Anapen so Tuan Kayamanan

1, 2. Akin et walan walay mairap-bilay ed sayan sistema na mundo?

SAY sistema na ekonomya natan et makapairap tan aliwan patas. Ngalngali agmakalmo na trabaho iray kabataan. Ipapalaran na arum so bilay da pian onalis ed mayaman a bansa. Dakel so mairap-bilay anggan diad saray maaligwas ya bansa. Say mayaman et lalon onyayaman tan say mairap et lalon maniirap. Base ed agano nin impantantiya, say kayamanan na totoon sankayamanan ed mundo, ya 1 porsiento na populasyon, et mipara ed pinan-iiban kayamanan na 99 porsiento na populasyon. Anggaman ag-itan naseguro, amta tayo ya binilyon so talagan maniirap, say arum balet et sobsobray kayamanan da ya agnaupot anggan pigaran henerasyon ni onlabas. Binidbir nen Jesus iyan aliwliwan nagagawa nen imbaga to: “Naynay yon nakakaiba ray mairap-bilay.” (Mar. 14:7) Akin et walay ontan ya pandumaan?

² Amta nen Jesus ya say sistema na ekonomya natan et agmanguman anggad agni sinmabi so Panarian na Dios. Say masaol ya sistema na komersyo, ya irerepresenta na “saray negosyante” ya nabasad Apocalipsis 18:3, kaibay politika tan relihyon, et kabiangan na mundo nen Satanas. Anggaman saray totoo na Dios et agbalot mibibiang ed politika tan palson relihyon, maslak ed sikara et agda sigpot a napaliisan so mibiang ed komersyo na sayan mundo nen Satanas.

3. Anto ran tepet so pantongtongan tayo?

³ Bilang Kristiano, maabig no pannonotan tayo no antoy pangipapasen tayo ed sistema na komersyo natan. Tepetan tayoy sarili tayo: ‘Panon kon nausar iray materyal a kayarian ko pian ipanengneng koy katooran ed Dios? Panon kon nalimitaan so pibibiang ko ed komersyo na mundo? Anto ran eksperiensya so mangipapanengneng ya saray totoo na Dios et talagan manmamatalek ed sikato diad mairap iran kipapasen?’

ILUSTRASYON ED AGMATUNONG YA MANAG-ASIKASO

4, 5. (a) Antoy agawa ed samay manag-asikaso diad ilustrasyon nen Jesus? (b) Antoy imbilin nen Jesus ed saray patumbok to?

⁴ Basaen so Lucas 16:1-9. Say ilustrasyon nen Jesus nipaakar ed agmatunong ya manag-asikaso et pannonoten to tayo. Nen apalsaan ya mandadarak so manag-asikaso, sikatoy kinmiwas a “marundunong” pian “mikaaro” tan akatulong itan ed sikato nen inekal ya manag-asikaso.a Siempre, ag-ipapaseseg nen Jesus ed saray disipulo to ya manggawa ray agmatunong, odino aliwa, pian nabilay ed sayan mundo. Saray manggagawa na ontan et tinawag ton “anak na sayan sistema na mundo,” balet inusar to iyan ilustrasyon pian ibangat so sakey a leksion.

⁵ Amta nen Jesus ya singa samay manag-asikaso ya walad mairap a situasyon, maslak ed saray patumbok to et kaukolan day mananap na pambilay ed sayan aliwan patas a komersyo na mundo. Kanian binilin to ra: “Mikaaro kayo diad panamegley na agmatunong iran kayamanan, pian anggano naupot iratan et awaten da kayo [si Jehova tan Jesus] ed andi-anggaan iran ayaman.” Antoy naaralan tayo ed sayan imbaga nen Jesus?

6. Panon tayon amta ya say sistema na komersyo natan et agkabiangan na gagala na Dios?

⁶ Anggano ag-impaliwawa nen Jesus no akin ya tinawag to ya “agmatunong” iray kayamanan, ipapanengneng na Biblia ya say komersyo et agkabiangan na gagala na Dios. Intarya nen Jehova so amin a pankaukolan nen Adan tan Eva diad Eden. (Gen. 2:15, 16) Nen inmunan siglo, sanen naawat na kongregasyon na saray alanaan so masanton espiritu, “anggapon balot so mangibabaga a kayarian ton bukor so antokaman a walad sikato, noagta innabang dad balang sakey so amin a walad sikara.” (Gawa 4:32) Tinukoy met nen propeta Isaias so panaon sano panliketan la na amin a totoo iray produkto na dalin. (Isa. 25:6-9; 65:21, 22) Balet legan ya agni itan sinmabi, saray patumbok nen Jesus et kaukolan ya magmaliw a “marundunong” ed pananap na pambilay diad pangusar da ed “agmatunong iran kayamanan” na sayan mundo legan dan gagawaen so panlabayan na Dios.

MAGMALIW A MARUNONG ED PANGUSAR NA AGMATUNONG IRAN KAYAMANAN

7. Anton simbawa so naromog ed Lucas 16:10-13?

⁷ Basaen so Lucas 16:10-13. Samay manag-asikaso ed ilustrasyon nen Jesus et akikaaro parad sarili ton pankaabigan. Balet, pinaseseg nen Jesus iray patumbok to ya mikaaro ira ed sikato tan ed si Jehova aliwan parad sarili ra. Diad tinmumbok iran bersikulo kayari na ilustrasyon, say pangusar na “agmatunong iran kayamanan” et inkonekta ed pagmaliw tayon napanmatalkan. Say punto nen Jesus et sarag tayon “ipanengneng a napanmatalkan” itayo diad paraan na pangusar tayod sarayan kayamanan ya wala lad sikatayo. Panon?

8, 9. Mangiter na alimbawa no panon ya ipapanengneng na arum ya agagi a napanmatalkan ira ed panguusar day agmatunong iran kayamanan.

⁸ Say sakey a paraan pian nipanengneng tayon napanmatalkan itayo ed panguusar ed materyal iran bengatla et diad pandonasyon parad sankamundoan ya kimey a panagpulong ya impasakbay nen Jesus ya nagawa. (Mat. 24:14) Walay ugaw a bii diad India ya walay melag ya alkansia to tan pepelagpelagan to na barya, ya agla ingen mangasaliw na gakgalaw. Nen napno lay alkansia to, indonasyon to itan pian nausar ed panagpulong a kimey. Wala met so sakey a brother ed India ya walay taneman toy niyog tan nandonasyon na dakdakel a niyog diad Malayalam remote translation office. Imbaga to ya siansia lan mangasaliw iray niyog, mas makatulong no niyog lay idonasyon to imbes ya kuarta. Talagan sikatoy marunong. Saray agagi met ed Greece et regular ya mandodonasyon na olive oil, keso, tan arum nin naakan parad pamilyan Bethel.

⁹ Sakey a brother a nanlapud Sri Lanka, a manaayam lad arum a bansa, et papausar to ray kayarian to parad aral tan asemblea tan tuloyan na saray walad full-time. Sakripisyo itan parad samay brother, balet baleg a tulong ed saray mairap ya agagi. Diad bansa ya pepegetan so kimey tayo, wala ray agagin papausar day abung da bilang Kingdom Hall, kanian walay pasen a pantitiponan na dakel a payunir tan arum ni ya daiset so pundo ra pian agla ra masyadon manggastos.

10. Anto ray bendisyon ya nanaawat tayo no maiter tayo?

¹⁰ Ipapanengneng na saratan ya alimbawa ya saray lingkor na Dios et “napanmatalkan ed daiset,” diad panguusar da ed materyal iran kayamanan ya agtanto importante kompara ed espiritual iran kayamanan. (Luc. 16:10) Antoy nalilikna na sarayan kakaaro nen Jehova ed pansasakripisyo da? Amta ra ya no maiter ira, naromog day “tuan” kayamanan. (Luc. 16:11) Sakey a sister ya regular a mandodonasyon parad kimey ed Panarian so angibaga na bendisyon ya nanaawat to: “Nen nagmaliw ak ya maiter, aliknak ya walay nikaduman agawad siak diad inlabas na saray taon. Anengneng ko ya no diman ak mas maiter ed materyal, diman ak mas mabunlok nipaakar ed panagtratok ed arum. Nagmaliw ak ya mas mabunlok ed panamerdona, panag-anos ed arum, tan mas mainomay ko lay mangawat na simbawa tan pakadismayaan.” Naamtaan na dakel a say pagmaliw a maiter et makapayaman ed espiritual.​—Sal. 112:5; Pro. 22:9.

11. (a) Akin ya nipanengneng tayon “marundunong” itayo no maiter tayo? (b) Panon ya nagagawa so pampapara na pundo diad saray lingkor na Dios? (Nengnengen so litratod gapo na artikulo.)

¹¹ Walay sakey nin paraan pian nipanengneng ya “marundunong” itayo diad panguusar tayo na saray materyal a kayarian tayo pian nasuportaan so kimey parad Panarian. Sarag tayon tulongan so arum no wala tayod kipapasen. Saramay dakel so kayarian da balet ag-ira makapanlingkor ya full-time odino makaonla ed bansa ya baleg so pankaukolan et naliliketan lapud amta ran nasusuportaan so ministeryo na arum panamegley na donasyon da. (Pro. 19:17) Panamegley na saray boluntaryon donasyon, nasusuplayan na literatura tan nasusuportaan so panagpulong a kimey ed saray teritoryan dakel so mairap-bilay balet maaligwas ed espiritual. Diad sarayan bansa, a singa diad Congo, Madagascar, tan Rwanda, pigaran taon ya saray agagi et kaukolan day manpili no dinan so saliwen da, no kasin naakan na pamilya ra odino Biblia, ya no maminsan say bili to et miparad sakey simba o sakey bulan a sueldo. Balet panamegley na donasyon na dakel tan pampapara na pundo, ya ‘saray sulok na arum et mamapano ed kulang na arum,’ nagagawaan na organisasyon nen Jehova so panagpatalos na Biblia tan naiikdan na libren kopya so kada membro na pamilya ontan met iray iyaaralan na Biblia a nanaerasan ed espiritual. (Basaen so 2 Corinto 8:13-15.) Kanian saramay mangiiter tan mangaawat et magmamaliw a kaaro nen Jehova.

LIMITAAN SO PIBIANG ED KOMERSYO NA MUNDO

12. Panon ya impanengneng nen Abraham a sikatoy manmamatalek ed Dios?

¹² Say sakey nin paraan pian magmaliw itayon kaaro nen Jehova et no limitaan tayo so pibiang ed komersyo na mundo tan anamoten tayoy kipapasen tayo pian anapen so “tuan” kayamanan. Si Abraham, ya mabiskeg so pananisia to, et inunor toy ganggan ya taynanan so maaligwas a syudad ya Ur pian manayam ed tolda lapud labay toy magmaliw a kaaro nen Jehova. (Heb. 11:8-10) Sikatoy lanang ya manmamatalek ed Dios bilang Lapuan na tuan kayamanan tan agto inyuna so materyal iran bengatla, a saya et mangipatnag na kakulangan na panagmatalek. (Gen. 14:22, 23) Impaseseg nen Jesus iyan klase na pananisia nen imbaga tod sakey ya mayaman a laki: “No labay mon anggapoy kulang ed sika, la ka tan ilakom iray kaykayarian mo tan iter mod saray mairap-bilay, tan nawalaan kay kayamanan ed tawen; tan gala, magmaliw kan patumbok ko.” (Mat. 19:21) Anggapo ed satan ya laki so pananisian singa ed si Abraham, balet wala ray arum ya impanengneng dan manmamatalek irad Dios.

13. (a) Antoy imbilin nen Pablo ed si Timoteo? (b) Panon tayon niyaplika natan so bilin nen Pablo?

¹³ Si Timoteo et mabiskeg so pananisia to. Kayarin tinawag nen Pablo si Timoteo ya “maong a sundalo nen Kristo Jesus,” imbaga to: “Anggapoy sundalo a legan a walad serbisyo et mibibiang ed pananap na pambilay, pian nagamoran toy panangabobon na samay angilistad sikato bilang sundalo.” (2 Tim. 2:3, 4) Saray patumbok nen Jesus natan, kaiba lay masulok a sakey milyon ya walad full-time, et uunoren da iyan bilin nen Pablo anggad iyabuloy na kipapasen da. Ag-ira manpapatukso ed saray advertisement tan ed mundo, ya sankanonot da iyan prinsipyo: “Say akautang et aripen na samay amautang.” (Pro. 22:7) Labalabay nen Satanas ya upoten tayoy panaon tan biskeg tayo pian magmaliw tayon aripen na komersyo na mundo to. Ompan lapud saray arum ya desisyon tayo et pigay taon tayon nalubog ed utang. Nayarin manproblema tayo ed pinansyal lapud baleg ya pepelagan parad abung, edukasyon, mablin luluganan, odino baleg ya gastos ed engranden kasal. Ipapanengneng tayon marundunong tayo no papasimplien tayoy bilay tayo tan iiwasan tayoy onutang tan manggastos na baleg pian mansiansia tayon aripen na Dios imbes ya naaripen na sayan sistema na komersyo.​—1 Tim. 6:10.

14. Antoy nepeg ya determinasyon tayo? Mangiter na alimbawa.

¹⁴ Pian napansiansian simpli so bilay tayo, kaukolan tayon iyuna iray mas importante. Walay sanasawa ya baleg so negosyo da. Balet lapud labay day makapawil ed full-time ya panaglingkor, inlako day negosyo da, pati say baloto da tan arum nin gamit da. Insan ira namboluntaryo ed konstruksion na world headquarters ed Warwick, New York. Say balibalin bendisyon ya naawat na sayan sanasawa et akapanlingkor ira ed Bethel kaibay anak dan bii tan manugang da, tan pigay simba da met ya akaiba iray ateng na asawan laki ya namboluntaryo met ed Warwick. Wala met so payunir ya sister diad Colorado, U.S.A., ya akalmo na part-time ya trabaho ed banko. Agustoan na saray staff so trabaho to kanian naopresian ya mantrabaho na full-time ya triple so sueldo. Balet agto inawat itan lapud labay toy mansiansian akapokus ed ministeryo to. Pigara labat iyan alimbawa na dakel ya impansakripisyo na saray lingkor nen Jehova. Say ontan ya determinasyon tayon iyuna so Panarian et mangipapanengneng ya say pikakaaro ed Dios tan saray espiritual a kayamanan et talagan mas papablien tayo nen say antokaman ya niiter na komersyo na mundo.

SANO NAUPOT LA IRAY MATERYAL A KAYAMANAN

15. Anton kayamanan so makapangiter na tuan liket?

¹⁵ Agto labay ya ibagan no mayaman tayo ed materyal et bebendisyonan itayo la na Dios. Balet bebendisyonan nen Jehova iray “mayaman ed saray maabig a gawa.” (Basaen so 1 Timoteo 6:17-19.) Alimbawa, nen naamtaan nen Luciab ya walay baleg a pankaukolan ed Albania, sikatoy inmalis diman manlapud Italy nen 1993. Anggapoy pansuporta tod sarili to balet sigpot a nanmatalek ed si Jehova. Inaral ton maong so lenguahen Albanian tan masulok ya 60 so atulongan to ya manpabautismo. Maslak ed saray totoo na Dios et nayarin aliwan ontan kaaligwas so teritorya da. Balet antokaman so gagawaen tayo pian tulongan so arum ya naromog day dalan ya mamaarap ed bilay tan mansiansia ra ditan et seguradon mabmabli ed sikatayo tan ed sikara ya anggad angga.​—Mat. 6:20.

16. (a) Antoy magano lan nagawa ed komersyo na sayan mundo? (b) Lapud amta tayoy nagawa ed arapen, antoy nepeg ya pangipasen tayo ed materyal a kayamanan?

¹⁶ Say imbaga nen Jesus et “anggano naupot iratan [saray agmatunong a kayamanan],” aliwan “no naupot iratan.” (Luc. 16:9) Diad sayan kaunoran iran agew et wala ray naba-bankrupt ya banko tan ombabagsak so ekonomya, balet baliwala iratan no ikompara ed magano lan nagawa ya apektaen toy interon mundo. Seguradon ombagsak so interon sistema nen Satanas​—say politika, relihyon, tan komersyo. Impasakbay nen propeta Ezequiel tan Sofonias ya magmaliw ya anggapoy kana iray balitok tan pilak, saray abayag lan ipapasen ya makana ed komersyo na mundo. (Eze. 7:19; Sof. 1:18) Anto kasi nalikna tayo no bilang ta magano lan manampot so bilay tayo tan naisip tayo ya insakripisyo tayo iray tuan kayamanan parad dakel ya “agmatunong iran kayamanan” ed sayan mundo? Nayarin nalikna tayo a singa tayo sakey a toon nantrabaho ed interon bilay to pian mantipon na dakel a kuarta, anta manaya et peke iratan. (Pro. 18:11) On, saray materyal a kayamanan et seguradon naupot, kanian agyo papalampasen so pankanawnawan usaren iratan pian “mikaaro” ed si Jehova tan si Jesus. Antokaman so gagawaen tayo parad Panarian nen Jehova et payamanen to tayo ed espiritual.

17, 18. Antoy ipaparaan na Dios parad saray kakaaro to?

¹⁷ No onsabi lay Panarian na Dios, agtayo la kaukolan so man-renta odino onutang, libre tan dakdakel lay naakan, tan anggapo lay panggastosan tayon sakit tan tambal. Na-enjoy lan maong na kakaaro nen Jehova so amin ya produkto na dalin. Magmaliw labat lan parakep iray balitok, pilak, tan mablin bato, aliwan parad pampayaman. Saray maabig a klase na kiew, bato, tan metal et libre lan nausar ed pampaalagey na balibali iran abung. Tulongan itayo na kakaaro tayo lapud labay da, aliwan lapud kuarta. Magmaliw lan kabiangan na bilay tayo so paniiteran na saray produkto na dalin.

¹⁸ Pigara labat iya ed saray mabmablin tawir ya naawat na saramay mikakaaro ed si Jehova tan si Jesus. Agnaparaan ya liket so nalikna na saray mandadayew ed si Jehova diad dalin sano narengel da iyan ibaga nen Jesus: “Gali dia, sikayo ran benendisyonan nen Amak, tawir yoy Panarian ya imparaan ed sikayo manlapu lad inkiletneg na mundo.”​—Mat. 25:34.