Saray Reperensya Parad Workbook ed Aral
MAYO 2-8
KAYAMANAN ED SALITA NA DIOS | 1 SAMUEL 27-29
“Say Estratehiya nen David ed Pilalaban”
mwbr22.05—it-1 41
Akis
Nen tatakasan nen David si Saul, amiduan inmamot ed teritoryan sakop nen Arin Akis. Diad samay unonan pankanawnawa, nankunkunwarin ambagel si David ta nansuspetsaan da ya sakey a kalaban. Lapud satan, pinataynan nen Akis ta inisip ton atapis tan agmet makasakit ed arum. (1Sa 21:10-15; Sal 34:Sup; 56:Sup) Diad komaduan imbisita nen David, walay 600 ya lalakin kaiba to tan saray pamilya da, tan inabuloyan ira nen Akis ya manayam ed Ziklag. Legan na sakey taon tan apatiran bulan ya wala rad Ziklag, anisia si Akis ya lulusoben nen David tan saray lalakin kaiba to iray baley na Juda, balet diad tua say lulusoben da et saray Gesurita, Girzita, tan saray Amalekita. (1Sa 27:1-12) Talagan apalikdo nen David si Akis ta ginawa ni ingen ya guardia nen Akis si David nen oorganisaen na saray Filisteo so ilusob ed si Arin Saul. Balet diad sampot, impilit na saray manuley na saray Filisteo ya papawilen ed Ziklag si David tan saray lalakin kaiba to. (1Sa 28:2; 29:1-11) Nen nagmaliw ya ari si David tan aki-guerra rad Gat, ompapaway ya agda pinatey si Akis. Nambilay ni anggad panaon na impanuley nen Solomon.—1Ar 2:39-41.
Sikayo ran Kabataan ya Brother—Antoy Gawaen Yo Pian Pantiwalaan Kayo ed Kongregasyon?
8 Isip mo pay sakey nin subok ya dinalan nen David. Ugaw ni nen nilanaan nen propetan Samuel, balet dakel nin taon so linmabas antis ya talagan nagmaliw ya ari ed Juda. (1 Sam. 16:13; 2 Sam. 2:3, 4) Antoy akatulong ed sikato pian maan-anos ya manalagar? Imbes ya nadismaya, sikatoy nampokus ed no antoy sarag ton gawaen. Singa bilang, legan ya manaamot-amot diad teritorya na saray Filisteo, sinambot to iman ya panaon pian labanan iray kalaban na Israel. Lapud satan, aprotektaan toy ketegan na teritoryay tribu na Juda.—1 Sam. 27:1-12.
mwbr22.05—it-2 245 ¶6
Tila
Talagan kokondenaen na Biblia so panagtila, balet aglabay ya ibaga ya obligado tayo lan ibaga so katuaan ed saray totoon agda kanepegan ya naamtaan itan. Oniay bilin nen Jesus: “Agyo iiter ed saray aso so antokaman a masanto, tan agyo ibubuntok ed saray baboy iray perlas yo, pian agdan balot iratan gatin-gatinan tan sikayoy puliktaran tan bingkasen da.” (Mat 7:6) Kanian wala ray pankanawnawa ya ag-imbaga nen Jesus so amin ya detalye odino agto inebatan iray tepet no manresulta itan ed peligro. (Mat 15:1-6; 21:23-27; Jn 7:3-10) Ontan met sirin so pangipasen tayo ed samay ginawa di Abraham, Isaac, Rahab, tan Eliseo ya agda imbaga iray tuan impormasyon ed saray agmandadayew ed si Jehova.—Ge 12:10-19; kap 20; 26:1-10; Jos 2:1-6; San 2:25; 2Ki 6:11-23.
Saray Espiritual a Kayamanan
Natulongan Kasi na Inaatey Iray Mabilay?
Nonoten pa iya. Ibabaga na Biblia a say inatey a too et “ompawil ed dalin” tan “saray nonot to natawtaw ira.” (Salmo 146:4) Amta nen Saul tan Samuel ya aglabay na Dios so ikerew na tulong ed saray espiritista. Agta si Saul nensaman so angidaulo ed impangekal na saray espiritistikon gawagawa diad dalin a nasasakopan to!—Levitico 19:31.
Sakey ni, no mabilay ni Samuel bilang espiritu, kasin sumlangen toy ganggan na Dios tan manpausar ed espiritista pian makapitongtong ed si Saul? Agmet la labay nen Jehova so mitongtong ed si Saul. No ontan sirin so kipapasen, sarag kasin piliten na espiritista so Makapanyarin-amin a Dios pian mitongtong ed si Saul panamegley na inatey lan Samuel? Andi. Malinlinew a sayan “Samuel” et aliwan samay matoor a propeta na Dios. Sakey iyan marelmeng ya espiritu a mangaalig ed inatey lan Samuel.
MAYO 9-15
KAYAMANAN ED SALITA NA DIOS | 1 SAMUEL 30-31
“Pabiskeg Moy Sarilim Panamegley nen Jehova a Dios Mo”
Takotan si Jehova—Magmaliw a Maliket!
12 Say takot nen David ed si Jehova so aglambengat angamper ed sikaton manggawa na kasalanan. Satan so amabiskeg ed sikato ya onkiwas a determinado tan sikakabat diad silong na mairap iran kipapasen. Diad loob na sakey taon tan apat bulan, nanamot si David tan saray bataan to ed Ziklag diad probinsya na Filisteo, lapud uusilan ira nen Saul. (1 Samuel 27:5-7) Sanen anggapo iray lalaki, pinoolan na saray linmusob ya Amalekitas so syudad tan inawit da so amin a kaasawaan, ananak, tan saray pulok na lalaki. Sanen kasempet da tan anengneng da so agawa, nannangis si David tan saray bataan to. Say ermen so tampol ya asalatan na sanok, tan imbaga na saray bataan nen David a sikato so tupaken da. Anggaman agonigon, si David so agnakalan na ilalo. (Uliran 24:10) Lapud takot to ed Dios, sikato so apakiwas a manilalo ed si Jehova, tan ‘pinakasil to so inkasikato ed si Jehova.’ Diad tulong na Dios, atalo nen David tan saray bataan to iray Amalekitas tan abawi ra so amin a bengatla.—1 Samuel 30:1-20.
Sasalimbengan Itayo nen Jehova Parad Kilalaban
14 Dakerakel ya subok ed bilay so dinalan nen David. (1 Sam. 30:3-6) Napatnagan ed saray balikas ton nirekord ed Biblia ya amta nen Jehova so nalilikna to. (Basaen so Salmo 34:18; 56:8.) Amta met nen Jehova so nalilikna tayo. No asugatan o ‘nabtag so puso’ tayo odino ‘asakitay kamarerwa’ tayo, asinggeran to itayo. Aligliway David ed satan kanian inkanta to: “Maliket ak tan manggayaga ak ed panangasim, ta sika inimanom so gonigon ko; sika akabatan mo so kamarerwak a wala ed saray kasumpaan to.” (Sal. 31:7) Balet aglabat iimanoen nen Jehova iray gonigon tayo. Liligliwaen tan papasesegen to itayo pian ombiskeg so liknaan tayo. Say sakey ya uusaren to et saray Kristianon pantitipon.
Saray Espiritual a Kayamanan
Saray Pabitar ed Libro na Unonan Samuel
30:23, 24. Ipapanengneng na sayan desisyon, base ed Numeros 31:27, a papablien nen Jehova iramay mangipapanengneng na pananuporta ed kongregasyon. Antokaman sirin so gagawaen tayo “gawaen [tayon] mabulos, a singa nipaakar ed Katawan, et aliwan dia ed saray totoo.”—Colosas 3:23.
MAYO 16-22
KAYAMANAN ED SALITA NA DIOS | 2 SAMUEL 1-3
“Antoy Naaralan Tayo ed Maermen a Kansion ya ‘Say Pana’?”
Igalang Yo ray Naikdan na Pakauley ed Sikayo
9 Kasin agonigon si David sanen sikatoy namamaltrato? “Saray manangimedmer aanapen da so kamarerwak,” so inkelyaw nen David ed si Jehova. (Salmo 54:3) Oniay impapuso ton imbesngaw ed si Jehova: “Iliktar mo ak ed saray kakabusol ko, O Dios ko . . . Saray mabibiskeg atiptipon ira ya onsumpa ed siak: Aliwa a dia ed kasusumpak, nisay dia ed kasalanan ko, O Jehova. Sikara ombatik ira tan manparaan ira ya onsumpa ed siak ya anta anggapo so ginawak a mauges ed sikara: Liing ka a manulong ed siak, tan mangimaton.” (Salmo 59:1-4) Alikna yo la kasi so ontan—ya anggapo met so ginawa yon makapuy ed sakey a toon walad pakauley, balet ta papairapen to kayo? Si David et angipanengneng na respeto ed si Saul. Nen inatey si Saul, imbes a manliket, nanggawa si David na sakey a punebre: “Si Saul tan si Jonatan sikara nensaman so mapangaro tan makapaliket ed saray bilay da . . . sikara so masisiglat nen saray agila, sikara so mabibiskeg nen saray leon. Sikayo bibii ya anak na Israel, nangisan yo si Saul.” (2 Samuel 1:23, 24) Agaylan abig ya ehemplo na puron panagrespeto ed nilanaan nen Jehova, anggano si David et lalamesen nen Saul!
Ag-inkamatoor—Mapeligron Tanda na Kaunoran Iran Agew!
8 Nabasa met ed Biblia so alimbawa na saray nanmatoor. Konsideraen tayoy duara ed saraya tan nengnengen no antoy naaralan tayod sikara. Say unona et si Jonatan, say lakin nanmatoor ed si David. Sikatoy panguloan ya anak nen Arin Saul, tan nayarin onsublay ya ari na Israel. Balet, say pinili nen Jehova et si David. Nirespeto nen Jonatan so desisyon na Dios tan agnan-imon ed si David. Imbes, “say kamarerwa nen Jonatan et nisiglaot ed kamarerwa nen David,” tan insipan ton sikatoy manmatoor ed kaaro to. Inter to ni ingen so kawes, kampilan, pana, tan balkes tod si David bilang paneknek na katooran to. (1 Sam. 18:1-4) Ginawa toy anggaay nayarian to pian ‘pabiskegen so lima nen David,’ tan inrisga to ni ingey bilay to pian protektaan iyan kaaro to manlapud si Saul ya ama to. Oniay insipan nen Jonatan ed si David: “Sika so manari ed Israel, tan siak so saginonor ed sika.” (1 Sam. 20:30-34; 23:16, 17) Agla sirin pankelawan ya nen inatey si Jonatan, imbalikas nen David so ermen tan panangaro to diad sakey a kansion.—2 Sam. 1:17, 26.
Saray Espiritual a Kayamanan
mwbr22.05—it-1 369 ¶2
Agi
Say salitan “agi” et onaplika met ed totoon walaan na pankakasakey tan pareho so gagala da. Singa bilang, tinawag nen Arin Hiram na Tiro ya agi si Arin Solomon, aliwa labat ya lapud pareho ira na rangko tan posisyon noagta nayarin lapud pareho dan labay so mangiter na suplay na tabla tan arum nin bengatla parad templo. (1Ar 9:13; 5:1-12) “Nengneng yo! Agaylay abig tan makapaliket a saray sanaagi et saniiban manaayam a walay pankakasakey!” so insulat nen David. Ipapanengneng na satan ya aliwa labat ya saramay sanaagi ed laman so nayarin nawalaan na kareenan tan pankakasakey. (Sal 133:1) Diad tua, apakiwas si David ya tawagen ya agi si Jonatan lapud inar-aro tan papablien day sakey tan sakey, aliwan lapud parehoy ateng da. (2Sa 1:26) Saramay saniiba ya pareho so kualidad tan panagnonot da, anggano mauges ni ingen iratan, et nayarin tawagen ya sanaagi.—Pro 18:9.
MAYO 23-29
KAYAMANAN ED SALITA NA DIOS | 2 SAMUEL 4-6
“Itultuloy Mon Ipanengneng ya Antakot Mon Napaermen si Jehova”
Saray Pabitar ed Libro na Komaduan Samuel
6:1-7. Anggaman maabig iray getma nen David, say impangiyalis to ed Kaban ya inlugan ed karwahe et sumlang ed ganggan na Dios tan nanresulta ed impakasaew. (Exodo 25:13, 14; Numeros 4:15, 19; 7:7-9) Ipapanengneng met na impamemben nen Uza ed Kaban a saray maabig a getma so agmakapanguman ed saray kakaukolanen na Dios.
Lawas Gagawaen nen Jehova so Maptek
20 Tandaan ya amta nen Uza so Ganggan nipaakar ed satan. Say Kaban so irerepresenta na kiwawala nen Jehova. Indatak na Ganggan ya agnepeg itan a diwiten na ag-autorisadon indibidual, a maranet a mamapasakbay a nadusa na patey iray onsumlang ed satan. (Numeros 4:18-20; 7:89) Kanian, say pangiyalis ed sagradon kaban et sakey a kimey ya agnepeg a leglemewen. Si Uza et mapatnag a sakey a Levita (aliwa balet a saserdote), kanian sikato so mikabisado ed Ganggan. Nilikud ni ed satan, pigaran taon ed asasakbay et niyalis so Kaban ed abung nen ama to pian niyatol. (1 Samuel 6:20–7:1) Nansiansia itan diman ed loob na manga 70 a taon, anggad sanen denesidi nen David ya iyalis la itan. Kanian manlapud inkaugaw to, si Uza so nayarin mikabat ed saray ganggan nipaakar ed Kaban.
Lawas Gagawaen nen Jehova so Maptek
21 Unong ed asalambit la ed akadkauna, nayarian nen Jehova a basaen so kapusoan. Lapud tinukoy na Salita to so ginawa nen Uza bilang sakey a “lingo” odino agmarespeton kiwas, nayarin anengneng nen Jehova so sinisiblet a motibo ya ag-espesipikon niparungtal ed salaysay. Kasin si Uza et mapalakbat a too, a walaan na tendensian manggawa na agto la kanepegan? (Uliran 11:2) Kasin say mapublikon impangidaulo to ya awiten so Kaban, a pribadon binantayan na pamilya to, so sengegan na impakalikna to na inkamapaatagey? (Uliran 8:13) Kasin anggapoy pananisia nen Uza, ya inisip to ya agnaprotektaan nen Jehova so sagradon kaban a mangisisimbolo na kiwawala To? Antokaman so kipapasen, makapanseguro itayo a maptek so ginawa nen Jehova. Maseguron walay bengatlan anengneng To ed puso nen Uza ya amakiwas ed Sikaton mangukom a tampol.—Uliran 21:2.
Saray Espiritual a Kayamanan
Lawas Ibuntok so Awit Mo ed si Jehova
Bilang ari napilanor ed saya si David. Ipapanengneng na reaksion to ya anggan samay walaan na maong a siglaotan ed si Jehova so nayarin onkiwas ya agmakanepegan ed mairap iran situasyon a tunggal paminsan. Unona et sinmanok si David. Insan natatakot. (2 Samuel 6:8, 9) Say nailaloan a siglaotan to ed si Jehova so nisilong ed pirmin inkasubok. Wadia so sakey a pankanawnawan singano sinmaew ya angipasakbat na awit to ed si Jehova, sanen agto tinumbok iray ganggan to. Nayari kasin niiyan tayo ed ontan a kipapasen no maminsan? Tetetelen tayo ta si Jehova ed saray probleman resulta na agtayo itutumbok ed saray bilin to?—Uliran 19:3.
Magmaliw ya Epektibo ed Ministeryo
“Mantultuloy a Manbantay” Lapud Sinmabi la so Oras na Panangukom!
‘Sinmabi la so Oras na Panangukom’!
14 Diad pantutultuloy tayon manbabantay, anto so nailaloan tayo? Indatak na libro na Apocalipsis so mantutumbokan a kasumpalan na gagala na Dios. Importante so ikiwas unong ed ibabaga na satan ta pian napaneknekan tayo ya akaparaan itayo. Malinew a dedeskribien na propesiya iray ebenton nagawa ed “agew na Katawan,” a ginmapo sanen nitrono si Kristo ed tawen nen 1914. (Apocalipsis 1:10) Ipapaimano ed sikatayo na Apocalipsis so anghel ya angimatalekan ed ‘andi-anggaan a maabig a balita ya ipulong to.’ Oniay maksil ya inyabawag to: “Takotan yo so Dios, tan iter yo ed sikato so gloria: ta say oras na pangukom to sinmabi la.” (Apocalipsis 14:6, 7) Satan ya “oras” na panangukom et antikey a panat na panaon; lalanoren na satan so panangiyabawag tan panangipaakseb ed saray panangukom ya adeskribe ed satan a propesiya. Manbibilay itayo la natan ed satan a panaon.
15 Natan, sakbay a manampot so oras na panangukom, sikatayo so napapaseseg a: ‘Takotan so Dios, tan iter ed sikato so gloria.’ Anto so lalanoren na satan? Say manepeg a takot ed Dios so kaukolan a mamakiwas ed sikatayon ompaliis ed kaugsan. (Uliran 8:13) No igagalang tayo so Dios, sikato so dengelen tayo tekep na aralem a respeto. Ag-itayo magmaliw ya okupado ed arum ya aktibidades, a napaulyanan tayo lay regular a panagbasa ed Salita to, say Biblia. Agtayo leglemewen so simbawa to ya onatendi ed saray pantitipon na Kristiano. (Hebreos 10:24, 25) Pablien tayo so pribilehyon mangiyabawag ed maong a balita na Mesianikon Panarian na Dios tan maseseg tayon gawaen itan. Manmatalek itayo ed si Jehova ed amin a panaon tan diad interon puso tayo. (Salmo 62:8) Lapud bibidbiren tayon si Jehova so Soberano ed Uniberso, sikato so igagalang tayo diad mabulos a pampapasakop tayo ed pananguley to diad bilay tayo. Talaga kasin tatakotan yo so Dios tan iiter yo ed sikato so gloria ed amin a paraan?
MAYO 30–HUNYO 5
KAYAMANAN ED SALITA NA DIOS | 2 SAMUEL 7-8
“Akisipanan si Jehova ed si David”
“Say Nanarian Mo Mansiansia Lawas”
Inapresya nen Jehova so impapuson pilalek nen David. Lapud anengneng to so debosyon nen David tan kaukolan a nasumpal so propesiya, akisipanan so Dios ed si David a diad kapolian to so panlapuan na samay manari ed andi-anggaan. Impasabi nen Natan ed si David so importantin sipan na Dios: “Say abung mo tan say nanarian mo mansiansia lawas ed arap mo. Say yurongan mo [odino tronom] niletneg lawas.” (Bersikulo 16) Siopa so permanentin Mananawir ed sayan sipanan—samay Sakey a manari ed andi-anggaan?—Salmo 89:20, 29, 34-36.
“Say Nanarian Mo Mansiansia Lawas”
Si Jesus a taga Nazaret et nanlapud kapolian nen David. Oniay inkuan na sakey ya anghel sanen impakabat toy kianak nen Jesus: “Iter nen Jehova a Dios ed sikato so trono nen David ya ama to, tan sikato so manuley ya andi-anggaan bilang ari ed abung nen Jacob, tan anggapo so anggaan na panarian to.” (Lucas 1:32, 33) Kanian say sipan ed si David et asumpal ed si Jesu-Kristo. Sikatoy manari, aliwan lapud sikatoy pinili na totoo, noagta lapud samay sipan na Dios ya angiter ed sikato na kanepegan a manuley diad andi-anggaan. Tandaan tayo sirin a talagan nasumpal so amin a sipan na Dios.—Isaias 55:10, 11.
Paeleten so Pananisiam ed Panarian na Dios
14 Nengnengen tayoy insipan nen Jehova ed si Arin David panamegley na Davidikon sipanan. (Basaen so 2 Samuel 7:12, 16.) Akisipanan si Jehova ed si David legan na panaari tod Jerusalem—insipan nen Jehova ed sikato ya manlapud poli to so Mesias. (Luc. 1:30-33) Impaamta sirin nen Jehova so mas espisipikon detalye no iner so panlapuan na ilalak tan imbaga to ya sayan ilalak nen David so “akankanepegan” ed trono na Mesianikon Panarian. (Eze. 21:25-27) Panamegley nen Jesus, say uley nen David et ‘niletneg a malet ya anggad angga.’ On, say ilalak nen David et “mansiansia ya anggad angga; say trono to et mansiansia a singa say agew.” (Sal. 89:34-37, NW) Matalek tayo sirin ya say panuley na Mesias et agbalot magmaliw ya mauges, tan say bendisyon na uley to et andi-anggaan!
Saray Espiritual a Kayamanan
mwbr22.05—it-2 206 ¶2
Kaunoran Iran Agew
Propesiya nen Balaam. Nen onloob lad Insipan a Dalin iray Israelita, imbaga nen propeta Balaam ed ari na Moab ya si Balak: “Gala, ta ipasakbay kod sika no antoy gawaen na sarayan totoo [Israel] ed saray totoom diad kasampotan na saray agew. . . . Sakey a bitewen so ompaway manlapud Jacob, tan sakey a setro so ontalindeg manlapud Israel. Tan betagen to so moling na Moab tan say lapislapis na ulo na amin a magulon ananak.” (Nu 24:14-17, paimanod leksab) Diad unonan kasumpalan na sayan propesiya, say “bitewen” et si Arin David, ta tinalo to ray Moabita. (2Sa 8:2) Mapatnag sirin ya diad unonan kasumpalan na sayan propesiya, ginmapo so “kasampotan na saray agew” nen nagmaliw ya ari si David. Ililitrato nen David si Jesus bilang Mesianikon Ari kanian onaplika met so propesiya ed si Jesus diad panaon ya taloen to la iray kalaban to.—Isa 9:7; Sal 2:8, 9.
HUNYO 6-12
KAYAMANAN ED SALITA NA DIOS | 2 SAMUEL 9-10
“Impanengneng nen David so Matoor ya Panangaro”
Seguradon Naromog Mo so Liket
“Mapalar so mangimano na duka,” so insulat nen David. Tan intuloy to: “Ta si Jehova iliktar to ed agew na kaugsan. Si Jehova yapiger to tan pansiansiaen to a mabilay, tan sikato napapalar.” (Salmo 41:1, 2) Say maaron konsiderasyon ya impatnag nen David ed si Mefiboset, say piley ya anak na maapit a kaaro ton si Jonatan, so sakey ya alimbawa na dugan awawey nipaakar ed saray makapuy.—2 Samuel 9:1-13.
Saray Pabitar ed Libro na Komaduan Samuel
9:1, 6, 7. Tinoor nen David so sipan to. Nepeg a panggunaetan tayo met a tooren iray sipan tayo.
Atalonaan Da Iray Sabit ed Laman Da
10 Kayari na pigaran taon si Arin David, lapud pirmin panangaro to ed si Jonatan, so angipatnag na maaron-panangasi ed si Mefiboset. Inter nen David ed sikato so amin a dalin nen Saul tan tinuro to so ayudante nen Saul a si Siba bilang kasamak ed sayan dalin. Inkuan met nen David ed si Mefiboset: “Mangan ka na tinapay ed dulang ko lawas.” (2 Samuel 9:6-10) Andi-duaruwan say maaron-panangasi nen David so makapaligliwa ed si Mefiboset tan amakepa ed ot-ot a makasengeg ed inkapiley to. Agaylan abig a leksion! Sikatayo so nepeg met a mangipatnag na panangasi ed saramay mipupuligesgesan ed sabit ed laman da.
Saray Espiritual a Kayamanan
mwbr22.05—it-1 266
Balbas
Diad dakel ya totoo ed Bukig nensaman, kaiba la ray Israelita, importante so balbas ta pakapatnagan itan na dignidad ed saray lalaki. Insebel na ganggan na Dios so pankiskis ed “buek ed gilig na ulo” odino patilya na saray lalaki, say buek diad baetan na layag tan mata, tan say pankatli ed nguro na balbas da. (Le 19:27; 21:5) Mapatnag ya say rason et lapud ontan so gagawaen na arum ya pagano diad panagdayew da.
HUNYO 13-19
KAYAMANAN ED SALITA NA DIOS | 2 SAMUEL 11-12
“Agka Manpapakontrol ed Makapuy ya Pilalek”
Makablos tan Makaiwas Ka ed Saray Patit nen Satanas!
10 Say sakey met ya apatitan nen Satanas et si Arin David. Dakdakel so bendisyon nen Jehova ed sikato—ginawa ton ari, impanalo to ed saray guerra, tan nagmaliw ya mayamyaman. Imbagan mismo nen David ya “agaylay karakel” na regalo na Dios ed sikato. (Sal. 40:5) Pero wala may inkagawa ya aminpinsan ton alingwanan iratan lapud ag-akontento ed no antoy wala lad sikato. Anta pigara lay asawa to, ginmusto ni ed asawa na arum! Agustoan toy Bat-sheba ya asawa nen Urias ya Heteo. Akirelasyon ed sayan bii tan alukonan to. Anta akagawa la lanti imoral, impapatey to ni Urias! (2 Sam. 11:2-15) Agayla yay David, anto kasi linmad nonot to? Say amta to amo, agnanenengneng nen Jehova so gagawaen to. Anggano abaybayag lan manmamatoor ed si Jehova, apatitan nin siansia. Inani nen David so mauges ya resulta na saray kasalanan to. Pero maong labat ta impatua to iratan tan nagbabawi. Seguradon alemewan so liknaan nen David nen pinerdona nen Jehova.—2 Sam. 12:7-13.
Mabulos ya Manpasakop ed si Jehova—Akin tan Panon?
15 Inter nen Jehova ed si David so autoridad bilang ulo na interon nasyon na Israel, aliwa labat ya ulo na pamilya to. Baleg so autoridad nen David ta sikato so ari. Wala ray pankanawnawa ya aliwa so impangusar tod autoridad to tan akagawa na saray seryoson kasalanan. (2 Sam. 11:14, 15) Balet impanengneng to ya sikatoy nampasakop ed si Jehova nen inawat toy disiplina. Sikatoy nampikasi ed si Jehova tan imbalikas toy amin ya walad puso to. Tan ginawa toy anggaay nayarian ton unoren iray bilin nen Jehova. (Sal. 51:1-4) Ontan met, mapaabeba ton inawat so maong ya simbawa na anggan saray bibii, aliwa labat ya saray simbawa na lalaki. (1 Sam. 19:11, 12; 25:32, 33) Akaaral si David ed saray lingo to tan inyuna tod bilay to so panaglingkor ed si Jehova.
Abuloyan Mon Saray Ganggan na Dios tan Prinsipyo To so Mangipasal ed Konsiensiam
7 Maong labat ta agtayo la kaukolan ya naeksperiensya ni iray makapuy ya epekto na isumlang ed saray ganggan na Dios pian makaaral tayo na importante iran leksion. Makaaral tayo la ed saray lingo na arum, ya nisulat ed Salita na Dios iray makapuy ya ginawa ra. Ibabaga na Proverbio 1:5: “Say toon marunong et ondedengel tan mangaawat na kaaruman a bilin.” On, makaawat tayo na sankaabigan ya bilin manlapud Dios no basaen tan dalepdepen tayo iray tuan agawa ya nisalaysay ed Biblia. Singa bilang, isipen pay ansakisakit ya alikna nen Arin David lapud agto inunor so ganggan nen Jehova tan akikalugoran ed si Bat-sheba. (2 Sam. 12:7-14) Legan tayon babasaen tan dadalepdepen iyan salaysay, nayarin itepet tayod sarili tayo: ‘Panon ya apaliisan la komon nen Arin David so makapaermen ya epekto na impikalugoran to ed si Bat-sheba? No nipaarap ak met ed ontan ya tukso, kasin walay kasil na liknaan kon onarawi? Kasin ombatik ak a singa si Jose, odino manpatukso ak a singa si David?’ (Gen. 39:11-15) No dalepdepen tayo iray makapuy ya epekto na kasalanan, napabiskeg so determinasyon tayon ‘busolen so kaugsan.’
Saray Espiritual a Kayamanan
mwbr22.05—it-1 590 ¶1
David
Balet anengneng nen Jehova so amin ya agawa tan impaamta to itan ya kaugsan. No inabuloyan nen Jehova iray totoon ukom ya walad silong na Mosaikon Ganggan ya mamemben ed kaso nen David tan si Bat-sheba, seguradon pinatey da la ran dua, tan siempre, kaiba lay agni niyanak ya ugaw ya bunga na pilalawanan da. (De 5:18; 22:22) Balet si Jehova a mismo so amemben ed kaso da tan kinasian toy David lapud samay sipanan nipaakar ed Panarian (2Sa 7:11-16), ontan met lapud si David ya mismo et angipanengneng na panangasi (1Sa 24:4-7; ikompara so San 2:13) tan lapud anengneng na Dios ya talagan nagbabawi ira. (Sal 51:1-4) Balet agda apaliisan so amin ya dusa. Panamegley nen propeta Natan et oniay imbaga nen Jehova: “Iyakar kod sika so desyang manlapud dilin sankaabungan mo.”—2Sa 12:1-12.
HUNYO 20-26
KAYAMANAN ED SALITA NA DIOS | 2 SAMUEL 13-14
“Nanresulta ed Trahedya so Inkamakasarili nen Amnon”
mwbr22.05—it-1 32
Absalom
Impamatey ed si Amnon. Magangganay Tamar ya agi nen Absalom kanian agustoan na kuya ton si Amnon, ya agi tod ama. Nankunwarin mansasakit si Amnon tan pinaonla tod kuarto to si Tamar pian manlutoy naakan to, insan to balet puersaan ya inakdolan. Samay panggusto ya alikna nen Amnon ed si Tamar et asalatan na graben pambusol tan ingganggan ton ipaway si Tamar. Pinilat nen Tamar so espisyal ya kawes ton pakabidbiran ya sikatoy sakey ya birhen ya anak na ari, tan angiyan na dapol ed ulo to. Nen anengneng nen Absalom si Tamar, alikas to lay agawa tan nansuspetsaan ton tampol si Amnon, mapatnag ya dati to lan nalilikas ya walay panggusto nen Amnon ed agi to. Binilin nen Absalom ya agla oneesel si Tamar, insan to inawit ed abung to pian diman la manayam.—2Sa 13:1-20.
Paaligwasen so Panangontrol ed Sarili
11 Binitla na Biblia iramay indibidual ya nampadaeg ed tukson manggaway seksual ya imoralidad. Nabasa met ditan iray makapaermen ya resulta lapud agda kinontrol so sarili da. Siopaman ya miparay situasyon to ed si Kim et nepeg ton dalepdepen so agawa ed samay inosentin kabataan ya adeskribe ed Proverbio kapitulo 7. Isipen met so ginawa nen Amnon tan say graben resulta na satan. (2 Sam. 13:1, 2, 10-15, 28-32) Natulongan na atateng iray ananak da ya nawalaan na kontrol ed sarili tan karunongan nipaakar ed pipiinaroan no pantongtongan da iratan ya alimbawa ed Biblia diad panagdayew na pamilya ra.
mwbr22.05—it-1 33 ¶1
Absalom
Linmabas so duay taon, panaon lay panagkiskis na bagoy karnero tan maliket iman ya okasyon. Angiyuksoy si Absalom na ponsia diad Baal-hazor manga 22 kilometro diad bandad amianen-bukig na Jerusalem, inimbitaan to ray ananak na ari tan anggan si David ya mismo. Nen aglabay na ama to so onatendi, pinilit toy ama to ya si Amnon lay ibaki to, say panguloan ya anak nen David. (Pro 10:18) Legan na ponsia, nen “malikeliket lay puso nen Amnon lapud alak,” ingganggan nen Absalom iray lingkor to ya pateyen da. Pinmawil ed Jerusalem iray arum ya ananak na ari, balet si Absalom et tinmakas tan linmad laki ton Siryano diad panarian na Gesur, diad bandad bukig na Dayat na Galilea. (2Sa 13:23-38) Say “espada” ya impasakbay nen propeta Natan et linmoob lad “sankaabungan” nen David tan mansiansia ditan legay bilay to.—2Sa 12:10.
Saray Espiritual a Kayamanan
ypq tepet 2 par. 7
Akin ya Aburido Ak ed Itsurak?
Say Talagan Manpaganggana o Manpaguapo ed Sika!
Mas labalabay ka na totoo no balibali so ugalim. Isip mo pay Absalom ya anak nen Arin David. Oniay ibabaga na Biblia:
“Anggapoy lakin nirayrayew a singa si Absalom lapud inkaguapo to. Manlapud dapan ya anggad toktok na ulo to et anggapoy nabalaw ed sikato.”—2 Samuel 14:25.
Balet sikatoy malastog, ambisyoso, tan traidor! Kanian anggano guapo, mas dakel so nabasa ed Biblia ya makapabaing a ginawa to, singa say impantraidor tod ama to tan impamatey tod kuya to.
Kanian dugaruga irayan bilin na Biblia: “Isulong yoy balon personalidad.”—Colosas 3:10.
“Komon ta say pamarakep yo et aliwan samay nanengneng . . . , noagta say peteg ya inkatoo ed dalem na puso.”—1 Pedro 3:3, 4.
Aliwa met ya mauges so manpaganggana o manpaguapo, balet tandaan mo ya mas importante so ugalim nen say itsuram. Diad ilabas na panaon, mas balibali so pakanengneng ed sika na arum lapud ugalim, aliwan lapud itsuram! “Napansin kan tampol no magana ka,” so kuan nen Phylicia, “pero say mas natandaan na totoo et say inkatoom tan saray balibalin ugalim.”
HUNYO 27–HULYO 3
KAYAMANAN ED SALITA NA DIOS | 2 SAMUEL 15-17
“Nanrebelde si Absalom Lapud Inkamapaatagey To”
mwbr22.05—it-1 860
Ombabatik ed Unaan
Kaiba ed kustombre na saray ari nensaman ya wala ray ombatik diad unaan na karwahe da pian iparaan tan iyanunsio so isabi na ari, tan pian naserbian day ari diad arum nin paraan. (1Sa 8:11) Angiyan si Absalom tan Adonias na 50 ya ombabatik diad unaan na karwahe da pian aligen itan ya dignidad ya parad saray arari, tan pian naaruman so dayew tan nipanengneng ya walay autoridad da ed panrerebelde da.—2Sa 15:1; 1Ar 1:5.
Panlingkoran so Dios na Kawayangan
5 Nabasa tayod Biblia iray alimbawa na totoon walaan na mauges ya impluensyad arum. Sakey ed saraya et si Absalom ya anak nen Arin David. Sikatoy guakguapo. Balet singa si Satanas, binayuboan toy mauges ya pilalek ed puso to. Labay ton samsamen so inkaari nen ama to, anta anggapoy kanepegan to. Kanian sikatoy kunkunwarin angipanengneng na panangiyansakit ed saray Israelita, legan ton papapawayen ya anggapoy pibabali na ari ed sikara. Singa ed ginawa na Diablo diad hardin na Eden, pinapaway nen Absalom ya iyaansakit to ray totoo, ingen ta papaugesen toy ama to.—2 Sam. 15:1-5.
mwbr22.05—it-1 1083-1084
Hebron
Kalabas na pigay taon, pinmawil ed Hebron si Absalom ya anak nen David tan ditan to inggapo so ag-atuloy ya plano ton panamsam ed inkaari na ama to. (2Sa 15:7-10) Nayarin lapud makasaysayan itan ya lugar tan datin capital itan na Juda, tan nayarin lapud ditan so binalegan nen Absalom kanian atan so pinili ton syudad pian igapo so panamsam to ed trono. Asabi panaon, impaalagey lamet na apo nen David ya si Arin Rehoboam so Hebron. (2Aw 11:5-10) Kayarin dineral na saray tagad Babilonia so Juda tan nen pinmawil la ray Judion bihag, nanayam so arum ed sikara diad Hebron (Kiriat-arba).—Ne 11:25.
Saray Espiritual a Kayamanan
Kasin Antam No Antoy Tua?
11 Kada sakey ed sikatayo et nayarin nabiktima met na ag-inkahustisya lapud saray ikakayat ya impormasyon nipaakar ed sikatayo ya aliwan amin et tua odino aliwan kompleto. Imanoen pay agawad si Arin David tan Mefiboset. Si David et maiter tan maong ed si Mefiboset, impawil tod sikato so amin ya dalin nen laki to ya si Saul. (2 Sam. 9:6, 7) Balet agnambayag, akaawat si David na negatibon balita nipaakar ed si Mefiboset. Anggano agni sineguro nen David no kasin tua so impormasyon, nandesisyon lan tampol ya bawien so amin ya kayarian nen Mefiboset. (2 Sam. 16:1-4) Nen akapantongtong iran siansia nen Mefiboset, binidbir nen David so lingo to tan impawil toy kayarian nen Mefiboset. (2 Sam. 19:24-29) Balet apaliisan komon iyan ag-inkahustisya no inamta nin unona nen David no anton talagay tua, imbes ya bastabasta labat ya nandesisyon base ed agkompleton impormasyon ya naawat to.
Magmaliw ya Epektibo ed Ministeryo
Aligen so Katooran nen Etai
‘Taga’d Sananey a Bansa Tan Miaayam Labat’
Nayarin si Etai et taga’d Gat, sakey a kabkabat a syudad na Filisteo a lugar met na alan a si Goliat tan arum ni ran aliwan basta-bastan kalaban na Israel. Say sankaunaan a pankanawnawan nabasay nipaakar ed sayan maabilidad a sundalo a si Etai et sanen nanrebelde si Absalom ed si Arin David. Diad saman a panaon, si Etai tan saray 600 a Filisteon bataan to et miaayam diad sakey a lugar ya asingger ed Jerusalem.
Say situasyon nen Etai tan saray bataan to et nayarin angipanonot ed si David ed samay agawan mismo’d sikato tan ed saray 600 Israelitan sundalo to sanen nanamot-amot ira ed teritoryay Filisteo tan akakar ira’d sakop nen Akis ya ari na Gat. (1 Sam. 27:2, 3) Anto kasi gawaen nen Etai tan saray bataan to diad impanrebelde nen Absalom ed si ama ton David? Siopa kasi pilaan da, si Absalom odino si David? Odino anggapo?
Isipen tayo pa imay eksena. Tinaynan nen David so Jerusalem tan akasabi ed lugar a tatawagen a Bet-merac, a mankabaliksay “Say Arawin Abung.” Nayarin satan la so sankaunoran lan abung ed Jerusalem no paarap ka’d Palandey na Olibo antis a nabeltang so Kulos Kidron. (2 Sam. 15:17) Legan ya ondadalan so armada nen David, ninengneng to no siopara kasi akila’d sikato. Et anengneng ton aliwa labat la manayan saray matoor ya Israelita so akila noagta pati amin a Kireteo tan Peleteo. Tan akila met manaya iray amin a Geteo, salanti, si Etai tan saray 600 a sundalo to.—2 Sam. 15:18.
Lapud natatalosan nen David so situasyon nen Etai, oniay inkuan to’d sikato: “Akin et mimila ka ed sikami? Pawil ka la ta mikasakey ka ed balon ari [mapatnag a say tutukoyen to et si Absalom]. Taga ka sananey a bansa, miaayam ka dia labat, tan arawi ka’d dilin bansam. Aganggano ka nin manaayam dia, kanian akin et panakar-akaren ta kan kaibak? Agko anggan amta no iner so laen ko. Pawil ka la tan itagar mo la ray kabansaan mo. Mapangasi tan matoor komon so Katawan ed sikayo.”—2 Sam. 15:19, 20, MB.
Insan la’d satan imbalikas nen Etai so sigpot a katooran to. Oniay inyebat to’d David: “Kagalang kon Ari, sambaan ko’d sika diad ngaran na mabilay a Katawan, a mila ak lawas ed sika anggan iner so laen mo, patey ma’y pansumpalan tayo.” (2 Sam. 15:21, MB) Diad sayan ebat to et nayarin anonotan nen David imay imbaga nen bai to’d pueg a si Rut. (Rut 1:16, 17) Lapud atenyeg so puso nen David ed imbaga nen Etai, oniay inkuan to: “Onla ka tan ombaliw ka” ed Kulos Kidron. Kanian, “si Etai a Geteo binmaliw, tan saray amin a totoo to, tan saray amin ya angkelag a wala ed sikato.”—2 Sam. 15:22.
“Onkana ed Kibangat Tayo”
“Saray bengatla a nisulsulat nensaman, nisulat ira ya onkana ed kibangat tayo,” so kuan na Roma 15:4. Kanian maabig no itepet tayo, Anto ray naaralan tayo ed alimbawa nen Etai? Nengnengen tayo pa no akin a sikatoy nanmatoor ed si David. Anggaman taga’d sananey a bansa tan miaayam labat, binidbir ton si Jehova so mabilay a Dios tan si David so nilanaan nen Jehova. Agto inimano so busolan na saray Israelita tan Filisteo. Agto ninonot imay impamatey nen David ed samay maong a bumabakal na Filisteo a si Goliat tan ed dakel ni ran kabansaan to. (1 Sam. 18:6, 7) Noagta, say sankanonot nen Etai et inad-aro nen David si Jehova tan seguradon inimano toy marakdakep iran kualidad nen David. Tan ontan met nen David, baleg so respeto to ed si Etai. Impudir to ni ingen ed “lima nen Etai” so kakatlo na armada to sanen pinasya lay impilaban da ed armada nen Absalom!—2 Sam. 18:2.
Ontan tayo met natan, kaukolan tayon pansagpotan ya ag-imanoen so panduruma na kultura, poli, bansan nanlapuan, tan antokaman nin lapuay panangidumaduma tan gula. Say imanoen tayo et saray maong a kalidad na arum. Ipapanengneng na impankaaro di David tan Etai a say pakapikabat tan pangaro ed si Jehova so makatulong pian napaliisan tayoy panaglabi.
Diad pannodnonot tayon maong ed ehemplo nen Etai, oniay nayarin itepet tayo’d inkasikatayo: ‘Ontan met kasi katooran ko ed Mas Matalonggaring a David, si Kristo Jesus? Ipapanengneng ko ta so katooran ko diad maseseg a pibibiang ko’d panangipulong ed Panarian tan panaggaway babangatan?’ (Mat. 24:14; 28:19, 20) ‘Lawas ko kasin papaneknekay katooran ko, antokaman ni nagawa?’
Nagunggonaan met iray ulo na pamilya diad pandalepdep da ed napanuliranan a katooran nen Etai. Say impanmatoor to ed si David tan say desisyon ton ondapag ed nilanaan na Dios ya ari et maabig so epekto to ed saray bataan to. Mipadpara, saray desisyon na ulo na pamilya pian suportaan so tuan panagdayew et apektaen toy pamilya ra. Tan ompan lapud satan et makasagmak ira na temporaryon kairapan. Ingen ta oniay ipapaseguro na Biblia: “Matoor [si Jehova] ed saray matoor ed [sikato].”—Sal. 18:25, MB.
Kayari na impibakal nen Absalom ed si David, aglan balot asalambit ed Kasulatan si Etai. Anggaman antikey labat so salaysay na Biblia nipaakar ed sikato, baleg lay naaralan tayo’d inkatoo to legan na samay maprobleman panaon na bilay nen David. Say impakasalambit na Biblia ed si Etai et paneknek a papablien tan tutumangan nen Jehova so ontan a klase na katooran.—Heb. 6:10.