Antoy Gagala na Dios Parad Totoo?

1. Antoy gagala na Dios parad totoo?

BALIBALI so gagala na Dios parad totoo. Pinalsa toy inmunan laki tan bii, si Adan tan Eva, pian manayam ed marakdakep ya hardin. Gagala na Dios ya nawalaan ira na ananak, gawaen dan paraiso so interon dalin, tan asikasoen da iray ayayep.​—Genesis 1:28; 2:8, 9, 15; nengnengen so Kaaruman ya Impormasyon 6.

2. (a) Akin ya amta tayon gawaen na Dios so inggagala to? (b) Antoy ibabaga na Biblia nipaakar ed pambilay na andi-anggaan?

² Kasin manisia ka ya talagan manayam tayod paraiso? Imbaga nen Jehova: “Inggagalak iya, tan sumpalen ko met.” (Isaias 46:9-11; 55:11) On, gawaen to no antoy inggagala to, tan anggapoy makaamper ed sikato. Imbaga nen Jehova ya walay rason na impamalsa tod dalin. Say dalin et “agto pinalsa ya andiay gagala.” (Isaias 45:18) Labay ton panayaman na totoo so interon dalin. Anton klase na totoo so labay na Dios ya manayam dia, tan panon kabayag? Ibabaga na Biblia: “Saray matunong [odino, maunor] et tawiren day dalin, tan manbilay ira ditan diad andi-anggaan.”​—Salmo 37:29; Apocalipsis 21:3, 4.

3. Antoy nayarin nitepet mo lapud mansasakit tan ompapatey iray totoo?

³ Natan et mansasakit tan ompapatey iray totoo. Diad dakel ya lugar, manlalaban tan manpapateyan ira. Balet aliwan ontan so gagala na Dios. Antoy agawa, tan akin? Say Biblia labat so makaebat.

SAY KABUSOL NA DIOS

4, 5. (a) Siopay akitongtong ed Eva panamegley na uleg diad hardin na Eden? (b) Panon ya magmaliw ya matakew so sakey a too ya datin matua?

⁴ Ibabaga na Biblia ya walay kabusol na Dios ya “tatawagen a Diablo tan Satanas.” Inusar nen Satanas so sakey ya uleg ya mitongtong ed si Eva diad hardin na Eden. (Apocalipsis 12:9; Genesis 3:1) Kunwari et samay uleg so mansasalita.​—Nengnengen so Kaaruman ya Impormasyon 7.

⁵ Kasin say Dios so nanggawa ed si Satanas a Diablo? Andi! Nen ginawa na Dios so dalin ya panayaman nen Adan tan Eva, walay anghel ed tawen ya anguman tan nagmaliw ya Diablo. (Job 38:4, 7) Panon ya agawa iman? Isipen pa, panon ya magmaliw ya matakew so sakey a too ya datin matua? Sikatoy ag-inyanak ya matakew. Balet walay pinirawat odino nan-interesan to ya agto gawa. Atan so sankanonot ton lanang, kanian linmoor so pampirawat to. Insan nen walay pankanawnawa to, tinakew to. Ginawa toy sarili to ya matakew.​—Basaen so Santiago 1:13-15; nengnengen so Kaaruman ya Impormasyon 8.

6. Panon ya nagmaliw a kabusol na Dios so sakey ya anghel?

⁶ Ontan so agawa ed saman ya anghel. Kayarin pinalsa nen Jehova si Adan tan Eva, inkuan tod sikara ya mananak ira tan ‘panoen day dalin.’ (Genesis 1:27, 28) Ompan naisip na samay anghel, ‘Sarag to met ya siak so idayew na sarayan totoo imbes ya si Jehova!’ Lapud atan so sankanonot ton lanang, linmoor so pampirawat to ed kanepegan nen Jehova. Labay na samay anghel ya sikato so dayewen na totoo. Kanian tinilaan toy Eva tan pinalikdo to. (Basaen so Genesis 3:1-5.) Lapud satan ya ginawa to, nagmaliw ya Satanas a Diablo, say kabusol na Dios.

7. (a) Akin ya inatey si Adan tan Eva? (b) Akin ya ontatatken tan ompatey itayo?

⁷ Ag-inunor nen Adan tan Eva so ganggan na Dios. Kinan da imay bunga na kiew. (Genesis 2:17; 3:6) Nankasalanan irad si Jehova, tan diad inlabas na panaon et inatey ira. Agawa so imbaga nen Jehova. (Genesis 3:17-19) Makasalanan met iray ananak nen Adan tan Eva, kanian ompapatey ira. (Basaen so Roma 5:12.) Pian natalosan tayo no akin ya makasalanan iray ananak nen Adan tan Eva, imanoen iyan alimbawa. Imadyin mon walay kumpil na sukogan ya uusaren ed panaggaway tinapay. Amin ya tinapay ya gawaen ed satan et wala met so kumpil to. Mipadpara, sanen ag-inunor nen Adan so Dios, nagmaliw ya makasalanan. Lapud ananak itayo nen Adan, makasalanan tayon amin, odino walay “kumpil” tayo ya singa sikato. Tan lapud makasalanan tayon amin, ontatatken tan ompatey itayo.​—Roma 3:23; nengnengen so Kaaruman ya Impormasyon 9.

8, 9. (a) Antoy labay nen Satanas ya panisiaan nen Adan tan Eva? (b) Akin et agtampol ya pinatey nen Jehova iray rebelde?

⁸ Inggapo nen Satanas so panagrebelde ed si Jehova nen inimpluensyaan toy Adan tan Eva ya ag-unoren so Dios. Labay ton manisia si Adan tan Eva ya si Jehova et matila, mauges a manuley, tan agto labay a maliket so bilay da. Papapawayen nen Satanas ya agda la kaukolan so Dios ya mangibaga no antoy gawaen da, tan sarag nen Adan tan Eva so mandesisyon parad sarili da no antoy duga tan aliwa. Anto kasi gawaen nen Jehova? Sarag to komon ya pateyen a tampol iray rebelde pian ontunda lay panrerebelde da. Pero napaneknekan kasi na satan ya matila si Satanas? Andi.

⁹ Kanian agtampol ya pinatey nen Jehova iray rebelde. Imbes, inikdan to ray totoo na panaon ya uleyan da so sarili da. Diad satan et napaneknekan ya matila si Satanas, tan nanengneng ya amta nen Jehova no antoy sankaabigan parad totoo. Dakel ni naaralan tayod satan diad Kapitulo 11. Balet, antoy nibagam ed desisyon nen Adan tan Eva? Duga kasi ya panisiaan day Satanas tan agda unoren so Dios? Si Jehova so angiter ed amin ya walad si Adan tan Eva. Inikdan to ray perpekton bilay, marakdakep ya panayaman, tan makapaliket ya kimey. Balet anggapon balot so maabig ya ginawa nen Satanas parad sikara. No sika so wadman, antoy gawaen mo?

10. Anton importantin desisyon so kaukolan ya gawaen tayon amin?

¹⁰ Amin tayo met natan et kaukolan tayoy mandesisyon, tan say bilay tayo et akadepende ed pilien tayon desisyon. Sarag tayon pilien ya unoren si Jehova bilang manuley tayo tan paneknekan ya matila si Satanas. Odino say pilien tayon manuley tayo et si Satanas. (Salmo 73:28; basaen so Proverbio 27:11.) Dagdaiset ya totoo natan so manguunor ed Dios. Diad tua, aliwan sikato so manuuley ed mundo. Balet no aliwan sikato, siopa ey?

SIOPAY MANUULEY ED MUNDO?

11, 12. (a) Antoy alinewan tayo ed samay opresi nen Satanas ed si Jesus? (b) Anto ran teksto so mangipapanengneng ya si Satanas so manuuley ed mundo?

¹¹ Amta nen Jesus no siopan talagay manuuley ed mundo. Aminsan et “impanengneng [nen Satanas ed] sikato so amin a panarian na mundo tan say karakpan na saratan.” Insan imbaga nen Satanas ed si Jesus: “Amin iraya et iter kod sika no ondakmomo ka tan mandayew kad siak a maminsan.” (Mateo 4:8, 9; Lucas 4:5, 6) Isip mo pa, ‘Iyopresi kasi nen Satanas iratan ya panarian no agto iratan gawa?’ Andi. Malinew sirin ya gawa nen Satanas so amin ya gobierno.

¹² Nayarin itepet mo: ‘Panon a nagmaliw ya manuley na mundo si Satanas? Agta si Jehova ya Makapanyarin-amin a Dios so amalsa ed uniberso?’ (Apocalipsis 4:11) On, balet malinew ya imbaga nen Jesus a say “manuley na sayan mundo” et si Satanas. (Juan 12:31; 14:30; 16:11) Binitla met nen apostol Pablo ya si Satanas a Diablo so “dios na sayan sistema na mundo.” (2 Corinto 4:3, 4) Tan insulat nen apostol Juan ya “say interon mundo et walad pakayari na samay mauges.”​—1 Juan 5:19.

PANON YA NADERAL SO MUNDO NEN SATANAS?

13. Akin ya kaukolan tayoy balon mundo?

¹³ Mapeligro lan maong so mundo natan. Anggan iner et wala ray guerra, kurapsion, panagloko, tan krimen. Agsarag na totoo ya solusyonan irayan problema, anggan ginawa da la so amin ya paraan. Balet magano lan deralen na Dios iyan mauges a mundo diad Armagedon, tan salatan to na matunong ya balon mundo.​—Apocalipsis 16:14-16; nengnengen so Kaaruman ya Impormasyon 10.

14. Siopa so pinili na Dios a magmaliw ya Ari na Panarian To? Antoy impropesiya na Biblia nipaakar ed si Jesus?

¹⁴ Si Jesu-Kristo so pinili nen Jehova ya magmaliw ya Ari na gobierno o Panarian To ed tawen. Nilibon taon lay apalabas, impropesiya na Biblia ya si Jesus et manuley bilang “Prinsipe na Kareenan” tan anggapoy anggaan na gobierno to. (Isaias 9:6, 7) Imbangat nen Jesus iray papatumbok to ya ipikasi iyan gobierno nen imbaga to: “Onsabi la komon so Panarian mo. Nagawa komon so linawam, a singa ed tawen, ontan met diad dalin.” (Mateo 6:10) Diad Kapitulo 8, naaralan tayo no panon ya salatan na Panarian na Dios iray gobierno ed sayan mundo. (Basaen so Daniel 2:44.) Insan la pagmaliwen na Panarian na Dios ya marakdakep a paraiso so interon dalin.​—Nengnengen so Kaaruman ya Impormasyon 11.

ASINGGER LAY BALON MUNDO!

15. Anto so “balon dalin”?

¹⁵ Insipan na Biblia: “Walay balon tawen tan balon dalin ya aalagaren tayo unong ed sipan to, tan diad saraya et manayam so inkatunong.” (2 Pedro 3:13; Isaias 65:17) No maminsan, say tutukoyen na Biblia ya “dalin” et saray totoon manaayam ditan. (Deuteronomio 32:1) Kanian say matunong ya “balon dalin” et ontutukoy ed amin ya totoon manguunor ed Dios tan bebendisyonan to.

16. Anton balibalin regalo so iter na Dios ed saramay manayam ed balon mundo to, tan antoy gawaen tayo pian naawat tayo itan?

¹⁶ Insipan nen Jesus ya saramay manayam ed balon mundo na Dios et nawalaan na “bilay ya andi-anggaan.” (Marcos 10:30) Antoy gawaen tayo pian naawat tayo itan ya regalo? Ipangasin basaen so Juan 3:16 tan 17:3 pian naamtaan moy ebat. Nengnengen tayo natan no antoy ibabaga na Biblia ya kipapasen na bilay no Paraiso lay dalin.

17, 18. Akin et segurado tayon niwala lay kareenan ed interon dalin tan magmaliw lan maligen so bilay tayo?

¹⁷ Anggapo lay kaugsan, guerra, krimen, tan gulo. Anggapoy nakeran anggan sakey ya mauges a too diad dalin. (Salmo 37:10, 11) Panampoten na Dios iray “guerra diad interon dalin.” (Salmo 46:9; Isaias 2:4) Say dalin et napano na totoon mangaaro tan manguunor ed Dios. Magmaliw lan mareen diad andi-anggaan.​—Salmo 72:7.

¹⁸ Maligen la ray totoo nen Jehova. Diad panaon na Biblia, no unoren na saray Israelita so Dios, maligen ira ta protektaan to ra. (Levitico 25:18, 19) Diad Paraiso, anggapo lay antokaman o siopaman ya takotan tayo. Maligen lay bilay tayo!—Basaen so Isaias 32:18; Miqueas 4:4.

19. Akin et segurado tayon dakdakel lay naakan diad balon mundo na Dios?

¹⁹ Dakdakel lay naakan. “Dakdakel so anien ya ilik diad dalin; say toktok na kapalandeyan et napanopano.” (Salmo 72:16) “Bendisyonan itayo na Dios, say Dios tayo,” si Jehova, tan “say dalin et mangiter na bunga to.”​—Salmo 67:6.

20. Akin et segurado tayon magmaliw ya paraiso so interon dalin?

²⁰ Magmaliw lan paraiso so interon dalin. Saray totoo et manggawa na balibalin kaabungan tan hardin. (Basaen so Isaias 65:21-24; Apocalipsis 11:18.) Say interon dalin et magmaliw a marakdakep ya singa samay hardin na Eden nensaman. Tuloytuloy ya itarya nen Jehova so amin ya nakaukolan tayo. Oniay ibabaga na Biblia nipaakar ed sikato: “Ilulukas moy limam tan pepeneken moy pirawat na balang mabilay a bengatla.”​—Salmo 145:16.

21. Akin et segurado tayon mareen lan maniiba iray totoo tan saray ayayep?

²¹ Mareen lan maniiba iray totoo tan saray ayayep. Agla sakitan na ayayep iray totoo. Agla natatakot iray ugugaw ya onasingger ed saray ayayep ya antakot tayo natan.​—Basaen so Isaias 11:6-9; 65:25.

22. Antoy gawaen nen Jesus ed saray mansasakit?

²² Anggapo lay mansakit. Nen wadia ed dalin si Jesus, dakdakel ya totoo so pinaabig to. (Mateo 9:35; Marcos 1:40-42; Juan 5:5-9) Balet no manuley la bilang Ari ed Panarian na Dios, paabigen nen Jesus so amin ya totoo. Anggapo lay mangibagan: “Mansasakit ak.”​—Isaias 33:24; 35:5, 6.

23. Antoy gawaen na Dios ed saray inaatey?

²³ Nabilay la iray inaatey. Insipan na Dios ya paolien to ray binilyon ya totoon inaatey. “Walay kioli na saray matunong tan saray agmatunong.”​—Basaen so Juan 5:28, 29; Gawa 24:15.

24. Antoy naliliknam nipaakar ed pambilay diad Paraiso?

²⁴ Kaukolan tayon amin so manpili. Sarag tayon pilien ya kabaten si Jehova tan manlingkor ed sikato, odino gawaen tayo no antoy labay tayo. No pilien tayoy manlingkor ed si Jehova, nawalaan tayoy balibalin bilay ed arapen. Nen kinerew na sakey ya laki ed si Jesus ya sikatoy nodnonoten to, oniay insipan nen Jesus ed sikato: “Nakaiba ta ka ed Paraiso.” (Lucas 23:43) Aruman tayo ni amta tayo nipaakar ed Jesu-Kristo tan no panon ton sumpalen iray balibalin insipan na Dios.