No Antoy Gawaen na Dios ed Kaugsan

Malinew ya ibabaga na Biblia ed sikatayo no antoy gawaen nen Jehova tan say Anak to, si Jesu-Kristo, ed kaugsan ya nanlapud si Satanas a Diablo. Ibabaga na Biblia ya ‘nipatnag so Anak na Dios [si Jesus] pian deralen to iray kimey na Diablo.’ (1 Juan 3:8) Say kaplesan a sistema na mundo ya napnoy inkaagum, pambubusolan, tan mauges iran kagagawa et naderal. Tan impormisa nen Jesus ya “nibantak naani” si Satanas a Diablo, “say manuley na sayan mundo.” (Juan 12:31) No anggapo lay impluensya nen Satanas, niletneg lay matunong a balon mundo, tan sayan dalin et magmaliw lan mareen a pasen.​—2 Pedro 3:13.

Panon to balet iramay agda labay ya umanen so kabibilay da tan siansia ni ran manggagaway mauges? Isipen pa iyan malinew a sipan: “Say maptek manayam naani dia ed dalin, tan say ayadyari mansiansia naani ed sikato. Balet say marelmeng napegpeg a manlapu ed dalin, tan saray [agmatoor] nabagot ira ed sikato.” (Uliran 2:21, 22) Anggapo lay impluensya na mauges iran totoo. Diad satan ya mareen a kipapasen, saray matulok ya totoo et kalkalnan nibulos ed atawir ya ag-inkaperpekto.—Roma 6:17, 18; 8:21.

Diad satan a balon mundo, panon ya ekalen na Dios so kaugsan? Agto ekalen ed saray totoo so regalon makapandesisyon parad sarili da tan agto ra pagmaliwen a singa robot. Imbes, ibangat tod saray matulok ya totoo iray ganggan to, tan tulongan to ran ipulisay so mauges iran kanonotan tan kagagawa.

Antoy gawaen na Dios nipaakar ed saray trahedyan ag-iilaloan ya nagawa? Impormisa to ya asingger lan uleyan na gobiernoy Panarian to so dalin. Say tinuro na Dios ya Ari na satan a Panarian et si Jesu-Kristo, tan walay pakayari ton paabigen iray mansasakit. (Mateo 14:14) Walaan met na pakayari si Jesus ya kontrolen iray natural a puersa. (Marcos 4:35-41) Sirin, naandi lay paniirap lapud saray ag-iilaloan a nagawa. (Eclesiastes 9:11) Diad pananguley na Kristo, anggapo lay nagawan mauges ed saray totoo.—Uliran 1:33.

Panon to balet iramay minilyon ya inosentin totoo ya inatey ed makapasinagem iran trahedya? Antis ya paolien nen Jesus so kaaro ton si Lazaro, imbaga to: “Siak so kioli tan say bilay.” (Juan 11:25) On, walay pakayari nen Jesus ya paolien o bilayen lamet iray inaatey!

No labay moy manbilay ed mundon anggapo lay nagawan mauges ed saray maong a totoo, maabig no aralen mo nin maong so nipaakar ed tuan Dios tan say gagala to panamegley na panaral moy Biblia. Maliket iray Tasi nen Jehova ed lugar yo ya ontulong ed sika ya nawalaan na ontan a pikakabat. Papasesegen mi kan mitongtong ed sikara odino mansulat ed saray publisher na sayan magasin.