Panangusar ed Biblia no Onebat

SANO natepetan itayo nipaakar ed sisisiaen tayo, dalan na bilay tayo, panmoria tayo ed saray peles a nagagawa, ilalo tayo ed arapen, panggunaetan tayon usaren so Biblia pian onebat. Akin? Lapud satan so Salita na Dios. Manlalapud Biblia iray sisisiaen tayo. Ibabase tayo so dalan na bilay tayo ed Biblia. Momoldien na satan so panmoria tayo ed saray nagagawa ed mundo. Malet a nilamut ed saray apuyanan a sipan ed Biblia iray ilalo tayo ed arapen.​—2 Tim. 3:16, 17.

Sikakabat itayon tuloy ed responsabilidad a nisiglaot ed ngaran tayo. Sikatayo so Tastasi nen Jehova. (Isa. 43:12) Kanian ebatan tayoray tepet, aliwan unong ed pilosopiya na too, noagta base ed walan ibabaga nen Jehova ed apuyanan a Salita to. Tua, bilang indibidual walaan itayo na saray opinyon nipaakar ed saray pamaakaran, balet aabuloyan tayo so Salita na Dios a manmoldi ed saray panmoria tayo lapud kombinsido itayon tuloy a satan so katuaan. Siempre, say Biblia so mangiiter na kawayangan ed sikatayo diad personal a panlabay ed dakel iran pamaakaran. Imbes ya ipilit tayoray panlabayan tayo ed arum, kaliktan tayon ibangat iray prinsipyon nidatak diad Kasulatan, diad ontan et papalugaran tayoray dumerengel tayo a mangagamil na parehon kawayangan ed panagpili a panggagayagaan tayo. Singa si apostol Pablo, labay tayon “iyalibansa so katutulok panamegley na pananisia.”​—Roma 16:26, NW.

Si Jesu-Kristo so adeskribe ed Apocalipsis 3:14 bilang “say tasi a matoor tan matua.” Panon ton inebatan iray tepet tan inarap iray kipapasen a nidungetan to? No maminsan et pannonoten toray totoo diad panguusar to na saray ilustrasyon. No arum et diad pantepet ed samay manuupapet nipaakar ed dilin pakatalos to ed sakey a kasulatan. Mabetbet a diad pangaon ed saray kasulatan, panaglawi ed saratan, odino panukoy ed saratan. (Mat. 4:3-10; 12:1-8; Luc. 10:25-28; 17:32) Nen inmunan siglo, saray lukot na Kasulatan so kaslakan ya akasinop ed saray sinagoga. Anggapoy ebidensya a si Jesus so walaan na personal a koleksion na saratan a lukot, balet kabisado to so Kasulatan tan mabetbet ton tinukoy iratan sanen nambangat ed arum. (Luc. 24:27, 44-47) Nayarian ton ibaga a simamatua a say imbangat to so agnanlapu ed sikaton dili. Sinalita to so walan nadngel to ed si Ama to.​—Juan 8:26.

Say pilalek tayo et say panumbok ed ehemplo nen Jesus. Agtayo ni personal a nadngel a nansalita so Dios, a singa nadngel nen Jesus. Balet say Biblia so Salitay Dios. Sano usaren tayo itan bilang basiyan na saray ebat tayo, agtayo nipaimano so inkasikatayo. Ipanengneng ya imbes ya ibalikas so opinyon na ag-ayadyarin too, determinado itayon maong ya abuloyan so Dios a mangibaga no anto so katuaan.​—Juan 7:18; Roma 3:4.

Siempre, say pilalek tayo et aliwan basta pangusar ed Biblia noagta usaren itan diad paraan a makagunggonan tuloy ed dumerengel tayo. Sikato so labay tayon ontalineng tekep na lukas a nonot. Depende ed awawey na too, nayarian mon iparungtal iray lugan na Biblia diad pangikuan: “Agta mipakna ka a say peteg a makabaliksan et say ibabaga na Dios?” Odino nayarian mon ibaga ya: “Agmo ta amta a say Biblia so mangipapaliwawa ed satan a mismon tepet?” No mitotongtong ka ed sakey ya andian na respeto ed Biblia, nayarin kaukolan ya usaren mo so duman introduksion. Nayarin ibagam: “Kaliktan kon inabang ed sika iyan propesiya nensaman.” Odino nayarin ikuan mo: “Say libron sankalaknaban a nibubunog ed awaran na too so mangibabaga na onia . . .”

Diad arum a kipapasen et nayarin labay mon basta segeken labat so sakey a teksto. Anggaman ontan, no posibli et sankaabigan a bukayen so mismon Biblia insan basaen so ibabaga na satan. Ipanengneng so teksto ed too diad dilin Biblia to kapiganman a praktikal itan. Sayan direktan panangusar ed Biblia so mabetbet a walaan na mabiskeg ya epekto ed totoo.​—Heb. 4:12.

Saray Kristianon mamatatken so walaan na nikabiig a responsabilidad diad pangusar ed Biblia sano ebatan daray tepet. Sakey ed saray kualipikasyon diad panlingkor bilang sakey a matatken et satan ya agin laki so “mamebemben a malet ed matoor a salita a mitukoyan ed dunong to ed panagbangat.” (Tito 1:9, NW) Say sakey a membro na kongregasyon so nayarin seryoson mandesisyon nipaakar ed bilay to kayarin sikato so sinimbawa na sakey a matatken. Agaylan importante a sayan simbawa so malet a nibase ed Kasulatan! Say ehemplo na sakey a matatken diad panggawa ed saya so mangimpluensya ed dakel ni diad paraan na panagbangat da.