Anton Talagay Manudutak ed Sakey a Too?

Nen manasingger lay Paskua na 32 C.E., akapokus si Jesus ya manbabangat ed Galilea. Insan posiblin linmad Jerusalem parad Paskua, pian unoren so Ganggan na Dios. Balet, maal-alwar si Jesus lapud sikatoy labay a pateyen na saray Judio. (Juan 7:1) Kayari na Paskua, amawil ed Galilea.

Posiblin walad Capernaum si Jesus nen sinmabi ray Fariseo tan eskriba ya nanlapud Jerusalem. Akin ya linma rad man? Manaanap iray niyakusa dad si Jesus ya kontrad relihyon. Intepet da: “Akin et ibabaliwala na saray disipulom so abayag lan tradisyon na totoo? Singa bilang, agda uurasan iray lima ra antis iran mangan.” (Mateo 15:2) Agbalot ingganggan na Dios ed totoo to so ritual ya ‘panuras na lima anggad siko.’ (Marcos 7:3) Balet parad saray Fariseo et seryoson kasalanan so agpanggawad satan.

Imbes ya direkta ton ebatan so akusasyon da, impaimano nen Jesus no panon dan gagagalaen ya ag-unoren so Ganggan na Dios. “Akin et ibabaliwala yo met so ganggan na Dios lapud tradisyon yo?” so intepet tod sikara. “Singa bilang, imbaga na Dios ya, ‘Igalang moy amam tan inam,’ tan, ‘Say mansalita na mauges ed ama odino ina to et nepeg ya ompatey.’ Balet ibabaga yo, ‘Siopaman a mangikuan ed ama odino ina to: “Antokaman a walad siak a napinabangan mo et sakey a regalon nidedika lad Dios,” agto la kaukolan ya igalang so ama to.’”​—Mateo 15:3-6; Exodo 20:12; 21:17.

Ibabaga na saray Fariseo ya say kuarta, kaykayarian, odino antokaman ya indedika la bilang regalod Dios et gawa lay templo, kanian agla nayarin usaren ed arum ya gagala. Balet diad tua, wala nid too so indedikan regalo. Singa bilang, nayarin ibaga na sakey ya anak a say kuarta odino kayarian to et “korban,” regalon indedika lad Dios odino diad templo, kanian nibagan say templo la so akankayarian ed regalo. Samay kuarta odino kayarian et sarag nin usaren na saman ya anak ta wala nid sikato, balet ibabaga to ya agto la nayarin usaren itan pian tulongay maedad lan atateng to. Manbabaraan pian aggawaey responsabilidad tod sikara.​—Marcos 7:11.

Asyodotan si Jesus ed sayan pamipikewet dad Ganggan na Dios kanian inkuan to: “Ginawa yon andi-kakanaan so salita na Dios lapud tradisyon yo. Sikayo ran mansimpisimpitan, dugarugay impropesiya nen Isaias nipaakar ed sikayo sanen inkuan to: ‘Sarayan totoo et papagalangan da ak ed panamegley na bibil da, balet arawrawi ed siak so kapusoan da. Anggapoy kakanaan na pandadayew dad siak, ta saray ganggan na totoo so ibabangat dan doktrina.’” Anggapoy niyebat na saray Fariseo ed mapuersan imbaga nen Jesus. Kanian pinadago to ray totoo. Inkuan to: “Dengel kayo tan talosan yoy kabaliksan na saya: Say mandutak ed sakey a too et aliwan say onloob ed sangi to, noag say ompaway ed sangi to.”​—Mateo 15:6-11; Isaias 29:13.

Nen akasempet la rad abung, imbaga na saray disipulo ed si Jesus: “Amtam ta ya asakitan iray Fariseo ed imbagam?” Sikatoy inmebat: “Balang tanaman ya ag-intanem nen Amak a walad tawen et nabagot. Paulyan yo ra labat. Bulag iran manangigiya. Sirin, no itabin na bulag so sakey nin bulag, napelag iran dua ed abot.”​—Mateo 15:12-14.

Ompan abigla si Jesus nen insalitaan nen Pedro iray disipulo tan intepet to no anton talagay manudutak ed sakey a too. Inmebat si Jesus: “Agyo ta amta ya antokaman ya onloob ed sangi et ondalan ed pait tan ipaway ed kasilyas? Balet antokaman ya ompapaway ed sangi et manlalapud puso, tan saratan so manudutak ed sakey a too. Alimbawa, say puso so panlalapuan na saray mauges a panagkatunongan, panagpatey, pikakalugoran, seksual ya imoralidad, panagtakew, palson panagtasi, panagmudmora. Saraya so manudutak ed sakey a too; balet say agpanuras na lima antis a mangan et agmandutak ed sakey a too.”​—Mateo 15:17-20.

Agdidismayaen nen Jesus iray totoo ya magmaliw a mapalinis, tan agto met kokontraen so panuras na lima antis ya mangiparaan na panangan odino mangan. Imbes, kinontra toy pansimpisimpitan na saray lider na relihyon ya manasalin mangibaliwala ed saray matunong ya ganggan na Dios tan mas papablien da iray tradisyon na totoo. Diad tua, saray mauges ya kagagawa ya manlalapud puso so manudutak ed sakey a too.