LEKSION 6

Malinew ya Nipaliwawa no Akin ya Inusar so Teksto

Juan 10:33-36

SUMARYO: Aglabat basta babasaen so teksto insan onla lad onsublay ya punto. Seguroen ya natatalosan na saray ondedengel so koneksion na tekston binasam ed punton labay mon papawayen.

NO ANTOY GAWAEN:

Ipaimano iray importantin salita. Kayarin basaen so sakey a teksto, ipaimano iray salita ed teksto ya direktan onkonekta ed manunan punto. Nagawaan mo iya no uliten mo iratan ya salita odino mantepet ka pian anapen na saray ondedengel iratan ya importantin salita.

No mangusar kay duman salita pian ipaimano so ideya ya walad teksto, seguroen ya nanengneng nin siansia na saray ondedengel no panon ya onkonekta iray salitan inusar ed Biblia ed manunan punton papapawayen mo.
Idanet so punto. No antis mon basaen so teksto et imbagam so rason no akin ya basaen mo itan, ipaliwawam met no panon ya onkonekta itan a rason ed saray importantin salita ed binasan teksto.

Legan mon ipapaliwawa so teksto, pansiansiam ya akalukas so Bibliam. Makatulong itan pian ikonekta na saray ondedengel so ibabagam ed samay binasam.
Gawam ya simpli so pangipaliwawam ed teksto. Agla kokomentoan iray detalye ya anggapoy koneksion to ed manunan punto. Depende ed amta la na saray ondedengel nipaakar ed topic, mandesisyon ka no panon karakel ya impormasyon so kaukolan pian napalinew tan natalosan so pangipaliwawam ed teksto.