Epektibon Pangusar na Tepetepet

LAPUD saray tepet so mankaukolan na ebat​—balanglan insalita odino diad nonot—​saratan so ontulong diad pangibiang ed saray dumerengel mo. Saray tepet so ontulong ed sikan mangigapo na tongtongan tan panggayagaan so makapasagyat iran pansasalatan na ideya. Bilang managpaliwawa tan managbangat, nayarin mangusar ka na tepetepet pian managyat na interes, pian natulongan so sakey a manrason ed sakey a suheto, odino pian lalon mangidanet ed walan ibagam. No maabig so pangusar mo ed saray tepet, napaseseg mo so arum ya aktibon mannonot imbes a pasaray ya ontatalineng. Nonoten so kalat mo, tan itepet moray tepet mo diad paraan ya ontulong ed pakagegemtan ed satan.

Pamaseseg ed Pantotongtong. No mibiang ka ed lawak na ministeryo, alisto ed saray pankanawnawa pian paibalikas ed totoo so liknaan da no labay da.

Dakel iran Tastasi so mangigagapo na makapainteres iran tongtongan diad basta pangitepet na, “Kasin naumameng mo la . . . ?” No pilien day sakey a tepet a tuan walad nonot na dakel a totoo, seguradon nawalaan ira na makapaliket a panaon ed lawak na ministeryo. Anggano balo so tepet ed kaisipan na arum a too, nayarin nasagyat so inkamausisa. Dakel a nanduruman bengatla so nayarin iparungtal ed saray balikas a singa “Anto so isipen mo . . . ?,” “Panon so panliknam . . . ?,” tan “Kasin sisiaen mo . . . ?”

Sanen akitongtongan nen ebanghelisador a Felipe so sakey ya Etiopen opisyal ed korte a mamabasan maksil ed propesiya nen Isaias, basta labat la intepet nen Felipe: “Natatalosan mo so babasaen mo?” (Gawa 8:30) Sayan tepet so angilukas na dalan ed si Felipe a mangipaliwawa ed saray katuaan nipaakar ed si Jesu-Kristo. Diad panguusar ed miparan tepet, aromog na arum a modernon-agew a Tastasi so totoo a tuan manpipilalek ed malinew a pakatalos ed katuaan na Biblia.

Bektan naikdan ira na pankanawnawan mangibalikas ed saray dilin panmoria ra, dakel a totoo so nayarin malabay ya ontalineng ed sika. Kayari na pantepet, ontalineng a maong. Mililikna imbes a makritiko diad pangapresya ed ebat na too. Komendaan ira sano nagawaan mo itan a masimoon. Diad sakey ya inkagawa, kayarin “inmebat a sikakalakal” so sakey ya eskriba, sikato so kinomendaan nen Jesus, a kuanto: “Agka arawi ed panariay Dios.” (Mar. 12:34) Anggano agka mipakna ed panmoria na sananey a too, nayarian mon pisalamatan ed impangibesngaw to’d inkasikato. Say imbaga to so pakaamtaan mo ed awawey a kaukolan mon ikonsidera diad panginabang mo na katuaan na Biblia ed sikato.

Pangiparungtal ed Saray Importantin Punto. Sano mitongtong ka ed sakey a grupo odino ed sakey a too, salien ya usaren iray tepet a mangipaarap ed saray importantin punto. Seguroen a saray tepet mo so manasaglawi ed saray bengatlan peteg a paninteresan na saray dumerengel mo. Nayarin mangusar ka met na tepetepet a managyat na panusisa lapud agtampol napatnagan so ebat. No ontunda kan magano kayari na pantepet mo, nayarin ontalineng iray dumerengel mo lapud nainteresan a maong ed no anto niray onggendan.

Diad sakey ya inkagawa, inusar nen propeta Miqueas so pigaran tepet. Kayari na impanepet ed no anto so iilaloan na Dios ed saramay mandadayew ed sikato, amipat nin nantepet so propeta, a balang sakey so walaan na ebat. Amin na saraman a tepet so ontulong ed managbasa a mangiparaan na makatebek ya ebat ya angisampotan to ed saman a parte na siningbat to. (Miq. 6:6-8) Kasin nagawaan mo so ontan sano manbabangat ka? Salien itan.

Pankatunongan ed Sakey a Suheto. Nayarin nausar iray tepet pian natulongan so arum a nasubaybayay pangikatunongan ed sakey ya argumento. Sanen impaliwawa to so sakey a seryoson panangiyabawag ed Israel, onia so ginawa nen Jehova, a singa nipanengneng ed Malaquias 1:2-10. Unona et imbaga to’d sikara: “Siak inaro takayo.” Saman a panangaro so agda inapresya, kanian intepet to: “Si Esau aliwa ta ya agi nen Jacob?” Insan impaimano nen Jehova so mankibalatar a kipapasen na Edom bilang ebidensya ya agpinabli na Dios so nasyon lapud karelmengan da. Saya so pinatumbokan to ed saray ilustrasyon a sinaletsaletan na saray tepet pian idanet so insaew na Israel ya onkiwas a manepeg ed panangaro to. Arum ed saray tepet so imbalikas a singano itetepet na saray agmatoor a saserdote. Arum so tepetepet ya intepet nen Jehova ed saray saserdote. Say pantotongtong so mamaliing na emosyon tan manawag ed imano tayo; say pangika tunongan so agnasuppiat; say mensahe so agnalingwanan.

Arum a managpaliwawa so epektibon manguusar na tepetepet diad miulibay a paraan. Anggaman anggapo so insalitan ebat a nayarin nailaloan, makapibiang iray dumerengel dia ed kanonotan da, a singano ira mitotongtong.

Sano mangiyaaral itayo na Biblia, usaren tayoray metodon pakapibiangan na iyaaralan. Siempre, lalon makagunggona no say iyaaralan so onebat ed dilin salita to. Diad mapalnan tono, mangusar na kaaruman a tepet diad pikatunongan ed iyaaralan. Diad saray manunan punto, sikato so pasesegen mo a mangusar ed Biblia bilang basiyan na ebat to. Nayarin itepet mo met: “Panoy pisiglaotan na sisingbaten ta ed sayan sananey a punton naaralan ta la? Akin ya importante itan? Panon ya apektaen na satan so bilay tayo?” Say ontan a metodo so lalon epektibo nen say pangibalikas mo ed dilin kombiksion mo odino pamalaknab ed salaysay mo. Diad onian paraan, tutulongan moy iyaaralan a mangusar ed ‘pakayari na panagkatunongan’ to pian mandayew ed Dios.​—Roma 12:1.

No agnatebek na iyaaralan so sakey ya ideya, mananos. Nayarin ikokompara to so ibabagam ed saman so sisisiaen to ed dakel lan taon. Nayarin makatulong so pangarap ed suheto diad duman paraan. Anggaman ontan, no maminsan et nakaukolan so simpli labat a panagkatunongan. Magenap ya usaren so Kasulatan. Mangusar na saray ilustrasyon. Tekep na saraya, mangusar na simplin tepetepet a managyat ed toon manrason ed walan ebidensya.

Paibalikas Iray Akindalem a Liknaan. Sano ebatan na totoo iray tepet, agdan naynay ipatnag so peteg a liknaan da. Nayarin basta onebat ira lapud isipen dan ontan so labay mo. Nakaukolan so pakatebek. (Uli. 20:5) Singa ginawa nen Jesus, nayarin itepet mo: “Sisiaen mo ya?”​—Juan 11:26.

Sanen karaklan ed saray babangatan nen Jesus so naopende ed imbaga to insan sikatoy tinaynanan da, impaibesngaw nen Jesus ed saray apostol to so liknaan da. Intepet to: ‘Labay yo met la so ontaynan?’ Imbesngaw nen Pedro so liknaan da, a kuanto: ‘Katawan, siopa ni so laen mi? Wala ed sika iray salita na maandon bilay; et anisia tan amta mi a sika so Masanton Sakey na Dios.’ (Juan 6:67-69) Diad sananey ya inkagawa, tinepetan nen Jesus iray babangatan to: ‘Siopa so Anak na too unong ya ibabaga na totoo?’ Pinatumbokan to iya na sakey a tepet ya anagyat ed sikaran ibalikas so walad puso ra. ‘Sikayo, anggaman kuan, siopa ak ed kuan yo?’ Inmebat si Pedro: ‘Sika so Kristo, say Anak na mabilay a Dios.’​—Mat. 16:13-16.

Sano mangiyaaral na Biblia, nayarin naimanom a makagunggona so miparan pitotongtong diad panangebat ed saray isyu. Nayarin itepet mo: “Panoy panmoria na saray kaklasem (odino katrabahoan mo) ed sayan pamaakaran?” Insan nayarin itepet mo: “Panoy liknaan mo ed satan?” No nakabatan mo so tuan liknaan na sakey a too, saya so manggawan posible a makatulong ka na baleg bilang managbangat.

Pangarum na Danet. Nausar met iray tepet diad pangarum na danet ed saray punto. Onia so ginawa nen apostol Pablo, a singa nikurit ed Roma 8:31, 32: “No say Dios gampi ed sikatayo, siopa ni kasi onsumpa ed sikatayo? Saman so agto kinawanan so dilin Anak to, noag ingen inyawat to lapud sikatayon amin, panon so agto pangiter ed sikatayo, ya anggapo so bayar, na ami ganagana a pati sikato?” Imanoen a, diad kada kipapasen, papalaknaben na tepet so balikas a tinumbokan na satan.

Kayari na impangikurit ed panangukom nen Jehova ed ari na Babilonia, imbalikas nen propeta Isaias so mabiskeg a kombiksyon diad impangiyarum toy: “Si Jehova na saray ehersito ninonot to, tan siopa so mamaandi kabaliksan to? Et say lima to niyunat, tan siopa so mangipikos ed sikato?” (Isa. 14:27) Diad mismon lugan na saratan, ipanengneng na ontan iran tepet ya agniburi so ideyan imbalikas. Anggapoy nailaloan ya ebat.

Pangiwalwal ed Lingon Kaisipan. Saray tepet ya inisip a maong so mabiskeg met iran paraan diad pangiwalwal ed lingon kaisipan. Sakbay a paabigen nen Jesus so sakey a too, tinepetan to iray Fariseo tan arum ya eksperto ed Ganggan: “Matunong kasi manambal ed agew na sabaton, ono andi?” Kayari ton anambal, sikatoy amatumbok na sananey a tepet: ‘Siopa ed sikayo, no say anak odino baka so naplag ed bobon, agta agwaten ton tampol ed agew na sabaton?’ (Luc. 14:1-6) Anggapoy nailaloan ya ebat, nisay wala so niyebat. Inwalwal na saray tepet so lingon kaisipan da.

No maminsan, anggan saray tuan Kristiano so napelag ed lingon kaisipan. Arum ed inmunan-siglon Corinto so mangidedemanda ed agagi ra pian solbaren iray problema a nepeg komon ya asolbar da lan mismo. Panoy impangasikaso nen apostol Pablo ed pamaakaran? Sikatoy nantepet na nantutumbokan a mabitar iran tepet pian napetek so kaisipan da.​—1 Cor. 6:1-8.

Lapud panagpasal, naaralan mon usaren ya epektibo iray tepet. Anggaman ontan, tandaan so pagmaliw a magalang, nagkalalo la sano mitotongtong ed saray maedad la, ed saray totoon agmo kabkabat, tan ed saramay walad pakauley. Usaren iray tepet diad pangipresenta ed katuaan na Biblia diad makapasagyat a paraan.