanta a nadngel nen Juan et mantutultuloy a nasusumpal?

¹¹ Agaylay panggayaga nen Moises a mismo no sikato natan so walad agew na Katawan tan mikakanta ed mangatatawen a koro: “Amin a nasyones ondago ra tan mangigalang ira ed arap mo”! Satan ya agnaparaan a kanta so mantutultuloy a walaan na makapakelkelaw a kasumpalan natan, aliwa lambengat a diad pasingawey noagta bilang sakey a peteg a nagagawa, unong a nanenengneng tayo iray minilyon a nanlapud “nasyones” a magayagan ondadagup natan ed mangaraldalin ya organisasyon nen Jehova.

12. Akin a say kanta na saray nambiktorya so atawag met a “kanta na Kordero”?

¹² Anggaman ontan, sayan kanta et aliwa lambengat a kinen Moises noagta kanta met “na Kordero.” Panon ya ontan? Si Moises so propeta nen Jehova ed Israel, balet impropesiya nen Moises a mismo a mamatalindeg si Jehova na sakey a propeta a singa sikato. Sayan Sakey so apaneknekan a say Kordero, si Jesu-Kristo. Bangta si Moises et “aripen na Dios,” si Jesus so Anak na Dios, sirin, say Babaleg a Moises. (Deuteronomio 18:15-19; Gawa 3:22, 23; Hebreos 3:5, 6) Kanian, saray komakanta so mankakanta met na “kanta na Kordero.”

13. (a) Panon a si Jesus, anggaman babaleg nen say si Moises, et singa sikato? (b) Panon itayon makapikasakey ed saray komakanta?

¹³ Singa si Moises, mapublikon kinanta nen Jesus iray panangigalang ed Dios tan nampropesiya nipaakar ed pananalo To sumpad amin a kakabusol. (Mateo 24:21, 22; 26:30; Lucas 19:41-44) Tatalaranan met nen Jesus so arapen sano saray nasyon so mangigalang ed si Jehova, tan bilang masakripisyon “Korderoy Dios,” imbagat toy bilay to bilang too pian magmaliw iyan posible. (Juan 1:29; Apocalipsis 7:9; ikompara so Isaias 2:2-4; Zacarias 8:23.) Tan no panon ya inapresya nen Moises so ngaran na Dios, a Jehova, tan indalangirang to itan a ngaran, ontan met ya imparungtal nen Jesus so ngaran na Dios. (Exodo 6:2, 3; Salmo 90:1, 17; Juan 17:6) Lapud matoor si Jehova, saray maglorian sipan to so seguradon nasumpal. Petepeteg, sirin a mikakasakey itayo ed sarayan matoor a komakanta, a kaiba so Kordero, tan si Moises, diad panuporta ed saray balikas na kanta: “Siopa so ag-ontakot ed sika, O Jehova, tan agmangigalang ed ngaran mo?”

Saray Anghel a Walaan na Saray Yaong

14. Siopa so anengneng nen Juan a pinmaway manlapud santuaryo, tan antoy niiter ed sikara?

¹⁴ Matukotukoy a narengel tayo so kanta na sarayan alanaan a mananalo. Akin? Lapud iyaabawag da ed dalin so panangukom a karga na saray kopa odino yaong a napno na sanok na Dios. Balet aliwa labat a katooan so lalanoren na pangikalbo ed sarayan yaong, unong ya itutuloy ya ipapanengneng nen Juan: “Et kayari na saraya a bengatla ninmengneng ak, et nia so templo na tabernakulo na pakatasian a wala ed tawen a nilukas: Tan pinmaway ira ed templo [“say santuaryo,” NW] so pitora ya anghel a wala ed sikara so pitora a bakbak, a sikakawes ira na mablin batobato, malinis tan makapulag, tan sibabalkes so kapagewan da na balkes a balitok. Tan sakey ed saray apatira a mabilay ya ayep angiter ed saray pitora ya anghel na pitora a kopa a balitok a napno ra na sanok na Dios, a manbilay ed ando lan ando.”——Apocalipsis 15:5-7.

15. Akin ya aliwan makapakelaw a saray pitoran anghel et ompapaway manlapud santuaryo?

¹⁵ No nipaakar ed templo na saray Israelita, a wadtan iray representasyon na mangatatawen iran bengatla, say atagey a saserdote lambengat so makaloob ed Sankasantosan, a tinawag dia a “say santuaryo.” (Hebreos 9:3, 7) Irerepresenta na satan so pasen a kawalaan nen Jehova ed tawen. Balet, diad tawen a mismo et aliwa lambengat a say Atagey a Saserdote a si Jesu-Kristo so walaan na pribilehyon onloob ed arap nen Jehova noagta ontan met ed saray anghel. (Mateo 18:10; Hebreos 9:24-26) Agpankelawan sirin, a saray pitoran anghel so nepeg a nanengneng ya ompapaway manlapud santuaryo ed tawen. Walaan iray kimey manlapud si Jehova a Dios a mismo: Say pangikalbo ed yaong a napno na sanok na Dios.—Apocalipsis 16:1.

16. (a) Antoy mangipapanengneng a saray pitoran anghel et kualipikadon maong parad kimey da? (b) Anto so pakapatnagan a saray arum et nalalanor ed baleg a kimey a pangikalbo na simboliko iran yaong?

¹⁶ Sarayan anghel so kualipikadon maong ed sayan kimey. Sikaray akawesan na malinis, masnag a lienzo, a pakapatnagan a sikaray malinis tan masanto ed espiritual, matunong ed pakanengneng nen Jehova. Ontan met, sikaray akasulong na balitok a balkes. Saray balkes so kaslakan ya uusaren sano babalkesan na sakey so inkasikato pian nasumpal so sakey a kimey. (Levitico 8:7, 13; 1 Samuel 2:18; Lucas 12:37; Juan 13:4, 5) Kanian saray anghel so abalkesan a manumpal ed sakey ya asainmin. Niarum ni, saray balkes da et binmalitok. Diad kadaanan a tabernakulo, say balitok so inusar a pangirepresenta ed madibino, mangatatawen a bengabengatla. (Hebreos 9:4, 11, 12) Kabaliksan na satan a walay gawaen na sarayan anghel ya importante, madibinon kimey ed serbisyo. Arum met so nalalanor ed sayan baleg a kimey. Sakey ed saray apatiran mabilay a pinalsa so angipalima ed sikara na aktual iran yaong. Seguradon saya so unonan mabilay a pinalsa, a kapara na leon, a mangisisimbolo na inkakpel tan agnadaeg a tepel a nakakaukolan diad pangiyabawag ed saray panangukom nen Jehova.—Apocalipsis 4:7.

Si Jehova so Walad Santuaryo To

17. Antoy ibabaga nen Juan ed sikatayo nipaakar ed santuaryo, tan panon a nipapanonot na satan ed sikatayo so santuaryo ed Israel nensaman?

¹⁷ Kaunoran, bilang pangompleto ed sayan kabiangan na pasingawey, ibabaga nen Juan ed sikatayo: “Tan napno so templo [“santuaryo,” NW] na asewek a nanlapu ed gloria na Dios, tan nanlapu ed pakapanyari to; tan anggapo so makaloob ed templo, angga ed pakasumpal na saray pitora a bakbak na saray pitora ya angheles.” (Apocalipsis 15:8) Walaray inkagawa ed awaran na Israel a say sakey a lurem so anakbong ed literal a santuaryo, tan sayan panangipatnag na gloria nen Jehova so angamper ed pakaloob na saray saserdote diman. (1 Arari 8:10, 11; 2 Awaran 5:13, 14; ikompara so Isaias 6:4, 5.) Saraya imay panaon sanen aktibon alanor si Jehova ed saray nagagawa ed dalin.

18. Kapigan ompawil iray pitoran anghel pian manreport ed si Jehova?

¹⁸ Si Jehova met so interesadon tuloy ed saray bengatlan nagagawa ed dalin natan. Labay ton nakompleto na saray pitoran anghel so asainmin da. Satan so kapantokan a panaon na panangukom, unong ya adeskribe ed Salmo 11:4-6: “Si Jehova wala ed loob na masanto a templo to, say trono nen Jehova wala ed tawen: saray mata to manim-imaton ira, saray lukablukab na mata to suboken to so saray anak na totoo. Si Jehova suboken to so matunong; balet say bagel tan saman so labalabay to so karamsakan gulaen na kamarerwa to. Uranen to so bagel na saray kalokalot; apoy, asupre tan sake’ya ampetang a dagem, sikato ya so niyan a kaaruman na baso ra.” Anggad agni nikalbo irayan pitoran salot ed saray marelmeng, agni ompawil iray pitoran anghel ed maglorian kawalaan nen Jehova.

19. (a) Anton ganggan so niiter, tan siopa so angiter? (b) Kapigan so inggapo na panangikalbo ed simboliko iran yaong?

¹⁹ Onia so singa-karol a makapakebbiew a ganggan: “Tan nadngel ko so sakey a baleg a boses ed templo, a kuanto ed saray pitora ya anghel: Onla kayo tan yibung yo so pitora a kopa na sanok na Dios dia ed tapew na dalin.” (Apocalipsis 16:1) Siopa so mangigaganggan ed saya? Seguradon si Jehova a mismo, lapud say kamasnag na gloria tan pakapanyari to so mangaamper ed siopaman ya onloob ed santuaryo. Si Jehova so linma ed espiritual a templo pian mangukom nen 1918. (Malaquias 3:1-5) Kanian, segurado ya ag-abayag kayari na satan a petsa et ingganggan ton ikalbo so pitoran yaong na sanok na Dios. Diad tua, saray panangukom a karga na simbolikon yaong so ginmapon niyabawag tekep na pirmin seseg nen 1922. Tan say pangiyaabawag ed saratan so ompapalalo natan.

Saray Yaong tan Saray Tanol na Trumpeta

20. Anto so ipaparungtal tan ipapasakbay na saray yaong na sanok nen Jehova, tan panon iratan ya ikakalbo?

²⁰ Saray yaong na sanok nen Jehova so mangipaparungtal ed saray aspekto na eksena na mundo, unong ed panmoria nen Jehova ed saratan tan mangipapasakbay na saray panangukom ya ipaakseb nen Jehova. Ikakalbo na saray anghel iray yaong diad panamegley na kongregasyon na alanaan iran Kristiano ed dalin, saray mankakanta ed kanta nen Moises tan kanta na Kordero. Legan ya iyaabawag so Panarian bilang maong a balita, say Juan a klase so sitetepel ya angiparungtal ed karga na sarayan yaong na sanok. (Mateo 24:14; Apocalipsis 14:6, 7) Kanian, say nankaduan mensahe ra so mareen diad pangiyaabawag na satan na kawayangan ed katooan balet singa bakal diad pangipapasakbay na satan ed “agew na kababales na Dios tayo.”—Isaias 61:1, 2.

21. Panon a saray puntirya na unonan apatiran yaong na sanok na Dios et misimbangan ed saramay unonan apatiran tanol na trumpeta, tan anto so pandumaan na saratan?

²¹ Saray puntirya na unonan apatiran yaong na sanok na Dios so misimbangan ed saramay inmunan apatiran tanol na trumpeta, salanti, say dalin, say dayat, saray ilog tan say subosubol na danum, tan saray mangatatawen a lapuan na liwawa. (Apocalipsis 8:1-12) Balet saray tanol na trumpeta so mangiyaanunsio na salot ed “kakatlo,” bangta say pangikakalbo ed saray yaong na sanok na Dios so mamairap ed intiraminte. Kanian, anggaman say Kakristianoan, bilang “kakatlo,” so manunan iimanoen legan na agew na Katawan, anggapoy anggan sakey a kabiangan na sistema nen Satanas a nipuera ed makasalot a panangukom iran mensahe nen Jehova tan saray kaermenan ya itatarok na saratan.

22. Panon a miduma so taloran unor a tanol na trumpeta, tan panon iratan a misiglaotan ed unor a taloran yaong na sanok nen Jehova?

²² Miduma so unor a taloran tanol na trumpeta, lapud atawag iratan a kasi odino ey-ey. (Apocalipsis 8:13; 9:12) Say unonan duara ed saraya so tugyopen a nagkalalo na duroduron tan saray armadan de-kabayoan, bangta say komatlo so angiparungtal ed kianak na Panarian nen Jehova. (Apocalipsis 9:1-21; 11:15-19) Unong a nanengneng tayo, saray unor a taloran yaong na sanok to so mangobri met ed pigara ed sarayan aspekto, balet samet a miduma iratan ed taloran kasi. Imanoen tayo pa natan a maong iray dramatikon panangiparungtal a resulta na panangikalbo ed saray yaong na sanok nen Jehova.

[Paimano ed leksab]