Pangdem na Katawan​—Sakey a Pankanawnawan Nigalang so Dios

INGGANGGAN iray Kristiano ya nodnonoten so Memoryal na impatey nen Kristo. Satan ya okasyon et tinawag met ya “Pangdem na Katawan.” (1 Corinto 11:20) Akin et importante itan? Kapigan tan panon so nepeg ya pannodnonot ed satan?

Inggapo nen Jesu-Kristo itan diad samay labi na Paskua na saray Judio nen 33 C.E. Say Paskua et seselebraan nensaman ya maminsan labat ed sakey taon, diad koma-14 ya agew na Judion bulan a Nisan. Say bulan ya Nisan et onggapo no nanengneng lay balon bulan, manga bandad unonan simba na Marso. Insan, manlapud satan et manbilang iray Judio na 14 agew pian selebraan so Paskua, kaselek na agew.

Sinelebraan nen Jesus so Paskua ya kaiba iray apostol to, pinapaway to si Judas Iscariote, insan to inggapo so Pangdem na Katawan. Lapud sinalatan na satan ya pangdem so Paskua na saray Judio, kaukolan met ya selebraan itan ya maminsan ed sakey taon.

Nabasad Ebanghelyo nen Mateo: “Angalay Jesus na sakey a tinapay, tan kayari ton impabendisyonan et pinisag to, tan sanen iiter to itan ed saray disipulo, inkuan to: ‘Ala yo tan akan yo. Saya et mankabaliksay laman ko.’ Tan sikatoy angalay sakey a kopa, insan akisalamat tan inter to itan ed sikara, ya inkuan to: ‘Inum kayon amin ed satan, ta mankabaliksan itan na “dalak nipaakar ed sipanan,” a nepeg ya iyibung nisengeg ed dakel a totoo pian naperdona iray kasalanan.’”​—Mateo 26:26-28.

Panisiaan na arum ya ginawa nen Jesus a tinapay so literal ya laman to tan ginawa ton alak so dala to. Balet, ag-abawasan so laman nen Jesus nen imbunog toy tinapay. Talaga kasin kinan na saray apostol nen Jesus so literal a laman to tan ininum day dala to? Andi, ta kanibalismo itan tan kontra ed ganggan na Dios. (Genesis 9:3, 4; Levitico 17:10) Diad Lucas 22:20 et imbaga nen Jesus: “Sayan kopa et mankabaliksay balon sipanan a pinaletan na dalak, a nepeg ya iyibung nisengeg ed sikayo.” Kasin literal ya nagmaliw a “balon sipanan” itan ya kopa? Imposible itan ta say labay ya ibaga na sipanan et paknaan, aliwan materyal a bengatla.

Kanian, say tinapay tan alak et simbolo labat. Isisimbolo na tinapay so perpekton laman nen Kristo. Inusar nen Jesus so tinapay ya akera ed pangdem na Paskua. Satan ya tinapay et anggapoy lebadura odino pampaalsa to. (Exodo 12:8) Mabetbet ya uusaren na Biblia so terminon lebadura bilang simbolo na kasalanan odino kaugsan. Kanian, irerepresenta na tinapay so perpekto odino anggapoy kasalanan ya laman nen Jesus ya imbagat to.​—Mateo 16:11, 12; 1 Corinto 5:6, 7; 1 Pedro 2:22; 1 Juan 2:1, 2.

Irerepresenta na ambalangan alak so dala nen Jesus. Lapud dala to, nagmaliw ya legal so balon sipanan. Imbaga nen Jesus a say dala to et inyibung pian “naperdona iray kasalanan.” Kanian, ipasen la na Dios ya malinis iray totoo tan nayari la ran misipanan ed si Jehova. (Hebreo 9:14; 10:16, 17) Lapud sayan balon sipanan odino kontrata, posible lan makaonlad tawen iray 144,000 a matoor ya Kristiano. Diman et manlingkor ira bilang arari tan saserdote pian nabendisyonan so amin a totoo.​—Genesis 22:18; Jeremias 31:31-33; 1 Pedro 2:9; Apocalipsis 5:9, 10; 14:1-3.

Siopay nepeg a mangan na tinapay tan oninum na alak diad Memoryal? Siempre, saraman labat so kaiba ed balon sipanan ya say ilalo ra et onlad tawen. Sikara labat so nepeg ya mangan na tinapay tan oninum na alak. Say masanton espiritu na Dios so mangombinse ed sikara ya apili iran magmaliw ya arari ed tawen. (Roma 8:16) Akisipanan met ed sikara si Jesus parad sakey ya Panarian.​—Lucas 22:29.

Kumusta balet iramay say ilalo da et manbilay ya tuloytuloy diad Paraison dalin? Uunoren day ganggan nen Jesus tan aatendian da so Pangdem na Katawan. Balet ag-ira mangan odino oninum noagta marespeto iran man-obserba labat. Maminsan ed sakey taon, kaselek na agew ed Nisan 14, mantitipon iray Tasi nen Jehova parad Pangdem na Katawan. Anggano pigaran libo labat ed interon mundo so walaan na ilalo ya manbilay diad tawen, say Pangdem na Katawan et papablien na amin a Kristiano. Diad satan ya okasyon et nodnonoten na amin so balbaleg ya panangaro nen Jehova a Dios tan si Jesu-Kristo.​—Juan 3:16.