Kasin Walay Pakayari na Salita na Dios ed Bilay Mo?

Say inagew-agew ya pambasay Biblia et makatulong pian ‘onlamut’ tan magmaliw a ‘mabiskeg ed pananisia.’ (Col. 2:6, 7) Balet pian walay pakayari na Salita nen Jehova ed bilay tayo, kaukolan tayon dalepdepen tan iyaplika iray prinsipyo na satan. (Heb. 4:12; Sant. 1:22-25) Nabasad Josue 1:8, (NW) so taloran epektibon paraan na panagbasa: (1) Basaen so Salita na Dios “ed agew tan labi.” (2) “Basaen a makalna,” nayarin say labay ton ibaga et manbasa ya agmanaapura pian nadalepdep tan naimadyin iray lugar tan nagagawa. (3) Gawaey anggaay nayarian ya iyaplikay “amin a nisulat ed saya.” No gawaen tayo irayan suhestion, “ontalona” tayo tan ‘onkiwas ya walaay karunongan’ diad inagew-agew ya bilay tayo.