Saray Reperensya Parad Workbook ed Aral
HULYO 1-7
KAYAMANAN ED SALITA NA DIOS | COLOSAS 1-4
“Lakseb Yoy Daan, tan Isulong Yoy Balo”
(Colosas 3:5-9) Kanian, patey yo ray kabiangan na laman yo nipaakar ed seksual ya imoralidad, karutakan, agnakontrol a pantintindek ed sekso, makapasakit a pilalek, tan inkaagum, a saya et idolatriya. 6 Nisengeg ed saratan a bengatla et onsabi so sanok na Dios. 7 Ontan met so kagagawa yo nensaman diad datin kabibilay yo. 8 Balet natan, amin iraya et nepeg yon ekalen ed inkasikayo: say sanok, pasnok, kaugsan, makapasakit iran salita, tan mabanday a panagsalita, a saya et agnepeg ya ompaway ed sangi yo. 9 Agkayo mantitilaan. Lakseb yoy daan a personalidad pati saray kagagawa na satan,
Awaten so Espirituy Dios, Aliwan say Espirituy Mundo
12 Anton espiritu so napatnagan ed inkatook? (Basaen so Colosas 3:8-10, 13.) Ipapaseseg na espirituy mundo iray gawa na laman. (Gal. 5:19-21) Say pakapatnagan no anton talaga so espiritun mangiimpluensya ed sikatayo et aliwan sano maong so situasyon, noag sano nasusubok itayo, a singa bilang sano walay kaagian ya ag-angimano, akaopendi, odino nankasalanan ni ingen ed sikatayo. Niarum ni, no wala tayo ed abung, nayarin napatnagan no anton espiritu so mangiimpluensya’d sikatayo. Pian nausisay sarili tayo, oniay itepet tayo: ‘Diad apalabas ya anem bulan, lalo kasin nagmaliw a singa si Kristo so personalidad ko odino apawil ko ‘may makapuy a kagagawak tan pananalitak?’
13 Natulongan itayo na espirituy Dios pian ‘lakseben so daan a personalidad pati saray kagagawa na satan’ tan isulong so “balon personalidad.” Ontulong itan ed sikatayo pian magmaliw a mas maaro tan mapangasi. Ontan met, mainomay tayoy mamerdona ed balang sakey, anggano walay makatunongan a sengegan na panreklamo. Tan no singa makapuy so ginawa na arum ed sikatayo, ag-itayo la ‘manem-em na sakit na linawa tan pasnok tan sanok tan paneeyagan tan makapasakit a salita.’ Imbes, pansagpotan tayoy magmaliw a “mapangasi.”—Efe. 4:31, 32.
(Colosas 3:10-14) tan isulong yoy balon personalidad, a diad panamegley na suston kakabatan et napapasimbalo itan pian niyaninag so personalidad na Dios ya amalsa ed satan. 11 Diad satan et anggapoy Griego odino Judio, panagsegat odino agpanagsegat, dayo, Escita, aripen, odino bulos a too; balet si Kristo so amin a bengatla tan sikatoy walad amin. 12 Unong ed saya, bilang pinili na Dios, masanto tan inad-aro, isulong yo so maaron panangabagey, kaabigan, inkamapaabeba, inkaulimek, tan anos. 13 Itultuloy yon itepel so sakey tan sakey tan mabulos a perdonaen so sakey tan sakey anggano walay rason na sakey ya ireklamo imay sakey. No panon a si Jehova et mabulos to kayon pinerdona, ontan met so gawaen yo. 14 Balet likud ni ed sarayan amin a bengatla, isulong yo so aro, ta saya so perpekton bedber na pankakasakey.
Kasin Nampasimbalo Ka La?
18 Pian napasimbalo itayo na Salita na Dios, agtayo labat itan basta basaen tan aralen. Wala ray totoon manbabasa met na Biblia tan kabisado day karga to. Ompan wala ray ontan ya akatongtong mod lawak na kimeyan. Say arum ni ingen et memoryado da iray tekstod Biblia. Balet, anggapo met so epekto tod bilay tan panagnonot da. Antoy rason? Napasimbalo labat na Salita na Dios so sakey a too no abuloyan ton ontanek itan ed puso to. No ontan sirin, dalepdepen tayon maong so nanaaralan tayo. Tepetan tayoy sarili tayo: ‘Kasin kombinsido ak ya aliwa labat iyan bangat na relihyon? Kasin apaneknekan ko lan aya so katuaan? Tan kasin iyaaplikak a mismo so nanaaralan ko, tan agko labat itan ibabangat ed arum? Kasin panisiaan ko ya si Jehova so mismon mitotongtong ed siak?’ No dalepdepen tayo irayan tepet, onaralem so panangaro tayod si Jehova. Nasabi so puso tayo, kanian napakiwas itayon manggaway pananguman ya mamaliket ed Dios.—Uli. 4:23; Luc. 6:45.
19 No lanang tayon babasaen tan dadalepdepen so Salita na Dios, nitultuloy tayon gawaen iyan imbaga nen Pablo: “Lakseb yo la so daan a personalidad pati saray kagagawa na satan, tan isulong yoy balon personalidad, a diad panamegley na suston pikakabat et napapasimbalo itan.” (Col. 3:9, 10) On, no talagan natatalosan tayo so ibabangat na Biblia tan iyaaplika itan, nipanengneng tayoy balon personalidad ya manprotekta ed sikatayo ed saray patit nen Satanas.
Pankotkot na Espiritual a Kayamanan
(Colosas 1:13, 14) Inliktar to itayo ed autoridad na kabilungetan tan inyalis to itayo ed panarian na inad-aro ton Anak, 14 a diad panamegley to et nibulos itayo lapud dondon, salanti, aperdona iray kasalanan tayo.
it-2 169 ¶3-5
Panarian na Dios
“Panarian na Inad-aro Ton Anak.” Samploran agew kayari na insegep nen Jesus ed tawen nen Pentecostes 33 C.E., awalaan na ebidensya iray disipulo to ya sikatoy “nitandoro lad nikawanan na Dios” sanen inkalbo nen Jesus ed sikara so masanton espiritu. (Gaw 1:8, 9; 2:1-4, 29-33) Kanian say “balon sipanan” et inmepekto lad sikara, tan nagmaliw iran manunan kabiangan na balon “masanton nasyon,” say espiritual ya Israel.—Heb 12:22-24; 1Pe 2:9, 10; Gal 6:16.
Natan et akayurong lay Kristo diad nikawanan na Ama to tan sikato lay Ulo na sayan kongregasyon. (Efe 5:23; Heb 1:3; Fil 2:9-11) Ipapanengneng na Kasulatan ya manlapu la nen Pentecostes 33 C.E., niletneg so espiritual a Panarian ya manuuley lad saray disipulo to. Nen sinulatan nen apostol Pablo iray inmunan siglon Kristiano ed Colosas, imbaga to ya si Jesu-Kristo et wala lay panarian to: “[Say Dios et] inliktar to itayo ed autoridad na kabilungetan tan inyalis to itayo ed panarian na inad-aro ton Anak.”—Col 1:13; ikompara so Gaw 17:6, 7.
Say panarian na Kristo manlapu la nen Pentecostes 33 C.E. et sakey ya espiritual a panarian ya manuuley ed espiritual ya Israel, odino saray Kristiano ya alanaan na espiritu na Dios, pian magmaliw ya espiritual ya ananak na Dios. (Jn 3:3, 5, 6) Sano saratan ya Kristianon alanaan na espiritu et awaten da lay tumang da ed tawen, agla ra uleyan na espiritual ya panarian na Kristo diad dalin, noagta magmaliw iran arari ya kaiba nen Kristo ed tawen.—Apo 5:9, 10.
(Colosas 2:8) Manalwar kayo pian anggapoy makarel ed sikayo diad panamegley na pilosopiya tan maapan panagpalikdo unong ed tradisyon na totoo, unong ed saray inuugaw a bengatla na mundo tan aliwan unong ed Kristo;
Saray Pabitar ed Libro a Galacia, Efeso, Filipos, tan Colosas
2:8—Antoran “dinaralin a bangat na mundo” so impasakbay nen Pablo ya arawian tayo? Saya et saray elemento na mundo nen Satanas—saray manunan bengatla odino prinsipyo a manutugyop, mangigigiya, odino mamapakiwas ed satan. (1 Juan 2:16) Kaiba ed satan iray pilosopiya, materyalismo, tan saray palson relihyon na sayan mundo.
Panagbasa ed Biblia
(Colosas 1:1-20) Siak, si Pablo, ya apostol nen Kristo Jesus diad linawa na Dios, tan si Timoteo ya agi tayo, 2 et nansulat ak ed saray masanto tan saray matoor ya agagi a disipulo nen Kristo diad Colosas: Nawalaan kayo komon na agnaparaan a kaabigan tan kareenan a manlalapud Dios ya Ama tayo. 3 Naynay kamin misasalamat ed Dios, say Ama na Katawan tayon Jesu-Kristo, sano ipipikasi mi kayo, 4 ta nadngelan mi so pananisia yo nipaakar ed si Kristo Jesus tan say panangaro yo ed amin a masanto 5 lapud ilalo a niparaan parad sikayo diad tawen. Sayan ilalo et nadngelan yo la nensaman diad panamegley na mensahe na katuaan nipaakar ed maong a balita 6 ya akasabi ed sikayo. No panon a say maong a balita et manbubunga tan onkakayat ed interon mundo, satan met so nagagawa ed limog yo, manlapu lad agew a nadngelan yo tan awalaan kayoy suston kakabatan nipaakar ed katuaan na agnaparaan a kaabigan na Dios. 7 Ontan so naaralan yo ed inad-aro tan kapara tayon aripen a si Epafras, a matoor a lingkor na Kristo parad sikatayo. 8 Impaamta to met ed sikami so panangaro yo a mitunosan ed espiritu na Dios. 9 Satan met so rason a manlapu la nen nadngelan mi itan, agkamin balot tinmundan mangipikasi ed sikayo tan kekerewen mi a napano kayo komon na suston kakabatan nipaakar ed linawa na Dios diad amin a karunongan tan pakatalos a manlalapud masanton espiritu, 10 diad ontan et manbilay kayo a manepeg ed si Jehova pian sikatoy napaliket yon maong legan a manbubunga kayo ed kada maabig a kimey tan naaaruman so suston kakabatan yo nipaakar ed Dios; 11 tan makaawat kayo komon na baleg a pakayari unong ed maglorian pakayari to pian sigpot kayon makapansungdo a walaay anos tan liket, 12 legan kayon misasalamat ed Ama, a pinagmaliw to kayon kualipikado a mibiang ed tawir na saray masanto a walad liwawa. 13 Inliktar to itayo ed autoridad na kabilungetan tan inyalis to itayo ed panarian na inad-aro ton Anak, 14 a diad panamegley to et nibulos itayo lapud dondon, salanti, aperdona iray kasalanan tayo. 15 Sikato so kaulibay na agnanengneng a Dios, say panguloan na amin a pinalsa; 16 ta diad panamegley to et apalsa so amin ni ran bengatlan walad tawen tan walad dalin, saray bengatlan nanengneng tan agnanengneng, balanglan saratan et trono odino pakauley odino gobierno odino autoridad. Apalsa so amin ni ran bengatla diad panamegley to tan parad sikato. 17 Ontan met, sikatoy wala la antis na amin ni ran bengatla, tan diad panamegley to et niwala so amin ni ran bengatla, 18 tan sikato so ulo na laman, say kongregasyon. Sikato so gapoan, say unonan inmoli manlapud saray inaatey, pian sikatoy magmaliw ya unaan ed amin a bengatla; 19 ta labay na Dios a sikatoy magmaliw a nagnap ed amin a bengatla, 20 tan diad panamegley nen Kristo et nagawaan na Dios a makapikareenan ed Sikato so amin ni ran bengatla, saray bengatlan walad dalin odino saray bengatlan walad tawen. Nagmaliw a posible iyan pikakareenan diad panamegley na dala to a nipaagus diad panamairapan a poste.
HULYO 8-14
KAYAMANAN ED SALITA NA DIOS | 1 TESALONICA 1-5
“Itultuloy Yon Pasesegen tan Pabiskegen so Sakey tan Sakey”
(1 Tesalonica 5:11-13) Kanian itultuloy yon pasesegen tan pabiskegen so sakey tan sakey, a singa gagawaen yo la. 12 Natan et kerewen mid sikayo, agagi, respeto yo iramay mansasagpot ed limog yo tan mangidadaulo ed sikayo ed kimey na Katawan tan manisimbawa ed sikayo; 13 tan ipatnag yod sikara so mas nagkalalon konsiderasyon tan panangaro lapud kimey da. Pansiansia yoy kareenan ed limog yo.
“Respeto Yo Iramay Mansasagpot ed Limog Yo”
12 Say lalanoren na ‘panangidaulo’ ed kongregasyon et aliwan say pambangat labat. Satan ya balikas et nabasa met ed 1 Timoteo 3:4. Imbaga nen Pablo a say sakey a manangasikaso et “lakin maabig so panangidaulo to ed dilin sankaabungan to, walaan na ananak a matulok tan makalakal.” Mapatnag ya say balikas dia a “panangidaulo” et aglabat ontutukoy ed pambangat tod ananak to noagta nepeg met ya igiya toy pamilya to, tan saray ‘ananak to et matulok.’ On, idadaulo na saray elder so kongregasyon, a tutulongan da ray agagin ontulok ed si Jehova.—1 Tim. 3:5.
“Respeto Yo Iramay Mansasagpot ed Limog Yo”
19 Antoy gawaen mo no akaawat kay regalo ya talagan parad sika labat? Agta usaren mo pian nipanengneng moy panangapresyam? Saray “langkap a lalaki” et regalo nen Jehova ed sika panamegley nen Jesu-Kristo. Say sakey a paraan pian nipanengneng mon aapresyaen mo iyan regalo et diad idengel mon maong sano manpapaliwawa iray elder tan panggunaetan mon iyaplika iray indanet dan punto. Nipanengneng mo met so panangapresyam no iparaan mon maong iray komentom diad aral. Suportaan moy panangidaulo da, a singa diad lawak na kimeyan. No agunggonaan kad impanimbawa ed sika na sakey ya elder, agta marakep no ibagam itan ed sikato? Tan agta maabig met no ibalikas moy apresasyon mod pamilya na saray elder? Tandaan, diad pansasagpot na saray elder parad kongregasyon, ipapalugar na pamilya da so panaon ya sikaray nakaiba da komon.
(1 Tesalonica 5:14) Balet, bilinen mi kayo, agagi, a pasakbayan yo iramay masunggay, ligliwa yo iramay maer-ermen, tulongan yo iramay makapuy, anosan yo so amin.
“Mangaro Itayo . . . Diad Gawa tan Katuaan”
13 Tulongan iramay makapuy. Nasubok no kasin tua so panangaro tayo panamegley na ganggan na Biblia ya “tulongan yo iramay makapuy, anosan yo so amin.” (1 Tes. 5:14) Anggaman dakel so agagi ya datin makapuy so pananisia ra insan binmiskeg, say arum balet et kaukolan day tuloytuloy ya tulong tan anos tayo. Nayarin kaiba ed saya so panginabang na saray makapabiskeg ya teksto ed Biblia, pangitagar ed sikara diad ministeryo, odino anggan say idengel ed sikara. Ontan met, imbes ya basta labat isipen ya say sakey ya agi et “mabiskeg” odino “makapuy,” nepeg tayon bidbiren ya wala ray kaksilan tan kakapuyan tayon amin. Anggan si apostol Pablo et binidbir to ya wala ray kakapuyan to. (2 Cor. 12:9, 10) Kanian nagunggonaan itayon amin ed tulong na saray agagi tayo.
Aligen so Kapaabebaan tan Panangabagey nen Jesus
16 Saray maabagey ya salita tayo. Say panangabagey so mamakiwas met ed sikatayon ‘ligliwaen iray maneermen.’ (1 Tes. 5:14) Antoy sarag tayon ibaga pian napabiskeg ira? Onlemew so liknaan da no ibalikas tayod sikara ya iyaansakit tayo ra. Impapuso tayo ran komendaan pian nanengneng da iray positibon kualidad tan abilidad da. Ipanonot tayod sikara ya inyasingger ira nen Jehova ed Anak to, kanian mabmabli ira sirin ed pakanengneng to. (Juan 6:44) Ipaseguro tayod sikara ya talagan iyaansakit nen Jehova iray lingkor ton ‘nabtag so puso ra.’ (Sal. 34:18) Saray maabagey ya salita tayo et makatambal ed saramay mankaukolan na ligliwa.—Uli. 16:24.
Pankotkot na Espiritual a Kayamanan
(1 Tesalonica 4:3-6) Ta linawa na Dios a magmaliw kayon masanto tan paliisan yoy seksual ya imoralidad. 4 Nepeg ya amtaen na kada sakey ed sikayo no panon ton kontrolen so dilin laman to unong ed kasantosan tan kagalangan, 5 ya aliwan diad maagum tan agnakontrol a pantintindek ed sekso a singa ed saray nasyon ya agda kabat so Dios. 6 Anggapoy nepeg ya onlampas ed nigeter a limitasyon tan anamoten toy agi to nipaakar ed saya, ta dusaen nen Jehova iramay manggagawa ed sarayan amin, unong ya imbaga mi la nensaman tan impasakbay mi met lad sikayo.
it-1 863-864
Pilalawanan
Say pilalawanan et kasalanan ya nayarin pakaekalan (pakadispeloan) na sakey manlapud Kristianon kongregasyon. (1Co 5:9-13; Heb 12:15, 16) Impaliwawa nen apostol Pablo ya say Kristianon manggagaway pilalawanan et mankakasalanan ed sarili ton laman, ta saray kabiangan na laman to ya parad panag-anak et uusaren to ed imoral a paraan. Apektadon maong so espiritualidad to, dinutakan toy kongregasyon na Dios, tan impeligro toy sarili to ya naalisan na makapatey iran sakit ed sekso. (1Co 6:18, 19) Agto nirespeto iray kanepegan na Kristianon agagi to (1Te 4:3-7) lapud (1) inloob tod kongregasyon so karutakan, kabandayan, tan pakabalawan (Heb 12:15, 16), (2) inekalan to na malinis a talindeg ed moral imay akilawanan to tan, no anggapo ni asawa na samay akilawanan to, adutakan la sano miasawa, (3) dineral to so maong ya reputasyon na pamilya to, tan (4) nankasalanan met ed saray ateng, ed asawa, odino magmaliw ya asawa na samay akilawanan to. Say imbaliwala to et aliwan say too, ya saray ganggan to et nayarin mangonsinti odino andi ed pilalawanan, noagta say Dios ya mangiter na dusa ed kasalanan to.—1Te 4:8.
(1 Tesalonica 4:15-17) Ta saya so ibabaga mi ed sikayo unong ed salita nen Jehova, a saramay mabilay ni ed sikatayo legan na kiwawala na Katawan et agdan balot unaan iramay naugip la ed patey; 16 lapud say Katawan a mismo et onleksab manlapud tawen tan mangiganggan, a walaay boses na arkanghel tan walaay trumpeta na Dios, tan saramay inaatey a nikasakey ed Kristo so unonan onoli. 17 Kayari na satan, sikatayo ran mabilay ni et alaen ed saray lurem pian nakaiba ra tan miabet ed Katawan diad dagem; diad ontan et naynay tayo lan kaiba so Katawan.
“Asingger Lay Kililiktar Yo”!
14 Antoy nagawa sano ginmapo lan onataki so Gog na Magog ed totoo na Dios? Inrekord nen Mateo tan Marcos so nagawa: “Ibaki [na Anak na too] iray anghel to pian tiponen da iray pinili to manlapud apatiran dagem, manlapud sampot na dalin angga ed sampot na tawen.” (Mar. 13:27; Mat. 24:31) Satan ya pantipon ed saray pinili et ag-ontutukoy ed inmunan impantatak ed saray alanaan; tan agmet itan ontutukoy ed pangiter na permanentin tatak ed saray nakekeran alanaan diad dalin. (Mat. 13:37, 38) Say pakaawat dad permanentin tatak da et antis ya onggapo so baleg a kairapan. (Apo. 7:1-4) Anto sirin so tutukoyen nen Jesus nen imbaga to ya ‘tiponen na saray anghel iray pinili to’? Atan imay panaon sano awaten la na nakekeran membro na 144,000 so premyo da ed tawen. (1 Tes. 4:15-17; Apo. 14:1) Nagawa itan sano ginmapo lan onataki so Gog na Magog. (Eze. 38:11) Diad satan la nasumpal iyan imbaga nen Jesus: “Diad satan a panaon, saray matunong et onsinag a singa kaliwawa na agew diad panarian na Ama ra.”—Mat. 13:43.
15 Kasin labay ya ibaga na satan ya saray alanaan et biglan onlad tawen odino walay nagawan “rapture”? Dakel ed Kakristianoan so manisia ya diad “rapture” et onlad tawen so amin a Kristiano ya pisikal nin siansiay laman da. Insan nanengneng da kuno so ipawil nen Jesus pian manuley diad dalin. Malinlinew balet ed Biblia ya say “tanda na Anak na too” et omparungtal ed tawen, tan onsabi si Jesus “a walad saray lurem na tawen.” (Mat. 24:30) Natalosan tayod sarayan balikas ya say isabi nen Jesus et agnanengneng. Sakey ni, “say laman tan dala et agmakatawir ed panarian na Dios.” Kanian saramay alanaan ya onlad tawen et nepeg nin ‘nauman diad kakirem na mata, legan na unor a trumpeta.’ (Basaen so 1 Corinto 15:50-53.) Kanian anggano agtayo usaren so terminon “rapture” lapud aliway pakatalos na arum ed satan, amta tayo ya saray nakekeran alanaan diad dalin et tampol ya natipon, “diad kakirem na mata.
Panagbasa ed Biblia
(1 Tesalonica 3:1-13) Kanian, sanen agmi la nitepel, inisip min mas maabig so mansiansiad Atenas; 2 tan imbaki mi Timoteo, ya agi tayo tan ministro na Dios parad maong a balita nipaakar ed Kristo, pian pabiskegen tan ligliwaen to kayo nipaakar ed pananisia yo, 3 pian anggapod sikayo so onkapuy lapud sarayan kairapan. Ta amta yon agtayo napaliisan irayan bengatla. 4 Ta sanen kaiba mi kayo ni, ibabaga mi lad sikayo a napairap itayo, tan agawa itan, unong ya amta yo la. 5 Kanian sanen agko la nitepel, walay imbakik pian naamtaan koy nipaakar ed katooran yo, ompan atukso kayo la na Managtukso, tan magmaliw ya andi-kakanaan so impansagpot mi. 6 Balet kasabisabi dia natan nen Timoteo a nanlapud sikayo tan maong so imbalita tod sikami nipaakar ed katooran tan panangaro yo, a naynay yon nononoten iray maliket ya impanlilimog tayo tan pipirawaten yon nanengneng kami a singa ed pampipirawat min nanengneng kayo. 7 Kanian, agagi, anggano nagogonigon tan maniirap kami, naliligliwa kami lapud sikayo tan ed ipapanengneng yon katooran. 8 Lapud napapabiskeg kami no mansiasiansian malet so relasyon yo ed Katawan. 9 Ta panon min nipanengneng so pisasalamat mid Dios nipaakar ed sikayo lapud pinasyan liket a nalilikna mid arap na Dios tayo nisengeg ed sikayo? 10 Agew-labi kamin manpipikasi a masimsimoon pian nanengneng mi kayo tan napanoan mi no antoy kulang ed pananisia yo. 11 Natan, komon ta say Dios tan Ama tayo tan say Katawan tayon Jesus et manggaway paraan pian makaonla kamid sikayo. 12 Niarum ni, pakiwasen kayo komon na Katawan a lalo yo nin pabalegen so panangaro yo ed sakey tan sakey tan ed amin, a singa gagawaen mi met ed sikayo, 13 pian say kapusoan yo et napabiskeg to, a magmaliw ya andiay pakabalawan tan masanto ed arap na Dios tan Ama tayo diad kiwawala na Katawan tayon Jesus a kaiba so amin a masanton lingkor to.
HULYO 15-21
KAYAMANAN ED SALITA NA DIOS | 2 TESALONICA 1-3
“Say Kiparungtal na Samay Mauges”
(2 Tesalonica 2:6-8) Tan natan et amta yo la no antoy mangaamper, pian sikatoy niparungtal labat diad aturon panaon. 7 Tua, sayan kaugsan to et sakey a misteryo tan nagagawa la, balet mansiansia labat ya ontan anggad sano naandi la imay mangaamper natan. 8 Insan niparungtal imay mauges, a deralen na Katawan a Jesus diad panamegley na pakayarin ompapaway ed sangi to tan paandien to sano napatnagan lay kiwawala to.
it-1 972-973
Debosyon ed Dios
Wala so sakey nin misteryo ya midumaan ya maong ed “sagradon sekreto” nen Jehova. Say ‘misteryo na kaugsan.’ Misteryo iya ed saray tuan Kristiano lapud diad panaon nen apostol Pablo et agni malinew ya natukoy tan nabidbir no siopa so “too na kaugsan.” Anggano nen niparungtal la iyan “too,” siansia nin misteryo ed dakel ya totoo so pakabidbiran to lapud iyaamot to so panggagawa toy kaugsan tan mankunkunwarin walaan na debosyon ed Dios. Diad tua et panag-apostata itan ed tuan debosyon ed Dios. Imbaga nen Pablo ya say ‘misteryo na kaugsan’ et nagagawa la diad panaon to, lapud walay mauges ya impluensya ed Kristianon kongregasyon ya manresulta ed kiwala na saray apostata. Balet diad kaunoran, sano napatnagan lay kiwawala nen Jesu-Kristo, sayan mauges et paandien to. Sayan apostatan “too” ya kokontrolen nen Satanas et iyatagey toy sarili to “ed amin a tatawagen a dios odino bengatlan dadayewen” (Griego, sebasma). Kanian sayan onsusumpa ed Dios ya uusaren nen Satanas et grabe so panamalikdo to tan pakaderalan na saramay ontutumbok ed gagawaen to. Epektibo so panamalikdo na “too na kaugsan” lapud sasakbongan toy kaugsan to panamegley na pankunkunwari ton walaan na debosyon ed Dios.—2Te 2:3-12; ikompara so Mat 7:15, 21-23.
(2 Tesalonica 2:9-12) Balet say kiwawala na samay mauges et napapatnagan lapud saray gagawaen nen Satanas diad panamegley na amin a makapanyarin gawa tan saray palson tanda tan pakelaw 10 tan amin ya agmatunong a panamalikdo ed saramay nadederal la, bilang panangibales lapud agda inawat tan impatnag so panangaro ed katuaan pian niliktar ira komon. 11 Kanian papaulyan na Dios a naimpluensyaan ira na sakey a katilaan pian panisiaan da so aliwan tua, 12 diad ontan et naukom iran amin lapud agda anisiaan so katuaan noagta nanliketan day ag-inkatunong.
it-2 245 ¶7
Tila
Pinaulyan nen Jehova a Dios ya ‘naimpluensyaan na katilaan’ iray totoon mas labay dan ‘panisiaan so aliwan tua’ imbes ya say maong a balita nipaakar ed si Jesu-Kristo. (2Te 2:9-12) Sayan prinsipyo et nanengneng ed samay agawa ed ari na Israel ya si Ahab pigaran siglo lay apalabas. Imbaga na saray matilan propeta ya si Ahab et seguradon manalo ed pilaban to diad Ramot-gilead, balet impasakbay na propeta nen Jehova ya si Micaias ya natalo si Ahab. Diad sakey ya pasingawey ya anengneng nen Micaias, inabuloyan nen Jehova so sakey ya anghel a magmaliw ya “manamalikdon espiritu” diad sangi na saray propeta nen Ahab. Labay ton ibaga, inusar na sayan anghel so pakayari to pian say ibaga na saratan ya propeta et aliwan tua noagta samay labay dan ibaga tan no antoy labay ya narengel nen Ahab ed sikara. Anggaman pinasakbayan lay Ahab, mas pinili ton panisiaan iray katilaan da tan say kasalat na satan et bilay to.—1Ar 22:1-38; 2Aw 18.
Pankotkot na Espiritual a Kayamanan
(2 Tesalonica 1:7, 8) Balet sikayo ran napapairap et nainawaan a kaiba mi sano omparungtal so Katawan a Jesus manlapud tawen a kaiba iray makapanyarin anghel to 8 diad mandarlang ya apoy, a legan na satan et sikatoy ombales ed saramay agda kabat so Dios tan ed saramay agmanguunor ed maong a balita nipaakar ed Katawan tayon Jesus.
it-1 834 ¶5
Apoy
Insulat nen Pedro ya “say tawen tan say dalin a wala natan et nigana ed apoy.” Base ed konteksto tan ed arum ya teksto ed Biblia, mapatnag ya aliwa iyan literal ya apoy noagta ontutukoy ed permanentin kadederal. Singa ed samay Delap ed panaon nen Noe, ag-aderal so literal ya tawen tan dalin noagta saray mauges ya totoo labat. Mipadpara, sano omparungtal si Jesu-Kristo kaiba iray makapanyarin anghel to diad mandarlang ya apoy, say permanentin naderal labat et saray mauges ya totoo tan sayan mauges a sistema na mundo.—2Pe 3:5-7, 10-13; 2Te 1:6-10; ikompara so Isa 66:15, 16, 22, 24.
(2 Tesalonica 2:2) ya agkomon main-inomay a naandi so maabig a panagkatunongan yo odino nabigla kayo lapud saray impuyan a balikas odino mensahen imbagad sikayo odino sulat a singano nanlapud sikami, a mangibabagan asingger lay agew nen Jehova.
it-1 1206 ¶4
Panangipuyan
“Saray Impuyan a Balikas”—Tua tan Tila. Say Griegon salitan pneuma (espiritu) et inusar diad pigaran sulsulat na saray apostol diad nikaduman paraan. Singa bilang, diad 2 Tesalonica 2:2, pinaseseg nen apostol Pablo iray agagi ed Tesalonica ya ag-ira masyadon mapagpaga odino agkomon main-inomay ya naandi so maabig a panagkatunongan da “lapud saray impuyan a balikas [literal, “espiritu”] odino mensahen imbagad [sikara] odino sulat a singano nanlapud sikami, a mangibabagan asingger lay agew nen Jehova.” Malinew ya inusar nen Pablo so salitan pneuma (espiritu) ya ontutukoy ed paraan na pitatalosan, a singa say ‘mensahen imbaga’ odino “sulat.” Lapud satan, oniay imbaga na Commentary on the Holy Scriptures (p. 126) nen Lange nipaakar ed sayan teksto: “Say tutukoyen dia na Apostol et sakey ya bengatlan walaan na espiritual a kabaliksan, palson prediksion, imbalikas na sakey ya propeta.” (Impatalos tan inedit nen P. Schaff, 1976) Oniay imbaga na Word Studies in the New Testament nen Vincent: “Panamegley na espiritu. Panamegley na saray imbalikas ya propesiya na saray indibidual diad saray pantitipon na Kristiano, ya mangibabagan nanlapu iratan ed Dios.” (1957, Vol. IV, p. 63) Kanian, anggaman say pigaran patalos et angusar labat na salitan “espiritu” parad pneuma diad sayan teksto tan ed arum ni, say inusar balet na arum ya patalos et “mensahe na Espiritu” (AT), “prediksion” (JB), “panangipuyan” (D’Ostervald; Segond [French]), “impuyan a balikas” (NW).
Panagbasa ed Biblia
(2 Tesalonica 1:1-12) Siak, si Pablo, kaibak si Silvano tan si Timoteo, et nansulat ak ed kongregasyon na saray taga Tesalonica a nikasakey ed Dios ya Ama tayo tan ed Katawan a Jesu-Kristo: 2 Nawalaan kayo komon na agnaparaan a kaabigan tan kareenan a manlalapu ed Dios ya Ama tayo tan ed Katawan a Jesu-Kristo. 3 Obligado kamin naynay a misalamat ed Dios nipaakar ed sikayo, agagi. Manepeg iya, lapud ombibiskeg a maong so pananisia yo tan ombabaleg so panangaro yo ed sakey tan sakey. 4 Kanian ipapasirayew mi kayo ed saray kongregasyon na Dios lapud panagsungdo tan pananisia yo anggaman makakasagmak kayoy panamasegsegang tan irap. 5 Saya so paneknek na matunong a panangukom na Dios, kanian sikayoy ipapasen a makanepegan ed Panarian na Dios, a parad saya et maniirap kayo. 6 Ta petepeteg a matunong parad Dios a balesen to na kairapan iramay mamapairap ed sikayo. 7 Balet sikayo ran napapairap et nainawaan a kaiba mi sano omparungtal so Katawan a Jesus manlapud tawen a kaiba iray makapanyarin anghel to 8 diad mandarlang ya apoy, a legan na satan et sikatoy ombales ed saramay agda kabat so Dios tan ed saramay agmanguunor ed maong a balita nipaakar ed Katawan tayon Jesus. 9 Sikaray naukom tan say dusa ra et andi-anggaan a kadederal tan naandi ra ed arap na Katawan tan agda la nanengneng so maglorian pakayari to, 10 diad panaon a sikatoy onsabi pian nigloria a kaiba iray masanton lingkor to tan diad satan ya agew et sikatoy pankelkelawan na amin ya angipatnag na pananisia, lapud anisiaan yo so impantasi mi ed sikayo. 11 Lapud satan et naynay mi kayon ipipikasi, a sikayoy ipasen komon na Dios a makanepegan ed samay anawagan tod sikayo tan diad panamegley na pakayari to et sigpot ton sumpalen so amin a maabig a panliliketan to tan amin a kimey a gagawaen yo lapud pananisia yo. 12 Diad ontan, say ngaran na Katawan tayon Jesus et nigloria diad panamegley yo tan sikayoy nigloria lapud sikato, unong ed agnaparaan a kaabigan na Dios tayo tan say Katawan a Jesu-Kristo.
HULYO 22-28
KAYAMANAN ED SALITA NA DIOS | 1 TIMOTEO 1-3
“Dampoten so Maabig a Kimey”
(1 Timoteo 3:1) Napanmatalkan iyan salita: No walay sakey a laki a dadampoten toy magmaliw a manangasikaso, maabig a kimey so pipirawaten to.
Akin ya Importantin Paaligwasen Moy Espiritualidad Mo?
3 Basaen so 1 Timoteo 3:1. Say Griegon salitan impatalos ya “dadampoten” et ontutukoy ed pampursigin gawaten so sakey ya bengatla, anggano onkulandit ka ni. Diad impangusar nen apostol Pablo ed satan ya salita, indanet to ya kaukolay pansagpot pian onaligwas ed espiritual. Imadyin mon walay sakey ya brother ya iisipen to no antoy nitulong tod kongregasyon diad arapen. Aliwa nin ministeryal ya lingkor natan, balet atalosan to ya kaukolan toy onaligwas ed espiritual. Unona, panseetan toy onkualipikan ministeryal ya lingkor. Tan diad ilabas na panaon et labay to met so onkualipikan manlingkor ya elder. Diad saratan ya plano to, gawaen toy anggaay nayarian ton nadampot iray kualipikasyon pian nagawaan to ray kaaruman ya responsabilidad tod kongregasyon.
(1 Timoteo 3:13) Ta saray lalakin maabig so panaglingkor da et maabig so reputasyon da tan bulobulos iran makapansalita nipaakar ed pananisia ed si Kristo Jesus.
km 9/78 4 ¶7
Saramay “Maabig so Reputasyon Da”
7 Kanian natalosan tayon tampol no akin ya imbaga nen Pablo ya saraman ya lalaki et “maabig so reputasyon da.” Aglabay ya ibaga na saya ya onatagey so posisyon da diad kongregasyon. Imbes, saray ministeryal a lingkor ya “maabig so panaglingkor da” et seguradon bebendisyonan nen Jehova tan nen Jesus, tan rerespetoen tan susuportaan ira na interon kongregasyon. Kanian “bulobulos iran makapansalita nipaakar ed pananisia ed si Kristo Jesus.” Lapud satan ya betang da, aapresyaen ira ed maabig ya panaglingkor da; mabiskeg so pananisia ra tan makpel dan niyabawag so pananisia ra, ya ag-ira natatakot ya nabalaw.
Pankotkot na Espiritual a Kayamanan
(1 Timoteo 1:4) tan agda iimanoen iray palson istorya tan saray kapolian. Anggapoy kakanaan na sarayan bengatla, noagta mamalesa labat na saray espikulasyon, tan ag-iratan kabiangan ed saray bengatlan iiter na Dios a mamabiskeg na pananisia.
it-1 914-915
Kapolian
Anggapo so nagunggona no aralen tan pandiskusyonan ni itan, tan lalo la diad panaon ya insulat nen Pablo itan ed si Timoteo. Agla importante so mangisinop na saray rekord na kapolian pian pruebaan so pamilyan nanlapuan na sakey, ta diad saman a panaon et agla ipapasen na Dios ya walay pandumaan na saray Judio tan Gentil diad Kristianon kongregasyon. (Gal 3:28) Tan naamtaan la ed saray rekord na kapolian so pamilyan nanlapuan na Kristo, diad linya nen David. Sakey ni, kayarin insulat nen Pablo iyan bilin et magano lan naderal so Jerusalem, pati saray rekord na kapolian na saray Judio. Ag-iratan inabuloyan na Dios ya mansiansia. Kanian, mapaga si Pablo ya ompan si Timoteo tan saray kongregasyon et nasayang labat so panaon da ed pansukimat tan pisuppiatan nipaakar ed saray nanlapuan na pamilya, ta ag-itan mamabiskeg na pananisia na sakey a Kristiano. Magenap lay rekord na kapolian ya walad Biblia ya mamaneknek ya si Kristo so Mesias, say rekord na kapolian ya sankaimportantian ed saray Kristiano. Saray arum ya listaan na kapolian ya walad Biblia et ebidensya ya napanmatalkan so rekord na Kasulatan, tan pakapatnagan ya saratan et tuan salaysay.
(1 Timoteo 1:17) Natan say andi-anggaan ya Ari, ya agbalot ompatey, agnanengneng, tan alenleneg a Dios, so nigalang tan nigloria komon ya anggad angga. Amen.
cl 12 ¶15
“Nia! Saya so Dios Tayo”
15 Say sananey nin titulo ya onaplika lambengat ed si Jehova et “Ari ya andi angga.” (1 Timoteo 1:17; Apocalipsis 15:3, NW) Anto so kabaliksan na saya? Ag-itan narandan na limitadon kanonotan tayo, balet si Jehova so magnayon ed namparan pamaakaran—apalabas tan ed arapen. Ibabaga na Salmo 90:2: “Manlapu ed andi-anggaan ya angga ed andi-anggaan, Dios ka la.” Kanian anggapon balot so gapoan nen Jehova; sikatoy lawas a wala. Sikatoy makanepegan a natawag a “say Kadaanan na Ag-agew”—magnayon lay kiwawala to antis nin apalsa so siopaman odino antokaman ed uniberso! (Daniel 7:9, 13, 22, NW) Siopa so makatunongan a makasuppiat ed kanepegan to bilang Soberanon Katawan?
Panagbasa ed Biblia
(1 Timoteo 2:1-15) Kanian manuna ed amin, ipapaseseg ko a saray nanduruman paraan na panagpikasi, salanti, saray masimoon a kerew, pangipikasi ed arum, tan pisasalamat, et gawaen komon nipaakar ed amin a klase na totoo, 2 tan nipaakar ed saray arari tan amin a walad atagey a posisyon, pian makapantultuloy itayon manbilay a maligen tan mareen a walaay sigpot a debosyon ed Dios tan inkaseet. 3 Saya so maabig tan makapaliket ed pakanengneng na Manangiliktar tayo, say Dios, 4 a say linawa to et niliktar so amin a klase na totoo tan nawalaan ira na suston kakabatan ed katuaan. 5 Ta saksakey so Dios, tan saksakey so manamegley ed Dios tan totoo, sakey a too, si Kristo Jesus, 6 ya inter toy sarili to bilang kasimbangan a dondon parad amin—natasian iya diad dugan panaon. 7 Pian natasian iyan katuaan, aturo ak bilang managpulong tan apostol—ibabagak so tua, agak mantitila—managbangat ak ed saray nasyon nipaakar ed pananisia tan katuaan. 8 Kanian komon ta diad amin a pasen et mantultuloy a manpikasi iray lalaki, ya itagey day lima ra diad katooran da, ya anggapoy pasnok tan pandedebati. 9 Ontan met, nepeg a say pamarakep na saray bibii ed sarili ra et say matukoy a panangawes, a mangipatnag na kasimpitan tan limpion kanonotan, aliwan say nanduruman estilo na panaglapir na buek tan saray balitok odino perlas odino mabmablin kawes, 10 noagta diad paraan a manepeg ed saray bibii a mangibabagan mandadayew irad Dios, salanti, diad panamegley na maong iran gawa. 11 Komon ta say bii et mareen a manaral tan sigpot a manpasakop. 12 Agko abuloyan a say bii et manbangat odino nawalaan na autoridad ed laki, noagta mansiansian mareen. 13 Ta si Adan so unonan pinalsa, insan si Eva. 14 Ontan met, ag-apalikdo si Adan, noagta say bii so apalikdon maong tan sinumlang toy ganggan. 15 Balet, sikatoy nasalimbengan diad pagmaliw ton ina, daput no sikatoy mantultuloy ed pananisia tan panangaro tan inkasanto a walaay limpion kanonotan.
HULYO 29–AGOSTO 4
KAYAMANAN ED SALITA NA DIOS | 1 TIMOTEO 4-6
“Say Pandumaan na Debosyon ed Dios tan Kayamanan”
(1 Timoteo 6:6-8) Diad tua et baleg a pakagunggonaan so debosyon ed Dios ya atekepan na inkakontento. 7 Ta anggapon balot so inawit tayo diad mundo, tan anggapon balot so naawit tayo manlapu dia. 8 Kanian, no walay naakan tan kawes tayo, mankontento tayo la ed saratan.
Aralen so Sekreto na Panamasarag
Say manunan sengegan na liket tan inkapnek nen Pablo et say impamasarag to. Balet, anto ta so kabaliksan na panamasarag? Diad simplin panangibaga, satan so mankabaliksan na pagmaliw a kontento ed manuna iran pankaukolan. Nipaakar ed saya et oniay inkuan nen Pablo ed si Timoteo a kaiba to ed ministeryo: “Balet say kasimpitan [“maridios a debosyon,” NW] sikato so baleg a gunggona no tooran na pamasarag. Ta anggapo so intarok tayo dia ed mundo, et agtayo met nayariay mangala na antokaman a bengatla. No wala siri pantagano tayo tan kawesen tayo pasaragen tayo komon ya.”—1 Timoteo 6:6-8.
Imanoen ya insiglaot nen Pablo so panamasarag ed maridios a debosyon. Binidbir to a say tuan liket so manlalapu ed maridios a debosyon, salanti, say pangiyuna ed serbisyo tayo ed Dios, tan aliwan say materyal a kaykayarian odino kayamanan. Say ‘tagano tan kawesen’ et paraan lambengat pian makapantultuloy itayon manggegemtan ed maridios a debosyon. Kanian para ed si Pablo say sekreto ed panamasarag et say panmatalek ed si Jehova, antokaman iray sirkumstansya.
(1 Timoteo 6:9) Balet saramay determinadon onyaman et napepelag ed tukso tan patit tan dakel ya andi-kakanaan tan makapasakit a pilpilalek a mangilelereg ed totoo diad kadederal tan kabagbag.
g 6/07 6 ¶2
Determinadon Onyaman—No Antoy Epekto na Satan ed Sika
Siempre, aliwan amin ya totoo et ompatey diad pampupursigi dan onyaman. Balet, agda napanliketan so bilay lapud akapokus la ran maong ed satan. Sakey ni, nayarin naapektoan so bilay da na stress ed trabaho odino problema ed kuarta ya manresultad sobran takot, agpakaugip, graben sakit na ulo, odino ulcer—saray sakit ya mamatikey na bilay. Tan anggano naisip lanlamang na sakey ya kaukolan ton umanen iray prayuridad tod bilay, nayarin atrasado la itan. Ompan anggapo lay talek ed sikato na asawa to, arawi lay liknaan na ananak to ed sikato, tan masakit la. Nayarin naapiger met ni so arum ed saray makapuy ya epekto na satan, balet kaukolan so pansagpot a maong. Saray ontan ya totoo et talagan “sinasaksak day sarili ra na dakel a pakasakitan.”—1 Timoteo 6:10.
(1 Timoteo 6:10) Ta say panangaro ed kuarta et lamot na amin a makaderal a bengatla, tan diad panggugunaet na arum a peneken iyan panangaro, abalang ira ed pananisia tan sinasaksak day sarili ra na dakel a pakasakitan.
g 11/08 6 ¶4-6
Anemiran Makatulong Pian Maliket so Bilay
Singa naimano tayo ed inmunan artikulo na sayan serye, saramay totoon manguusil ed kayamanan pian magmaliw ya maliket so diad tua et singa ra manguusil ed dagem. Ag-ira labat nadismaya, noagta dakel so pakasakitan da. Singa bilang, saray totoon pursigidon onyaman et mabetbet dan napapaulyanan so relasyon dad saray kapamilya tan kakaaro da. Saray arum et agla onuugip—lapud trabaho, odino lapud pampapaga o panaaburido. “Masamit so ugip na samay manlilingkor, daiset man odino dakel so kakanen to, balet say dakel a kayarian na toon mayaman et agto pakaugipan,” so kuan na Eclesiastes 5:12.
Say kuarta et aliwa labat ya maruksan katawan noagta mapalikdo met. Tinukoy nen Jesu-Kristo so “mapalikdon pakayari na kaykayamanan.” (Marcos 4:19) Labay ton ibaga, ipropromisa na kayamanan so liket, balet agto itan niiter, noagta pampirawaten to ka labat ya naaruman ni. “Say toon maaro ed kuarta et agbalot napenek,” so imbaga na Eclesiastes 5:10.—The New English Bible.
Diad simplin panangibaga, sika lanlamang so kaskasian no maaro kad kuarta tan mansumpal labat itan ed pakadismaya, pakasakitan, odino krimen ni ingen. (Proverbio 28:20) Say talagan maliket tan matalona et saramay maiter, mainomay ya mamerdona, malinis ed moral, maaro, tan maespiritual.
Pankotkot na Espiritual a Kayamanan
(1 Timoteo 4:2) diad panamegley na pansimpisimpitan na saray totoon mansasalita na katilaan, a say konsiensia ra et agmakalikna a singa tinatakan na ampetapetang a balatyang.
Malinis a Konsiensia ed Arap na Dios
17 Oniay insulat nen apostol Pedro: “Pansiansia yon malinis so konsiensia yo.” (1 Pedro 3:16) Makapaermen ta no ibabaliwala na totoo iray prinsipyo nen Jehova, kalkalna ya agla ra pasakbayan na konsiensia ra. Imbaga nen Pablo ya say ontan ya konsiensia et “agmakalikna a singa tinatakan na ampetapetang a balatyang.” (1 Timoteo 4:2) Asalim ta lay asinit na ampetapetang a balatyang? No nagawa itan, napiglatan so katat mo tan agla makalikna. No say sakey et tuloytuloy ya manggawa na mauges, say konsiensia to et magmaliw ya “agmakalikna” tan onsabi panaon et agla itan onggana.
(1 Timoteo 4:13) Itultuloy moy manseet ed panagbasa diad publiko, ed panamilin, tan ed panagbangat, anggad isabik ditan.
it-2 714 ¶1-2
Panagbasa ed Publiko
Diad Kristianon Kongregasyon. Nen inmunan siglo, pigpigara so walaan na kopya na saray lukot na Biblia, kanian importante so panagbasa diad publiko. Ingganggan nen apostol Pablo ya basaen ed publiko iray sulat to diad saray pantitipon na Kristianon kongregasyon tan binilin to ira ya misalatan ira na saray sulat to ed arum ya kongregasyon pian nibasa da met iratan. (Col 4:16; 1Te 5:27) Binilin nen Pablo so ugaw nin Kristianon manangasikaso ya si Timoteo ya manseet ed “panagbasa diad publiko, ed panamilin, tan ed panagbangat.”—1Ti 4:13.
Kaukolan ya marlas so pambasa diad publiko. (Hab 2:2) Lapud say panagbasa ed publiko et pakaaralan na arum, nepeg ya tebeken a maong na managbasa no antoy babasaen to tan talosan ton maong so gagala na nansulat, asikasoen toy panagbasa to pian agmakapangiter na lingon ideya odino kabaliksan ed saray ondedengel. Base ed Apocalipsis 1:3 saramay manbabasan maksil ed satan ya propesiya, ontan met iramay ondedengel tan manguunor ed satan, et magmaliw ya maliket.
Panagbasa ed Biblia
(1 Timoteo 4:1-16) Anggaman ontan, malinew ya ibabaga na impuyan a salita a diad kaunoran iran panaon et wala ray onsian ed pananisia, ya imanoen da ray manangibalang ya impuyan a balikas tan bangabangat na saray demonyo, 2 diad panamegley na pansimpisimpitan na saray totoon mansasalita na katilaan, a say konsiensia ra et agmakalikna a singa tinatakan na ampetapetang a balatyang. 3 Isesebel da so panangasawa tan igaganggan da ray totoo a paliisan iray naakan a pinalsa na Dios pian kanen tan pisalamatan na saray walaan na pananisia tan suston kakabatan ed katuaan. 4 Ta kada pinalsa na Dios et maabig, tan anggapoy nepeg ya ipulisay no inawat itan tan akisalamatan, 5 ta apasanto itan ed panamegley na salitay Dios tan diad impangipikasi ed satan. 6 Diad pangiter mo ed sayan bilin ed saray agagi, magmaliw kan maong a ministro nen Kristo Jesus, a napapabiskeg ed saray salita na pananisia tan maabig a bangat a maapit mon tutumboken. 7 Balet agmo dedengelen iray palson istorya a mamapabanday ed Dios, a singa saramay ibabaga na akukulaw. Ingen, ipasal moy sarilim, a say gagalam et nipatnag moy debosyon ed Dios. 8 Ta say panangipasal ed laman et makagunggona na daiset, balet say debosyon ed Dios et makagunggona ed amin a bengatla, lapud isisipan na satan so bilay natan tan say bilay diad arapen. 9 Sayan salita et napanmatalkan tan manepeg a panisiaan. 10 Saya so rason a mansasagpot tan manseseet itayo, lapud say paniilaloan tayo et mabilay a Dios, a Manangiliktar ed amin a klase na totoo, nagkalalo la ed saray matoor. 11 Itultuloy mo irayan iganggan tan ibangat. 12 Anggapo komon so manleglemew ed inkaugaw mo. Imbes, magmaliw kan ehemplo ed saray matoor diad panagsalitam, diad ugalim, diad panangarom, diad pananisiam, diad kalinisan mo. 13 Itultuloy moy manseet ed panagbasa diad publiko, ed panamilin, tan ed panagbangat, anggad isabik ditan. 14 Agmo papaulyanan so regalon niiter ed sika diad panamegley na sakey a propesiya sanen intapew na ulop na mamatatken iray lima ra ed sika. 15 Nodnonot mo irayan bengatla; iyulom iraya, pian nanengneng na amin a totoo so iyaaligwas mo. 16 Imanom a naynay so sarilim tan say ibabangat mo. Panseetan mo irayan bengatla, ta diad panggawam ed saya et niliktar moy sarilim tan saramay ondedengel ed sika.