Saray Reperensya Parad Workbook ed Aral
MAYO 1-7
KAYAMANAN ED SALITA NA DIOS | 2 AWARAN 17-19
“Nengneng Moy Arum ya Singa Pakanengneng nen Jehova ed Sikara”
Kasin Ipapapusom Iray Nisulat ya Pasakbay?
7 Kumusta balet si Jehosafat ya anak nen Asa? Amayamay so balibalin kualidad to. Lapud sikatoy nanmatalek ed Dios, dakel so maabig ya agawaan to. Balet wala met iray makapuy ya desisyon to. Singa bilang, sikatoy akialyado ed mauges ya Arin Ahab diad panamegley na panangasawa. Tan anggano pinasakbayan nen propeta Micaias, inibaan to nin siansiay Ahab ya milaban ed saray taga Sirya. Diad saman ya guerra, dawdawit ya apatey si Jehosafat. Insan pinmawil ed Jerusalem. (2 Awa. 18:1-32) Diman et tinepetan nen propetan Jehu: “Kasin saray mauges so nepeg mon tulongan, tan saramay mamubusol ed si Jehova so nepeg mon aroen?”—Basaen so 2 Awaran 19:1-3.
Dalepdepen so Agmanganggan Panangaro nen Jehova
8 Labay nen Jehova ya ipaamtad sikatayo ya inar-aro to tayo tan aliwan saray kakapuyan tayo so nenengnengen to, noagta saray maong ya nagagawaan tayo. (2 Awa. 16:9) Ontan so ginawa to ed ari na Juda ya si Jehosafat. Aliway desisyon nen Jehosafat nen inibaan to so ari na Israel ya si Ahab ya miguerra ed saray Siryano diad Ramoth-gilead. Imbaga na 400 ya palson propeta ya manalo so mauges ya si Ahab, balet imbaga na tuan propeta nen Jehova ya si Micaias ya seguradon natalo ira. Inatey si Ahab diad guerra, tan ngalngali met inatey si Jehosafat. Kapawil nen Jehosafat ed Jerusalem, imbaki nen Jehova si Jehu ya anak nen Hanani pian sikatoy baaten lapud impialyansa tod si Ahab. Anggaman ontan, oniay imbagad sikato nen Jehu: ‘Wala ray maong a bengatlan anengneng ed sika.’—2 Awa. 18:4, 5, 18-22, 33, 34; 19:1-3.
9 Nen kagapo ni labat na uley nen Jehosafat, ingganggan to ray prinsipe, Levita, tan saray saserdote ya ibangat da so Ganggan nen Jehova ed amin a syudad ed Juda. Maong so resulta na satan a kampanya ta anggan saray totood kaliberliber a bansa et tinmakot ed si Jehova. (2 Awa. 17:3-10) Tua, aliwa may desisyon nen Jehosafat nen akialyansad si Ahab, balet agnilingwanan nen Jehova iray maong ya ginawa to. Ipapanonot na sayan salaysay ed Biblia ya anggano agtayo perpekto, agmanguman so panangaro nen Jehova ed sikatayo no gawaen tayoy anggaay nayarian tayon manlingkor ed sikato diad interon puso.
Saray Espiritual a Kayamanan
Lingkoran si Jehova Diad Interon Puso!
10 Si Jehosafat ya anak nen Asa et “nantultuloy a nanakar ed dalan a nanakaran nen Asa ya ama to.” (2 Awa. 20:31, 32) Panon? Pinaseseg to ray totoo ya anapen day Jehova. Inorganisa toy pambangat ya usarey “libro na Ganggan nen Jehova.” (2 Awa. 17:7-10) Linma ni ingen ed saramay walad amianen ya panarian na Israel tan asabi toy kapalandeyan na Efraim “pian papawilen to ra ed si Jehova.” (2 Awa. 19:4) Si Jehosafat so ari ya “sigpot-puson nananap ed si Jehova.”—2 Awa. 22:9.
11 Sarag tayon amin so mibiang ed interon mundon panagbangat ya pagagawa nen Jehova ed sikatayo natan. Kasin kada bulan et gagawaen moy anggaay nayarian mon ibangat ed arum so Salita na Dios tan tutulongan mo ran nipapusoy panlingkor ed Dios? Diad sagpot mo tan tulong na Dios, nayarin walay nigapom ya iyaralan na Biblia. Kasin ipipikasim itan? Kasin desidido kan mangiyaral na Biblia, anggano kaukolan mon bawasan so oras ya parad sarilim? Tan singa si Jehosafat ya linma ed Efraim pian tulongan iray totoon ompawil ed dugan panagdayew, sarag tayo met ya tulongan iramay nagmaliw ya inaktibo. Niarum ni, bibisitaen tan tutulongan na saray elder iray adispelo ya walad teritorya na kongregasyon a nayarin tinmunda lad makasalanan ya kagagawa ra.
MAGMALIW YA EPEKTIBO ED MINISTERYO
Agtayo Komon Onsasawan Manpulong!
11 Wala ray totoo ya ag-interesado ed ipupulong tayo. Seguro iisipen da ya agda kaukolan so Dios tan agda met kaukolan so Biblia. Say arum et agmanisia ya walay Dios ta dakdakel so problema ed mundo. Say arum balet et anggapoy interes dan manaral na Biblia ta nanenengneng day pankunkunwari na saray lider na relihyon. Wala ra met so subsob ya maong ed trabaho da, akapokus irad pamilya da, odino dakdakel so problema da, tan agda amta ya makatulong manaya so Biblia ed bilay da. Antoy gawaen tayo pian agtayo nadismaya anggano wala ray ontan diad teritorya tayo?
12 Ipanengneng so malasakit ed pupulongan mo. Wala ray totoo ya diad unaan et ag-interesado ed maong a balita, balet dinmengel lanlamang ira nen alikna dan walay malasakit to may manpupulong ed sikara. (Basaen so Filipos 2:4.) Singa bilang, oniay imbaga nen David ya abitla nen niman: “No walay unabung ya ibaga ton ag-interesado, ipawil mi nid bag mi so Biblia odino say publikasyon ya awit mi, insan mi ra tepetan: ‘Nayarin naamtaan no akin ya ontan so nibaga yo?’” Nalikas na katongtong tayo no walay malasakit tayo ed sikara. Ompan agda la nanonotan iramay imbaga tayo, balet seguradon agda nalingwanan imay alikna ra nen katongtong tayo ra. No bilang ta agdan talaga labay ya pantongtongan so Biblia, nipalikna tayo nin siansia ya imamalasakit tayo ra diad ekspresyon na lupa tayo tan no makaaro tayo.
13 Nipanengneng tayon walay malasakit tayo no ibagay tayoy presentasyon tayo ed posiblin pan-interesan na unabung. Singa bilang, kasin walay pakapatnagan ya wala ray ananak to? No wala, ompan sikatoy interesado ed saray bilin na Biblia ed pamabaleg na ananak odino ed saray advice na Biblia no panon ya magmaliw a maliket so pamilya. Kasin piga-pigaray kandado na puertay abung da? Ompan mas ondengel no say topic ya itongtong mo et tungkol ed krimen odino saray makapataktakot ya nagagawa ed mundo, insan kayari to et ibagam no antoy permanentin solusyon ed saraya. Antokaman so situasyon na unabung, no nalikas mon ondengel, ipanengneng mod sikato no panon ya makatulong so Biblia ed bilay to. Oniay imbaga nen Katarína ya abitla nen niman: “Lanang kon iisipen no panon ya inuman na Biblia so bilay ko.” Kanian diad ministeryo, kombinsido si Katarína ed ipupulong to, tan seguradon nalilikas itan na saray katongtong to.
14 Makaaral ed arum. Imbangat nen apostol Pablo ed si Timoteo iray epektibon paraan na panagpulong tan panagbangat. Insan to pinaseseg si Timoteo ya ibangat to met iratan ed saray agagi. (1 Cor. 4:17) Singa si Timoteo, makaaral tayo met ed saray agagin eksperiensyado ed panagpulong. (Basaen so Proverbio 27:17.) Nengnengen tayoy alimbawa na sakey a brother ya si Shawn. Sikatoy abayag a nampayunir ed sakey a baryo ya saray totoo et debotadon maong ed relihyon da. Antoy akatulong pian mansiansian maliket ed ministeryo to? “Anggad posible, labay ko ya walay partner kon manpulong,” so kuan to. “No paonla kami lad onsublay ya abung, pantotongtongan mi no panon min napaaligwas so pitotongtong mi ed saray totoo. Singa bilang, pantongtongan mi no anto ray imbaga to may unabung ya nakar mi tan no anto ray inyebat mi ed sikato. Insan kami manisip na mas marakep ya iyebat no bilang ta wala lamet so onman ya nakatongtong mi.”
15 Manpikasi. Kada no manpulong ka, kerew moy tulong nen Jehova ta kaukolan tayoy masanton espiritu to ed amin ya gagawaen tayo. (Sal. 127:1; Luc. 11:13) Dapat espisipiko so pikakasim. Singa bilang, kerew mo ya igiya to ka ed saramay ondengel tan labay da so manaral na Biblia. Kayarim ya manpikasi, gawam met so betang mo—anggad posible et agmo papalampasen so pankanawnawam ya napulongan so sakey a too.
MAYO 8-14
KAYAMANAN ED SALITA NA DIOS | 2 AWARAN 20-21
“Manmatalek Kayod si Jehova a Dios Yo”
Saniiban Manlingkor Legan a Manasingger so Anggaan
8 Diad panaon nen Arin Jehosafat, walay mabiskeg ya armadan akaparaan lan onlusob ed Juda. (2 Awa. 20:1, 2) Antoy ginawa na saray Israelita nen naamtaan dan nitan la ray kalaban da? Nanmatalek irad si Jehova tan kinerew day panangigiya to. (Basaen so 2 Awaran 20:3, 4.) Ag-ira nankanya-kanya, noagta nantitipon ira. Oniay nabasad Biblia: “Amin a Juda inmalagey ed arap nen Jehova, pati saray angkelag da, saray asawa ra, tan saray anak da.” (2 Awa. 20:13) Ugaw man o matatken, saniiba dan tinulok so instruksion nen Jehova, tan prinotektaan to ra ed saray kalaban da. (2 Awa. 20:20-27) Agta maong so alimbawan impanengneng da no panon tayon saniiban arapen iray subok bilang totoo na Dios?
Sikayo ran Balon Kasal—Iyuna Yo si Jehova ed Bilay Yo
7 Inusar nen Jehova so Levita ya si Jahaziel pian ipasabi so mensahe To ed si Jehosafat. Oniay imbaga nen Jehova: “Omposisyon kayo, alagey kayo labat, tan nengneng yo so panangiliktar nen Jehova parad sikayo.” (2 Awa. 20:13-17) Imbaga nen Jehova ya onalagey ira labat tan agda kaukolan so milaban. Nikadkaduma itan ya instruksion! Pero sankanonot nen Jehosafat ya nanlapu itan ed si Jehova. Lapud balbaleg so talek tod Dios, inunor to itan. Nen akiabetan ed kalaban si Jehosafat tan saray sundalo to, say inyan tod arapan et aliwan saray marundunong ya sundalo, noagta saray lalaki ya inyasain ton mangansion parad si Jehova tan anggapoy armas da. Antoy agawa? Tinoor nen Jehova so imbaga tod si Jehosafat. Tinalo To iray kalaban!—2 Awa. 20:18-23.
Saray Espiritual a Kayamanan
mwbr23.05—it-1 1271 ¶1-2
Jehoram
Ag-inalig nen Jehoram so matunong ya impanbilay na ama ton si Jehosafat, nayarin say sakey ya rason et lapud naimpluensyaan na mauges ya asawa ton si Atalia. (2Ar 8:18) Aglabat pinatey nen Jehoram so anemiran agagi ton lalaki pati saray arum a prinsipe na Juda, noagta inimpluensyaan to ni ingen iray walad sakop to ya taynan day Jehova tan mandayew ira ed saray palson dirios. (2Aw 21:1-6, 11-14) Say interon uley nen Jehoram et napnoy gulo balanglan diad loob tan diad paway na nasyon. Unona, nanrebelde so Edom; insan nanrebelde met so Libna sumpad Juda. (2Ar 8:20-22) Pinasakbayan nen propeta Elias si Jehoram diad sakey ya sulat, oniay kuan to: “Si Jehova et mangidapo na baleg a kadederal ed saray totoom, saray ananak mo, kaasawaan mo, tan ed amin a kayarian mo. Tan kada agew et pairapen ka na dakel a sakit, kaiba lay sakit ed pait, anggad ompaway iray pait mo lapud satan.”—2Aw 21:12-15.
Agawan amin iratan. Inabuloyan nen Jehova iray Arabo tan Filisteo ya nasakop so dalin tan inala da ray asawa tan ananak nen Jehoram tan ginawa da ran bihag. Say inabuloyan labat nen Jehova ya makatakas et say sankayugtanan ya anak nen Jehoram ya si Jehoahaz (a tinawag met ya Ahazias) ta pian labat natoor may sipanan na Panarian ya insipan nen Jehova ed si David. “Kayari na saya, si Jehova et angidapod [si Jehoram] na sakit ed pait ya agla natambal.” Kayari na duay taon “pinmaway iray pait to” tan kalkalnan inatey. Ditan anampot so bilay na sayan mauges ya too, tan “anggapoy nanermen sanen inatey.” Sikatoy imponpon da diad Syudad nen David, “balet aliwan diad ponponan na saray arari.” Si Ahazias ya anak to so sinmublay ed sikato ya nagmaliw ya ari.—2Aw 21:7, 16-20; 22:1; 1Aw 3:10, 11.
MAYO 15-21
KAYAMANAN ED SALITA NA DIOS | 2 AWARAN 22-24
“Bebendisyonan nen Jehova so Inkakpel na Saray Lingkor To”
Joas—Tinaynan Toy Jehova Lapud Mauges a Kakaaro
ALIWLIWAY situasyon diad Jerusalem ed saman, say syudad a kawalaan na temploy Dios. Kapkapamatey ni labat ed si Arin Ahazia. Ingen ta wala ni mas graben ginawa na nanay ton si Atalia. Impapatey to iray anak nen Ahazia—saray mismon apo to! Amtan ta no akin?—Pian sikato so magmaliw a manuley, imbes a sikara.
Balet, walay sakey ya apo nen Atalia a nisalba, si Joas, a diad saman et kapangiyanak ni labat. Tan ag-iyan balot amta nen bai to. Labay mo ta’n naamtaan no panon?— Onia ay, walay panginaen nen Joas, a manngaran na Josaba, ya angiyamot ed kinen Joas diad templo na Dios. Sarag to itan a gawaen ta say asawa ton si Joiada et Atagey a Saserdote. Kanian sineguro ran dua ya anggapoy nagawan mauges ed si Joas.
Joas—Tinaynan Toy Jehova Lapud Mauges a Kakaaro
Diad loob na anem taon et inyamot day Joas ed templo, tan ditan et imbangat da’d sikato so amin a nipaakar ed si Jehova tan saray ganggan To. Balet, sanen pitoy taon la nen Joas, nanggaway paraan si Joiada pian magmaliw ya ari si Joas. Labay mo ta’n naamtaan no antoy ginawa nen Joiada, tan no antoy agawa’d mauge-uges a bai nen Joas a si Reyna Atalia?—
Onia ay, pasekreton tinawag nen Joiada iray sankamaongan iran nagmaliw a guardia na arari ed Jerusalem diad saraman a panaon. Imbaga to ed sikara no antoy ginawa ran sanasawa pian nisalba so sakey ya anak a laki nen Arin Ahazia. Insan inyakar nen Joiada si Joas ed sarayan guardia, tan amoria ran saya so manepeg a manari. Insan ira’d satan nanggawa na plano.
Impaway nen Joiada si Joas ed publiko insan to kinoronaan. Kayari to, ‘nantipak iray totoo tan inkuan da: Maando komon a manbilay so ari!’ Pinaliberan na saray guardia si Joas pian naprotektaan. Et sanen nadngel nen Atalia so panliliket da, sikatoy batik ed paway tan namprotesta. Balet, sikatoy impapatey nen Joiada ed saray guardia.—2 Arari 11:1-16.
mwbr23.05—it-1 379 ¶5
Panagponponan
Naikdan na kagalangan ya niponpon so Atagey a Saserdoten si Jehoiada “diad Syudad nen David a kaiba na saray arari.” Sikato labat so agnanlapud poli na saray arari ya akaawat na ontan ya panamagalang.—2Aw 24:15, 16.
Saray Espiritual a Kayamanan
mwbr23.05—it-2 1223 ¶13
Zacarias
12. Say anak na Atagey a Saserdoten si Jehoiada. Nen inatey lay Jehoiada, tinaynan nen Arin Jehoas so dugan panagdayew, say dinengel to et saray mauges ya bilin imbes ya saray bilin na saray propeta nen Jehova. Pinasakbayan nen Zacarias ya kapinsan nen Jehoas (2Aw 22:11) iray totoo nipaakar ed satan, balet imbes ya magbabawi ira, tinutupak day Zacarias diad sular na templo. Oniay imbaga to sanen ompapatey la: “Komon ta seguroen nen Jehova ya ebatan moy ginawam.” Satan ya kerew to et asumpal bilang propesiya, ta aglabat inataki na Syria so Juda tan dakel so asamsam da noagta nankokomplot met so duaran lingkor nen Jehoas tan pinatey da “lapud impaagus toy dala na ananak nen Jehoiada a saserdote.” Ibabaga na Greek Septuagint tan say Latin Vulgate ya si Jehoas et pinatey pian ibawian so “anak” nen Jehoiada. Balet diad Masoretic text tan diad Syriac Peshitta, say nabasa tayo et “ananak,” nayarin inusar so plural ya bilang pian nidanet so kablian tan kaimportantian na anak nen Jehoiada ya si Zacarias a propetan saserdote.—2Aw 24:17-22, 25.
MAGMALIW YA EPEKTIBO ED MINISTERYO
‘Makmakpel ya Iyabawag so Salita na Dios’
6 Say sankadirektaan a paraan pian naawat so masanton espiritu na Dios et say pangerew ed satan. Oniay imbaga nen Jesus ed saray ondedengel ed sikato: ‘No sikayo sirin, anta mauges kayo, amta yo so mangiter na saray maong a panangaro ed saray anak yo agkasi nagkalalo a say Ama yo a mangatatawen mangiter na masanton espiritu ed saray onkerew ed sikato?’ (Luc. 11:13) Kanian kaukolan a lawas tayon kerewen so masanton espiritu. No medyo talawan itayo ed arum a kabiangan na ministeryo a singa say panagpulong ya impormal, odino diad karsada, odino diad pannenegosyoan, nayari tayon kerewen ed si Jehova so espiritu to tan tulongan to itayon makapanpakpel.—1 Tes. 5:17.
7 Ontan so ginawa na sakey ya agin manngaran na Rosa. Aminsan, diad eskuelaan a pantatrabahoan to, babasaen na sakey a maestra so report na impanmaltrato ed ugugaw diad sananey ya eskuelaan. Ontan lay impakabigla na maestra ed abasa to kanian oniay nibaga to, “Agayla, grabe laray nagagawa natan!” Agnitepel nen Rosa a palampasen iyan pankanawnawan makapanpulong. Antoy ginawa to pian makapanpakpel a mitongtong? Oniay inkuan to: “Nampikasi ak ed si Jehova tan kinerew kon tulongan ak na espiritu to.” Kanian sikatoy matalonan akapanpulong tan nampakna ran ituloy da lamet so tongtongan da. Nia ni so sakey ya eksperiensya. Si Milane, a mantaon na limara a taga New York City, so angikuan: “Antis ak ya onla’d eskuelaan, lanang kamin manpipikasi nen mommy ed si Jehova.” Antoy ipipikasi ra ey? A nawalaan komoy kasil na linawa si Milane pian nibaga toy nipaakar ed Dios to. Oniay kuan nen nanay to: “Akatulong iya ed si Milane pian nipaliwawa toy talindeg to nipaakar ed saray birthday tan holiday, tan agmibiang sano seselebraan iratan.” Agta ipapanengneng na sarayan eksperiensya ya epektibo so pikakasi pian nawalaay pakpel?
8 Imanoen pa met no antoy akatulong ed si propeta Jeremias a manpakpel. Sanen sikatoy tinuro nen Jehova a magmaliw a propeta ed saray nasyon, oniay inyebat to: “Nia, agko amta so mansalita; ta ugaw ak.” (Jer. 1:4-6) Balet, asabi panaon et agaylay seet tan talek nen Jeremias a nampulong, kanian sikatoy impasen na dakel a totoo a manangipakabat na desyang. (Jer. 38:4) Diad masulok a 65 a taon et makpel ton inyabawag iray panangukom nen Jehova. Sikatoy akabkabat ed Israel bilang agnatatakot tan makpel a managpulong. Kanian, kalabas na manga 600 taon, sanen makpel met a nansalita si Jesus, abaloan laingen na arum a sikato so apaolin Jeremias. (Mat. 16:13, 14) Panon a tinalonaan nen propeta Jeremias so inkamabaing to? Oniay inkuan to: ‘Wala dia ed pusok so salita na Dios a singa mandarlang ya apuy ya akapotan ed saray pukel ko et naksawan ak lan mantetepel.’ (Jer. 20:9) On, say salita nen Jehova so amabiskeg tan amakiwas ed si Jeremias a mansalita.
9 Diad sulat nen apostol Pablo ed saray Hebreo, inkuan to: “Say salita na Dios sikatoy mabilay tan mabiskeg, tan makdem nen say anggan dinan a kampilan a duaray tarem, tan ontalos ya angga ed pansianan na kamarerwa tan espiritu, tan angga ed saray langolangoan tan saray utek, tan masiglat a mangibiig ed saray nonot tan saray getma na puso.” (Heb. 4:12) Singa ed samay agawa’d si Jeremias, say mensahe odino salita na Dios et mamakiwas met ed sikatayo. Tandaan ya anggaman totoo so inusar a nansulat ed Biblia, aliwa itan a libron nanlapud karunongan na too, noagta pinuyanan itan na Dios. Diad 2 Pedro 1:21 et oniay nabasa tayo: ‘Anggapo so propesiya a nanlapu ed linawa na too, noag saray totoo nansalita ra a nanlapu ed Dios, diad impanenyeg ed sikara na masanton espiritu.’ No ipanaon tan seryoso tayon aralen so Biblia, napanoy kanonotan tayo na mensahen pinuyanan na masanton espiritu. (Basaen so 1 Corinto 2:10.) Satan a mensahe et magmaliw a “singa mandarlang ya apuy” ed dalem tayo, kanian agtayo napokpokan ya ag-itan ibaga.
10 Pian baleg so epekto ed sikatayo na personal a panagaral na Biblia, nepeg a say panagaral tayo et diad paraan ya ontanetanek so mensahe na satan ed sikatayo, a naimpluensyaan toy inkatoo tayo. Alimbawa, diad sakey a pasingawey ed si propetan Ezequiel et kinerew ed sikaton kanen toy sakey a lukot a mankargay ambelat a mensahen ipasabi ed saray totoon agmaawat. Sirin et kaukolan ton talosan a maong tan ipapuso so mensahe. No gawaen to itan, say pangipasabi to ed mensahe et maliket odino masamit a singa a dilo.—Basaen so Ezequiel 2:8–3:4, 7-9.
MAYO 22-28
KAYAMANAN ED SALITA NA DIOS | 2 AWARAN 25-27
“Sarasarag Kan Ikdan nen Jehova na Mas Dakdakel nen Satan”
mwbr23.05—it-1 1266 ¶6
Jehoas
Impaupa nen Jehoas so 100,000 ya sundalo to ed ari na Juda pian milaban ed saray Edomita. Balet binilin na “too na tuan Dios” so ari kanian pinasempet to la ra, tan anggano abayaran to la ray 100 a talenton pilak ($660,600), ampetapetang so ulo ran sinmempet, nayarin lapud naandi may iilaloan dan betang da ed samsam. Kanian nen papawil la rad amianen, nilolooban da ray syudad na Juda, manlapud Samaria (a nayarin ditan kawalaay kampo ra) ya anggad Bet-horon.—2Aw 25:6-10, 13.
“Tawayan” so Kamaongan nen Jehova—Panon?
16 Mansakripisyo ka parad si Jehova. Agto labay ya ibagan sibletan moy sarilim pian napaliket moy Jehova. (Ecl. 5:19, 20) Anggaman ontan, no say rason no akin ya manaalangan kan palaknaben so ministeryom et agmo labay so mansakripisyo, ompan naalig mo imay lingo na laki ed ilustrasyon nen Jesus ya nansagpot ya maong pian mainaway bilay to pero nilingwanan toy Dios. (Basaen so Lucas 12:16-21.) Oniay imbaga nen Brother Christian ya taga France: “Dati, kerakera labat ya panaon tan biskeg so iiter kod si Jehova tan ed pamilyak.” Sikato tan say asawa to et implano day manpayunir. Pero pian makapanpayunir ira, kaukolan day man-resign ed trabaho da. Say nagmaliw ya sideline da et manlinis na saray abung tan opisina. Nankontento la ra ed simplin bilay. Kasin sulit so sakripisyo da? Oniay imbaga nen Christian: “Mas nai-enjoy mi la natan so ministeryo tan malikeliket min tutulongan iray Bible study tan RV mi pian lalo dan nakabat si Jehova.”
Saray Espiritual a Kayamanan
Walaan Ka ta na Manangibangat ed Espiritual?
ANGGAMAN 16 años ni labat nen Uzias, sikatoy nagmaliw lan ari na abalaten a panarian na Juda. Masulok a 50 taon so impanuley to, manlapud pansamposampot na komasiam a siglo anggad kagapo na komawalon siglo B.C.E. Manlapud satan a malangwer ya edad to, “ginawa to so maptek ed saray mata nen Jehova.” Antoy akaimpluensya ed sikato pian manbilay a maptek? Onia so kuan na rekord na awaran: “Impasen [nen Uzias] so inkasikato a mananap ed Dios ed saray agew nen Zacarias, a walaan na pakatalos ed pasingawey na Dios [“say managbangat diad itatakot ed tuan Dios,” NW]: et leleg ya inanap to si Jehova, sikato so ginawa na Dios a maaligwas.”—2 Awaran 26:1, 4, 5.
Nilikud ed sayan salaysay ed Biblia, daiset labat so amta tayo nipaakar ed si Zacarias, say mananimbawa na ari. Balet, bilang “say managbangat diad itatakot ed tuan Dios,” sikato so akaimpluensyan maong ed malangwer nin ari a manggawa no antoy duga. Inkomento na The Expositor’s Bible a mapatnag a si Zacarias et “sakey a lakin kabkabisado toy Kasulatan, walaan na malaknab a pakatalos ed espiritual, tan marundunong a manginabang na pikakabat to.” Onia met so inkuan na sakey ya iskolar na Biblia nipaakar ed si Zacarias: “Kabkabisado to iray propesiya tan . . . sikato so intelihente, debosyonado, maptek a too; tan, ompatnag a mabiskeg so impluensya to ed si Uzias.”
MAYO 29–HUNYO 4
KAYAMANAN ED SALITA NA DIOS | 2 AWARAN 28-29
“Sarag Moy Manlingkor ed si Jehova Anggano Aliwliway Impamabaleg ed Sika”
Aligen Iray Malet ya Kaaro nen Jehova
8 Aliwan singa si Rut, say ugaw nin Hezekias et nianak lad sakey a bansa ya dedikado ed si Jehova. Balet aliwan amin ya Israelita et nansiansian matoor. Sakey lan alimbawa so ama nen Hezekias, si Arin Ahaz. Inimpluensyaan na sayan mauges a too so panarian na Juda ya mandayew ed saray idolo, tan pinabanday da ni ingen so templo nen Jehova ed Jerusalem. Makapaermen ya isipen so mauges ya agawad pamilya nen Hezekias, ta makapasinagem so impatey na arum ed saray agagi to, ya pinoolan ira bilang bagat ed palson dios!—2 Ara. 16:2-4, 10-17; 2 Awa. 28:1-3.
Aligen Iray Malet ya Kaaro nen Jehova
9 Walay posibilidad ya ombarong o manpasnok tan manrebelde ed Dios si Hezekias. Wala ray arum natan ya aliwan ontan kagrabe so situasyon da balet inisip da ya walay rason dan ‘onsanok sumpad si Jehova’ odino ombarong ed organisasyon to. (Uli. 19:3) Tan nononoten na arum a totoo ya lapud aliwliwan kipapasen na pamilya ra et magmaliw met lan aliwliway bilay da, odino ompan naulit da lamet iray lingo na atateng da. (Eze. 18:2, 3) Duga kasi so ontan ya kanonotan?
10 Unong ed samay agawa ed bilay nen Hezekias, say malinew ya ebat et andi! Anggapon balot so makatunongan a rason pian onsanok ed si Jehova, ta aliwan sikatoy panlalapuan na mauges a nagagawa ed totoo. (Job 34:10) Tua, baleg so impluensya na atateng ed pankaabigan odino pankaugsan na ananak da. (Uli. 22:6; Col. 3:21) Balet agto labay ya ibagan no antoy agawad kapamilya na sakey a too et onman met lay pagmaliwan na bilay to. Amin tayo et inikdan nen Jehova na mabmablin regalo—say abilidad a manpili no antoy gawaen tayo tan pagmaliwan tayo. (Deu. 30:19) Panon ya inusar nen Hezekias itan a regalo?
11 Anggano si Hezekias et anak na sakey ed saray sankaugesan ya ari na Juda, sikatoy nagmaliw a sakey ed saray sankaabigan ya ari. (Basaen so 2 Arari 18:5, 6.) Agto inalig so mauges ya ginawa na ama to. Imbes, dinengel ton maong iray propeta nen Jehova a singa si Isaias, Miqueas, tan Oseas. Inimanon maong nen Arin Hezekias iray apuyanan a mensahe na saratan ya matoor a lalaki, tan impapuso toy simbawa tan panangipetek nen Jehova. Kanian impetek nen Hezekias iray mauges a ginawa na ama to. Nilinisan toy templo, angiyapay na pananakbong ed saray kasalanan na totoo, tan dineral to ray paganon idolo diad interon nasasakopan to. (2 Awa. 29:1-11, 18-24; 31:1) Nen nipaarap ed makapataktakot ya subok, a singa say planon pangataki ed Jerusalem nen Senakerib ya ari na Asirya, impanengneng nen Hezekias so nikadkaduman inkakpel tan pananisia. Sikatoy nanmatalek ed panangiliktar na Dios tan pinabiskeg to ray totoo to panamegley na salita tan alimbawa. (2 Awa. 32:7, 8) Nen asabi panaon ya kaukolan ya ipetek si Hezekias lapud impatnag ton panagpaatagey, sikatoy nampaabeba tan nagbabawi. (2 Awa. 32:24-26) Malinew sirin ya ag-inabuloyan nen Hezekias so apalabas to ya maneral ed peles a bilay to odino arapen to. Imbes, impatnag to ya sikatoy kaaro nen Jehova, tan maabig ya ehemplon aligen tayo.
Saray Espiritual a Kayamanan
Natan—Matoor a Mananuporta na Tuan Panagdayew
Bilang matoor a managdayew nen Jehova, sinuportaan nen Natan so plano nen David ya mangipaalagey na sankaunaan ya templo parad tuan panagdayew. Balet diad sayan pankanawnawa, say imbaga nen Natan et sarili ton opinyon aliwan say imbaga nen Jehova ed sikato. Diad saman lanlamang a labi, ingganggan na Dios so propeta to ya ipasabi so duman mensahe ed ari: Aliwan si David so mangipaalagey na templo nen Jehova. Say manggawad satan et sakey ed saray anak to. Anggaman ontan, impaamta nen Natan ya misipanan so Dios ed si David pian say panarian to et “niletneg lawas.”—2 Sam. 7:4-16.
Say opinyon nen Natan nipaakar ed no siopay mangipaalagey ed templo et agmitunosan ed linawa na Dios. Anggaman ontan, agnanreklamo iyan mapaabeban propeta. Sikatoy tinmulok tan sinmuporta ed gagala nen Jehova. Agta maabig itan ya aligen no bilang ta sikatayoy kaukolan ya simbawaen na Dios? Nanengneng ed saray sinmublay a ginawa nen Natan ya agnaandi so panangabobon na Dios ed sikato. Diad tua, nayarin tinuro nen Jehova si propetan Natan tan Gad ya mangiwanwan ed si David diad pangorganisa ed 4,000 a managtogtog ed templo.—1 Awa. 23:1-5; 2 Awa. 29:25.
HUNYO 5-11
KAYAMANAN ED SALITA NA DIOS | 2 AWARAN 30-31
“Parad Pankaabigan Tayo so Saniiban Pantitipon”
mwbr23.05—it-1 1103 ¶2
Hezekias
Say Seseg To Parad Dugan Panagdayew. Impatnag ya tampol nen Hezekias so seseg tod panagdayew ed si Jehova nen nagmaliw ya ari nen 25 so taon to. Say unonan ginawa to et inlukas to lamet so templo tan inapiger itan. Insan to impatawag iray saserdote tan saray Levita, tan imbaga tod sikara: “Pirpirawat na pusok a misipanan ed si Jehova a Dios na Israel.” Saya et sipanan na katooran a singano inggapo lamet ed Juda so Ganggan a sipanan, ya siansia nin kaukolan ya tumboken balet ta nibabaliwala la. Masetseseg ton inorganisa iray Levita diad saray kimey da, tan inletneg to lamet so uksoyan parad saray instrumento ya uusaren ed musika tan say panagkansion na saray panangirayew. Diad saman et Nisan la, say bulan ya panselebra na Paskua, balet marutak so templo pati saray saserdote tan saray Levita. Kasabi koma-16 ya agew na Nisan, asumpal ya alinisan so templo tan nipawil la ray kagawaan. Insan kaukolan ya walay nagawan espisyal ya pananakbong parad interon Israel. Unona, angawit na saray apay iray prinsipe, bilang apay parad kasalanan ya iyapay parad panarian, parad santuaryo, tan parad Juda, insan tinumbokan itan na saray apay a popoolan parad saray totoo.—2Aw 29:1-36.
mwbr23.05—it-1 1103 ¶3
Hezekias
Lapud agmalinis iray totoo, agda aselebraan so Paskua ed unonan bulan, kanian inusar nen Hezekias so ganggan ya mangiyaabuloy ed saray agmalinis ya selebraan day Paskua diad onsublay ya bulan. Aliwa labat ya Juda so impatawag to noagta angibaki met na saray bumabatik pian awiten iray sulat ed Israel, manlapud Beer-sheba anggad Dan. Inelek-elekan tan niludlurey na dakel iray bumabatik; balet wala ray totoon nanlapud Aser, Manases, tan Zebulon a nampaabeba tan linma ra, wala met iray inmatendi ya nanlapud Efraim tan Isacar. Wala ra met so linma ya aliwan Israelita ya mandadayew ed si Jehova. Seguradon mair-irap parad saramay tagad amianen a panarian ya sinmuportad dugan panagdayew so onatendi. Singa saramay mensahero, kontraen tan ludlureyen met ira na totoo, lalo la ta aliwdiway kipapasen na samploran tribu a panarian, palso so panagdayew da tan guguloen ira na Asirya.—2Aw 30:1-20; Nu 9:10-13.
mwbr23.05—it-1 1103 ¶4-5
Hezekias
Kayari na Paskua, pitoy agew ya malikeliket ya sinelebraan so Piesta na Andi-lebaduran Tinapay kanian nandesisyon so interon kongregasyon ya selebraan da itan na pitoy agew ni. Anggano mapeligro iman a panaon, mas apatnagan so bendisyon nen Jehova kanian “walay baleg a panliliket ed Jerusalem, ta anggapo ni onian agawa ed Jerusalem nanlapud saray agew nen Solomon ya anak nen David ya ari na Israel.”—2Aw 30:21-27.
Nanengneng ed saray sinmublay ya agawa ya talagan nipawil tan binmiskeg lamet so dugan panagdayew, tan aliwa yan basta temporaryon maemosyon ya okasyon labat. Antis ya sinmempet iray inmatendi, linma ni rad saray syudad na Juda, tan minemekmek da ray sagradon lusek, intutumba da ray sagradon poste, tan inggegeba da ray atagey a pasen tan saray altar diad interon Juda tan Benjamin, pati diad Efraim tan Manases. (2Aw 31:1) Inalig na totoo si Hezekias nen tinetemek to imay gansan uleg a ginawa nen Moises, ta ginawa itan ya idolo na saray totoo tan manpapaasewek ira na bagat ed satan. (2Ar 18:4) Kayari na baleg ya piesta, sineguro nen Hezekias ya mantultuloy so dugan panagdayew diad impan-organisa toy grupo na saray saserdote tan inyuksoy toy pansuporta ed saray kimey ed templo; pinaseseg to ray totoo ya tumboken day ganggan nipaakar ed pangiter na saray kakaplo tan saray unonan inani ra ed saray Levita tan saray saserdote, tan inmunor iray totoo diad interon puso ra.—2Aw 31:2-12.
Saray Espiritual a Kayamanan
“Lapud Amta Yo La Iraya, Maliket Kayo No Gawaen Yo”
14 Say sakey nin paraan pian nipanengneng tayo ya talagan mapaabeba tayo et no akaparaan tayon ondengel ed arum. Ibabaga na Santiago 1:19 ya nepeg a sikatayoy “aliston ondengel.” Si Jehova so sankaabigan ya alimbawa nipaakar ed saya. (Gen. 18:32; Jos. 10:14) Imanoen no antoy naaralan tayo ed impantongtong nen Jehova tan Moises ya nabasa ed Exodo 32:11-14. (Basaen.) Anggaman agkaukolan nen Jehova so opinyon nen Moises, sikatoy inikdan nen Jehova na pankanawnawa ya ibalikas so nalilikna to. Kasin anosan mo nin dengelen so sakey a toon nalilingo, insan mo gawaen no antoy ibaga to? Ontan so gagawaen nen Jehova, maanos ton dedengelen iray pikakasi na totoon walaan na pananisia ed sikato.
15 Maabig no itepet tayod sarili tayo: ‘No si Jehova et mapaabeba ya mitongtong tan ondengel ed saray totoo a singa ginawa tod si Abraham, Raquel, Moises, Josue, Manoa, Elias, tan Hezekias, siopa ak ya agko respetoen tan pagalangan iray agagik, ya agko dengelen odino gawaen ni ingen iray balibalin suhestion da? Kasin walay kakongregasyon ko odino kapamilyak ya mankaukolan natan na atension ko? Antoy nepeg kon gawaen?’—Gen. 30:6; Ukom 13:9; 1 Ara. 17:22; 2 Awa. 30:20.
MAGMALIW YA EPEKTIBO ED MINISTERYO
Idayew si Jehova Diad Kongregasyon
13 Anto sirin iray praktikal ya suhestion ya ontulong pian makapangiter kay makapaseseg iran komento diad saray aral? Konsideraen tayoy pigara.
14 Manparaan parad kada aral. No masakbay ka lan manplano tan manparaan kan maong, mas walay kompiyansam ya mankomento. (Pro. 21:5) Siempre, aliwan pareparehoy eskedyul tayo. Si Eloise, ya abalon sister a manedad na masulok ya 80, et ipaparaan to la so Panag-bantayan kagapo ni labat na simba. Imbaga to, “Mas nagunggonaan ak ed aral no masakbay ak lan manparaan.” Si Joy, ya full-time a mantratrabaho, et eskedyul toy manaral na Panag-bantayan no Sabado. “Mas mainomay kon natandaan no aganok ni itan ya inaral,” so kuan to. Si Ike, a busy ya elder tan payunir, et imbaga to, “Mas labay koy manaral na sandaraiset ed interon simba nen say maminpinsan ak ya manaral.”
15 Panon kan makapanparaan ya maong parad saray aral? Antis kan manaral, ipikasim ed si Jehova ya ikdan to kay masanton espiritu to. (Luc. 11:13; 1 Juan 5:14) Insan mangigana kay pigaran minuto pian nengnengen so titulo, saray subtitulo, saray litrato, tan saray kahon. Legan mon aaralen so kada parapo, no nayari et basam ya amin iray nisitan teksto. Dalepdepen so impormasyon, ya manpokus ka ed saray punto ya labay mon komentoan. No manparaan kan maong, mas nagunggonaan ka tan nayarin mas mainomay moy mankomento.—2 Cor. 9:6.
16 No posible, usaren so intarya na organisasyon tayo ya app, website, tan computer program ya walad lenguahe ya antam. Si Jehova, panamegley na organisasyon to, et angitarya na saray elektronikon uusaren ya ontulong ed sikatayon manparaan parad saray aral. Diad JW Library® app et na-download tayo ed gadyet tayo iray aaralen ya publikasyon. Kanian sarag tayon aralen, odino anggan panon et basaen o dengelen so publikasyon, diad anggan anton oras tan anggan iner. Uusaren iya na arum pian makapanaral ira no oras na panangugto diad trabaho o diad eskuelaan odino legan iran manbiabiahe. Sarag tayon usaren so Watchtower Library tan say Watchtower ONLINE YA LIBRARYA™ pian mas mainomay tayon i-research iray punto ya labay tayo nin aralen ya maong.
17 No posible, mangiparaan na pigaran komento parad kada aral. Akin? Lapud ompan agka lanang ya natawag no iyatagey moy limam. Ompan wala ray kabansag mon mangiyatagey na lima, tan sakey ed sikara so nayarin turoen na manangikondukta. Pian nasumpal so aral ed suston oras, wala ray parapo ya nayarin limitaan na manangikondukta so turoen ton mankomento. Kanian agka nasasakitan o nadidismaya no agka naturon tampol. No mangiparaan ka na pigaran komento, mas dakel so pankanawnawam ya onebat. Sakey ed saray sarag mon iparaan ya komento et say pambasa na teksto. Balet no posible, mangiparaan ka met na komento ya ibagam ed sarilim ya salita.
18 Gawaen ya antikey so komentom. Mabetbet ya mas makapaseseg so komento no antikey tan simpli. Kanian gawam ya antikey iray ebat mo. No nayari et anggad 30 segundo labat. (Pro. 10:19; 15:23) No mankokomento kad saray aral diad loob na dakel lan taon, importante ya ipanengneng moy maong ya alimbawa ed pangiter na antikey iran komento. No komplikado tan pigaran minuto iray komentom, ompan natatakot lay arum ya onebat ta isipen dan agda naparaan so abilidad mo. Sakey ni, no antikey so komentom, mas dakel so makaebat ed aral. Mangiter na simpli tan direktan ebat lalo la no sika so unonan naturo. Agmo kokobrian so amin a punto ed parapo. No nikomento la so manunan ideya ed parapo, sarag mo lan ikomento so arum nin punto.
HUNYO 12-18
KAYAMANAN ED SALITA NA DIOS | 2 AWARAN 32-33
“Pabiskeg Mo ray Agagim Legan na Mairap ya Panaon”
mwbr23.05—it-1 204 ¶5
Asirya
Senakerib. Inataki nen Senakerib, ya anak nen Sargon II, so panarian na Juda legan na koma-14 ya uley nen Hezekias (732 B.C.E.). (2Ar 18:13; Isa 36:1) Nanrebelde si Hezekias ed pamapairap na Asirya ya resulta na ginawa na ama to ya si Ahaz. (2Ar 18:7) Lapud satan, inataki nen Senakerib so Juda, tan base ed report et 46 ya syudad so asakop to (ikompara so Isa 36:1, 2), insan legan ya walad kampo to ed Lakis, impanmulta toy Hezekias na 30 talenton balitok (c. $11,560,000) tan 300 a talenton pilak (c. $1,982,000). (2Ar 18:14-16; 2Aw 32:1; ikompara so Isa 8:5-8.) Anggano niiter la iratan ya kerew to, angibaki nin siansia si Senakerib na saray pinagkasangiyan to pian pasukoen so Jerusalem. (2Ar 18:17–19:34; 2Aw 32:2-20) Diad sakey a labi labat, pinatey nen Jehova so 185,000 lalaki diad kampo nen Senakerib kanian apilitan ya onatras iyan malastog ya Asiryano tan pinmawil lad Ninive. (2Ar 19:35, 36) Diman et pinatey lanlamang na duaran ananak to tan sinmalat ed trono so sananey nin anak to ya si Esar-hadon. (2Ar 19:37; 2Aw 32:21, 22; Isa 37:36-38) Saratan ya agawa et akarekord ed prism nen Senakerib tan nen Esar-hadon, puera labat imay impamatey ed saray sundalon Asiryano.
Siopa ray Pitora a Pastol tan Walora a Manunaan a Lalaki?
12 Naynay ya mabulos si Jehova ya ontulong ed sikatayo no wala ray probleman agtayo sarag, balet ta iilaloan ton gawaen tayoy anggaay nayarian tayo. Kinmerew na simbawa si Hezekias ed “saray prinsipe to tan saray makapanyari a lalaki” tan nandesisyon ira ya “patundaen da so saray danum na saray subol ya wala ed paway na syudad . . . Et nampakpel [si Hezekias], tan impaalagey to ya amin so bakor a nigeba, tan sikato so pinaatagey to angga ed saray ilang, tan say arum a bakor ed paway . . . tan nanggawa na ay-ayura tan saray kinlong a daakan.” (2 Awa. 32:3-5) Pian naprotektaan tan napastolan nen Jehova iray totoo to ed saman a panaon, sikatoy angusar na pigaran lalaki—si Hezekias, saray prinsipe to, tan saray propetan mabiskeg ed espiritual.
Siopa ray Pitora a Pastol tan Walora a Manunaan a Lalaki?
13 Say sinmublay ya ginawa nen Hezekias et mas importante nen say pamatunda ed saray danum odino pamaatagey ed saray padir na syudad. Lapud sikatoy maabig a pastol, tinipon to ray totoo tan pinaseseg to ra: “Agkayo antakot ni say napunaw kayo lapu ed ari ed Asirya, . . . ta wala so babaleg ed sikatayo nen sikato: Et sikato wala so taklay a laman; balet ed sikatayo wala si Jehova a Dios tayo ya ontulong ed sikatayo, tan mibakal a miulop ed saray bakal tayo.” Talagan makapabiskeg na pananisia itan ya panamaseguro—si Jehova so milaban parad totoo to! Nen nadngel itan na saray Judio, sikaray “nanmatalek ed saray salita nen Hezekias [ya] ari ed Juda.” Imanoen ya “saray salita nen Hezekias” so amabiskeg ed saray totoo. Apaneknekan ya sikato, saray prinsipe to tan saray makapanyari a lalaki, ontan met ed si propetan Miqueas tan Isaias et maong iran pastol, singa impasakbay nen Jehova panamegley na propeta to.—2 Awa. 32:7, 8; basaen so Miqueas 5:5, 6.
Saray Espiritual a Kayamanan
Anto so Tuan Panagbabawi?
11 Inebatan nen Jehova iray pikakasi nen Manases. Anengneng tod puso nen Manases ya talagan anguman la, ya singa napatnagan ed saray pikakasi to. Kanian nen kinmerew na perdona si Manases, akasian nen Jehova tan impawil to ya ari. Agsinayang nen Manases iyan pagkakataon ya inter nen Jehova ed sikato. Kanian impanengneng to ya talagan magbabawi. Ginawa to imay agan balot ginawa nen Ahab. Inuman toy bilay to. Nanggawa na paraan pian naekal so palson panagdayew ed Juda. Tan pinaseseg to ray sakop to ya ompawil tan mandayew lamet ed si Jehova. (Basaen so 2 Awaran 33:15, 16.) Abaybayag ya mauges so impluensya to ed pamilya to, saray opisyal ed Juda, tan saray sakop to, kanian kaukolan toy manpakpel tan mantiwala ed si Jehova pian nagawaan ton amin iratan. Natan ya masiken la, ginawa toy anggaay nayarian ton ipetek iray mauges ya ginawa to nensaman. Kanian posiblin baleg so nitulong nen Manases pian manmatoor ed si Jehova so ugaw nin apo to ya si Josias, ya diad inlabas na panaon et nagmaliw ya maomaong ya ari na Juda.—2 Ara. 22:1, 2.
12 Anto ray naaralan tayo ed ginawa nan Manases? Sikatoy nampaabeba, pero aliwan satan labat so ginawa to. Nampikasi si Manases, tan kinmerew na perdona ed si Jehova. Sakey ni, inuman ton talagay bilay to. Ginawa toy anggaay nayarian ton ipetek iray lingo to, tan sinuportaan toy dugan panagdayew. Tan pinaseseg toy arum ya ontan met so gawaen da. Say impamerdona nen Jehova ed si Manases et balibalin dalepdepen na saramay akagawa na seryoson kasalanan. Prueba itan ya si Jehova et ‘maomaong tan akaparaan ya mamerdona.’ (Sal. 86:5) On, mabulos ya perdonaen nen Jehova iramay talagan magbabawi.
JUNE 19-25
KAYAMANAN ED SALITA NA DIOS | 2 AWARAN 34-36
“Kasin Minanabang Kan Maong ed Salita na Dios?”
mwbr23.05—it-1 1157 ¶4
Hulda
Nen arengel nen Josias so impanbasa ed “libro na Ganggan” ya nalmo na atagey a saserdoten si Hilkias legan ya aapigeren so templo, angibaki na grupo ya onlan ontupleg ed si Jehova. Linma rad si Hulda ya angibagad sikara na mensahe nen Jehova. Imbaga to ya amin ya kadederal ya akasulat ed “libro” lapud ag-ira inmunor et nagawa ed apostatan nasyon. Imbaga met nen Hulda ya lapud nampaabeba si Josias ed arapan nen Jehova, agto la nanengneng iratan ya kadederal noagta nitipon ed saray inmuunan atateng to, tan niponpon ed lubok to diad panaon na kareenan.—2Ar 22:8-20; 2Aw 34:14-28.
Magmaliw a Maseseg Parad Abung nen Jehova!
20 Sanen inyuksoy nen Arin Josias so kimey a pangapiger ed templo, aromog na Atagey a Saserdoten si Helcias so “libro na tunong nen Jehova, a niiter ed panamegley nen Moises.” Insan to itan inter ed si Safan a sekretaryo na ari. Tan binasa itan nen Safan ed si Josias. (Basaen so 2 Awaran 34:14-18.) Antoy reaksion nen Josias? Tampol a pinilat na ari so kawes to lapud ermen, tan walaray ingganggan ton lalaki ya ontupleg ed si Jehova. Panamegley nen propetesan Hulda, angiter so Dios na mensahe a mangokondena ed saray pigaran paraan na panagdayew a gagawaen diad Juda. Anggaman impropesiya lan walay desyang a nagawa’d interon nasyon, inimano nen Jehova so maabig a ginawa nen Josias ya ekalen so idolatriya. Tan nansiansiay panangabobon nen Jehova ed sikato. (2 Awa. 34:19-28) Antoy naaralan tayo ed saya? Seguradon kaliktan tayo met ya aligen si Josias. Labay tayon tamtampol a tuloken so instruksion nen Jehova, a nodnonoten tayo no antoy nagawa no ag-itayo manmatoor tan no abuloyan tayon nalaokan na apostasya so panagdayew tayo. Diad ontan et matalek itayo a naimano tan abobonan nen Jehova so inkaseseg tayo parad dugan panagdayew, a singa ed si Josias.
Saray Espiritual a Kayamanan
Kasin Ipapapusom Iray Nisulat ya Pasakbay?
15 Say sampot ya pantongtongan tayo et say agawad maong ya Arin Josias. Amtaen tayoy rason no akin ya atalo tan inatey. (Basaen so 2 Awaran 35:20-22.) Linmay Josias ya “milaban” ed si Arin Neco na Ehipto anggano imbaga na satan ya ari ya agmilaban. Ibabaga na Biblia ya “nanlapud sangi na Dios” so imbaga nen Neco. Akin et akilaban nin siansia si Josias ed sikato? Anggapoy ibabaga na Biblia.
16 Balet panon komon ya naamtaan nen Josias ya nanlapud si Jehova so imbaga nen Neco? Nayari ton tepetan si Jeremias, sakey ed saray matoor ya propeta. (2 Awa. 35:23, 25) Balet anggapoy nabasan ginawa to itan. Sakey ni, paonlad Carkemis si Neco pian milaban ed “sananey a nasyon,” aliwan diad Jerusalem. Tan agnalalanor so ngaran na Dios lapud agbabalawen nen Neco so ngaran nen Jehova odino saray totoo To. Kanian aliway desisyon nen Josias ya milaban ed si Neco. Wala kasi naaralan tayod saya? No wala ray problema tayo, maong no amtaen tayoy linawa nen Jehova.
17 No wala ray onlesan problema, maabig no ikonsidera tayo ray prinsipyo na Biblia tan balansin iyaplika iratan. Ompan no maminsan et kaukolan tayon konsultaen iray elder. Nayarin inisip tayo la iramay amta tayo nipaakar ed satan, tan nan-research tayo lad saray publikasyon tayo. Balet, nayarin wala ni ray arum ya prinsipyo na Biblia ya ipaimano na sakey ya elder a kaukolan tayon ikonsidera. Singa bilang, amta na sakey a sister ya responsabilidad ton ipulong so maong a balita. (Gawa 4:20) Balet panon to no diad samay implano ton pampulong et i-request na agmananisian asawa to ya ag-onalis. Imbaga na asawa to ya diad apalabas iran agew et ngalngali anggapoy panaon dad balang sakey, kanian labay ton makapaniba iran sanasawa. Nayarin isipen na asawan bii iray importantin teksto ed Biblia, singa say pangunor ed Dios tan say ganggan ya manggaway babangatan. (Mat. 28:19, 20; Gawa 5:29) Balet ta kaukolan to met ya ikonsidera so pampasakop tod asawa to tan say pagmaliw ya makatunongan. (Efe. 5:22-24; Fil. 4:5) Talaga kasin sesebelan na asawa to ya manpulong, odino request to labat iman ed saman ya agew? Kaukolan so pagmaliw ya balanse diad panggaway linawa na Dios tan panggaway anggaay nayarian tayon nawalaay malinis ya konsiensia.
MAGMALIW YA EPEKTIBO ED MINISTERYO
“Say Salita na Dios et . . . Makapanyari”
7 Antoy makatulong pian nausar tayon maong so Salita na Dios diad ministeryo? Say sakey ya paraan et no lanang tayon usaren itan diad pampupulong tan pambabangat tayo. Oniay imbaga na sakey ya brother, “No bilang ta kaibam si Jehova ya manpupulong ed kaabungan, kasin sika lan lanang so mansalita odino abuloyan mon mansalita?” Say punto to: No ibabasa tayoy Salita na Dios diad ministeryo, aabuloyan tayon si Jehova so mitongtong ed unabung. Say pinilin maong ya teksto et mas makapanyari nen say antokaman ya ibaga tayo. (1 Tes. 2:13) Tepetan moy sarilim, ‘Kasin manaanap ak na pankanawnawan makapangibasa na teksto ed Biblia diad saray napupulongan ko?’
8 Siempre, wala ni kaukolan tayon gawaen nen say basta pangibasa na teksto ed Biblia ed saray nakakatongtong tayo. Akin? Lapud maslak ya totoo et daiset so natatalosan da ed Biblia odino anggapo ni ingen. Ontan so situasyon nen inmunan siglo, tan anggad natan. (Roma 10:2) Kanian agtayo iisipen ya natalosan lan tampol na unabung so teksto lapud binasa tayo itan. Nayari tayon ipaimano iray importantin salita diad bersikulo—ompan sarag tayon basaen lamet—tan ipaliwaway kabaliksan da. Makatulong itan pian say mensahe na Biblia et natalosan tan makasabid puso na saray ondedengel.—Basaen so Lucas 24:32.
9 Say ibaga tayo antis tayon ibasa so teksto et nayarin mamakiwas ed unabung ya respetoen so Biblia. Singa bilang, nayari tayon ibaga, “Nengnengen tayo no antoy ibabaga na Amalsa nipaakar ed saya.” No say katongtong tayo et aliwan Kristiano, sarag tayon ibaga, “Imano yo no antoy ibabaga na Masanton Sulsulat.” Odino no say pupulongan tayo et aliwan relihyoso, nayarin itepet tayo, “Arengel yo la yan makabat a salita nensaman?” Kanian nepeg tayon nonoten so kipapasen na kada too tan itukoy tayoy introduksion tayo.—1 Cor. 9:22, 23.
10 Apaneknekan la na dakel ya say pangusar na Salita na Dios ed ministeryo et baleg so epekto to ed saray napupulongan da. Imanoen so sakey ya alimbawa. Sakey a brother so binmisita lamet ed lakin maedad la ya pigay taon lan manbabasa na saray magasin tayo. Imbes ya iderew to labat so sankabaloan ya isyu na Say Panag-bantayan, imbasa na brother so sakey ya tekston wadtan. Binasa toy 2 Corinto 1:3, 4, ya oniay ibabaga to: “Say Ama na maaron panangasi tan say Dios na amin a ligliwa [so] manliligliwa ed sikatayo diad amin a subok a dadalanen tayo.” Atenyeg so liknaan na samay laki, kanian impabasa to lamet ed brother so teksto. Imbaga to ya kakkaukolan da nen asawa to so ligliwa, tan nagmaliw ya interesado ed mensahe na Biblia. Agta talagan walay pakayari na Salita na Dios no usaren tayo itan diad ministeryo?—Gawa 19:20.
HUNYO 26–HULYO 2
KAYAMANAN ED SALITA NA DIOS | ESDRAS 1-3
“Manpausar Ka ed si Jehova”
Kasin Nanenengneng Mo Imay Anengneng nen Zacarias?
EKSAYTED iray Judio! Kayari na dakel ya dekada na impanayam dad Babilonia, sa wakas et magmaliw la ran bulos. “Pinakiwas nen Jehova so puso nen Arin Ciro na Persia a manggawa na proklamasyon” ya makapawil la rad Juda tan “tan ipaalagey [da] lamet so abung nen Jehova a Dios na Israel.” (Esd. 1:1, 3) Makapalikliket itan ya balita! Ompawil la so dugan panagdayew diad mismon dalin ya inter na Dios ed saray Israelita nensaman.
Saray Karwahe tan Say Korona so Manproprotekta ed Sika
2 Amta nen Zacarias ya saray Judion pinmawil ed Jerusalem et mabiskeg so pananisia ra. Sikara may totoon “say puso [ra] et pinakiwas na tuan Dios” pian taynan so komportablen ayaman da tan saray negosyo ra. (Esd. 1:2, 3, 5) Tinaynan day dalin ya apasalan da la pian onalis ed pasen ya agnin balot anengneng na maslak ed sikara. No aliwan importante ed sikara so pangipaalagey na templo nen Jehova, agda komon labay so manbiahe na arawi ya manga 1,600 kilometro diad mapalandey tan mapeligron dalan.
Saray Espiritual a Kayamanan
Saray Pabitar ed Libro na Esdras
1:3-6. Singa saray arum ya Israelita a tinmilak la ed Babilonia, dakel ed saray Tasi nen Jehova so agmakapanlingkor bilang sigpot-panaon a ministro odino diad lugar a babaleg so pankaukolan. Balet, sikaray manusuporta tan mamapaseseg ed saraman so makasarag, tan mangiiter ira na boluntaryon donasyon parad kilaknab na kimey a panangipulong ed Panarian tan panaggaway-babangatan.