Say Patey et Aliwan Anggaan na Amin!

Say Betania et sakey a melag ya baryo ya 3 kilometro so kaarawi tod Jerusalem. (Juan 11:18) Walay makapaermen ya agawa diman pigaran simba antis na impatey nen Jesus. Si Lazaro, sakey ed saray maapit ya kaaro nen Jesus, et biglan nansakit tan inatey.

Nen naamtaan itan nen Jesus, imbaga tod saray disipulo to a si Lazaro et naugip kanian sikatoy onla pian bangonen to. (Juan 11:11) Balet ag-atalosan na saray disipulo nen Jesus so labay ton ibaga, kanian direkta to lan imbagad sikara: “Inatey lay Lazaro.”—Juan 11:14.

Apatiran agew kayari dan imponpon, sinmabi Jesus ed Betania tan niligliwa toy Marta, say atsi na samay inatey. Inkuan tod si Jesus: “No wadia ka labat, agkomon inatey so agik.” (Juan 11:17, 21) Inkuan nen Jesus ed sikato: “Siak so kioli tan say bilay. Samay mangipapanengneng na pananisia ed siak, anggano sikatoy ompatey et ombilay lamet.”—Juan 11:25.

Pian paneknekan ya tua so imbaga to, inmasingger si Jesus ed lubok tan inkelyaw to: “Lazaro, paway ka!” (Juan 11:43) Tan abigbigla iray akanengneng nen binmangon so inatey.

Antis na saya et amidua lan amaoli si Jesus na inatey. Amay sakey et nen pinaoli to imay ugaw a biin anak nen Jairo. Antis ya sikatoy paolien nen Jesus, imbaga ton sikatoy nanaugip labat.—Lucas 8:52.

Imanoen ya diad samay impatey nen Lazaro tan anak a bii nen Jairo, inkompara nen Jesus so patey ed ugip. Dugaruga itan ya impangikompara nen Jesus. Akin? Lapud no say sakey et naugip, anggapoy amta to tan agmakaliknay sakit tan irap. (Eclesiastes 9:5; nengnengen so kahon ya “Say Patey et Singa Aralem ya Ugip.”) Malinew ed saray inmunan disipulo nen Jesus so tuan kipapasen na saray inaatey. “Parad saray papatumbok nen Jesus, say patey et ugip, tan say lubok et pasen ya pampainawaan . . . parad saramay inatey ya walaay pananisia,”a so imbaga na Encyclopedia of Religion and Ethics.

Makapaligliwa ya naamtaan a saray inatey et nanaugip labat ed saray ponponan tan agmaniirap. Kanian amta tayo la no antoy nagawa sano ompatey tayo tan agtayo la antakot.

“NO SAY SAKEY A TOO OMPATEY, OMBILAY TA LAMET?”

Anggaman labalabay tayoy masamit ya ugip diad labi, anggapod sikatayo so malabay ya dirediretso lan onugip. Panon tayon makaseguro ya saramay inatey ya naugip ed lubok et ombilay lamet—ya singa si Lazaro tan say anak a bii nen Jairo?

Ontan so intepet nen Job sanen say pakalikna to et asingger lan ompatey: “No say sakey a too ompatey, ombilay ta lamet?”—Job 14:14.

Inebatan nen Job so tepet to sanen imbaga to iya ed Makapanyarin-amin a Dios: “Ontawag ka, tan onebat ak ed sika. Pirawaten mo so kimey na saray limam.” (Job 14:15) Seguradoy Job ya pirawat nen Jehova so agew ya paolien To so matoor ya lingkor to. Kasin parad si Job et kugkugip labat itan? Andin balot.

Saray impamaoli nen Jesus et malinew ya ebidensya ya sikatoy inikdan na Dios na pakayarin daegen so patey. Diad tua, ibabaga na Biblia ya walad si Jesus “iray tombok na patey.” (Apocalipsis 1:18) No panon a walay autoridad nen Jesus ya bilayen lamet si Lazaro, wala met so autoridad ton paolien iray totoo diad arapen.

Sayan pormisa ya kioli et aminpigan binitla ed Biblia. Pinaseguroan na sakey ya anghel si propetan Daniel: “Insan ka ompatey, balet onalagey kan mangawat na tumang mo diad kasamputan na panaon.” (Daniel 12:13, Maung a Balita) Imbaga nen Jesus ed saray Saduceo, saray Judion lider ya agmanisiad pormisa ya kioli: “Nalilingo kayo, lapud agyo amta so Kasulatan odino say pakapanyari na Dios.” (Mateo 22:23, 29) Oniay imbaga nen apostol Pablo: “Walay ilalok ed Dios . . . a wala so kioli na saray matunong tan saray agmatunong.”—Gawa 24:15.

KAPIGAN PAOLIEN IRAY INAATEY?

Kapigan nagawa iyan pamaoli ed saray matunong tan agmatunong? Imbaga na anghel ed matunong ya si Daniel ya sikatoy onalagey “diad kasamputan na panaon.” Manisia met si Marta ya say agi ton si Lazaro et “onoli diad kaunoran ya agew.”—Juan 11:24.

Diad Biblia, sayan “kaunoran ya agew” et mikonektaan ed uley na Panarian nen Kristo. Oniay insulat nen Pablo: “Ta sikatoy [Kristo] nepeg a manuley bilang ari anggad niiyan la na Dios so amin a kakabusol diad salian to. Bilang unor a kabusol, say patey et naandi la.” (1 Corinto 15:25, 26) Mabiskeg iyan rason no akin ya nepeg tayon ipikasi ya onsabi so Panarian na Dios tan nagawa so linawa to diad dalin.b

Singa say papanisiaan nen Job, linawa na Dios ya paolien iray inaatey. No nagawa la itan, sigpot lan naandi so patey. Tan aglan balot manisip iray totoo no ‘Kasin say patey so anggaan na amin?’