Saray Reperensya Parad Workbook ed Aral
© 2023 Watch Tower Bible and Tract Society of Pennsylvania
SETYEMBRE 4-10
KAYAMANAN ED SALITA NA DIOS | ESTER 1-2
“Manpaabeba ya Singa si Ester”
Sarag Moy Mansiansian Mapaabeba Anggano Nasusubok
11 Nasubok met so inkamapaabeba tayo no naynay itayon kokomendaan o irarayew na arum. Imanoey makapadinayew ya reaksion nen Ester ed nantutumbokan ya pananguman ed bilay to. Magangganan maong tan dinmalan ed sakey taon ya proseso na pampaganggana. Inagew-agew ton kaulop so dakel ya mamarikit ya nanlalapud interon Empiryo na Persia ya mankokompetensya pian naala day atension na ari. Balet nansiansian marespeto tan mareen si Ester. Agnagmaliw ya mapasirayew odino paimportante anggano nen pinili la na ari ya magmaliw a reyna to.—Est. 2:9, 12, 15, 17.
Inyagel To ray Totoo na Dios
15 Sanen turno la nen Ester ya onarap ed ari, sikatoy inabuloyan ya manpili na antokaman ya nausar to pian lalon onganggana. Balet, anggapo lay kinerew to nilikud ed saramay imbaga nen Hegai. (Est. 2:15) Nayarin inisip nen Ester ya aliwan ganggana labat so nagustoan na ari; mas importante so masimpit tan mapaabeban ugali—mataltalag so ontan ya too diman ed palasyo. Duga kasi iisipen to?
Sarag Moy Mansiansian Mapaabeba Anggano Nasusubok
12 Makatulong so inkamapaabeba pian say panangawes, panag-ayos, tan kakikiwas tayo et naynay ya desente tan marespeto. Amta tayon ag-itayo nagustoan na arum no manpasirayew odino no alaen tayoy atension da. Mas nagustoan da tayo no “mareen tan maulimek” itayo. (Basaen so 1 Pedro 3:3, 4; Jer. 9:23, 24) No walad puso tayo so inkamapasirayew, ompaway lanlamang itan ed kiwas tayo. Singa bilang, ompan ipalikas tayon wala ray espisyal ya pribilehyo tayo, wala ray amta tayon impormasyon ya ag-amta na arum, odino wala ray kaaro tayon walaan na responsabilidad ed organisasyon. Odino ompan no walay ipapaliwawa tayo et singa sikatayo labat so nanlapuan na amin ya ideya, anta diad tua et piga-pigaray nantutulongan ed satan. Balibalin alimbawa lamet si Jesus ed saya. Maslak ed saray imbaga to et inala odino imbase tod Hebreon Kasulatan. Ontan so mapaabeban ginawa to pian naamtaan na saray ondedengel ya nanlapud si Jehova iray ibabangat to tan aliwan sarili ton karunongan o kakabatan.—Juan 8:28.
Saray Espiritual a Kayamanan
Kasin Antam?
Akalmo iray researcher na Persian cuneiform ya ditan et abitla so laki ya say ngaran to et Marduka (o Mardokeo diad Pangasinan). Sikatoy sakey ya opisyal na gobierno. Posiblin say trabaho to et accountant diad syudad na Susan. Imbaga nen Arthur Ungnad, sakey ya eksperto ed Oriental history, ya nilikud ed Biblia, sayan dokumento so “sankaunaan ya pakabasaan ed ngaran ya Mardokeo.”
Manlapu lad satan ya report nen Ungnad, in-translate na saray scholar so dakel nin Persian cuneiform. Kaiba ed satan iray clay tablet ya nalmo ed saray geray na syudad na Persepolis. Nalmo itan na saray archeologist diad saray geray na opisina na Treasury, ya asingger ed padir na syudad. Unong ed tantiya, sarayan clay tablet et nen panaon ni nen Xerxes I. Akasulat itan ed lenguahe na saray Elamita, tan nabasa ditan so pigaran ngaran ya abitla ed libron Ester.
Nabasa ed pigaran Persepolis clay tablet so ngaran ya Marduka, ya nantrabaho bilang managkopya ed palasyo ed Susan legan na uley nen Xerxes I. Abitla ed sakey ya clay tablet ya si Marduka et sakey ya translator. Sayan detalye et eksakto ed deskripsion na Biblia tungkol ed si Mardokeo. Sikatoy sakey ya opisyal ed palasyo nen Arin Ahasuero (o Xerxes I) tan makasalita na ag-onkulang ed duaran lenguahe. Lanang ya akayurong si Mardokeo ed puerta na palasyo na ari diad Susan. (Est. 2:19, 21; 3:3) Sayan puerta na palasyo et balbaleg ya bilding ya pantratrabahoan na saray opisyal na palasyo.
Sayan Marduka ya abitla ed saray clay tablet et amayamay so pamparehoan to ed si Mardokeo ya abitla ed Biblia. Nambilay ira ed parehon panaon, parehon lugar, parehoy trabaho ra, tan parehoy lugar na nantrabahoan da. Amin iratan et ebidensya ya posiblin si Marduka tan Mardokeo et saksakey ya too.
MAGMALIW YA EPEKTIBO ED MINISTERYO
PANAMEGLEY NEN JESUS TAN SARAY ANGHEL
3 Kakkaukolan nen Pablo so tulong. Nen manga 56 C.E., sikatoy inggayugoy na saray totoo ed paway na templo diad Jerusalem ta labay dan pateyen. Diad sinmublay ya agew, nen inawit day Pablo ed Sanhedrin, labay da lamet ya pateyen lapud petang na ulo da. (Gawa 21:30-32; 22:30; 23:6-10) Seguro diad saman ya agawa ed si Pablo, nayarin naisip to, ‘Anggad kapigan ko kasi itepel iyan irap?’
4 Anton tulong so naawat nen Pablo? Diad samay labi ya inaresto si Pablo, ‘inmalagey ed abay to so Katawan’ ya Jesus, tan inkuan to: “Manpakpel ka! Ta no panon a sigpot mon tatasian ed Jerusalem so nipaakar ed siak, ontan met so nepeg a pantasim diad Roma.” (Gawa 23:11) Seguradon apaseseg si Pablo! Sikatoy kinomendaan nen Jesus ed balbaleg ya agawaan tod Jerusalem. Tan insipan to ya makasabi si Pablo ed Roma tan ituloy toy manpulong diman. Lapud satan, seguradon linmigen so liknaan nen Pablo, ya singa ugaw a sankalakap na maar-aron ama to.
5 Anto ni ran irap so dinalan nen Pablo? Manga duay taon kayari na samay agawa ed Jerusalem, sikatoy linmugan ed barko paonla ed Italya. Diad dayat et biglan binmagyo na agaylay kasil, tan inisip na saray marino tan saray kaiba ton akalugan ya ompatey la ra. Balet kalmado labat si Pablo. Akin ey? Oniay imbaga to ed saray akalugan ed barko: “Nen kalabian et inmalagey ed abay ko so sakey ya anghel na Dios a dadayewen ko tan panlilingkoran ko tan inkuan to: ‘Agka natatakot, Pablo. Nepeg kan onarap ed Cesar, tan iliktar na Dios so amin a kaibam ed barko.’” Imbaki nen Jehova so sakey ya anghel pian uliten imay panamaseguro To ed si Pablo ya imbaga to la nen unaan panamegley nen Jesus. Tan tinmua itan ya insipan nen Jehova ta akasabi ed Roma si Pablo.—Gawa 27:20-25; 28:16.
6 Anton tulong so awaten tayo? Seguradon tulongan itayo nen Jesus a singa ginawa to ed si Pablo. Singa bilang, oniay insipan nen Jesus ed amin ya Kristiano: “Wala ak ed sikayo ed amin ya agew anggad kaunoran a parte na sistema na mundo.” (Mat. 28:20) Napapaseseg itayo ed saratan ya imbaga nen Jesus. Akin? On ta manbibilay tayo ed agaylay irap ya panaon tan kaukolan tayoy mananos. Singa bilang, no inateyan tayo na kapamilya o kaaro, ompan aliwa labat ya pigaran agew so panermen tayo. Nayarin ombayag ni ingen na pigaran taon. Wala met iray agagi tayo ya mairap so situasyon da lapud matatken la ra. Saray arum et nadi-depress tan mair-irap dan labanan so negatibon nalilikna ra. Anggan wala ray ontan ya dadalanen tayo, ombibiskeg so liknaan tayo lapud amta tayo ya tulongan itayo nen Jesus diad “amin ya agew,” anggan diad saray sankairapan ya agew na bilay tayo.—Mat. 11:28-30.
7 Ipapaseguro ed sikatayo na Biblia ya tulongan itayo nen Jehova panamegley na saray anghel to. (Heb. 1:7, 14) Singa bilang, tutulongan tan igigiya itayo na saray anghel legan tayon ipupulong so “maong a balita na Panarian” ed saray totoo “diad kada nasyon tan tribu tan lenguahe.”—Mat. 24:13, 14; basaen so Apocalipsis 14:6.
SETYEMBRE 11-17
KAYAMANAN ED SALITA NA DIOS | ESTER 3-5
“Tulongan so Arum ya Nagawaan Day Sankaabigan Da”
mwbr23.09—it-2 431 ¶7
Mardokeo
Agdinmakmomo ed si Haman. Kayari to ya, si Haman et ginawa nen Ahasuero ya manunan ministro. Ingganggan nen Ahasuero ya amin ya walad puerta na palasyo to et ondakmomo ed si Haman lapud inmatagey so posisyon to. Balet mapekder itan ya tinanggian nen Mardokeo tan imbaga to ya sikatoy sakey ya Judio. (Es 3:1-4) Ipapanengneng na sayan ginawa nen Mardokeo bilang sakey ya dedikadon Judio, ya say rason et lapud relasyon to ed Dios ton si Jehova. Amta to ya no ondakmomo ed si Haman, aliwa labat itan ya basta idakmomo ya singa gagawaen na saray Israelita nensaman bilang panamagalang ed saray walaan na atagey ya posisyon bilang manuley. (2Sa 14:4; 18:28; 1Ar 1:16) Diad kipapasen nen Haman, walay maabig ya rason nen Mardokeo no akin ya agdinmakmomo. Nayarin sakey ya Amalekita si Haman, tan imbaga nen Jehova ya sikatoy miguerra ed saray Amalekita “diad ilabas na saray henerasyon.” (Ex 17:16.) Parad si Mardokeo, say isyu et aliwa labat ya nipaakar ed politika noagta nalalanor so integridad to ed Dios.
mwbr23.09—it-2 431 ¶9
Mardokeo
Nausar Pian Iliktar so Israel. Anggano walay ganggan ya pateyen so amin ya Judio ed empiryo, imbalikas nen Mardokeo so pananisia to ya say rason no akin ya nagmaliw ya reyna si Ester ed saman ya panaon et pian niliktar iray Judio. Imbaga tod si Ester so ambelat ya responsabilidad to tan binilin to ya mikasi tan onkerew na tulong ed ari. Anggano nayarin ompatey si Ester no gawaen to itan, inmunor nin siansia.—Es 4:7–5:2.
Inyagel To ray Totoo na Dios
22 Seguradon tinmakot tan kinmapuy ya maong si Ester nen akasabid sikato itan ya mensahe. Saya lay sankabalgan ya subok ed pananisia to. Impaibaga tod si Mardokeo so rason no akin ya antakot ton gawaen imay pagagawa to. Impanonot to imay ganggan ya siopaman ya onlad ari ya ag-impatawag et pateyen, nilikud labat no iyunat na ari so balitok a setro to. Wala tay rason ya kasian nen Ahasuero si Ester anta anggan si Vasti et agto kinasian sanen impatawag to balet ta aglinma? Imbaga met nen Ester ed si Mardokeo ya sikatoy 30 agew lan ag-impatawag na ari! Isipen laingen nen Ester ya ompan anguman lay nonot na ari, ya agto la labay so reyna to!—Est. 4:9-11.
23 Pinabiskeg nen Mardokeo so pananisia nen Ester. Mapekder ton imbaga ya no anggapoy gawaen nen Ester, walan walay sananey ya panlapuay kiliktar na saray Judio. Imbaga to met ya aliwan segurado ya agnadamay si Ester sano pateyen da la ray kabaleyan to. On, impanengneng nen Mardokeo so mabiskeg ya pananisia tod si Jehova—ya agton balot abuloyan a naupot iray totoo To tan agnasumpal iray sipan To. (Jos. 23:14) Insan imbaga nen Mardokeo ed si Ester: “Antoy antam no say makasengeg na impagmaliw mon reyna et lapud panaon a singa saya!” (Est. 4:12-14, Maung a Balita) Agta maabig ya aligen tayoy Mardokeo? Sikatoy sigpot ya nanmatalek ed Dios a Jehova. Ontan tayo met kasi?—Uli. 3:5, 6.
Saray Espiritual a Kayamanan
Pangidepensad Kawayangan a Mandayew
14 Singa si Ester tan Mardokeo nensaman, idedepensa na totoo nen Jehova natan so kawayangan dan mandayew ed sikato diad paraan ya igaganggan to. (Est. 4:13-16) Wala kasi nitulong mo? On wala. Sarag mon regular ya ipikasi iray agagi tayon naiirapan lapud ag-inkahustisya. Baleg so nitulong na saratan ya pikakasi ed saray agagi tayon naaagrabiado tan napapasegsegang. (Basaen so Santiago 5:16.) Kasin eebatan nen Jehova iratan ya pikakasi? Ipapanengneng na saray impanalo tayod korte ya talagan eebatan to iratan!—Heb. 13:18, 19.
SETYEMBRE 18-24
KAYAMANAN ED SALITA NA DIOS | ESTER 6-8
“Alimbawa na Maong ya Komunikasyon”
Makabat, Makpel, tan Agmakasarili
15 Legan ya maanos ya pinalabas nen Ester so sakey nin agew antis ton ibagay kerew tod ari, nanggawa si Haman na kababaingan ton mismo. Agta posiblin si Jehova so ag-amaugip ed ari? (Uli. 21:1) Talagan duga imay ibabaga na Biblia ya maanos tayon “alagden” so ikiwas na Dios! (Basaen so Miqueas 7:7.) No ontan so gawaen tayo, napaneknekan tayon agtayon balot naparaan so solusyon na Dios ed saray problema tayo.
Makmakpel ya Nansalita
16 Aglabay nen Ester ya suboken ni pasensia na ari; diad komaduan ponsia, kaukolan to lan ibaga so amin ya labay ton ibaga. Panon to balet? Maong labat ta sikatoy tinepetan lamet na ari no antoy kerew to. (Est. 7:2) Saya la so dugan “panaon a pansalita” nen Ester.
Makabat, Makpel, tan Agmakasarili
17 Seguradon nampikasi ni Ester ed Dios antis ton imbaga irayan salita: “No labay na Kagalang kon Ari ya ipagamor so mogmon kerew ko, say pilalek ko et say pakapaliis ko tan saray totook ed patey.” (Est. 7:3, Maung a Balita) Imanoen ya impaseguro tod si asawa to ya respetoen toy antokaman ya desisyon to. Arawin dalin si Ester ed si Vasti ya datin asawa na ari, ta ginagala ton pabaingay asawa to! (Est. 1:10-12) Sakey ni, agbalot imbaga nen Ester ya alingoy ari ed impanmatalek tod si Haman. Imbes, akikasi ya sikatoy ipaliis komon na ari ed patey.
Makabat, Makpel, tan Agmakasarili
18 Seguradon abigla so ari tan mankelaw ed satan ya kerew. Siopa kasi makpel ya mamatey ed reyna to? Intuloy nen Ester: “Saray totook tan siak et nilako kamin pateyen. No nilako kamin aripenen labat komon, andi bali la, agak la komon onesel, tan agta ka la sigensigenen nipaakar ed saya. Balet ngalngali da ka mi la pateyen, paandipaten!” (Est. 7:4, Maung a Balita) On, prangkan imbaga nen Ester so problema, tan imbaga to nin agla komon onesel no aripenen da ra labat. Balet, kaukolan toy mansalita ta anggan say ari et apektado ed satan ya planon pamatey ed sikara.
19 Naaralan tayod alimbawa nen Ester so dugan paraan na panagkombinse. No bilang ta walay labay mon ipaamta ya seryoson problema ed sakey ya toon inad-arom odino walaan na autoridad, baleg so nitulong na inkaanos, inkamarespeto, tan inkaprangka.—Uli. 16:21, 23.
Saray Espiritual a Kayamanan
Saray Pabitar ed Libro na Ester
7:4—Panon a “makapauges ed ari” so pamalanit ed saray Judio? Diad mataktikan impanukoy nen Ester ed posibilidad a nilako iray Judio bilang ariripen, nipabitar to so baleg a pakaperdian na ari no sikaray naderal. Say 10,000 a piraso na pilak ya insipan nen Haman so agmangarum ed kayamanan na ari no ikompara ed kayamanan a napawala komon no say ninonot nen Haman et ilako iray Judio bilang ariripen. No nasumpal so plano nen Haman, napilanor so reyna ya ompatey.
MAGMALIW YA EPEKTIBO ED MINISTERYO
MAGMALIW YA MAONG A MANAGBANGAT YA SINGA SI SANTIAGO
8 Aliwan atagey so inaral nen Santiago kanian seguradon abebbebay pakanengneng na saray lider na relihyon ed sikato, ya singa pakanengneng da met ed si apostol Pedro tan Juan. Ipapasen dan “ordinaryo [labat] iran totoo.” (Gawa 4:13) Pero no basaen tayoy libron Santiago ya insulat to, nanengneng tayo ya sikatoy nagmaliw ya maong a managbangat. Singa si Santiago, ompan aliwan atagey so inaral tayo. Pero diad tulong na masanton espiritu nen Jehova tan panangipasal na organisasyon to, magmaliw tayo met ya maong a managbangat. Aralen tayo pay paraan na panagbangat nen Santiago, tan nengnengen tayo no anto ray naaralan tayo ed sikato.
9 Simpli labat iray salitan inusar nen Santiago tan aliwan komplikado so panagbangat to. Kanian atalosan ya tampol na saray ibabangat to no antoy kaukolan dan gawaen tan no antoy makatulong pian nagawaan da itan. Singa bilang, nen impaimano tod saray Kristiano ya kaukolan dan sungdoan o anosan iray subok tan ag-ira dapat ombabarong ed si Jehova, onia labat kasimpli so imbaga to: “Ipasen tayon maliket iramay nansungdo. Nadngelan yo so impansungdo nen Job tan naamtaan yo so ginawa nen Jehova ed sikato, no panon a si Jehova et maar-aro tan mapangasi.” (Sant. 5:11) On, imbase nen Santiago ed Kasulatan iray bilin to. Inusar toy alimbawa nen Job pian natalosan na saray ibabangat to ya bebendisyonan ya lanang nen Jehova iray matoor ed Sikato. Simpli labat so panagbangat to awa? Lapud satan, say nirayew et si Jehova, aliwan sikato.
10 Say leksion: Nepeg ya simpli labat so panagbangat mo, tan ibasem itan ed Biblia. No manbabangat tayo, agtayo labay ya pabiliben so arum ed karakel na amta tayo. Dapat say natilak ed nonot da et say karunongan nen Jehova tan nalikna dan inar-aro to ra. (Roma 11:33) Nagawaan tayo itan no lanang tayon ibase ed Biblia iray ibabaga tayo. Singa bilang, agtayo ibabaga ed Bible study tayo ya, ‘No siak so walad situasyon mo, oniay gawaen ko.’ Mas maabig no tulongan tayo ran mannonot no siopan karakter ed Biblia so sarag dan aligen, tan isipen da no antoy nalikna nen Jehova ed saray gawaen da ya desisyon. No ontan so niyugali da, si Jehova so lanang ya sankanonot dan paliketen, aliwan sika o arum ya too.
SETYEMBRE 25–OKTUBRE 1
KAYAMANAN ED SALITA NA DIOS | ESTER 9-10
“Inusar Toy Autoridad To Pian Tulongan so Arum”
mwbr23.09—it-2 432 ¶2
Mardokeo
Sinalatan la nen Mardokeo si Haman bilang prime minister tan niiter lad sikato so singsing na ari ya uusaren ed panagtatak na saray dokumento ya ipawit ed saray probinsya. Inter na ari so abung nen Haman ed si Ester, tan si Mardokeo so ginawa nen Ester ya manangasikaso ed satan. Insan inusar nen Mardokeo so autoridad na ari pian manggaway ganggan ya mangiter na legal ya karapatan ed saray Judio ya idepensa so sarili da. Malikeliket iray Judio ta niliktar ira. Dakel met ya walad sakop na Empiryo na Persia so pinmanig ed saray Judio, tan kasabi Adar 13, say agew ya pangipaakseb ed saray ganggan, akaparaan la ray Judio. Anggapoy agawaan na arum ya opisyal lapud atagtagey lay posisyon nen Mardokeo. Diad Susan, anggad sinmublay nin agew so panlalaban. Inatey so masulok ya 75,000 ed saramay mamubusol ed saray Judio diad interon Empiryo na Persia, kaiba lay samploran ananak nen Haman. (Es 8:1–9:18) Kinompirma nen Ester so ganggan ya insulat nen Mardokeo ya kada taon et selebraan ed koma-14 tan koma-15 ya agew na Adar so piesta na panliliket, panangan, tan paniiteran na regalo ed sakey tan sakey tan ed saray mairap bilay. Tan tinawag itan ya saray “agew na Purim.” Inawat na saray Judio iyan piesta tan ingganggan da ya selebraan met iya na saray onsublay ya henerasyon tan na amin ya ondapag ed sikara. Bilang onkokomadua ed empiryo, rerespetoen met si Mardokeo na saray totoon akadedika ed Dios, saray Judio. Tan tuloytuloy ya gagawaen nen Mardokeo iray bengatlan parad pankaabigan da.—Es 9:19-22, 27-32; 10:2, 3.
mwbr23.09—it-2 716 ¶5
Purim
Gagala. Anggaman wala ray komentarista ya mangibabagan say Piesta na Purim ya seselebraan na saray Judio natan et nagmaliw lan sekular ya okasyon imbes ya relihyoso, tan no maminsan et wala ray alablabas ya gagawaen da legan na satan ya selebrasyon, aliwan ontan so situasyon nen ginmapo itan tan diad saray inmuunan impanselebra ed satan. Si Mardokeo tan Ester et parehon lingkor na tuan Dios ya Jehova, tan inggapo itan ya piesta bilang panamagalang ed Sikato. Nibaga ya akaliktar iray Judio nensaman lapud tulong nen Jehova a Dios, ta say rason no akin ya linmesa so isyu et lapud matoor si Mardokeo ed si Jehova, labay ton si Jehova labat so dayewen to. Nayarin sakey ya Amalekita si Haman, tan say nasyon ya nanlapuan to et espisipikon ingganggan nen Jehova ya pateyen. Rerespetoen nen Mardokeo so ganggan na Dios kanian agto labay so ondakmomo ed si Haman. (Es 3:2, 5; Ex 17:14-16) Nanengneng met ed saray imbaga nen Mardokeo ed si Ester (Es 4:14) ya manmamatalek ed mas atagey ya pakayari pian niliktar iray Judio. Tan ipapanengneng met na impanayunal nen Ester antis ya linmad ari parad samay unonan kerew to ya imbitaan ed sakey ya panangan, ya kinmerew na tulong ed Dios.—Es 4:16.
“Magmaliw ya Umaalig ed Dios” Diad Panangusar Mo na Pakayari
12 Mangitatarya si Jehova na saray manangasikaso pian mangidaulo ed Kristianon kongregasyon. (Hebreos 13:17) Nepeg ya usaren na sarayan kualipikadon lalaki so inter na Dios ya autoridad da pian mangiter na nakakaukolan a tulong tan pian pabulaslasen so espiritualidad na pulok. Kasin lapud sayan betang et pakatawan la iray mamatatken ed saray kapananisiaan da? Andin balot! Nepeg ya asimbang tan mapaabeba so panmoria na mamatatken ed betang da diad kongregasyon. (1 Pedro 5:2, 3) Ibabaga na Biblia ed saray manangasikaso: “Pastolan yo so kongregasyon na Dios, a satan so sinaliw to ed dala na dilin Anak to.” (Gawa 20:28, NW) Mabiskeg iyan rason diad matamoy a pantrato ed balang sakey a membro na pulok.
13 Nayarin iyilustra tayo ed onia. Papaasikaso na maapit a kaarom so pinabpabli ton kayarian. Antam a mabli so impanaliw na kaarom ed satan. Agta alwaran mon maong itan? Mipadpara, inmatalek na Dios ed mamatatken so responsabilidad a mangasikaso ed tuan pinablin kayarian: say kongregasyon, a saray membro so niyaliling ed saray karnero. (Juan 21:16, 17) Pinabli nen Jehova iray karnero to—ontanlan pinabpabli, a sinaliw to ira diad mablin dala na bogbogtong ya Anak to, si Jesu-Kristo. Sankablian a presyo so impanaliw nen Jehova parad saray karnero to. Nodnonoten itan na mapaabeban mamatatken tan mitunosan ed satan so pantrato ra ed saray karnero nen Jehova.
Saray Espiritual a Kayamanan
Saray Pabitar ed Libro na Ester
9:10, 15, 16—Anggaman inyabuloy na ganggan a saray Judio so mangala ed saray asamsam ed bakal, akin ya agda ginawa itan? Say agda impangala ed saray asamsam et malinew a pakapatnagan a say gagala ra lambengat et pian niliktar so inkasikara, aliwan say manpayaman.
OKTUBRE 2-8
KAYAMANAN ED SALITA NA DIOS | JOB 1-3
“Itultuloy Yon Ipanengneng no Panon Kaaralem so Panangaro Yod si Jehova”
Aligen so Pananisia tan Inkamatulok nen Noe, Daniel, tan Job
16 Saray subok ed si Job. Baleg iran pananguman so agawad bilay nen Job. Antis ya asubok, sikato so “sankayamanan ed amin a taga Bukig.” (Job 1:3) Sikatoy mayamyaman, kabkabat, tan rerespetoen ya maong. (Job 29:7-16) Balet anggano ontan so kipapasen nen Job, aliwan atagtagey so pakanengneng tod sarili to odino agto inisip ya agto kaukolan so Dios. Diad tua, sikatoy tinawag nen Jehova ya ‘lingkor ko,’ tan inkuan to ni: “Sikatoy maptek a too a walaay integridad, tatakotan toy Dios tan aarawian toy kaugsan.”—Job 1:8.
17 Diad antiktikey a panaon, anguma-uman so bilay nen Job. Inmirap a maong so bilay to tan naermenan a maong ya anggad labay to lay ompatey. Amta tayon say rason et say managpauges ya si Satanas, ya inakusaan toy Job ya mandadayew labat ed Dios lapud sarilin pankaabigan to. (Basaen so Job 1:9, 10.) Agpinaandin tampol nen Jehova itan ya mauge-uges ya akusasyon. Imbes, inikdan toy pankanawnawa si Job ya pruebaan so katooran to, ya sikatoy mandadayew ed Dios lapud tua tan agmakasarili so panangaro to.
Pansiansiam so Integridad Mo!
10 Panon kan nalalanor ed isyu ya pinalesa nen Satanas nipaakar ed si Job? Pareho so akusasyon nen Satanas ed kada sakey ed sikatayo. Singa to ibabaga ya agmon talaga inaro si Jehova a Dios, ya ontunda ka lan manlingkor ed Sikato pian niliktar mo labat so bilay mo, tan agmo kuno napansiansiay integridad mo! (Job 2:4, 5; Apo. 12:10) Antoy naliliknam ed satan ya akusasyon to? Ansakit, awa? Balet isipen iya: Ontan lay talek nen Jehova ed sika kanian iikdan to ka na alay abig ya pankanawnawa. Aabuloyan nen Jehova si Satanas ya suboken so integridad mo. Matalek si Jehova ya sarag mon pansiansiaen so integridad mo tan makatulong ka pian napaneknekan ya matila si Satanas. Tan insipan nen Jehova ya tulongan to ka pian nagawaan mo itan. (Heb. 13:6) Talagan baleg a pribilehyo ya manmamatalek ed sika so Soberano na uniberso! Kasin natatalosan mo la natan no akin ya importantin maong so integridad? No walay integridad tayo, sarag tayon paneknekan ya matila si Satanas, tan napasanto tayoy ngaran na Ama tayo tan nasuportaan tayoy pananguley to. Anto ray gawaen tayo pian napansiansia tayoy integridad tayo?
Saray Espiritual a Kayamanan
Saray Naaralan Tayo ed Sampot Iran Imbaga nen Jesus
9 Antoy imbaga nen Jesus? Nen asingger lan nauyosan na linawa si Jesus, inyeyag to: “Dios ko, Dios ko, akin et pinaulyanan mo ak?” (Mat. 27:46) Anggapoy nabasad Biblia no akin ya imbaga to man. Pero antoy naamtaan tayo ed satan ya imbaga to? Nen imbaga itan nen Jesus, sinumpal to imay propesiya ya nabasad Salmo 22:1. Sakey ni, malinlinew ed satan ya imbaga to ya sikatoy agprinotektaan nen Ama to tan ag-angiyan na “alar ed paliber” to. (Job 1:10) Amta nen Jesus ya talagan inabuloyan nen Ama to ya sikatoy pairapen na saray mamubusol ed sikato pian nasubok so pananisia to anggad ipapatey. Anggapo lay arum a too ya dinmalan ed onia kairap ya subok. Ontan met, prueba iyan imbaga to ya talagan anggapoy kasalanan to tan agto kanepegan so ompatey.
MAGMALIW YA EPEKTIBO ED MINISTERYO
MAGMALIW YA MAONG A MANAGBANGAT YA SINGA SI SANTIAGO
11 Natatalosan nen Santiago so situasyon na agagi. Nanengneng tayod samay sulat nen Santiago ya amta to ray subok tan problema ya dadalanen na saray kapara ton Kristiano, tan binilin to ra. Singa bilang, wala ray agagi ya agdan tampol iyaaplika iray nanaaralan da. (Sant. 1:22) Say arum et papaboran da ray agagin mayayaman. (Sant. 2:1-3) Wala met iray agagi ya agda nakontrol so dila ra. (Sant. 3:8-10) Anggano wala ray kakapuyan na agagi, ag-inisip nen Santiago ya agla ra manguman. Tua, prangka so impanbilin to, pero impalikna tod sikara ya gagawaen to iman ta inar-aro to ra. Imbaga to met ya no nanairapan iran manguman, manpatulong irad saray mamatatken.—Basaen so Santiago 5:13-15.
12 Say leksion: Talosan so situasyon na arum, tan tandaan ya sarag day manguman. Ompan wala ray Bible study tayo ya nanairapan ya mangiyaplika ed saray nanaaralan da. (Sant. 4:1-4) Kaukolan so panaon pian say sakey et nauman to ray aliwliwan ugali to tan nipanengneng to ray ugali o kualidad ya makapaliket ed si Jehova. Singa si Santiago, agtayo manaalangan ya ibaga ed iyaaralan tayo no antoy kaukolan ton umanen, tan ipalikna tayod sikato ya sarasarag ton gawaen itan. No say sakey ya Bible study et talagan mapaabeba, sikatoy pakiwasen nen Jehova ya manguman tan iyasingger to ed organisasyon to.—Sant. 4:10.
13 Aliwan atagtagey so pakanengneng nen Santiago ed sarili to. Anggano kuya nen Santiago si Jesus tan wala ray pribilehyo to, agto inisip ya sikatoy espisyal o mas importante nen saray agagi. Tinawag to ray kapara ton Kristiano ya “inad-arok ya agagi.” (Sant. 1:16, 19; 2:5) Agto impalikna ed arum ya agan balot nalilingo. Diad tua, impila to ingen so sarili to nen imbaga ton: “Amin tayo et naynay a nalilingo.”—Basaen so Santiago 3:2.
14 Say leksion: Agtayo lilingwanan ya amin tayo et makasalanan. Aliwan atagtagey dapat so pakanengneng tayod sarili tayo. No say ipapaliknam ed Bible study’m et agkan balot nalilingo, ompan isipen to ya imposiblin naunor to ray ganggan na Dios. Pero no aminen tayod sikato ya nanairapan tayo met no maminsan ya unoren iray ganggan na Biblia, tan iyistorya tayod sikato no panon itayon tutulongan nen Jehova, nanengneng na Bible study tayo ya sarasarag to met ya unoren si Jehova.
OKTUBRE 9-15
KAYAMANAN ED SALITA NA DIOS | JOB 4-5
“Manalwar ed Saray Aliwan Tuan Impormasyon”
mwbr23.09—it-1 713 ¶11
Elifaz
Sakey ed saray taloran kakaaro nen Job. (Job 2:11) Sakey a Temanita, kanian nanlapud poli nen Abraham tan arawi lan kanayon nen Job. Ipapasirayew to tan saray henerasyon ya sinmublay ed sikato so karunongan da. (Jer 49:7) Diad saray taloran “managligliwa,” ompapaway ya si Elifaz so sankaimportantian tan mas maimpluensya, tan nayarin sikato met so sankatatkenan ed sikara. Sikaton lanang so unona ya mansasalita ed taloran serye na impandebate da, tan mas andukey iray ibabaga to.
Ipulisay so Makapuy a Kanonotan!
Oniay inkuan nen Elifaz sanen nonodnonoten to so aminsan ya ekstraordinaryon eksperiensya to: “Sakey ya espiritu so linmabas ed arap na lupak; say bago na laman ko binmegas. Inmalagey a mareen, balet agko ayarian ya imbiig so ereng to; sakey a nengneng so wala nensaman ed arap na saray matak: wala nensaman so deen, tan nadngel ko so boses.” (Job 4:15, 16) Anton klase na espiritu so angimpluensya ed kanonotan nen Elifaz? Saray sinmaginonor a makritikon salita so mangipapanengneng a saman ya espiritu et seguradon aliwan sakey ed saray matunong ya anghel na Dios. (Job 4:17, 18) Sakey iman a marelmeng ya espiritun pinalsa. Ta no andi, akin et binaat nen Jehova si Elifaz tan saray duaran kaiba to diad impangibaga na tilatila? (Job 42:7) On, si Elifaz so inimpluensyaan na demonyo. Saray komento to so mangipaparungtal na agmaridios a kanonotan.
Sumpaen so Propaganda nen Satanas
Inusar nen Satanas si Elifaz, sakey ed saray ombibisitan kaaro nen Job pian ikatunongan ya agsarag na totoo a resistian so panangataki nen Satanas. Diad impanukoy ed totoo bilang “saray manaayam dia ed saray abung a langa,” oniay inkuan nen Elifaz ed si Job: “Say panangiletnegan da wala ed dabok, a natapiak ed arap na bokbok! Et nanleetan na kabuasan tan labi sikara so nabagbag, natawtaw ira lawas ya andi bengatla a mangimano.”—Job 4:19, 20.
Diad arum nin parte na Biblia, nikompara itayo ed “saray pananginan a gawa ed pitek.” (2 Cor. 4:7, NW) Maletey itayo lapud atawir a kasalanan tan inka-imperpekto. (Roma 5:12) No diad dilin biskeg tayo labat, mainomay itayon napalikdo nen Satanas. Balet bilang Kristiano, makapanilalo itayo ed tulong nen Jehova. Anggaman wala ray kakapuyan tayo, mabli itayo ed imaton na Dios. (Isa. 43:4) Kaaruman ni, papagamoran nen Jehova na masanton espiritu iramay onkekerew ed satan. (Luc. 11:13) Iikdan itayo na satan na “pakayari a mas mabiskeg nen say pakayari na too” pian natalonaan tayo so antokaman a kairapan ya ipaarap nen Satanas ed sikatayo. (2 Cor. 4:7, NW; Fil. 4:13) No sumpaen tayo so Diablo tekep na “mabiskeg a pananisia,” pabiskegen itayo na Dios. (1 Ped. 5:8-10) Kanian agtayo nepeg a takotay Satanas a Diablo.
mrt 32 ¶13-17
Protektaan Moy Sarilim ed Saray Aliwan Tuan Impormasyon
● Amtaen so nanlapuan na istorya tan say ibabaga na satan
No antoy ibabaga na Biblia: “Seguroen yo so amin a bengatla.”—1 Tesalonica 5:21.
Antis mon panisiaan so sakey ya balita odino ipasa itan, anggan saramay kabkabat la odino aminpiga lan imbalita, seguroen mo ni no kasin tua itan. Panon?
Amtaen mo no kasin napantiwalaan so nanlapuan na impormasyon. Sarag na saray kompanya na news media odino arum nin organisasyon ya umanen so sakey ya istorya pian nasuportaan so sarili dan panlabayan odino papanisiaan da ed politika. Ikomparam so karga na sakey ya balita ed arum nin mangibabalita ed satan. No maminsan, makakapangipasa iray kakaarom na aliwan tuan impormasyon diad email odino diad saray post da ed social media. Kanian antis mon panisiaan so sakey a balita, amtaen mo ni so nanlapuan na satan.
Seguroen ya sankabaloan tan susto so karga na satan. Nengneng mo ray petsa, saray detalye ya sarag mon i-research, tan saray mabiskeg ya ebidensya ya onsusuporta ed satan ya balita. Tan kaukolan so lalon panalwar no ataptapew so impangibalita ed sakey ya komplikadon impormasyon odino ginawa itan diad paraan ya naalay liknaan mo.
Saray Espiritual a Kayamanan
Mansiansian Mapekder, Pian Manalo ed Lumba Parad Bilay
Say pagmaliw a kabiangan na sankamundoan ya organisasyon na saray tuan managdayew so walaan na mabiskeg tan makapaligen ya epekto ed sikatayo. Agaylan bendisyon so pakapilimog ed ontan a maaro tan interon globon impanaagi! (1 Pedro 2:17) Tan napaligen tayo met iray kapananisiaan tayo.
Imanoen pa so inkamatulong na maptek a toon si Job. Anggan say mankuankuanan a managligliwa a si Elifaz et apaskar a mamidbir: “Saray salitam sinayakop da so napepelag nensaman, tan pinasekder mo so saray makapuy a pueg.” (Job 4:4) Komusta itayo ed sayan pamaakaran? Responsabilidad na balang sakey ed sikatayo a tulongan so agagi tayon lalaki tan bibii ed espiritual pian mansungdo ed panaglingkor ed Dios. Diad pidedeneng tayo ed sikara, nayarian tayoy onkiwas unong ed saray salitan: “Pabiskegen yo so saray makapuy a lima, tan pakasilen yo so saray makapuy a pueg.” (Isaias 35:3) Kanian akin ya aggawaen a kalat a pabiskegen tan pasesegen so pigaran kaparan Kristiano kada milimog ka ed sikara? (Hebreos 10:24, 25) Say makapaseseg a komendasyon tan panangapresya ed tuloytuloy a pansasagpot dan napaliket si Jehova so peteg a makatulong ed sikaran mansiansian mapekder tekep na ilalon manalo ed lumba parad bilay.
OKTUBRE 16-22
KAYAMANAN ED SALITA NA DIOS | JOB 6-7
“No Singa Agmo La Labay so Manbilay”
Saray Pabitar ed Libro na Job
7:1; 14:14—Anto so kabaliksan na “paskaran a panagkimey” odino “pinasoot a panaglingkor”? Ontan lay inkagonigon nen Job, ya inisip ton say bilay et singa kairap na makapakesaw a paskaran a panagkimey. (Job 10:17) Lapud nigetar so panaon a panayam na sakey ed Sheol, manlapud ipatey ya anggad kioli na sakey a too, inyaliling nen Job itan a panaon diad pinasoot a panaglingkor.
Ililiktar nen Jehova Iramay Nadidismaya
SEGURO naiisip mo met no maminsan ya anta antiktikey la lanti bilay, napnapno ni na problema. (Job 14:1) Kanian wala ray panaon ya onkakapuy so liknaan tayo. Alikna met itan na saray lingkor nen Jehova nensaman. Wala ra ingey labay da lay ompatey. (1 Ara. 19:2-4; Job 3:1-3, 11; 7:15, 16) Balet pinabiskeg ira nen Jehova, say Dios ya nanmatalekan da. Impairekord to ed Biblia so agawa ed bilay da pian nibangat tan napabiskeg tayo.—Roma 15:4.
g-TG 1/12 16-18
Kapag Parang Ayaw Mo Nang Mabuhay
Kahit parang wala nang kapag-a-pag-asa ang sitwasyon mo, tandaan na hindi ka nag-iisa at nakalulungkot na halos lahat ng tao sa ngayon ay nakakaranas ng problema. Sinasabi ng Bibliya: “Ang buong sangnilalang ay patuloy na dumaraing na magkakasama at nasasaktang magkakasama.” (Roma 8:22) Maaaring sa ngayon, parang walang kalutasan ang problema mo; pero sa paglipas ng panahon, kadalasan nang bumubuti ang sitwasyon. Samantala, ano ang makatutulong sa iyo?
Sabihin ang iyong nadarama sa isang may-gulang at pinagkakatiwalaang kaibigan. Ang sabi ng Bibliya: “Ang tunay na kaibigan ay umiibig sa lahat ng panahon, at isang kapatid na ipinanganganak kapag may kabagabagan.” (Kawikaan 17:17) Halimbawa, ang matuwid na taong si Job ay nagsabi sa iba tungkol sa kaniyang ikinababahala. Nang makadama siya ng ‘pagkarimarim sa kaniyang buhay,’ sinabi niya: “Ako ay magbubulalas ng aking pagkabahala tungkol sa aking sarili. Ako ay magsasalita sa kapaitan ng aking kaluluwa!” (Job 10:1) Ang pagsasabi sa iba ng iyong nadarama ay makapagpapagaan ng kalooban mo, at maaaring mabago ang pananaw mo tungkol sa iyong problema.
Sabihin sa Diyos sa panalangin ang nilalaman ng iyong puso. Ayon sa ilan, ang tulong na nagagawa ng panalangin ay nasa isip lang. Pero iba naman ang sinasabi ng Bibliya. Sa Awit 65:2, tinutukoy ang Diyos na Jehova bilang ang “Dumirinig ng panalangin,” at sinasabi ng 1 Pedro 5:7: “Siya ay nagmamalasakit sa inyo.” Idiniriin ng Bibliya na mahalagang magtiwala sa Diyos. Halimbawa:
“Magtiwala ka kay Jehova nang iyong buong puso at huwag kang manalig sa iyong sariling pagkaunawa. Sa lahat ng iyong mga lakad ay isaalang-alang mo siya, at siya mismo ang magtutuwid ng iyong mga landas.”—KAWIKAAN 3:5, 6.
“Ang nasa ng mga may takot [kay Jehova] ay kaniyang isasagawa, at ang kanilang paghingi ng tulong ay kaniyang diringgin, at ililigtas niya sila.”—AWIT 145:19.
“Ito ang pagtitiwala na taglay natin sa kaniya, na, anumang bagay ang hingin natin ayon sa kaniyang kalooban, tayo ay pinakikinggan niya.”—1 JUAN 5:14.
“Si Jehova ay malayo sa mga balakyot, ngunit ang panalangin ng mga matuwid ay dinirinig niya.”—KAWIKAAN 15:29.
Kung sasabihin mo sa Diyos ang hirap na nadarama mo, tutulungan ka niya. Hinihimok ka ng Bibliya na ‘magtiwala sa kaniya sa lahat ng panahon. Sa harap niya ay ibuhos mo ang iyong puso.’—Awit 62:8.
Saray Espiritual a Kayamanan
Dengelen tan Kabaten Iray Agagi, tan Ipanengneng so Pililikna
10 Naalig tayoy Jehova no pansagpotan tayon talosan so sakey tan sakey. Kabaten ya maong iray agagi. Miistoryaan kad sikara antis tan kayari na aral, miulop kad sikara diad ministeryo, tan no posible, imbitaan mo ra ed panangan. No ontan so gawaen mo, ompan naamtaan mo ya say sakey a sister ya singa suplada et mabaing labat manaya, say sakey a brother ya singa materyalistiko et maparawes manaya, odino say saniina ya lanang ya atrasado ed aral et napapasegsegang manaya. (Job 6:29) Siempre, agtayo nepeg ya ‘pibabalian so bilay na arum.’ (1 Tim. 5:13) Balet kaukolan tayon kabaten ya maong iray agagi tan amtaen tayo ray apalabas da tan saray dadalanen dan subok pian mas natalosan tayo ra.
MAGMALIW YA EPEKTIBO ED MINISTERYO
MAGMALIW YA MAONG A MANAGBANGAT YA SINGA SI SANTIAGO
15 Angusar si Santiago na saray ilustrasyon ya ontagos ed puso. Agawaan to itan diad tulong na masanton espiritu nen Jehova, pero seguradon dakel met so naaralan to ed saray ilustrasyon ya inusar na kuya ton si Jesus. Diad sulat nen Santiago, simpli labat iray ilustrasyon ya inusar to tan mainomay ya natalosan iray punto.—Basaen so Santiago 3:2-6, 10-12.
16 Say leksion: Mangusar na ilustrasyon ya ontagos ed puso. No ontan so gawaen mo, tutulongan mo ray ondedengel ed sika ya man-imadyin, kanian ontatak ed isip da iray katuaan ed Biblia. Marundunong ya angusar si Jesus na saray ilustrasyon tan inalig na agi ton si Santiago so alimbawa to. Aralen tayo pay sakey ed saray ilustrasyon ya inusar nen Santiago tan pantongtongan tayo no akin ya epektibo itan.
17 Basaen so Santiago 1:22-25. Akin et epektibo may ilustrasyon nen Santiago tungkol ed too ya ninmengneng ed espiho? On ta indanet na satan so punton labay ton papawayen—ya pian talagan minabang tayo ed Salita na Dios, agtayo labat itan babasaen, kaukolan tayo met ya iyaplika so binasa tayo. Say pinili nen Santiago ya ilustrasyon et amay pamilyar ed saray sinulatan to. Seguradon mani-espiho met ira kanian atalosan day labay ton ibaga. Antoy naaralan tayo ed sayan ilustrasyon? No say sakey et nan-espiho tan agto lanlamang inapiger so itsura to, anggapoy kana na impan-espiho to. Mipadpara, anggapo lanlamang so kana na pambabasa tayoy Biblia no agtayo lanlamang iyaplika iray nababasa tayo tan no agtayo labay so manguman.
18 No mangusar kay ilustrasyon, naalig moy Santiago no tandaan mo iraya: (1) Seguroen ya say usaren mon ilustrasyon et makatulong pian nidanet moy punto ya labay mon papawayen. (2) Mangusar kay ilustrasyon ya pamilyar ed saray ondedengel ed sika. (3) Malinew mon ibaga no antoy naaralan da ed satan. No nanairapan kan manisip na dugarugan ilustrasyon, sarag moy man-research ed Watch Tower Publications Index diad heading ya “Illustrations.” Dakel ditan so nanengneng mon ilustrasyon ya sarag mon usaren. Tandaan mo ya saray ilustrasyon et singa microphone. No panon ya say microphone et pakasilen toy boses mo, saray ilustrasyon et palinewen toy punto ya labay mon idanet. Pero no makatelek lay boses mo, naingongotan iray ondedengel. Mipadpara, no dakdakel so usaren mon ilustrasyon, naelew la ray ondedengel ed sika. Kanian mangusar ka labat na ilustrasyon no say idadanet mo et manunan punto. Tan siempre, tandaan tayo ya say rason no akin ya labay tayoy magmaliw ya maong a managbangat et aliwan pian pabiliben so arum ya too, noagta pian dakel so natulongan tayon magmaliw ya lingkor nen Jehova.
OKTUBRE 23-29
KAYAMANAN ED SALITA NA DIOS | JOB 8-10
“Proprotektaan Itayo na Matoor ya Panangaro na Dios ed Saray Katilaan nen Satanas”
Talaga Kasin Napaliket Tayoy Dios?
Si Job et akaeksperiensya na nantutumbokan ya trahedya ya singa agto met kanepegan. Kanian aliway inisip to. Nankonklusyon ya anggapoy pibabali na Dios no mansiansian matoor odino andi. (Job 9:20-22) Segseguradoy Job ya sikatoy matunong, kanian parad arum, singa to ibabagan mas matunong ni nen say Dios.—Job 32:1, 2; 35:1, 2.
14 Say matoor a panangaro na Dios so manproprotekta ed espiritualidad tayo. Oniay aminsan ya pikakasi nen David ed si Jehova: “Sika so panag-amotan ko; salimbengan mo ak pian agak nagonigon. Paliberan mo ak na panliliket lapud panangiliktar mo. . . . Samay manmamatalek ed si Jehova et apaliberan na matoor a panangaro To.” (Sal. 32:7, 10) Diad panaon na Biblia, saray syudad et apaliberan na padir pian naprotektaan iray manaayam ditan ed saray onsalakay ya kalaban. Mipadpara, say matoor a panangaro nen Jehova et singa padir ya manprotekta ed sikatayo no bilang ta wala ray subok ya posiblin maneral ed espiritualidad tayo. Lapud matoor a panangaro nen Jehova, inyasingger to tayo ed sikato ta labalabay to tayon protektaan.—Jer. 31:3.
Saray Espiritual a Kayamanan
“Siopa so Akaamta La ed Kanonotan nen Jehova?”
19 Antoy naaralan tayo nipaakar ed “kanonotan nen Jehova”? Nepeg a say Salita na Dios so pangalaan tayo na dugan pakatalos ed kanonotan nen Jehova. Agtayon balot komon uukomen si Jehova base ed limitadon panmoria, estandarte, tan panagnonot tayo. Inkuan nen Job: “[Say Dios et] aliwa a sakey a too, a singa siak, pian sikato so ebatan ko, tan onloob kami a bansag ed pangukoman.” (Job 9:32) Singa si Job, sano natatalosan tayo la so kanonotan nen Jehova, napakiwas tayon mangikelyaw na: “Melag labat irayan kabiangan na pakayari to; esaes labat so nadngel tayo. Siopay makapikabat no kaunongay kabaleg na pakayari Dios?”—Job 26:14, MB.
20 Sano babasaen tayo so Biblia, antoy gawaen tayo no wala ray tekston mairap a talosan, lalo la no nipaakar ed panagnonot nen Jehova? No nan-research itayo balet ta siansia nin agmalinew, ipasen tayon nasusubok ed saya so panagmatalek tayo’d si Jehova. Tandaan, diad saray nababasa tayo no maminsan et naiikdan itayo na pankanawnawan ipanengneng so panagmatalek ed saray kualidad nen Jehova. Komon ta mapaabeba tayon bidbiren ya agtayo natalosan so amin a gagawaen to. (Ecl. 11:5) Diad ontan et napakiwas itayon miabobon ed inkuan nen apostol Pablo: “O agaylay kaaralem na kaykayamanan tan karunongan tan pikakabat na Dios! Agaylan agnausisa iray panangukom to tan agnatonton iray dalan to! Ta ‘siopay akaamta ed panagnonot nen Jehova, odino siopay nagmaliw a mananimbawa to?’ Odino, ‘Siopay inmunan angiter ed sikato, ta pian sikatoy bayaran to?’ Ta say amin a bengatla et nanlapud sikato tan wala iratan lapud sikato tan parad sikato. Sikato so nigloria komon ed andi-anggaan. Amen.”—Roma 11:33-36.
OKTUBRE 30–NOBYEMBRE 5
KAYAMANAN ED SALITA NA DIOS | JOB 11-12
“Say Taloran Paraan Pian Nawalaan Tayoy Karunongan tan Minabang ed Satan”
Inggalgalang nen Job so Ngaran nen Jehova
17 Antoy akatulong ed si Job a pansiansiaen so integridad to? Malinlinew, sakbay nin agawa iramay kalamidad, binayuboan to lay maapit a relasyon ed si Jehova. Agtayo napekderan no kasin amta nen Job imay angat nen Satanas ed si Jehova, ingen ta sikatoy determinado a mansiansian matoor. Inkuan to: “Angga ed ompatey ak agko ekalen so inkaskey ko a manlapu ed siak!” (Job 27:5) Panon ton binayuboan itan a maapit a relasyon ed Dios? Seguradon pinabpabli to iramay nadngelan ton impideneng na Dios ed si Abraham, Isaac, tan Jacob, ya arawin kakanayon to. Tan diad impangobserba nen Job ed palsa, atebek to ray kualidad nen Jehova.—Basaen so Job 12:7-9, 13, 16.
Agmo Bukbukor Ta Kaibam si Jehova
10 Mikaaro ed saray agagi. Mikaaro ka ed saray agagi ya pakaaralan moy alimbawa ra, anggan diad saramay agmo kaedad odino dumay kipapasen da ed bilay. Ibabaga na Biblia ya “say karunongan et walad saray maedad la.” (Job 12:12) Anggan saray maedad la et makaaral met ed saray matoor ya kabataan. Si David tan Jonatan et baleg so agwat na edad da, balet nagmaliw iran malet ya sankaaro. (1 Sam. 18:1) Pinaseseg day sakey tan sakey pian makapanmatoor ira ed si Jehova anggano wala ray dinalan dan subok. (1 Sam. 23:16-18) “Saray agagi tayo ed kongregasyon so pinagka-ama, ina, kuya, atsi, odino ading tayo,” so imbaga nen Sister Irina, ya bukbukor toy Tasi ed pamilya da. “Sikara so uusaren nen Jehova ya mangaro tan onsuporta ed sikatayo.”
11 Aliwan mainomay so mikaaro, lalo la no mabaing ka. Oniay imbaga nen Rowena, sakey ya mabaing ya sister ya nagmaliw ya Tasi anggano wala ray onkokontra ed sikato: “Nampatulong ak ed saray agagi ta amtak ya diad tulong tan suporta ra et nasarag ko ray subok.” Pero no maminsan, ompan mairap ya ibagad arum so naliliknam. Balet kaukolan mon gawaen itan ta atan so mamaelet na pankakaaro. Labalabay kan pasesegen tan tulongan na saray kakaarom ed kongregasyon. Pero siempre, kaukolan mon ibaga ed sikara so situasyon mo pian amta ra no panon da kan natulongan.
12 Sakey ed saray sankaabigan ya paraan pian makapikaaro ka ed saray agagi et no miulop kad sikara diad ministeryo. Oniay imbaga nen Carol ya abitla nen niman: “Dinmakel so tuan kakaarok nen lanang kon kaiba iray sister diad ministeryo tan ed saray kimey diad kongregasyon. Amtak ya uusaren ira nen Jehova pian natulongan ak.” On, baleg a bendisyon iray tuan kakaaro ed kongregasyon. Uusaren ira nen Jehova pian nalabanan moy ermen mo tan agmo naliknan bukbukor mo.—Pro. 17:17.
mwbr23.09—it-2 1190 ¶2
Karunongan
Karunongan na Dios. Si Jehova labat so walaan na kompleton karunongan, ta “sikato labat so marunong.” (Rom 16:27; Apo 7:12) Say kakabatan et mikonektaan ed impormasyon, tan lapud si Jehova so Amalsa ya nanlapud “andi-anggaan ya anggad andi-anggaan” (Sal 90:1, 2), amta toy amin nipaakar ed interon uniberso, say inkagawa tan say karga na satan, manlapud gapo ya anggad natan. Sikatoy nanggawa na amin ya physical law, saray cycle, tan saray estandarte ya pangibabasian na saray totoo ed saray research tan imbension da. No anggapo iratan, anggapoy nagawaan da tan anggapoy napanmatalkan ya basiyan da. (Job 38:34-38; Sal 104:24; Pro 3:19; Jer 10:12, 13) Importante met sirin iray estandarte tod moral pian magmaliw itayon maligen, duga iray desisyon tayo, tan magmaliw itayon maliket ed bilay tayo. (De 32:4-6) Anggapoy bengatlan agto natalosan. (Isa 40:13, 14) Nayarin abuloyan ton nagawa iray bengatlan kontra ed saray matunong ya estandarte to, tan ompan temporaryon onaligwas ni ingen iratan, pero siansia nin kontrolado to ray nagawad arapen, tan seguroen ton nagawa iratan unong ed linawa to, tan amin ya imbaga to et “seguradon ontalona.”—Isa 55:8-11; 46:9-11.
Saray Espiritual a Kayamanan
mwbr23.09—w08 8/1 11 ¶5
Pitongtong ed Saray Tinedyer
▪ ‘Natatalosan ko kasi no anton talagay labay ton ibaga?’ Ibabaga na Job 12:11: “Agta susuboken na layag iray salita a singa panataway na dila ed kakanen?” Natan ta tinedyer lay anak mo, mas kaukolan mon ‘suboken’ iray ibabaga to. Kaslakan et basta labat mangibabaga iray tinedyer na walad isip da. Singa bilang, ompan ibaga na anak mo ya “Lanang yo ak ya gagawaen ya singa ugaw!” odino “Agyo ak balot dedengelen!” Imbes ya manpokus ka ed imbaga ton “lanang” tan “agbalot,” isip mo ya ompan aliwan satan so labay ton ibaga. Singa bilang, no imbaga ton “Lanang yo ak ya gagawaen ya singa ugaw” ompan say labay ton ibaga et “Singa agyo ak pantitiwalaan,” tan no imbaga ton “Agyo ak balot dedengelen” nayarin say labay ton ibaga et “Labay kon ibagad sikayo no anton talagay naliliknak.” Mas maong no talosan mo no anton talagay labay ton ibaga.