“Saksakey so Lenguahe na Amin a Totoo ed Dalin”

11:1-4, 6-9

Diad Babel, winetwet nen Jehova so lenguahe na saray agmatulok a totoo pian nitaytayak ira. Natan et titiponen to so baleg ya ulop manlapud amin ya bansa tan lenguahe, tan iikdan to ra na sakey a “puron lenguahe” pian “ontawag iran amin ed ngaran nen Jehova, tan mankakasakey iran manlingkor ed sikato.” (Sof 3:9; Apo 7:9) Sayan “puron lenguahe” et say katuaan nipaakar ed si Jehova tan ed saray gagala to ya naromog ed Kasulatan.

Say panaral na balon lenguahe et aliwa labat ya basta pangipatlep na balo iran salita. Kaukolan so panaral na balon paraan na panagnonot. Mipadpara, legan tayon aaralen so puron lenguahe na katuaan, say panagnonot tayo et napapasimbalo. (Rom 12:2) Tuloytuloy iyan proseso ya manreresulta ed pankakasakey na totoo na Dios.​—1Co 1:10.